Àte Ŋu Anɔ Te Ðe Ahomya La Nu

LE ƔEYIƔI sesẽ siawo me la, ame geɖe le akɔ kpem kple nudzɔɖeamedzi siwo nu sẽ abe ahomya ene. Ke hã, le Kristotɔwo gome la, lɔlɔ̃ na Mawu kple eƒe gɔmeɖosewo me léle ɖe asi nuteƒewɔwɔtɔe kpena ɖe wo ŋu wonɔa te ɖe nɔnɔme sesẽawo nu. Aleke wote ŋu wɔa esiae? Àte ŋu akpɔ ŋuɖoɖoa le kpɔɖeŋu aɖe si Yesu Kristo wɔ la me. Etsɔ eƒe nusrɔ̃la wɔnuteƒewo sɔ kple “ŋutsu nyanu, si tu eƒe xɔ ɖe kpe gbadza dzi.” Yesu gblɔ be: “Tsi dzana, eye tɔwo ɖɔna, eye yawo ƒona, eye wova nyẽa zi le nenem xɔ ma te, eye memuna o; elabena woɖo egɔme anyi ɖe kpe gbadza dzi.”—Mateo 7:24, 25.

De dzesii be, togbɔ be ŋutsu si ŋu woƒo nu tsoe le kpɔɖeŋua me dze nunya hã la, edoa go nɔnɔme sesẽwo kokoko—esiawoe wotsɔ tsidzadza, tɔɖɔɖɔwo kple ya gblẽnuwo wɔ kpɔɖeŋu na. Eya ta Yesu megblɔ be yeƒe nusrɔ̃lawo avo tso nɔnɔme sesẽwo katã me ahanɔ agbe si me kuxi aɖeke manɔ o, le ŋutifafa kple tomefafa me o. (Psalmo 34:20; Yakobo 4:13-15) Gake egblɔ be Mawu subɔla wɔnuteƒewo ate ŋu adzra ɖo ɖe nudzɔɖeamedzi kple kuxi, siwo nu sẽ abe ahomya ene la ŋu ahakpe akɔ kpli wo.

Yesu dze kpɔɖeŋua gɔme be: “Amesiame, si se nye nya siawo, eye [wòwɔa] wo dzi la, matsɔe aɖo ŋutsu nyanu, si tu eƒe xɔ ɖe kpe gbadza dzi la ŋuti.” Le nyateƒe me la, menye aƒe ŋutɔŋutɔ tutu ŋu nya gblɔm Yesu nɔ o, ke boŋ enɔ nu ƒom tso agbenɔnɔ nyui tutuɖo ŋu. Ame siwo ɖoa to Kristo ƒe nyawo la wɔa nugɔmesese ŋudɔ, eye wobua nuwo ŋu nyuie. Wotua woƒe nuwɔnawo ɖe Kristo ƒe nufiafia siwo li ke abe kpe gbadza ene la dzi, eye woɖea mɔ nu si wofia wo la fiaa mɔ wo le woƒe agbenɔnɔ me. Gake mele be míakpɔ mɔ be míake ɖe kpɔɖeŋukpe gbadza sia ŋu le gota o. Ehiã be ŋutsu si ŋu woƒo nu tsoe le kpɔɖeŋua me naku do ‘wòagoglo’ hafi wòake ɖe eŋu. (Luka 6:48) Nenemaa kee Yesu ƒe nusrɔ̃lawo hã yia edzi kua kutri hetua nɔnɔme nyui siwo léa ame ɖe te, siwo nana be wotena ɖe Mawu ŋu la ɖo.—Mateo 5:5-7; 6:33.

Ke nu kae dzɔna ne kuxi sesẽ siwo le abe ahomya ene va do Yesu yomedzelawo ƒe Kristotɔnyenye ƒe gɔmeɖoanyia ƒe kelili kpɔ? Woƒe lɔlɔ̃ faa be yewoawɔ ɖe Kristo ƒe nufiafiawo dzi kple Kristotɔwo ƒe nɔnɔme nyui siwo wotu ɖo la nyea ŋusẽtsoƒe na wo le nɔnɔme sesẽ mawo me, eye vevietɔ wu la, nu siawo ke anye ŋusẽtsoƒe na wo le Harmagedon ƒe ahomya si le aƒe tum la me. (Mateo 5:10-12; Nyaɖeɖefia 16:15, 16) Ẽ, ame geɖe le dzidzedze kpɔm le tenɔnɔ ɖe dodokpɔ siwo nu sẽ abe ahomya ene la nu to Kristo ƒe nufiafiawo dziwɔwɔ me. Wò hã àte ŋui.—Petro I, 2:21-23.