“Ènya Mawu Ƒe Ŋkɔa?”

NYABIASE sia nyɔ nyɔnu aɖe si le Titina Asia ƒe anyieheɣetoɖoƒe gome la ƒe ɖetsɔleme. Nyabiasea dze le February 8, 2004 ƒe Nyɔ!, si míetana kpena ɖe magazine sia ŋu ƒe akpa dzi. Nyɔnua ŋlɔ ɖo ɖe magazinea talawo be: “Esime mekpɔ míaƒe agbalẽa ko la, elé dzi nam zi ɖeka, eye ekpe ɖe ŋunye mede ŋugble tso agbenɔnɔ ŋuti se nyuiwo ŋu. Nukpɔsusu nyuiwo va le asinye sum ku ɖe agbe ŋu. Mele nu ƒom tso mía Mawu kple ŋutifafa si sidzedze sia hena vanɛ ŋu na ame sia ame.”

Le nyateƒe me la, ame geɖe wu va le Mawu ƒe ŋkɔ, Yehowa, nyam le teƒe geɖe “vaseɖe anyigba ƒe seƒe ke.” (Dɔwɔwɔwo 1:8) Le kpɔɖeŋu me, woate ŋu akpɔ ŋkɔ sia si woyɔna le Turkmenistangbe me be Yehowa le Ŋɔŋlɔ Kɔkɔeawo si gɔme woɖe ɖe Turkmenistangbe me la me bɔbɔe. Psalmo 8:2 gblɔ be: “Yehowa, mía Aƒetɔ, . . . ale gbegbe wò ŋkɔ dzeani le anyigba blibo la dzii!”

Be nyɔnua nagasrɔ̃ nu geɖe tso Yehowa Mawu ŋu la, ebia be woana axa 32 gbalẽ gbadza si ƒe tanyae nye The Divine Name That Will Endure Forever (Le nom divin qui demeure à jamais) la ye. Wò hã ate ŋu abia Yehowa Ðasefowo dometɔ ɖeka wòana agbalẽ gbadza sia wò.