Nu Ka Tae Wòle Be Míato Nyateƒe?

MANFRED, si xɔ ƒe 18 la, nɔ hehe xɔm abe ɔfisdɔwɔla ene. * Dɔwɔƒe si wònɔ dɔa srɔ̃m le la wɔ ɖoɖo na eya kple hehexɔla bubu geɖewo be woade asinudɔsrɔ̃suku aɖe ŋkeke eve le kwasiɖa ɖe sia ɖe me. Gbe ɖeka woɖe asi le wo ŋu le sukua kaba. Le dɔwɔƒea ƒe sewo nu la, ele be dɔsrɔ̃viawo nagbugbɔ ayi dɔme hena ŋkekea ƒe ɣeyiɣi susɔea. Gake wo katã wodzo yi ɖazã ɣeyiɣia tsɔ do dzidzɔ na wo ɖokui, negbe Manfred koe trɔ yi dɔwɔƒea. Gake eva dzɔ be dɔwɔƒea ƒe amegã, si kpɔa hehenana dɔsrɔ̃viawo ƒe nyawo gbɔ la, va srã dɔwɔlawo kpɔ. Esi wòkpɔ Manfred la, ebiae be: “Nu ka tae mèyi suku egbea o? Eye afi kae dɔsrɔ̃vi susɔeawo le?” Aleke Manfred aɖo biabia siawo ŋui?

Manfred tsi vedomesi. Ðe wòato nyateƒe loo, alo ɖe wòaka aʋatso atsɔ akpɔ eƒe sukuhatiawo taa? Ne eto nyateƒe la, ade ehatiawo nya me eye awɔe be ehatiawo makpɔ dzidzɔ ɖe eŋu o. Ðe wòsɔ be woaka aʋatso le nɔnɔme siawo tɔgbe mea? Nenye wòe ɖe, nu kae nàwɔ? Míayi Manfred ƒe nyaa dzi emegbe, gake gbã la, na míakpɔ nu siwo wòlɔ ɖe eme ne eva hiã be míato nyateƒe alo míatoe o la ɖa.

Nyateƒetoto Kple Aʋatsokaka —Tsitretsitsi Ðe Wo Nɔewo Ŋu Ŋuti Nya Vevi Aɖe

Le ameƒomea ƒe ŋutinya ƒe gɔmedzedze la, nu sia nu nɔ te ɖe nyateƒe dzi. Wometro gbo nyawo o, eye wometɔtɔ nu si nye nyateƒe loo, alo baɖa afɔ nɛ o. Yehowa, Wɔla la, nye ‘Mawu nyateƒetɔ.’ Eƒe nyawo nye nyateƒe; mate ŋu aka aʋatso o, elé fu aʋatsokaka kple aʋatsokalawo.—Psalmo 31:6; Yohanes 17:17; Tito 1:2.

Ne nenemae la, ke alekee aʋatsokaka wɔ va dzɔ? Yesu Kristo na ŋuɖoɖo si ame aɖeke mate ŋu ake ɖii o la, esime wògblɔ na subɔsubɔhakplɔla siwo tsi tre ɖe eŋu henɔ didim be yewoawui la be: “Miawo la mietso fofo, si nye Abosam la me, eye mia fofo ƒe nudzodzrowo miedina be, miawɔ. Eya la amewula wònye tso gɔmedzedzea me, eye mele tsitre ɖe nyateƒe la me o, elabena nyateƒe mele eyama me o. Ne ele aʋatso kam la, eƒoa nu tso eya ŋutɔ ɖokui me, elabena aʋatsokala kple aʋatsokafofo wònye.” (Yohanes 8:44) Le nyateƒe me la, nu si dzɔ le Eden-bɔa me esime Satana ble atsu  kple asi gbãtɔawo wogbe toɖoɖo Mawu, si wɔe be nuvɔ̃ kple ku va kpɔ ŋusẽ ɖe wo dzi la ƒe nya gblɔmee Yesu nɔ.—Mose I, 3:1-5; Romatɔwo 5:12.

Yesu ƒe nyawo ɖee fia kɔte be Satanae nye “aʋatsokafofo,” ame si gbɔ aʋatsokaka dzɔ tso. Satana gakpɔtɔ nye ame siwo doa nyateƒematomato ɖe ŋgɔ la ƒe ŋgɔxɔla, eye le nyateƒe me la, eyae “nye xexeame katã blela.” Eya dzie nu siwo katã alakpadada gblẽ le ameƒomea ŋu egbea la ƒe agba gãtɔ le.—Nyaɖeɖefia 12:9.

Nyateƒetoto kple aʋatsokaka ƒe tsitretsitsi ɖe wo nɔewo ŋu ŋuti ƒe nya vevi si Satana Abosam fɔ ɖe te la yi edzi le gã dom ɖe edzi egbea. Exɔ aƒe ɖe ameƒomea katã me hele nu gblẽm le ame sia ame ŋu. Ale si ame aɖe nɔa agbee la nana wònɔa nyateƒe ƒe akpa dzi loo, alo nɔa aʋatso ƒe akpa dzi. Ame siwo le Mawu ƒe akpa dzi la tua woƒe agbenɔnɔ ɖe nyateƒe si le Mawu ƒe Nya, Biblia, me la dzi. Ame sia ame si mezɔa nyateƒea ƒe mɔ dzi o la gena ɖe Satana ƒe asi me, eɖanya alo menya o, elabena “xexeme blibo la katã le vɔ̃ɖitɔ la me.”—Yohanes I, 5:19; Mateo 7:13, 14.

Nu Ka Tae Aʋatsokaka Ƒe Didi Le Amegbetɔwo Me Ðo?

Nyateƒe si wònye be “xexeme blibo la katã” le Satana ƒe ŋusẽ te la na míese nu si tae ame geɖe kaa aʋatso ɖo la gɔme. Gake ɖewohĩ míabia be, ‘Nu ka tae Satana, “aʋatsokafofo” la, kpɔ ŋusẽ gbegblẽ ma ɖe xexeame katã dzi ɖo?’ Satana nyae be Yehowae nye nu siwo katã wòwɔ, siwo dome atsu kple asi gbãtɔwo hã nɔ la, ƒe Dziɖulagã si dze. Ke hã, Satana di be Mawu ƒe ɖoƒe kɔkɔ tɔxɛ sia nasu ye si, evɔ medze nɛ kura o. Ŋukeklẽ kple nɔƒegãdidi ɖokuitɔdiditɔe na wòto ayemɔ dzi be Yehowa ƒe ɖoƒea nasu ye si. Eya ta Satana to aʋatsokaka kple amefuflu dzi be yeaɖo taɖodzinu sia gbɔ.—Timoteo I, 3:6.

Ke egbea ya ɖe? Ðe màlɔ̃ ɖe edzi be ŋukeklẽ kple nɔƒegãdidi ɖokuitɔdiditɔe kee ʋãa ame geɖe wokaa aʋatso oa? Asitsatsa, dunyahehe, kple alakpasubɔsubɔ siaa me yɔ fũ kple ŋukeklẽ, alakpadada, nu fitifiti wɔwɔ, ametafatafa, kple amefuflu nuwɔnawo. Nu ka tae? Zi geɖe la, ɖe menye esi ŋukeklẽ kple nɔƒegãdidi ʋãa amewo wodina be yewoaxɔ ŋkɔ wu ame sia ame, alo be kesinɔnuwo nasu yewo si, kple be ŋusẽ alo ɖoƒe si womedze na o nasu yewo si tae oa? Blema Israel-fia Salomo si nye dziɖula nyanu aɖe la gblɔ be: “Amesi tsi klokloklo ɖe hokpɔkpɔ ŋu la, womagbe tohehe nɛ o.” (Lododowo 28:20) Apostolo Paulo hã ŋlɔ bena: “Nuvɔ̃wo katã ƒe ke enye galɔlɔ̃.” (Timoteo I, 6:10) Woate ŋu agblɔ nya mawo ke le ame siwo dia ŋusẽ alo ɖoƒe kutɔkutɔe la hã gome.

Nu bubu si hã nana amewo kaa aʋatsoe nye vɔvɔ̃—vɔvɔ̃ na nu si ado tso eme, alo nu si ame bubuwo asusu ne yewoto nyateƒe. Ele dzɔdzɔme nu be amewo nadi be woalɔ̃ yewoƒe nya alo be woakpɔ ŋudzedze ɖe yewo ŋu. Gake didi sia ate ŋu aʋã amewo be woabaɖa afɔ na nyateƒea le nu suewo gɔ̃ hã me, be woatsyɔ nu woƒe vodadawo dzi ahaɣla nyateƒenya siwo manya se o, alo kple susu ko be ŋkɔ nyui nakpɔtɔ anɔ yewo ŋu. Eya ta esɔ nyuie ŋutɔ be Salomo ŋlɔ bena: “Amegbetɔvɔvɔ̃ mɔ̃e wònye ɖea ame; ke amesi ɖoa dzi ɖe Yehowa ŋu la, woakpɔ eta.”—Lododowo 29:25.

Nuteƒewɔwɔ Na Nyateƒe Mawu La

Ŋuɖoɖo kae Manfred na dɔwɔƒemegã si bia nyae la? Manfred gblɔ nyateƒea nɛ. Egblɔ be: “Nufialaa ɖe asi le mía ŋu kaba, eya ta meva dɔme. Gake nyemate ŋu aƒo nu ɖe ame mamlɛawo ya nu o. Anyo be nàbia woa ŋutɔwo.”

Anye ne Manfred ate ŋu adze aye ana ŋuɖoɖo si aflu dɔwɔƒemegã la, si ana be ehatiwo nalɔ̃ eƒe nya hafi. Gake susu nyuiwo tae wòlé ɖe nyateƒea ŋu nuteƒewɔwɔtɔe ɖo. Yehowa  Ðasefowo dometɔ ɖekae Manfred nye. Eƒe nyateƒetotoa na dzitsinya nyui kpɔtɔ nɔ esi. Esia wɔe hã be eƒe amegãa ka ɖe eyama dzi. Abe eƒe hehexɔxɔa ƒe akpa aɖe ene la, woɖoe ɖe sikanuwo ŋuti dɔwɔƒe, afi si womeɖea mɔ na dɔsrɔ̃lawo be woawɔ dɔ le hafi o la. Le ƒe 15 aɖewo megbe, esi wodo Manfred ɖe ŋgɔ wòva le ɖoƒe kɔkɔ aɖe le adzɔhaa me la, dɔwɔƒemegã ma ke ƒo ka nɛ hekafui ɖe eƒe ŋgɔyiyia ta, eye wògaƒo nu tso ale si wòlé nuteƒewɔwɔ me ɖe asi heto nyateƒe va yi la ŋu.

Esi wònye be Yehowa nye nyateƒe Mawu ta la, ele be ame sia ame si di be ƒomedodo kplikplikpli nanɔ ye kplii dome la ‘naɖe aʋatsokaka ɖi’ eye ‘wòagblɔ nyateƒe.’ Ele na Mawu subɔla be wòalɔ̃ nyateƒetoto. Nunyala Salomo ŋlɔ bena: “Ðasefo nyateƒetɔ mekaa aʋatso o.” Gake nu kae nye aʋatsokaka?—Efesotɔwo 4:25; Lododowo 14:5.

Nu Kae Nye Aʋatsokaka?

Aʋatsokaka ɖe sia ɖe nye nyateƒematomato, gake menye nyateƒematomato ɖe sia ɖee nye aʋatsokaka o. Nu ka tae? Nyagɔmeɖegbalẽ aɖe ɖe nya aʋatsokaka gɔme be “enye nya aɖe si egblɔlaa nya nyuie be menye nyateƒe o la gbɔgblɔ tɔteteɖedzitɔe kple susu be yeatsɔ aflu ame.” Eme kɔ ƒã be aʋatsokaka lɔ amefuflu ɖe eme. Ekema nyateƒematomato le manyamanya me—abe nya si mele eteƒe o gbɔgblɔ vodadatɔe, alo xexlẽdzesi masɔmasɔwo nana ame aɖe vodadatɔe—ya menye aʋatsokaka o.

Gawu la, ele be míanya ne ame si bia nyaa mí la dze be míagblɔ nya bliboa katã nɛ hã. Le kpɔɖeŋu me, tsɔe be adzɔha bubu aɖe ƒe amegãe bia nya mawo ke Manfred. Ðe wòanye dzizizi na Manfred be wòagblɔ nya sia nya nɛa? Kura o. Esi wònye be gome mele dɔwɔƒemegã ma si be wòanya nyatakaka ma o ta la, manye dzizizi na Manfred be wòagblɔe nɛ o. Gake le go sia me hã la, masɔ be wòaka aʋatso o.

Kpɔɖeŋu kae Yesu Kristo ɖo le go sia me? Ɣeaɖeɣi la, Yesu nɔ dze ɖom kple ame aɖewo siwo mexɔ eyama dzi se o, siwo di be yewoanya eƒe mɔzɔɖoɖowo. Eya ta wogblɔ nɛ be: “Dzo le afisia, eye nàyi Yudea.” Alekee Yesu ɖo eŋu na wo? Egblɔ na wo be: “Miawo miyi ŋkekenyuia ɖuƒe [le Yerusalem]; nyemele ŋkekenyui sia ɖuƒe yi ge haɖe o, elabena nye ɣeyiɣi ɖoɖi la meɖo keŋkeŋ haɖe o.” Gake emegbe kpuie la, Yesu yi Yerusalem la hena ŋkekenyuia ɖuɖu. Ke, nu ka tae wòɖo nyaa ŋu nenema? Elabena gome mele wo si be woanya nu sia nu tso afi sia afi si Yesu anɔ ŋuti o. Eya ta togbɔ be Yesu megblɔ nya aɖeke si mele eteƒe o hã la, megblɔ nya bliboa katã na wo o, ale be mɔnukpɔkpɔ magasu wo si woawɔ nuvevi eya ŋutɔ loo, alo eyomedzelawo o. Eya ta menye aʋatsoe Kristo ka le afi sia o, elabena Petro ŋlɔ tso eyama ŋu be: “Mewɔ nuvɔ̃ aɖeke o, eye womekpɔ beble le eƒe nu me hã o.”—Yohanes 7:1-13, NW; Petro I, 2:22.

 Ke Petro ŋutɔ ya ɖe? Le zã si me wolé Yesu la, ɖe Petro meka aʋatso zi etɔ̃ hegblɔ be yemenya Yesu oa? Ẽ, amegbetɔvɔvɔ̃ ɖu Petro dzi wòka aʋatso. Gake enumake ‘efa avi vevie’ hetrɔ dzime, eye wotsɔ eƒe nuvɔ̃a kee. Gawu la, esrɔ̃ nu tso eƒe vodadaa me. Le ŋkeke aɖewo megbe la, eƒo nu tso Yesu ŋu le dutoƒo, eye esi Yudatɔwo ƒe amegã siwo nɔ Yerusalem do ŋɔdzi nɛ hã la, eɖoe kplikpaa gbe be yemadzudzɔ nuƒoƒo tso eŋu o. Kakaɖedzitɔe la, ele be Petro ƒe kpododonu hena ɣeyiɣi kpui aɖe kple ale si wòwɔ ɖɔɖɔɖo kabae la, nade dzi ƒo na mí ame siwo katã dzi gbɔdzɔgbɔdzɔ ate ŋu aɖu bɔbɔe eye míada vo le nuƒoƒo alo nuwɔna me la hã.—Mateo 26:69-75; Dɔwɔwɔwo 4:18-20; 5:27-32; Yakobo 3:2.

Nyateƒetoto Agava Xɔ Aƒe Ði Eye Wòanɔ Anyi Ðaa

Lododowo 12:19 gblɔ be: “Nyateƒenuyi anɔ anyi tegbee; ke alakpaɖe anɔ anyi aɖabaƒoƒo ɖeka ko.” Vavãe, nyateƒenya nɔa anyi eteƒe didina eye wòlia ke ɖaa. Ne amewo ɖoe kplikpaa toa nyateƒe hewɔa nu le anukwareɖiɖi me la, enana ƒomedodowo lia ke eye wòhea dzidzeme vɛ. Nyateƒee, nyateƒetoto hea emetsonu nyuiwo vɛ enumake. Emetsɔnu siawo dometɔ aɖewoe nye ŋkɔ nyui kple dzitsinya nyui ƒe ame si nɔnɔ, eye enana hã be srɔ̃tɔwo, ƒometɔwo, xɔlɔ̃wo, kple dɔwɔhatiwo kura gɔ̃ hã dome ƒomedodowo lia ke.

Gake aʋatsonyawo ya mate ŋu anɔ anyi eteƒe nadidi o. Aʋatsoɖe ate ŋu aflu ame hena ɣeyiɣi aɖe ya, gake aʋatsonyawo menɔa anyi ɖaa o. Gakpe ɖe eŋu la, Yehowa, nyateƒe Mawu la, ɖo ɣeyiɣi si wòaɖe mɔ ɖe aʋatsokaka kple ame siwo donɛ ɖe ŋgɔ siaa ŋu ase ɖo la ɖi. Biblia do ŋugbe be Yehowa aɖe Satana Abosam, aʋatsokafofo la, ame si le xexeame katã blem la ƒe ŋusẽkpɔɖeamedzi ɖa. Eteƒe madidi o, Yehowa aɖe aʋatsokaka kple aʋatsokalawo katã ɖa.—Nyaɖeɖefia 21:8.

Dzidzeme kae nye esi wòanye ne ‘nyateƒetoto’ gava xɔ aƒe ɖi mlɔeba yi ɖe mavɔmavɔ me!

[Etenuŋɔŋlɔ]

[Nɔnɔmetata si le axa 5]

Ŋukeklẽ kple nɔƒegãdidi ɖokuitɔdiditɔe ye ʋãa ame geɖe wokaa aʋatso

[Nɔnɔmetata si le axa 6]

Aʋatsokaka ɖe sia ɖe nye nyateƒematomato, gake menye nyateƒematomato ɖe sia ɖee nye aʋatsokaka o

[Nɔnɔmetata si le axa 6]

Nu kae míesrɔ̃ tso Petro ƒe nugbegbe le Kristo gbɔ me?

[Nɔnɔmetata si le axa 7]

Nyateƒetoto nana ƒomedodowo lia ke henaa dzidzeme ame