“Yehowa Ƒe Ŋkeke Gã La Tu Aƒe”
“Yehowa Ƒe Ŋkeke Gã La Tu Aƒe”
“Yehowa ƒe ŋkeke gã la tu aƒe, etu aƒe, eye wòle du dzi ŋutɔ.”—ZEFANYA 1:14.
1, 2. (a) Ŋkeke tɔxɛ ka lalam Kristotɔwo le? (b) Nya kawoe wòahiã be míabia, eye nukatae?
ÐETUGBI si le srɔ̃ɖeŋugbedodo me tsɔa didi vevie nɔa eƒe srɔ̃kpegbe lalam. Funɔ tsɔa dzidzɔ nɔa mɔ kpɔm na eƒe vidzigbe. Dɔwɔla si ŋu ɖeɖi te belibeli la kpɔa mɔ na gbesigbe wòayi mɔkeke la vevie. Nukae amesiawo katã le mɔ kpɔm na? Wo katã wole ŋkeke tɔxɛ aɖe lalam—si nye ŋkeke si ahe tɔtrɔ aɖe ava woƒe agbe mee. Togbɔ be ŋkeke ɖeka aɖe koŋue wole mɔ kpɔm na hã la, nu vovovowo tae wole mɔa kpɔm nɛ ɖo. Ŋkeke si lalam wole la ava mlɔeba, eye ne eva la, maɖi ɖe wo o.
2 Nenema kee Kristotɔ vavãwo hã le ŋkeke tɔxɛ aɖe lalam vevie egbea. Eyae nye “Yehowa ƒe ŋkeke” gã la. (Yesaya 13:9; Yoel 2:1; Petro II, 3:12) Nukae nye “Yehowa ƒe ŋkeke” sia si tu aƒe la, eye nukae eƒe vava atrɔ le ameƒomea ŋu? Gawu la, aleke míawɔ be eƒe vava maɖi ɖe mí o? Ele vevie be míakpɔ nyabiase siawo ƒe ŋuɖoɖo fifia, elabena nusiwo le dzɔdzɔm la ɖo kpe edzi be Biblia me nya siwo gbɔna la nye nyateƒe be: “Yehowa ƒe ŋkeke gã la tu aƒe, etu aƒe, eye wòle du dzi ŋutɔ.”—Zefanya 1:14.
“Yehowa ƒe Ŋkeke Gã La”
3. Nukae nye “Yehowa ƒe ŋkeke gã la”?
3 Nukae nye “Yehowa ƒe ŋkeke gã la”? Le Ŋɔŋlɔawo me la, ɣeyiɣi siwo dzi Yehowa tu nu kple eƒe futɔwo tsɔ kɔ eƒe ŋkɔa ŋuti lae woyɔ be “Yehowa ƒe ŋkeke la.” “Yehowa ƒe ŋkeke” la de na Yudatɔ kple Yerusalemtɔ mawɔnuteƒewo kpakple ameteɖeanyila siwo nɔ Babilon kple Egipte la katã le ɣeyiɣi vovovowo me, esime Yehowa he to na wo. (Yesaya 2:1, 10-12; 13:1-6; Yeremya 46:7-10) Ke hã, “Yehowa ƒe ŋkeke” gãtɔ kekeake ya gakpɔtɔ le ŋgɔ gbɔna. Enye “ŋkeke” si dzi Yehowa atu nu kple amesiwo do vlo eƒe ŋkɔ la. Ŋkeke sia adze egɔme kple “Babilon Gã la,” si nye xexeame katã ƒe alakpasubɔsubɔwo la, tsɔtrɔ̃, eye wòawu enu kple ame vɔ̃ɖi siwo katã asusɔ la tsɔtrɔ̃ le Harmagedon-ʋa la me.—Nyaɖeɖefia 16:14, 16; 17:5, 15-17; 19:11-21.
4. Nukatae wòle be Yehowa ƒe ŋkeke si le aƒe tum kabakaba la nana ŋɔdzi nalé ameƒomea me tɔ akpa gãtɔ ɖo?
4 Ameƒomea ɖanya be ŋkeke sia le aƒe tum kabakaba loo alo womeɖanya o, ele be ŋɔdzi nalé ame akpa gãtɔ ɖe eta. Ðe susu ka ta? Yehowa to nyagblɔɖila Zefanya dzi ɖo eŋu be: “Dɔmedzoedogbe, hiãgbe kple xaxagbee, aƒedoɖigbe kple nugblẽgbee, blukɔ kple vivitidogbee, alilikpo kple tsizidogbee.” Ŋkeke sia dziŋɔ vavã! Gawu la, nyagblɔɖia gblɔ be: “Mahe xaxa ava amegbetɔwo dzi, . . . elabena wowɔ nuvɔ̃ ɖe Yehowa ŋu.”—Zefanya 1:15, 17.
5. Nukpɔsusu nyui kae le ame miliɔn geɖewo si ku ɖe Yehowa ƒe ŋkekea ŋu, eye nukatae?
5 Gake ame miliɔn gbogbo aɖewo ya tsɔ dzidzɔ le mɔ kpɔm na ŋkeke ma vevie. Nukatae? Elabena wonya be enye ɣeyiɣi si me woaxɔ ame dzɔdzɔewo ahaɖe wo, eye be enye ŋkeke si dzi Yehowa ŋutɔ ado gã eɖokui ahakɔ eƒe ŋkɔ gã la ŋu. (Yoel 3:16, 17; Zefanya 3:12-17) Ne ŋkeke ma adzi ŋɔ na amewo loo alo woatsɔ dzidzɔ anɔ mɔ kpɔm nɛ la nɔ te ɖe alesi wole agbe nɔm fifia dzi. Ekema alekee wò ya nèle ŋkeke ma, si le aƒe tum la bumee? Èle klalo nɛa? Ðe nyateƒe si wònye be Yehowa ƒe ŋkekea gbɔ megadidi o la kpɔa ŋusẽ ɖe alesi nènɔa agbee fifia dzia?
“Fewuɖulawo Lava Kple Fewuɖuɖu”
6. Aleke ame akpa gãtɔ wɔa nu ɖe “Yehowa ƒe ŋkeke” la ŋui, eye nukata esia mewɔa nuku na Kristotɔ vavãwo o?
6 Togbɔ be nuwɔwɔ kpata hiã vevie fifia hã la, “Yehowa ƒe ŋkeke” si le aƒe tum la mele fu tsɔm le lãme na ame akpa gãtɔ o. Woɖua fewu le amesiwo xlɔ̃a nu wo be ŋkekea tu aƒe la ŋu hekoa wo. Nuwɔna sia mewɔa nuku na Kristotɔ vavãwo o. Ke boŋ woɖoa ŋku nuxlɔ̃amenya si apostolo Petro gblɔ dzi be: “Minya esia gbã bena, le ŋkeke mamlɛawo dzi la fewuɖulawo lava kple fewuɖuɖu, amesiwo zɔna le woawo ŋutɔwo ƒe nudzodzrowo nu, eye woagblɔ bena: Afika eƒe vava la ƒe ŋugbedodo la le? Elabena tso esime fofoawo dɔ alɔ̃ la, nuwo katã nɔ anyi nenema tso nuwɔwɔ ƒe gɔmedzedze la me.”—Petro II, 3:3, 4.
7. Nukae akpe ɖe mía ŋu míayi edzi anɔ mɔ kpɔm na ŋkeke sia?
7 Nukae akpe ɖe mía ŋu be nukpɔsusu gbegblẽ ma nagasu mía si o, ale be míayi edzi anɔ mɔ kpɔm na ŋkeke sia? Petro gblɔ na mí be: “Metsɔ ŋkuɖoɖonudzi nyɔ miaƒe tamesusu, si me kɔ la le wo me, bene miaɖo ŋku nya, siwo nyagblɔɖila kɔkɔeawo gblɔ ɖi tsã la, kple Aƒetɔ kple xɔla ƒe se, si wòde to miaƒe apostolowo dzi la dzi.” (Petro II, 3:1, 2) Wɔwɔ ɖe nyagblɔɖilawo ƒe nuxlɔ̃amewo dzi akpe ɖe mía ŋu ‘míanyɔ míaƒe tamesusu, siwo me kɔ la.’ Ðewohĩ míese ŋkuɖodzinya siawo zi gbɔ zi geɖe, gake ele vevie ŋutɔ be míayi edzi aɖo to nuxlɔ̃amenya siawo fifia wu ɣeyiɣi ɖesiaɖe.—Yesaya 34:1-4; Luka 21:34-36.
8. Nukatae ame geɖewo ŋea aɖaba ƒua Biblia ƒe ŋkuɖodzinyawo dzi ɖo?
8 Nukatae ame aɖewo ŋea aɖaba ƒua ŋkuɖodzinya siawo dzi ɖo? Petro yi edzi be: ‘Ðe woɣlae ɖe wo, esi wole edim nenema, bena dziƒowo li tso blema ke, eye anyigba hã li hedo tso tsi me, eye wòto tsi me le Mawu ƒe nya nu; nusiawo na tsiɖɔɖɔ yɔ xexe kema me, eye wòtsrɔ̃.’ (Petro II, 3:5, 6) Nyateƒee, ame aɖewo li siwo medi be Yehowa ƒe ŋkekea nava o. Womedi be naneke nava ɖe fu na yewoƒe agbe o. Womedi be Yehowa nabia akɔnta yewo tso ɖokuitɔdidi ƒe agbe si nɔm yewole la ŋu o. Abe alesi Petro gblɔe ene la, wole agbe nɔm “le woawo ŋutɔwo ƒe nudzodzrowo nu.”
9. Nɔnɔme kae amewo ɖe fia le Noa kple Lot ƒe ŋkekeawo me?
9 Esi fewuɖula siawo ŋutɔ ‘dii’ ta la, wotiae be yewoaŋe aɖaba aƒu alesi Yehowa de nu ameƒomea ƒe nyawo me le blema la dzi. Yesu Kristo kple apostolo Petro siaa yɔ “Noa ƒe ŋkekeawo” kple “Lot ƒe ŋkekeawo” me nudzɔdzɔwo tsɔ wɔ kpɔɖeŋui. (Luka 17:26-30; Petro II, 2:5-9) Do ŋgɔ na Tsiɖɔɖɔa la, amewo metsɔ ɖeke le nuxlɔ̃ame si Noa na wo la me o. Nenema kee Lot ƒe toyɔviwo hã bu Sodom kple Gomora ƒe tsɔtsrɔ̃nya si woyi ɖagblɔ na wo do ŋgɔ na tsɔtsrɔ̃a la, “nukonyae.”—Mose I, 19:14.
10. Nukae Yehowa be yeatu kple amesiwo metsɔa ɖeke le yeƒe ŋkekea ƒe vava me o la?
10 Aleae wòle egbea hã. Ke hã, se nusi Yehowa be yeatu kple amesiawo ɖa: “Mahe to na amesiwo katã ɖo ƒã ɖi hele gbɔgblɔm le woƒe dzi me be: Yehowa mele nyui alo vɔ̃ wɔ ge o. Woaha woƒe kesinɔnuwo, eye woƒe aƒewo azu aƒedo; woatu xɔ, ke womanɔ eme o, eye woade weingble, ke womano eƒe wein o.” (Zefanya 1:12, 13) Amewo ayi edzi anɔ gbesiagbedɔwo wɔm abe ɖee naneke mele dzɔdzɔ ge o ene, gake womakpɔ viɖe gbagbe aɖeke tso woƒe kutrikuku siawo me o. Nukatae? Elabena Yehowa ƒe ŋkekea aɖi ɖe wo, eye kesinɔnu siwo woli kɔe ɖi la maxɔ na wo o.—Zefanya 1:18.
“Kpɔ Esinu”
11. Nuxlɔ̃amenya kae wòle be wòanɔ susu me na mí?
11 To vovo na xexe vɔ̃ɖi si me míele la, ele be nuxlɔ̃amenya si nyagblɔɖila Xabakuk ŋlɔ ɖi la nanɔ susu me na míawo ya ɣesiaɣi be: “Azãgbe li na ŋutega la, eƒe nuwuwu le aƒe tum, eye maflu ame o; ke ne etsi megbe la, kpɔ esinu; elabena ele vava ge kokoko, eye mahe ɖe megbe o.” (Xabakuk 2:3) Ne edze na amegbetɔ madeblibowo ya be ŋkeke ma tsi megbe gɔ̃ hã la, ele be míaɖo ŋku edzi be menye ɖee Yehowa le megbelele hem o. Eƒe ŋkekea ava ɖe game dzi pɛpɛpɛ, le esime amewo manɔ mɔ kpɔm nɛ o.—Marko 13:33; Petro II, 3:9, 10.
12. Nukae Yesu na míenya, eye aleke esia to vovo na alesi Yesu yomedzela wɔnuteƒewo ya wɔ nui?
12 Esime Yesu nɔ gbe tem ɖe alesi wòle vevie be míakpɔ mɔ na Yehowa ƒe ŋkekea dzi la, ena míenya be ye yomedzela aɖewo gɔ̃ hã aɖe ŋu ɖi. Egblɔ tso wo ŋu be: “Ne dɔla vɔ̃ɖi la agblɔ le eƒe dzi me bena: Nye aƒetɔ la tsi anyi, eye wòade asi eƒe hadɔtsɔlawo ƒoƒo me, eye wòaɖu nu, ano nu kple ahamulawo, dɔla ma ƒe aƒetɔ ava le ŋkeke, si dzi mele mɔ kpɔm nɛ o kple gaƒoƒo, si menya o la dzi, eye wòafe eyama ɖe eve, eye wòana eƒe gomee akpe ɖe alakpatɔwo ŋu.” (Mateo 24:48-51) To vovo na dɔla vɔ̃ɖi sia la, dɔla nuteƒewɔla kple aɖaŋudzela ya yi edzi le mɔ kpɔm na ŋkekea. Dɔla ƒe ha la le ŋudzɔ eye wòle klalo nɛ. Eyata Yesu tsɔe ɖo “eƒe nuwo katã dzi” le anyigba dzi.—Mateo 24:42-47.
Ŋutenɔnɔ Hiã
13. Aleke Yesu te gbe ɖe ŋutenɔnɔ ƒe vevienyenye dzii?
13 Enɔ vevie ŋutɔ be ƒe alafa gbãtɔ me Kristotɔwo nanɔ ŋute. Ne wonya kpɔ be “aʋakɔwo ɖe to ɖe Yerusalem ŋu” ko la, ele be woasi adzo le dua me enumake. (Luka 21:20, 21) Aʋakɔawo va ɖe to ɖe dua ŋu le ƒe 66 M.Ŋ. me. Se alesi Yesu gblɔ alesi wòle be Kristotɔ siwo nɔ anyi ɣemaɣi nawɔ nu kpatae la ɖa: “Amesi ke le xɔ ta la, megaɖi va tsɔ naneke tso eƒe me yii o; eye amesi ke le abɔ me la, megagbugbɔ va tsɔ eƒe avɔ yii o.” (Mateo 24:17, 18) Esi wònye be ŋutinya ɖee fia be ƒe ene sɔŋ gava yi hafi wotsrɔ̃ Yerusalem ɖe, nukatae wòhiã be Kristotɔwo nawɔ ɖe Yesu ƒe nyaa dzi enumake le ƒe 66 M.Ŋ. ɖo?
14, 15. Nukata wònɔ vevie be ne ƒe alafa gbãtɔ me Kristotɔwo kpɔ be aʋakɔwo va ɖe to ɖe Yerusalem ŋu ko la, woasi afɔtsɔtsɔe?
14 Togbɔ be ƒe 70 M.Ŋ. me hafi Roma-srafowo va tsrɔ̃ Yerusalem hã la, dziɖeɖi menɔ dua me le ƒe ene mawo me o. Duametɔwo xaxa ale gbegbe! Ʋunyaʋunyawɔwɔ kpakple ʋukɔkɔɖi nɔ anyi ŋutɔ. Ŋutinyaŋlɔla aɖe ɖɔ alesi nuwo nɔ le Yerusalem ɣemaɣi be “dua me viwo kpe aʋa dziŋɔ aɖe, si me ame gbogbowo ku le eye wonɔ ŋutasesẽnu dziŋɔwo hã wɔm.” Wolé ɖekakpuiwo akpasesẽe be woakpe ɖe aʋawɔlawo ŋu, wode aʋawɔnuwo asi na wo, bene woazu asrafowo. Wona asrafowo ƒe hehe wo gbesiagbe. Wobua amesiwo mekpɔa ŋudzedze ɖe nugbɔmewɔwɔ sia ŋu o la be wonye dugbãlawo. Ne ɖee Kristotɔwo mesi dzo le dua me afɔtsɔtsɔe o la, anye ne woɖo nɔnɔme sesẽ ŋutɔ aɖe me.—Mateo 26:52; Marko 12:17.
15 Ele be míade dzesii be Yesu gblɔ be “amesiwo le Yudea” hã nasi, ke menye amesiwo le Yerusalem la ɖeɖe ko o. Esia nɔ vevie ŋutɔ elabena ɣleti ʋɛ aɖewo koe Roma-srafowo ka le Yerusalem ŋu ko gatrɔ va dze edzi ake. Gbã la, woɖu Galilea dzi le ƒe 67 M.Ŋ. me, eye le ƒe si kplɔe ɖo me la, woɖu Yudea hã dzi. Esia he nuxaxa gã aɖe va du bliboa dzi. Eye Yudatɔ aɖeke hã magate ŋu asi adzo le Yerusalem o. Dzɔlawo nɔ dua ƒe agbowo nu, eye wobua amesiame si di be yeasi la be ɖe wòdi be yeaɖakpe ɖe Romatɔwo ŋu.
16. Aleke wòle be ƒe alafa gbãtɔ me Kristotɔwo nawɔ nui bene woate ŋu atsi agbe le xaxaɣi ma me?
16 Nudzɔdzɔ siawo katã na míese nusitae Yesu te gbe ɖe nuwɔwɔ kpata ƒe vevienyenye dzi ɖo la gɔme. Ehiã be Kristotɔwo nalɔ̃ aɖe asi le nanewo ŋu eye woagana ŋutilãmenunɔamesiwo nahe wo ɖe megbe o. Ele be woalɔ̃ agblẽ ‘nusiwo katã le wo si la’ ɖi bene woate ŋu awɔ ɖe Yesu ƒe nuxlɔ̃amea dzi. (Luka 14:33) Amesiwo wɔ ɖe edzi enumake hesi yi ɖe Yordan godo lae tsi agbe.
Alesi Míawɔ Ayi Edzi Anɔ Ŋutee
17. Nukatae wòle be míaganɔ ŋute wu ɖo?
17 Biblia me nyagblɔɖiwo ɖee fia be míele ŋkeke mamlɛawo ƒe yɔyrɔea nu. Ehiã be míanɔ ŋute fifia wu ɣeyiɣi ɖesiaɖe. Ne tomefafa li la, asrafo metsina dzi ɖe aʋa loo alo afɔku ƒe dzɔdzɔ ŋu o. Gake ne esia wɔe be mebui be ehiã be yeabla aʋakpa ɖi o ko woyɔe kpata be wòava yi aʋa la, mate ŋu abla akpa nyuie o, eye aʋa ate ŋu asii gɔ̃ hã. Nenema kee wòle le mí Kristotɔwo hã gome. Ne míeɖe ŋu ɖi la, míate ŋu asu te akpe akɔ kple nusiwo adze mí kpo la o, eye Yehowa ƒe ŋkekea ate ŋu ava ɖi ɖe mí faa. (Luka 21:36; Tesalonikatɔwo I, 5:4) Ne ame aɖewo ‘trɔ le Yehowa yome’ la, fifiae wòle be woagadi eyama ake.—Zefanya 1:3-6; Tesalonikatɔwo II, 1:8, 9.
18, 19. Nukawo wɔwɔe akpe ɖe mía ŋu be “Yehowa ƒe ŋkeke la ƒe vava” nanɔ susu me na mí vevie?
18 Esia tae mewɔ nuku o ɖo be apostolo Petro xlɔ̃ nu mí be “[Yehowa] ƒe ŋkeke la ƒe vava” nenɔ susu me na mí vevie! Aleke míate ŋu awɔ esiae? Mɔ siwo nu míawɔe le la dometɔ ɖekae nye be míanɔ ‘agbe dzadzɛ kple mawusosroɖagbe nɔm.’ (Petro II, 3:11, 12) Fɔléle ɖe agbe siawo ƒomevi nɔnɔ ŋu akpe ɖe mía ŋu be míanɔ mɔ kpɔm na “Yehowa ƒe ŋkeke la” ƒe vava vevie. Helagbe me nya si gɔme woɖe le afisia be “woadi vevie” la fia “tsɔtsɔe dodo nua” le nyaa ŋutɔŋutɔ nu. Le nyateƒe me la, míate ŋu ado tsɔtsɔe ɣeyiɣi si kpɔtɔ hafi Yehowa ƒe ŋkekea nava la ŋutɔŋutɔ o. Ke hã, esi míele mɔ kpɔm na ŋkeke ma la, adze abe ɖee ɣeyiɣia le tsɔtsɔm na mí ene ne míelé fɔ ɖe Mawu subɔsubɔdɔwo ŋu le wɔwɔm vevie.—Korintotɔwo I, 15:58.
19 Ŋugbledede tso Mawu ƒe Nya la, kple ŋkuɖodzinya siwo le eme ŋu hã akpe ɖe mía ŋu be míanɔ ŋkeke ma ƒe vava dim vevie, ahanɔ mɔ kpɔm nɛ ɣesiaɣi. (Petro II, 3:12) Nyagblɔɖi gbogbo siwo ku ɖe Yehowa ƒe ŋkekea ƒe vava ŋu, tsɔ kpe ɖe yayra gbago siwo amesiwo ‘le Yehowa sinu kpɔm’ axɔ ŋu lae le ŋkuɖodzinya siawo me.—Zefanya 3:8.
20. Nuxlɔ̃amenya ka dzie wòle be míawɔ ɖo?
20 Fifia koŋue nye ɣeyiɣi si wòle na mí katã be míawɔ ɖe nuxlɔ̃amenya si Mawu to nyagblɔɖila Zefanya dzi gblɔ la dzi be: “Hafi ne Yehowa ƒe dɔmedzoe heliheli nava mia dzi, eye hafi ne Yehowa ƒe dzikudogbe nava mia dzi! Midi Yehowa, mi amesiwo katã bɔbɔ mia ɖokui ɖe anyi le anyigba dzi, midi dzɔdzɔenyenye, eye midi ɖokuibɔbɔ yome mɔ, ame aɖe menya nu o woatsɔ mi aɣla le Yehowa ƒe dzikudogbe la hĩ!”—Zefanya 2:2, 3.
21. Tame kae Mawu ƒe amewo aɖo kplikpaa le ƒe 2007 me?
21 Ekema ɖe mesɔ ŋutɔ be wotia ƒe 2007 ƒe mawunyakpukpuia be wòanye “Yehowa ƒe ŋkeke gã la tu aƒe” ao? Mawu subɔlawo xɔe se vevie be “etu aƒe, eye wòle du dzi ŋutɔ.” (Zefanya 1:14) “Mahe ɖe megbe o.” (Xabakuk 2:3) Eyata esi míele mɔ kpɔm na ŋkeke ma la, mina míanɔ ŋudzɔ fifia wu ɣeyiɣi ɖesiaɖe, le esi míenyae be nyagblɔɖi siawo katã me vava mamlɛtɔ tu aƒe kpuie ta!
Àte Ŋu Aɖo Wo Ŋua?
• Nukae nye “Yehowa ƒe ŋkeke gã la”?
• Nukatae ame geɖe metsi dzi ɖe ŋudzɔnɔnɔ ŋu o?
• Nukatae wòhiã be ƒe alafa gbãtɔ me Kristotɔwo nawɔ nu kpata ɖo?
• Alekee míate ŋu awɔ ayi edzi anɔ ŋudzɔ geɖe wu?
[Biabiawo]
[Nya si ɖe dzesi si le axa 19]
Ƒe 2007 ƒe mawunyakpukpuiae nye: “Yehowa ƒe ŋkeke gã la tu aƒe.”—Zefanya 1:14.
[Nɔnɔmetata siwo le axa 16, 17]
Yehowa ƒe ŋkekea aɖi ɖe fewuɖulawo abe alesi wònɔ le Noa ŋɔli ene
[Nɔnɔmetata si le axa 18]
Esime Kristotɔwo kpɔe be “aʋakɔwo ɖe to ɖe Yerusalem ŋu” la, wowɔ nu afɔtsɔtsɔe