Ðe Woate Ŋu Axlɔ̃ Nu Ʋɔnudrɔ̃laa?

WOÐO ŋkeke na Sladjana, si nye Yehowa Ðasefo siwo le Croatia la dometɔ ɖeka, be wòava ʋɔnu ɖe domenyinu aɖe ŋu nya ŋuti. Eɖo ʋɔnudrɔ̃ƒea ɖe game dzi heɖe eɖokui fia ʋɔnudrɔ̃la aɖe. Gake ame bubu aɖe si wòle be wòava ʋɔnua mekpɔ va ɖo haɖe o. Sladjana di vevie be yeaɖi ɖase na ameawo, eyata esime ameawo katã nɔ lalam la, elé dzi ɖe ƒo heƒo nu na ʋɔnudrɔ̃la, si wòɖe eɖokui fia la.

Sladjana biae be: “Aƒetɔ, ɖe nènya be eteƒe madidi o ʋɔnudrɔ̃lawo kple ʋɔnudrɔ̃ƒe aɖeke maganɔ anyigba dzi oa?” Ʋɔnudrɔ̃la siwo li egbea ŋu nya gblɔmee wònɔ.

Ewɔ nuku na ʋɔnudrɔ̃la la, efɔ ŋku ɖe Sladjana dzi tẽ, eye gbɔgblɔ bu ɖee. Ɣemaɣi tututue wodze nyaa dɔdrɔ̃ gɔme. Esi wowu nyadɔdrɔ̃a nu, eye Sladjana tsi tre be yeade asi agbalẽ aɖe te la, ʋɔnudrɔ̃laa te ɖe eŋu hedo ta ɖe egbɔ do dalĩ biae be: “Èka ɖe nya si nègblɔ nam fifia be, eteƒe madidi o ʋɔnudrɔ̃lawo kple ʋɔnudrɔ̃ƒe aɖeke maganɔ anyigba dzi o, la dzia?”

Sladjana ɖo eŋu be: “Ẽ, Aƒetɔ, meka ɖe edzi bliboe!”

Ʋɔnudrɔ̃laa biae be: “Kpeɖodzi kae le asiwò le nya sia ŋu?”

Sladjana ɖo eŋu nɛ be: “Kpeɖodzia le Biblia me.”

Ʋɔnudrɔ̃laa gblɔ be, yedi be ye ŋutɔ yeaxlẽ kpeɖodzinya mawo, gake Biblia mele ye si o. Eyata Sladjana gblɔ nɛ be yeadi ɖe nɛ. Ðasefowo yi ɖasrã ʋɔnudrɔ̃laa kpɔ, wotsɔ Biblia nɛ, eye wode dzi ƒo nɛ be wòaɖe mɔ woasrɔ̃ Biblia kplii. Ʋɔnudrɔ̃laa lɔ̃ ɖe edzi, eye eteƒe medidi o, eva zu Yehowa Ðasefo.

Nyagblɔɖinya si dze le Psalmo 2:10 gblɔ be: “Mi fiawo, midze nunya, eye mina woaxlɔ̃ nu mi, mi anyigba dzi ʋɔnudrɔ̃lawo!” Aleke gbegbe wòdoa dzidzɔ na amee, ne amesiawo tɔgbe lɔ̃ xɔ Yehowa ƒe mɔfiame si me lɔlɔ̃ le la ɖokuibɔbɔtɔe nye esi!

[Nɔnɔmetata si le axa 32]

Sladjana kple ʋɔnudrɔ̃laa