Daniel Kple Eƒe Akɔtagbalẽvi

YESU ka mo na subɔsubɔhakplɔla siwo bua wo ɖokui ame dzɔdzɔewoe, amesiwo do dziku esime wokpɔ ɖeviwo wonɔ Mawu kafum le dutoƒo. Yesu bia wo wòsɔ nyuie be: “Alo miexlẽe kpɔ bena: ‘Ðeviwo kple vi nonowo ƒe nu me nèdzra kafukafu ɖo’ o mahã?”—Mateo 21:15, 16.

Daniel, si xɔ ƒe ade, si dea ha kple Russiagbedolawo ƒe hame aɖe si le Germany ƒe nuwɔna aɖe ɖo kpe edzi be ɖeviwo gakpɔtɔ le Yehowa kafum kokoko. Woa kple dadaa kpakple nɔvianyɔnu wode Yehowa Ðasefowo ƒe takpekpe aɖe le Duisburg. Esiae nye zi gbãtɔ si wode takpekpe gã sia tɔgbe. Nu ɖesiaɖe nye nu yeye na wo, eye nusiawo dometɔ aɖewoe nye: amedzrodzeƒea, vavala gbogboawo, anyinɔnɔ kpoo ŋkeke etɔ̃, nyɔnyrɔxɔxɔ wɔnaa, kple drama wɔdɔɖeamedzi la. Ke aleke Daniel wɔ nui? Elé eɖokui nyuie.

Esi wogbɔ va aƒeme azɔ, le Dzoɖagbe si kplɔ takpekpea nuwuwu ɖo la, Daniel fɔ ŋdi kanya be yeadzra ɖo ayi abɔdzokposuku. Ènya nusi gakpɔtɔ nɔ eƒe awudziwui ŋua? Eyae nye akɔtagbalẽvi si de dzesi eyama abe takpekpea delawo dometɔ ɖeka ene! Dadaa gblɔ nɛ be: “Takpekpea wu enu vɔ. Àte ŋu aɖe akɔtagbalẽvia da ɖi egbea.” Gake Daniel ɖo eŋu be: “Medi be amesiame nanya afisi meyi kple nusi meyi ɖasrɔ̃.” Eyata le ŋkeke bliboa katã me la, akɔtagbalẽvia nɔ Daniel ƒe akɔta wònye dzidzɔ nɛ. Esi eƒe nufiala bia nyae tso eŋu la, eƒo nu tso takpekpea ƒe wɔnawo ŋu nɛ.

To esia wɔwɔ me la, Daniel kpɔ gome le ŋutsuvi kple nyɔnuvi akpe geɖe siwo kafu Yehowa le dutoƒo le ƒe alafa siwo va yi me la ƒe kpɔɖeŋu nyuia me.