Agbenɔnɔ Ŋuti Se Siwo Le Tɔtrɔm Kplɔ Amewo Trae

XOTUTU xɔŋkɔ aɖe gblɔ be, gbe ɖeka Diogenes lé akaɖi ɖe asi zɔ to ablɔ dzi ŋdɔkutsu dzatsɛ, heɖoe kplikpaa be yeake ɖe nu dzeame wɔla aɖe ŋu, gake meke ɖe ɖeke ŋu o. Diogenes nye xexemenunyala aɖe si nɔ Atene le ƒe alafa enelia D.M.Ŋ. me.

Míate ŋu agblɔe kple kakaɖedzi ne xotutu ma le eme loo alo mele eme o. Ke hã, ne ɖe Diogenes gale agbe egbea la, míate ŋu ase nu gɔme nɛ nenye be anɔ nɛ be wòaku kutri geɖe wu tsã hafi ake ɖe agbe nyui nɔlawo ŋu. Edze abe ame geɖe megalɔ̃na ɖe edzi be ele be amewo nawɔ ɖe agbenɔnɔ ŋuti se siwo dzi woda asi ɖo dzi o ene. Zi geɖe la, wohea míaƒe susu yia nu madzemadze siwo amewo wɔna—le woawo ŋutɔwo ƒe agbenɔnɔ, le dziɖuɖuwo, le dɔwɔƒewo, le kamedefefenyawo, le asitsanyawo, kple agbenɔnɔ ƒe akpa bubuawo me—dzi le nyadzɔdzɔwo me. Amewo megadea bubu agbenɔnɔ ŋuti se geɖe siwo ŋu wodea asixɔxɔe tsã la ŋu o. Wogbugbɔ trɔa asi le dzidzenu siwo dzi woda asi ɖo tsã la ŋu, eye zi geɖe la, wotua afɔkpo wo. Le agbenɔnɔ ŋuti gɔmeɖose bubuwo ya gome la, amewo ƒoa nu nyuie tso wo ŋu, gake womezɔna ɖe wo dzi o.

Alan Wolfe, si nye mawusubɔsubɔ ŋuti nunyala aɖe gblɔ be: “Agbenɔnɔ ŋuti dzidzenu siwo dzi amewo katã da asi ɖo ƒe ŋkekeawo nu va yi.” Egblɔ hã be: “Medzɔ le ŋutinya me alea kpɔ be amewo nabui be womagate ŋu aɖo ŋu ɖe ameƒomea kple eƒe nuɖoanyiawo ŋu be woafia mɔ ame le agbenɔnɔ ŋu o.” Los Angeles Times ɖe xexemenunyala Jonathan Glover ƒe nukpɔsusu ku ɖe ƒe 100 siwo va yi ŋu gblɔ be, xexeme katã ƒe agbenɔnɔ ŋuti sewo dzi mawɔmawɔ kple mawusubɔsubɔ ƒe toyiyi gbɔe ŋutasẽnuwɔna siwo xɔ aƒe ɖe anyigba dzi la ƒe akpa gãtɔ tso.

Ke hã, tɔtɔ ma gbegbe si li ku ɖe agbenɔnɔ ŋuti se siwo dzi woda asi ɖo ŋu, mena ame aɖewo ya dzudzɔ agbenɔnɔ ŋuti sewo didi o. Ƒe ʋɛ aɖewoe nye esi va yi la, Federico Mayor, si nye Dukɔ Ƒoƒuawo ƒe Agbalẽsɔsrɔ̃, Dzɔdzɔmeŋutinunya, Kple Dekɔnuwo ƒe Nyawo Gbɔkpɔha ƒe ŋgɔnɔlagã, gblɔ be, “agbenɔnɔ ŋuti gɔmeɖosewoe nye nu siwo ŋu xexea va le dzi tsim ɖo vevie ŋutɔ  fifia wu ɣeyiɣi ɖe sia ɖe.” Gake esi xexea do kpo agbenɔnɔ ŋuti se nyuiwo dzi wɔwɔ la, mefia be agbenɔnɔ ŋuti se nyui si dzi woate ŋu azɔ ɖo, esi dzi wòle be woawɔ ɖo, aɖeke meli o.

Gake ɖe amewo katã ate ŋu alɔ̃ ɖe dzidzenu siwo dzi wole be woazɔ ɖo dzia? Edze ƒã be, womate ŋui o. Evɔ ne nyui kple vɔ̃ ŋuti dzidzenu si dzi wòlɔ̃ ɖo aɖeke meli o la, nu ka dzie woate ŋu anɔ te ɖo awɔ agbenɔnɔ ŋuti sewo? Agbenɔnɔ ŋuti dzidzenu ɖoɖo na ame ɖokui nye nu si bɔ egbea. Ke hã, àte ŋu akpɔe be nɔnɔme ma mena ame akpa gãtɔ ƒe agbenɔnɔ nyo ɖe edzi wu o.

Paul Johnson, si nye Britaintɔ blemaŋutinyaŋlɔla, gblɔ be agbenɔnɔ ŋuti dzidzenu ɖoɖo na ame ɖokui sia na be ale si amewo bunɛ le ƒe siwo do ŋgɔ na ƒe alafa 20 lia ‘ŋkubiãnyae be enye yewo ŋutɔ ƒe agbanɔamedzi, kple yewoƒe dɔ be yewoawɔ ɖe agbenɔnɔ ŋuti se vavã siwo woɖo la dzi me gbɔdzɔ vevie.’

Ekema ɖe míate ŋu akpɔ ‘agbenɔnɔ ŋuti se vavãwo’ alo anɔ agbe ɖe ‘xexeme katã ƒe sewo’ nua? Ðe ŋusẽtɔ aɖe li si ana se matrɔmatrɔ siwo sɔ na ɣeyiɣiwo katã, siwo ate ŋu alé mí ɖe te le agbe me ahana etsɔme mɔkpɔkpɔ mía? Nyati si kplɔe ɖo aɖo nyabiase siawo ŋu.