Yehowa Naa “Gbɔgbɔ Kɔkɔe Amesiwo Bianɛ La”
Yehowa Naa “Gbɔgbɔ Kɔkɔe Amesiwo Bianɛ La”
“Mi, amesiwo nye ame vɔ̃ɖiwo, mienya alesi miana nunana nyui mia viwo, ʋuu keke Fofo, si le dziƒo la, mana Gbɔgbɔ kɔkɔe amesiwo bianɛ la o mahã?”—LUKA 11:13.
1. Ɣekaɣiwo koŋue míehiãna na gbɔgbɔ kɔkɔea ƒe kpekpeɖeŋu?
‘NYEMATE ŊU anɔ te ɖe esia nu le nye ŋusẽ me o. Gbɔgbɔ kɔkɔea koe akpe ɖe ŋunye hafi mate ŋu ado dzi le tetekpɔ sia me!’ Wò hã ègblɔ nya sia tɔgbe kpɔa? Kristotɔ akpa gãtɔ gblɔe kpɔ. Ðewohĩ esime nèdze dɔ sesẽ aɖee nègblɔ nya sia. Alo ɖewohĩ esime srɔ̃wò lɔlɔ̃a ku le gbɔwò ye nègblɔe. Alo anye ɣeyiɣi si me nuteɖeamedzi sesẽ aɖe vu tsyɔ dziwò, si wɔe be blanuiléle va xɔ ɖe wò dzidzɔkpɔkpɔ teƒe lae nya siawo ge le nuwò. Ne nɔnɔme sesẽwo va dziwò le agbe me la, anɔ eme be èsenɛ le ɖokuiwò me be Yehowa ƒe gbɔgbɔ kɔkɔe si nana ‘ŋusẽ si gbɔ dzɔdzɔmetɔ ŋu’ la koe nana nète ŋu nɔa te ɖe wo nu dzidzedzetɔe.—Korintotɔwo II, 4:7-9; Psalmo 40:2, 3.
2. (a) Nɔnɔme sesẽ kawoe wòle be Kristotɔ vavãwo nakpe akɔ kple? (b) Nyabiase kawo mee míadzro le nyati sia me?
2 Ele na Kristotɔ vavãwo be woakpe akɔ kple xexe mavɔ̃mawu sia ƒe ŋusẽkpɔɖeamedzi kple tsitretsiɖeŋu siwo nu le sesẽm ɖe edzi gbeawotsyogbe la. (Yohanes I, 5:19) Tsɔ kpe ɖe eŋu la, Satana Abosam ŋutɔ hã ho aʋa ɖe Kristo yomedzelawo, siwo “léa Mawu ƒe seawo me ɖe asi, eye Yesu ƒe ɖaseɖiɖi le wo si la,” ŋu. (Nyaɖeɖefia 12:12, 17) Eyata nyateƒe matrɔmatrɔe wònye be míehiã Mawu ƒe gbɔgbɔa ƒe kpekpeɖeŋu fifia wu ɣeyiɣi ɖesiaɖe. Nukae míate ŋu awɔ ale be Mawu nanɔ eƒe gbɔgbɔ kɔkɔea nam mí geɖe? Eye nukata míate ŋu aka ɖe edzi be Yehowa di vevie, hele klalo hã, be yeana ŋusẽ si míehiã la mí ne míele nɔnɔme sesẽwo me tom? Nya siawo ƒe ŋuɖoɖo dze le kpɔɖeŋu vovovo siwo Yesu wɔ na eƒe nusrɔ̃lawo la dometɔ eve me.
Do Gbe Ða Kutrikukutɔe
3, 4. Kpɔɖeŋu kae Yesu wɔ, eye aleke wòku ɖe gbedodoɖa ŋui?
3 Yesu ƒe nusrɔ̃lawo dometɔ ɖeka biae gbeɖeka be: “Aƒetɔ, fia gbedodoɖa mí.” (Luka 11:1) Le nya sia ŋuɖoɖo me la, Yesu wɔ kpɔɖeŋu eve aɖewo na eƒe nusrɔ̃lawo. Gbãtɔ ku ɖe ŋutsu aɖe si le amedzro xɔm la ŋu, eye evelia ku ɖe vifofo si ɖoa to viaŋutsu la ŋu. Mina míadzro kpɔɖeŋu siawo dometɔ ɖesiaɖe me.
4 Yesu gblɔ be: “Mia dometɔ ka si xɔlɔ̃ anɔ, eye wòayi egbɔ le zãtitina, eye wòagblɔ nɛ bena; Xɔ̃, do abolo etɔ̃ nam; elabena xɔ̃nye aɖe tso mɔ dzi va gbɔnye, ke naneke mele asinye maɖo ekɔme o; eye ɖe ame ma aɖo eŋu nɛ le xɔa me agblɔ bena: Megaɖe fu nam o; ʋɔ la le tutu xoxo, eye vinyewo le aba dzi kplim, nyemate ŋu afɔ ana wò o mahã? Mele egblɔm na mi bena: Ne mefɔ, eye wònae le xɔlɔ̃, si wònye nɛ ta o la, ekema le fu, si ɖem wòle nɛ ta la afɔ, eye wòanae alesi nu dim wòle.” Emegbe Yesu ɖe alesi kpɔɖeŋu sia ku ɖe gbedodoɖa ŋui la me na wo be: “Eye nye la mele egblɔm na mi bena: Mibia nu, eye woana mi; midi nu, eye miakpɔ; miƒo ʋɔa, eye woaʋui na mi. Elabena amesiame, si le nu biam la, exɔna; eye amesiame si le nu dim la ekpɔna; eye amesiame si le ʋɔa ƒom la, woʋunɛ nɛ.”—Luka 11:5-10.
5. Nufiame kae le ŋutsu kutrikula la ƒe kpɔɖeŋua me na mí ku ɖe nɔnɔme si wòle be wòanɔ mía si ɖe gbedodoɖa ŋu la ŋu?
5 Ŋutsu kutrikula ŋuti kpɔɖeŋu wɔdɔɖeamedzi sia ɖe nɔnɔme si wòle be wòanɔ mía si ɖe gbedodoɖa ŋu la fia. De dzesii be Yesu gblɔ be ŋutsua ƒe asi te ŋu su nusi dim wònɔ la dzi “le eƒe kutrikuku vevie ta.” (Luka 11:8, NW) Zi ɖeka pɛ koe Helagbe me nya si gɔme woɖe be “kutrikuku vevie” la dze le Biblia me, eye Helagbe me nya la gɔme ŋutɔŋutɔe nye “ŋumakpemakpe.” Zi geɖe la, wobua ŋumakpemakpe be enye nɔnɔme gbegblẽ. Gake ŋumakpemakpe alo kutrikuku ƒe nɔnɔme sia te ŋu nyea nɔnɔme nyui ne woɖee fia ɖe susu nyui aɖe ta. Nenemae wònɔ le ŋutsu amedzroxɔla si hiã tu, si ŋu Yesu wɔ kpɔɖeŋua tsoe, la gome. Nusi nɔ ehiãm la biabia kutrikukutɔe mekpe ŋu nɛ kura o. Esi wònye be ɖe Yesu tsɔ ŋutsu sia wɔ kpɔɖeŋu na mí ta la, ele be míawo hã míaku kutri le gbedodoɖa me. Yehowa di be ‘míanɔ ebiabia dzi, míanɔ edidi dzi, míanɔ ʋɔƒoƒo dzi.’ Ekema ‘ana gbɔgbɔ kɔkɔea amesiwo bianɛ la.’
6. Alekee wobua amedzowɔwɔe le Yesu ƒe anyigba dzi nɔɣi?
6 Menye alesi míado gbe ɖa kutrikukutɔe la koe Yesu fia mí o, ke boŋ eɖe nusitae wòle be míawɔe nenema ɖo la hã me. Be míase nufiamenya sia gɔme nyuie la, ele be míade ŋugble tso alesi amesiwo nɔ to ɖom Yesu, esime wònɔ ŋutsu amedzroxɔla si nɔ kpekpeɖeŋu biam kutrikukutɔe ƒe kpɔɖeŋua wɔm la, bua amedzrowɔwɔe ŋu. Ŋɔŋlɔawo me nuŋlɔɖi geɖewo ɖee fia be le Biblia-ŋlɔɣi la, amedzrowɔwɔ nye nu vevi aɖe ŋutɔ, vevietɔ na mawusubɔlawo. (Mose I, 18:2-5; Hebritɔwo 13:2) Ne ame aɖe mete ŋu wɔ amedzro na amesi va dze egbɔ o la, enyea ŋukpe gã aɖe nɛ. (Luka 7:36-38, 44-46) Azɔ esi nya ma le susu me na mí la, mina míagatrɔ ɖe Yesu ƒe kpɔɖeŋua ŋu ake.
7. Nukata mekpe ŋu na Yesu ƒe kpɔɖeŋua me ŋutsua be wòaɖaƒo ʋɔ na exɔlɔ̃a le zãtiƒe o?
7 Le Yesu ƒe kpɔɖeŋua me la, amedzroa va dze ŋutsua le zãtiƒe. Ŋutsu sia nya be ele be yeana nuɖuɖu amedzroa, gake ‘naneke mele esi wòaɖo ekɔme o.’ Eyata ekpɔe dze sii be kuxi kpata aɖe ŋutɔe ma tu ye! Ele nɛ be wòado togodoe akpɔ abolo aɖe nɛ. Eyata eyi ɖanyɔ exɔlɔ̃ aɖe tso alɔ̃ me le zã ma me hebiae tẽ be: “Xɔ̃, do abolo etɔ̃ nam.” Togbɔ be exɔlɔ̃a melɔ̃ enumake o hã la, enɔ ebiabia dzi kutrikukutɔe vaseɖe esime wònae. Fifia si aboloawo su esi la, woate ŋu abui de amedzrola nyuiwo dome.
Ne Enya Le Hiãwòm Ko la, Ele be Nànɔ Ebiabia Dzi
8. Nukae aʋã mí be míanɔ gbɔgbɔ kɔkɔea biam kutrikukutɔe?
8 Nukae kpɔɖeŋu sia fia mí ku ɖe nusita míedoa gbe ɖa kutrikukutɔe la ŋu? Esi wònye be ŋutsua nyae be ehiã vevie be aboloa nasu ye si hafi yeate ŋu axɔ amedzro si va dze ye nyuie ta la, eyi edzi nɔ ebiam kutrikukutɔe. (Yesaya 58:5-7) Ne mekpɔ aboloa gbeɖegbeɖe o la, ekema eƒe agbanɔamedzia gbɔ kpɔkpɔ atsi akpo dzi. Nenema kee esi mí Kristotɔ vavãwo míenyae be míehiã Mawu ƒe gbɔgbɔa vevie hafi ate ŋu awɔ míaƒe subɔsubɔdɔa ta la, míeyia edzi doa gbe ɖa na Mawu be wòana eƒe gbɔgbɔa mí. (Zaxarya 4:6) Gbɔgbɔ kɔkɔea manɔmee la, míate ŋu awɔ naneke o. (Mateo 26:41) Èkpɔ nusɔsrɔ̃ vevi si le kpɔɖeŋu sia me na mí la azɔa? Ele be enyanya be míehiã Mawu ƒe gbɔgbɔ kɔkɔea vevie la naʋã mí be míanɔ ebiabia dzi.
9, 10. (a) Wɔ nusita wòle vevie be míaku kutri le gbɔgbɔ kɔkɔea biabia Mawu me la ƒe kpɔɖeŋu. (b) Nya kae wòle be míabia mía ɖokui, eye nukatae?
9 Be míagase nusɔsrɔ̃ si le Yesu ƒe kpɔɖeŋua me na mí gɔme nyuie la, mina míagbugbɔ kpɔɖeŋua awɔ wòasɔ ɖe egbegbe ƒe nɔnɔmewo nu. Tsɔe be dɔ dze wò ƒometɔ aɖe dzi le zãtiƒe. Ðe ʋɔ ƒoƒo na ɖɔkta aɖe le zã ma me bene wòakpe ɖe ŋuwò akpe ŋu na wòa? Menye dɔléle sue aɖe ƒe nya gblɔm míele o. Ke boŋ tsɔe be dɔ sesẽ aɖe, abe dzidɔ ene, ye dze edzi; ɖikeke mele eme o be ɖɔkta la yɔyɔ makpe ŋu na wò kura o. Nukatae? Elabena ŋkubiãnyae dzɔ ɖe dziwò kpata. Èkpɔe be yehiã ame aɖe si ate ŋu awɔ nane tso nɔnɔmea ŋu la ƒe kpekpeɖeŋu. Kpekpeɖeŋu sia madimadi ate ŋu ana ame naku ɖe akɔ na wò. Nenema kee ŋkubiãnyawo dzɔna ɖe Kristotɔ vavãwo dzi gbeawotsyogbe. Ẽ, Satana le tsatsam abe “dzata, si le gbe ɖem” ene hele mía dim be yeavuvu ami. (Petro I, 5:8) Hafi míate ŋu anɔ te sesĩe le mawusubɔsubɔ me la, míehiã Mawu ƒe gbɔgbɔa vevie ŋutɔ. Kpekpeɖeŋu mabiamabia tso Mawu gbɔ ate ŋu ade míaƒe agbe afɔku me. Eyatae wòle be míanɔ Mawu biam kutrikukutɔe be wòana eƒe gbɔgbɔ kɔkɔea mí ɖo. (Efesotɔwo 3:14-16) Esia wɔwɔ koe ate ŋu ana be ŋusẽ nanɔ mía ŋu míatsɔ ‘ado dzii vaseɖe nuwuwu.’—Mateo 10:22; 24:13.
10 Eyata ele vevie ŋutɔ be ɣeaɖewoɣi la, míayi ŋugble me ahabia mía ɖokui be: “Ðe medoa gbe ɖa kutrikukutɔea?” Ðo ŋku edzi be ne míede dzesii be míehiã Mawu ƒe kpekpeɖeŋu vevie la, ele be míado gbe ɖa abia eƒe gbɔgbɔ kɔkɔea kutrikukutɔe geɖe wu.
Nukae Ʋãa Mí be Míado Gbe Ða Kakaɖedzitɔe?
11. Gbedodoɖa ŋuti nufiame kae Yesu ɖe ɖe go le vifofo kple via ŋuti kpɔɖeŋu si wòwɔ la me?
11 Yesu ƒe kpɔɖeŋu si ŋu míeƒo nu tsoe va yi tɔ asi nɔnɔme si wòle be wòanɔ Kristotɔ si le gbe dom ɖa si la dzi. Azɔ kpɔɖeŋu evelia si gbɔna ya tɔ asi nɔnɔme si le Yehowa Mawu, amesi sea gbedodoɖawo, si la dzi. Yesu bia be: “Ke fofo ka le mia dome, si via abia aboloe, eye wòana kpee, alo tɔmelã, eye wòana dae ɖe tɔmelã teƒe mahã? Alo ne abia koklozi la, wòana dziɖegbee mahã?” Yesu ɖe nufiame si le kpɔɖeŋu sia me la ɖe go be: “Azɔ mi, amesiwo nye ame vɔ̃ɖiwo, mienya alesi miana nunana nyui mia viwo, ʋuu keke Fofo, si le dziƒo la, mana Gbɔgbɔ kɔkɔe amesiwo bianɛ la o mahã?”—Luka 11:11-13.
12. Alekee vifofo si sea via ƒe biabiawoe ŋuti kpɔɖeŋua te gbe ɖe alesi Yehowa dina vevie be yease míaƒe gbedodoɖawoe dzi?
12 Yesu zã alesi vifofo naa nu nyui viae ƒe kpɔɖeŋu sia tsɔ ɖe alesi Yehowa sena le eɖokui me ku ɖe amesiwo doa gbe ɖa nɛ ŋu la fia. (Luka 10:22) Ède dzesi vovototo si le kpɔɖeŋu eveawo domea? Yehowa mele abe ŋutsu si melɔ̃ enumake be yeana abolo exɔlɔ̃ si hiã tu le Yesu ƒe kpɔɖeŋu gbãtɔa me la ene o, ke boŋ ele abe vifofo si léa be na via hedina vevie be yeakpɔ ye via ƒe nuhiahiãwo gbɔ nɛ la ene. (Psalmo 50:15) Yesu ɖe alesi Yehowa, si nye mía fofo si le dziƒo, dina vevie be yeakpe ɖe mía ŋu wu alesi vifofo si nye amegbetɔ dinɛ ene la fia kɔte. Egblɔ be ne vifofo, si togbɔ be enye ‘ame vɔ̃ɖi’ le nuvɔ̃ si ƒe dome wònyi ta, naa nu nyui via la, ɖe mele be míakpɔ mɔ be mía Fofo dɔmenyotɔ si le dziƒo la, ana gbɔgbɔ kɔkɔea eƒe aƒemetɔ siwo subɔnɛ la geɖe wu o mahã?—Yakobo 1:17.
13. Kakaɖedzi kae ate ŋu anɔ mía si ne míele gbe dom ɖa na Yehowa?
13 Nusɔsrɔ̃ kae le eme na mí? Eyae nye be míate ŋu aka ɖe edzi be ne míebia gbɔgbɔ kɔkɔea mía Fofo si le dziƒo la, menye ɖeko wòadi be yeana mí ko o, ke boŋ ana mí hã godoo. (Yohanes I, 5:14) Ne míedoa gbe ɖa na Yehowa kutrikukutɔe la, mawɔ nu abe alesi ŋutsu si ŋu Yesu ƒo nu tsoe le kpɔɖeŋu gbãtɔa me wɔe ene, hegblɔ be “Megaɖe fu nam o; ʋɔ la le tutu xoxo” gbeɖe o. (Luka 11:7) Ke boŋ Yesu ka ɖe edzi na mí be: “Minɔ ebiabia dzi, eye woana mi; minɔ edidi dzi, eye miakpɔe; minɔ ʋɔƒoƒo dzi, eye woaʋui na mi.” (Luka 11:9, 10, NW) Ẽ, Yehowa ‘aɖo to mí le gbesigbe míeyɔe la!’—Psalmo 20:10; 145:18.
14. (a) Nukpɔsusu gbegblẽ kae ɖea fu na nɔnɔme sesẽwo me tola aɖewo? (b) Ne míele nɔnɔme sesẽwo me tom la, nukata wòle be míado gbe ɖa na Yehowa kakaɖedzitɔe?
14 Kpɔɖeŋu si Yesu wɔ ku ɖe vifofo si léa be na via ŋu la gate gbe ɖe edzi hã kɔte be Yehowa ƒe dɔmenyonyo de ŋgɔ wu dzila amegbetɔ tɔ sasasã. Eyata mele be mía dometɔ aɖeke nasee le eɖokui me gbeɖe be nɔnɔme sesẽ siwo me tom yele la ɖee fia be Mawu megakpɔa ŋudzedze ɖe ye ŋu o. Míaƒe futɔ gãtɔ, Satana, ye di be míanɔ sesem le mía ɖokui me nenema. (Hiob 4:1, 7, 8; Yohanes 8:44) Fɔbubuameɖokui ƒe nukpɔsusu siawo mewɔ ɖeka kple Ŋɔŋlɔawo o. Yehowa metea ame aɖeke kpɔna “kple nuvɔ̃ o.” (Yakobo 1:13) Metsɔa nɔnɔme sesẽ siwo le abe da alo dziɖegbe ene la naa mí o. Mía Fofo si le dziƒo la naa ‘nu nyuiwo amesiwo bianɛ la.’ (Mateo 7:11; Luka 11:13) Le nyateƒe me la, zi alesi míekpɔa ŋudzedze ɖe Yehowa ƒe nyuiwɔwɔ kple eƒe lɔlɔ̃ faa be yeakpe ɖe mía ŋu ŋu la, zi nenemae wòaʋã mí be míado gbe ɖa kakaɖedzitɔe geɖe wu. Ne míewɔe nenema la, míawo hã míate ŋu ase le mía ɖokui me abe alesi hakpala la se le eɖokui mee ene be: “Mawu see [vavã], eye wòɖo to nye gbedodoɖa ƒe gbe.”—Psalmo 10:17; 66:19.
Mɔ si Nu Gbɔgbɔ Kɔkɔea nye Míaƒe Nyaxɔɖakɔla Le
15. (a) Ŋugbe kae Yesu do ku ɖe gbɔgbɔ kɔkɔea ŋu? (b) Gblɔ mɔ siwo nu gbɔgbɔ kɔkɔea kpena ɖe mía ŋu le la dometɔ ɖeka.
15 Hafi Yesu naku la, egbugbɔ gbe te ɖe kakaɖedzi si le gbedodoɖa ŋuti kpɔɖeŋu siwo wòwɔ me ŋu la dzi. Egblɔ na eƒe apostoloawo ku ɖe gbɔgbɔ kɔkɔea ŋu be: “Nye la maɖe kuku na Fofo la, eye wòana nyaxɔɖakɔla bubu mi, bena wòanɔ anyi kpli mi vaseɖe mavɔmavɔ me.” (Yohanes 14:16) Esia nye ŋugbe si Yesu do be nyaxɔɖakɔla, alo gbɔgbɔ kɔkɔea, anɔ anyi kple ye yomedzelawo, siwo dome míawo hã míele la, tegbee. Mɔ ɖedzesi ka nue nyaxɔɖakɔla sia le kpekpem ɖe mía ŋu le egbea? Eyae nye be gbɔgbɔ kɔkɔea kpena ɖe mía ŋu míedoa dzi le nɔnɔme sesẽ vovovowo me. Aleke wònaa kpekpeɖeŋu siae? Apostolo Paulo ƒo nu tso alesi Mawu ƒe gbɔgbɔa kpe ɖe ye ŋu yeto dodokpɔwo me do la ŋu, le agbalẽ si wòŋlɔ ɖo ɖe Kristotɔ siwo nɔ Korinto la me. Mina míadzro eƒe nuŋlɔɖia me kpuie.
16. Aleke wòate ŋu adzɔe be míato nɔnɔme aɖe si le abe esi me Paulo to la ene me?
16 Gbã la, Paulo ʋu eme na eƒe haxɔsetɔwo kaŋ be yele nɔnɔme sesẽ aɖe me tom, si le abe “ŋù” ene le yeƒe “ŋutilã me.” Emegbe egblɔ be: “Meyɔ [Yehowa] zi etɔ̃, bene wòadzo le ŋunye.” (Korintotɔwo II, 12:7, 8) Togbɔ be Paulo ɖe kuku na Mawu be wòaɖe fukpekpea ɖa na ye hã la, kuxia gakpɔtɔ nɔ anyi. Ðewohĩ wò hã èle nɔnɔme ma tɔgbe me tom fifia. Anɔ eme be, abe alesi Paulo wɔe ene la, wò hã èdo gbe ɖa kutrikukutɔe kple kakaɖedzi be Yehowa naɖe nɔnɔme sesẽa ɖa. Èdo gbea ɖa, gadoe ɖa, zi gbɔ zi gbogbowo, gake kuxia gakpɔtɔ li. Ðe ema fia be Yehowa mele wò gbedodoɖawo sem o, eye be eƒe gbɔgbɔa mele kpekpem ɖe ŋuwò oa? Kura o! (Psalmo 10:1, 17) De dzesi nya si apostolo Paulo gagblɔ kpee.
17. Alekee Yehowa ɖo Paulo ƒe gbedodoɖawo ŋu nɛ?
17 Mawu ɖo Paulo ƒe gbedodoɖaa ŋu nɛ be: “Nye amenuveve sɔ gbɔ na wò; elabena nye ŋusẽ zu blibo le gbɔdzɔgbɔdzɔ me.” Emegbe Paulo gblɔ be: “Eyata mele lɔlɔ̃m wu bena, maƒo adegbe le nye gbɔdzɔgbɔdzɔ ŋuti boŋ, bene Kristo ƒe ŋusẽ nanɔ dzinye.” (Korintotɔwo II, 12:9; Psalmo 147:5) Esia fia be Paulo de dzesii be, to Kristo dzi la, Mawu ƒe ametakpɔkpɔ triakɔ vu tsyɔ ye dzi abe agbadɔ ene. Yehowa ɖoa míaƒe gbedodoɖawo ŋu na mí to mɔ ma tɔgbe nu egbea hã. Etsɔa eƒe ametakpɔkpɔ tsyɔa esubɔlawo dzi wòzua bebeƒe na wo.
18. Nukae kpena ɖe mía ŋu míete ŋu doa dzi le nɔnɔme sesẽwo me?
18 Le nyateƒe me la, agbadɔ mexea mɔ na tsidzadza alo yaƒoƒo o, ke boŋ ɖe wòkpɔa ame ta vaseɖe afi aɖe tso nusiawo si me. Nenema kee bebeƒe si Mawu nana mí to “Kristo ƒe ŋusẽ” me la, mexea mɔ ɖe dodokpɔwo kple nɔnɔme sesẽwo nu be woagava mía dzi o. Ke hã, ekpɔa mía ta le gbɔgbɔ me tso xexe sia ƒe ŋusẽkpɔɖeamedzi gbegblẽwo kple Satana, si nye xexea dziɖula la, ƒe amedzidzedze si me. (Nyaɖeɖefia 7:9, 15, 16) Eyata ne èle avu wɔm kple nɔnɔme sesẽ aɖe, si gbe vɔvɔ gɔ̃ hã la, kakaɖedzi nenɔ asiwò be avu si wɔm nèle la le nyanya na Yehowa, eye be ese “wò aƒadodo” la. (Yesaya 30:19; Korintotɔwo II, 1:3, 4) Paulo ŋlɔ bena: “Nuteƒewɔla enye Mawu, amesi mana mɔ bena, woate mi akpɔ awu alesi miate ŋui la o; ke ana gododo le eme hã akpe ɖe tetekpɔ ŋuti, bene miate ŋu atsɔe.”—Korintotɔwo I, 10:13; Filipitɔwo 4:6, 7.
19. Nukae nèɖoe kplikpaa be yeanɔ wɔwɔm, eye nukatae?
19 Le nyateƒe me la, xexe mavɔ̃mawu sia ƒe ‘ŋkeke mamlɛawo’ nye ‘ɣeyiɣi vɔ̃’ siwo me nɔnɔ sesẽ. (Timoteo II, 3:1) Togbɔ be ele nenema hã la, Kristotɔwo ate ŋu anɔ te ɖe enu. Nukatae? Elabena Yehowa ƒe gbɔgbɔ kɔkɔe, si wòlɔ̃na faa nana amesiwo katã bianɛ la fũ, la kpena ɖe wo ŋu hekpɔa wo ta. Eyata mina míaɖoe kplikpaa ayi edzi anɔ gbɔgbɔ kɔkɔea biam le gbedodoɖa me gbeawotsyogbe.—Psalmo 34:7; Yohanes I, 5:14, 15.
Aleke Nàɖo Wo Ŋui?
• Nukae wòle be míawɔ bene míaxɔ Mawu ƒe gbɔgbɔ kɔkɔea?
• Nukata míate ŋu aka ɖe edzi be Yehowa aɖo gbe siwo míado ɖa atsɔ abia gbɔgbɔ kɔkɔea ŋu na mí?
• Aleke gbɔgbɔ kɔkɔea kpena ɖe mía ŋu le nɔnɔme sesẽwo mee?
[Biabiawo]
[Nɔnɔmetata si le axa 21]
Nukae míate ŋu asrɔ̃ tso kpɔɖeŋu si Yesu wɔ ku ɖe amedzroxɔla kutrikulaa ŋu me?
[Nɔnɔmetata si le axa 22]
Èdoa gbe ɖa hebiaa Mawu ƒe gbɔgbɔ kɔkɔea kutrikukutɔea?
[Nɔnɔmetata si le axa 23]
Nukae míesrɔ̃ tso Yehowa ŋu le vifofo si tsɔa ɖe le eme na via ŋuti kpɔɖeŋua me?