Ŋusẽ Si Le Aɖe La Ŋu

SƆVEDA ƒe aɖe te ŋu didina wòdea sentimeta 45, ete ŋu trɔna kabakaba, eye ŋusẽ le eŋu wòte ŋu ŋea aŋgbawo le atilɔwo dzi. Boso gã si woyɔna be blue whale (baleine bleue) ƒe aɖe ƒe kpekpeme sɔ kple atiglinyi ƒe kpekpeme. De ŋugble le ŋusẽ si gbegbe ahiã be wòatsɔ atrɔ aɖe lae ŋu kpɔ!

Amegbetɔ ƒe aɖe ya le sue ŋutɔ ne míetsɔe sɔ kple lã siawo ƒe aɖe ƒe lolome, kpekpeme, kple ŋutete. Ke hã, ŋusẽ le amegbetɔ ƒe aɖe la ŋu kura wu le mɔ geɖe nu. Biblia gblɔ le amegbetɔ ƒe ŋutinu sue sia ŋu be: “Ku kple agbe le aɖe si me.” (Lododowo 18:21) Nyateƒee, zi nenie míese amegbetɔ ƒe aɖe ƒe ŋusẽa zazã ɖe mɔ gbegblẽ nu, to alakpanyawo toto vɛ kple to aʋatsoɖaseɖiɖi, siwo he gbegblẽ kple ku gɔ̃ hã vɛ na ame maɖifɔwo kpɔ o?

Nenema ke xɔlɔ̃ nyuiwo hã dome gblẽ to ameŋugblẽnyawo gbɔgblɔ me. Nya tɔamewo gbɔgblɔ gblẽ nu le amewo ƒe seselelãme ŋu. Hiob, ame si ŋu wogblɔ alakpanyawo ɖo la tsɔ nuxaxa gblɔ be: “Ɣekaɣi mianɔ nuxaxa dom na nye luʋɔ, eye miatsɔ nyawo agbãm nyanyanya ase ɖo?” (Hiob 19:2) Nusrɔ̃la Yakobo kɔ nu me tso nu si gbegbe aɖe si womede gae o la te ŋu gblẽna ŋu, esi wògblɔ be: “Aɖe . . . nye ŋutinu sue aɖe ko, eye wòkana ɖe nu gãwo ŋu. Kpɔ ale si dzo vi aɖe tɔa dzo ave gã la ɖa! Eye aɖe la, dzo wònye.”—Yakobo 3:5, 6.

Le go bubu me la, ŋusẽ si le aɖe la ŋu ate ŋu ana agbe hã. Veveseseɖeamenu kple dzideƒonamenyawo ɖe ame aɖewo tso blanuiléle kple ameɖokuiwuwu me. Aɖaŋuɖoɖo nyuiwo dzi wɔwɔ kpɔ ame geɖe siwo nye atike vɔ̃ɖi zãlawo kple nu vlo wɔlawo ta be womeku kukpo o. Nyateƒee, ame dzɔdzɔe ƒe aɖe “nye agbeti,” eye “nya, si wogblɔ ɖe egblɔɣi la, sikatɔtɔŋuti wònye le klosalogba me.”—Lododowo 15:4; 25:11.

Eya ta, mɔ nyuitɔ si dzi míazã míaƒe aɖea le lae nye le Yehowa Mawu kafukafu me, le Mawu ƒe Fiaɖuƒe ŋuti nya nyuia gbɔgblɔ fia me, kple Biblia me nyateƒe xɔasia fiafia amewo me. Nu ka tae? Yesu gblɔ be: “Esiae nye agbe mavɔ la bena, woanya wò, Mawu vavã ɖeka la, kple Yesu Kristo, si nèdɔ ɖa la.”—Yohanes 17:3; Mateo 24:14; 28:19, 20.