Ame Si Xɔ Ƒe Alafa Si Ƒe Agbe Ŋu Tameɖoɖo Le

ELIN nye ame 60 siwo woyɔ be woxɔ ƒe 105 alo esi wu nenema le Sweden la dometɔ ɖeka. Eya ŋutɔ xɔ ƒe 105. Togbɔ be ame tsitsiwo dzikpɔƒee wòle hã la, egakpɔtɔ nye Yehowa Ðasefo si tsɔ dzonɔameme le eƒe subɔsubɔdɔ si gɔme wòdze ƒe 60 kple edzivɔwoe nye esia la wɔmee.

Be Elin nate ŋu aɖe gbeƒã na amewo la, ewɔa nu si apostolo Paulo hã wɔ esime wotui ɖe aƒeme. Paulo ɖe gbeƒã na ame siwo katã va srãe kpɔ la. (Dɔwɔwɔwo 28:16, 30, 31) Nenema kee Elin hã zãa mɔnukpɔkpɔ ɖe sia ɖe tsɔ gblɔa Biblia me nyanyuia na xɔmetutulawo, aɖutikewɔlawo, ɖɔktawo, ɖawɔlawo, dɔnɔdzikpɔlawo, kple ame bubuwo. Enuenu la, nɔvi siwo le Elin ƒe hamea me kplɔa woƒe Biblia-nusrɔ̃viwo gɔ̃ hã ɖe asi yina ɖasrãnɛ kpɔna bene woawo hã woate ŋu asrɔ̃ nu tso sidzedze kple nuteƒekpɔkpɔ siwo su esi la me.

Ale si Elin kpɔa dzidzɔe, eye wòdina be yeanya nu sia nu la doa dzidzɔ na woƒe hamea me tɔwo ŋutɔ. Nɔvi Ðasefo aɖe gblɔ be: “Ete ŋu nyana nu siwo katã yia edzi le hamea me. Eɖoa ŋku ɖevi siwo katã le hamea me kple ame yeye siwo ʋu va hamea me la ƒe ŋkɔwo dzi.” Wonya Elin nyuie hã ɖe eƒe amedzrowɔwɔ, nukokoedodoname, kple mɔkpɔkpɔnɔamesi ta.

Nu kae kpena ɖe Elin ŋu be wòkpɔa dzidzɔ eye eƒe susu kuna ɖe tameɖoɖo si le esi le agbe me la ŋu? Exlẽa mawunyakpukpui aɖe gbe sia gbe tso Ŋɔŋlɔawo Me Dzodzro Gbesiagbe gbalẽ, si Yehowa Ðasefowo ta, me. Ezãa ahuhɔ̃e si naa nuŋɔŋlɔwo lolona tsɔ xlẽa Biblia ƒe akpa aɖe gbe sia gbe. Elin dzrana ɖo ɖe Yehowa Ðasefowo ƒe kpekpewo ŋu, eye togbɔ be mete ŋu dea wo o hã la, woléa kpekpeawo me nyawo ɖe mɔ̃ dzi nɛ wòsena. Biblia kple Biblia-srɔ̃gbalẽwo xexlẽ kpakple gomekpɔkpɔ le Kristotɔwo ƒe kpekpeawo me edziedzi ate ŋu akpe ɖe míawo hã ŋu míanɔ agbe si me dzidzeme le, eye tameɖoɖo anɔ míaƒe agbe ŋu eɖanye ƒe ka kee míexɔ o.—Psalmo 1:2; Hebritɔwo 10:24, 25.