“Wotsea Ku Le Tsitsi Me Ke Hã”

AME akpa gãtɔ siwo le Mediterranea nutowo me doa ayedeti ɖe woƒe aƒewo me. Ati siawo ɖe dzesi le woƒe nyonyo kple woƒe tsetse siwo vivina la ta. Gawu la, woyia edzi tsea ku wu ƒe alafa ɖeka.

Fia Salomo si ɖu blema Israel dzi ɖɔ Sulamit ɖetugbi la ƒe dzedzeme be ele abe deti ene. (Hawo ƒe Ha 7:7) Agbalẽ si nye Plants of the Bible gblɔ be: “Hebrigbe me nya si wozãna na ayedeti ye nye ‘tàmâr.’ . . . Esia va zu amenuveve kple dzedzeme ƒe dzesi na Yudatɔwo, eye zi geɖe la wotsɔ tsɔa ŋkɔ na nyɔnuviwo.” Le kpɔɖeŋu me, woyɔ Salomo nɔvinyɔnu dzetugbe la be Tamar. (Samuel II, 13:1) Dzila aɖewo gakpɔtɔ tsɔa ŋkɔ ma na wo vinyɔnuviwo.

Menye nyɔnu siwo dze tugbe la koe wotsɔ sɔ kple ayedeti o. Hakpala dzi ha be: “Ame dzɔdzɔe la atu hlo abe deti ene, eye wòade dzi abe sederti le Libanon dzi ene. Wodo wo ɖe Yehowa ƒe aƒe la me, eye woƒo se ɖe mía Mawu ƒe xɔxɔnuwo. Woatse ku le tsitsi me ke hã, tsi anɔ wo me gugugu, eye woade ama.”—Psalmo 92:13-15.

Le kpɔɖeŋunyagbɔgblɔ nu la, ame siwo subɔa Mawu nuteƒewɔwɔtɔe le woƒe tsitsi me sɔ kple ayedeti si nya kpɔ le mɔ geɖewo nu. Biblia gblɔ be: “Atsyɔ̃fiakuku enye ta ƒowɔ, dzɔdzɔenyenye ƒe mɔ dzi wokpɔnɛ lena.” (Lododowo 16:31) Togbɔ be ame tsitsi siawo agbɔdzɔ le ŋutilã me ne ƒeawo va le yiyim hã la, ŋusẽ agate ŋu anɔ wo ŋu le gbɔgbɔ me to Mawu ƒe Nya, Biblia la sɔsrɔ̃ edziedzi dzi. (Psalmo 1:1-3; Yeremya 17:7, 8) Woƒe nya tuameɖo siwo wogblɔna kple kpɔɖeŋu nyui siwo woɖona nyea dzideƒoname tsoƒe wɔnuku aɖe na ame bubuwo, eye woyia edzi tsea ku ƒe sia ƒe. (Tito 2:2-5; Hebritɔwo 13:15, 16) Abe ayedeti ene la, ame tsitsiwo ate ŋu atse ku le woƒe tsitsi me ke hã.