‘Nyemebui Kura be Nuwo Ava Yi Nam Nyuie Alea O’

SEKƐNDRISUKU nufiala aɖe si le Spain ŋlɔ be: “Ƒe alafa ɖeka kple edzivɔe nye esia si Yehowa Ðasefowo wɔa nu aduadu, woɖia anukware le nusianu me, eye ƒo wo katã ta la, xɔse sesẽ le wo si.” Nukae ʋã nufiala sia—amesi ŋutɔ be mawudzimaxɔselae yenye—wògblɔ nya mawo?

Nyaa katã dze egɔme esime wobia tso Noemí, si nye Yehowa Ðasefo aɖe le sekɛndrisuku (lycée), si be wòaŋlɔ nu tso nyati aɖe ŋu le sukunuwuwu dodokpɔ aɖe me. Eɖoe be yeaŋlɔ nu tso nyati si nye “Amesiwo ƒe Awu ŋu Wotɔ Avɔ Dzĩ si Le Dzogoe Etɔ̃ me Ðo le Nazitɔwo ƒe Dziɖuɣi.”

Nukatae wòtia tanya ma? Noemí ɖe eme be: “Esi wònye nufiala aɖe ato nye dɔa me ta la, mesusui be mate ŋu azã mɔnukpɔkpɔ sia atsɔ aɖi ɖase nɛ. Alesi Yehowa Ðasefowo yi edzi wɔ nuteƒe le Germany le Nazitɔwo ƒe dziɖuɣi la wɔ dɔ ɖe dzinye ŋutɔ. Eyata mexɔe se be awɔ dɔ ɖe ame bubuwo hã dzi.”

Nusi Noemí ŋlɔ la wɔ dɔ ɖe ame geɖe dzi wu alesi eya ŋutɔ susui. Dukɔa katã ƒe hoʋiʋli aɖe si ku ɖe dzɔdzɔmeŋutinya kple amegbetɔwo ƒe ŋutinya ŋu mee wotia nusi Noemí ŋlɔ la le, eye le October 5, 2002 dzi la, exɔ nunana ɖe nusi wòŋlɔa ta. Agbalẽnyalagã 20 siwo tso Spain-dukɔa ƒe yunivɛsiti xɔŋkɔ aɖewo mee tia dɔ siwo nyo wu la.

Aƒenɔ Pilar del Castillo, si nye Spain ƒe dudɔnunɔla si kpɔa agbalẽsrɔ̃nyawo gbɔ ye tsɔ Noemí ƒe nunanaa de esi. Noemí zã mɔnukpɔkpɔa tsɔ videokasɛt si nye Jehovah’s Witnesses Stand Firm Against Nazi Assault (Yehowa Ðasefowo nɔ te sesĩe le Nazitɔwo ƒe Amedzidzedze Me) ƒe ɖeka na dudɔnunɔlaa. Dudɔnunɔlaa xɔ nunana la kple dzidzɔ.

Le Manresa, si nye Noemí de la, nyadzɔdzɔgbalẽ aɖe ƒo nu tso Noemí ƒe dzidzedzekpɔkpɔ le suku ŋu, eye wòdzro eƒe nuŋɔŋlɔa me. Le ɣeyiɣi ma ke me la, eƒe sukua ƒe tatɔ xɔ nusi wòŋlɔ ƒe kɔpi be yeatsɔ akpe ɖe ɖoɖo si wowɔ be woaɖu sukua ƒe ƒe 75 xɔxɔ ƒe azã ŋu.

Noemí gblɔ be: “Nyemebui kura be nuwo ava yi nam nyuie alea le nye sekɛndrisuku nuwuɣia o. Dzi dzɔm wu gbɔgblɔ esi mexlẽ nusi nye nufiala Aƒetɔ Jorge Tomás Calot ŋlɔ tsɔ dze nyatakaka si wòna tso ŋunye gɔme ƒe akpa aɖe be:

“‘Mawudzimaxɔselae menye, gake madi be woakpe ɖe ŋunye maxɔ Nuwokatãtaƒola sia, si dea dzi ƒo na esubɔlawo be woaɖe “havilɔlɔ̃” vavãtɔ kekeake afia la ƒe anyinɔnɔ dzi ase ŋutɔŋutɔ.’”