Agbenɔnɔ Ðe Mawu Ƒe Tameɖoɖo Nu Egbea

“[Kristo ku] ɖe wo katã ta, bene amesiwo le agbe la, naganɔ agbe na wo ɖokui o.”—KORINTOTƆWO II, 5:15.

1. Ƒo nu tso nu siwo dutanyanyuigblɔla aɖe wɔ le dukɔ si me woɖoe ɖo me ŋu.

DUTANYANYUIGBLƆLA aɖe, si ŋkɔe nye Aaron, gblɔ be: “Esi dukɔmeviʋaa wu enu megbe la, míaƒe ʋuae nye ʋu gbãtɔ, si menye asrafoʋu o, si yi ɖe Afrika ƒe kɔƒenuto saɖeaga ma me. * Ɣeyiɣi aɖee nye esia si kadodo aɖeke menɔ mía kple hame sue si le afi ma dome o, eye ele be míakpɔ mía nɔviawo ƒe nuhiahiãwo gbɔ na wo. Hekpe ɖe nuɖuɖu, nudodo, kple Biblia srɔ̃gbalẽwo ŋu la, míetsɔ video si nye Jehovah’s Witnesses—The Organization Behind the Name (Les Témoins de Jéhovah : un nom, une organisation) hã ɖe asi yii. * Kɔƒea me tɔ gbogbo aɖewo va ƒo ƒu ɖe agbadɔ gã aɖe si wotsɔ be gbã, afi si míezã videoɖemɔ̃ ɖeka kple television ɖeka le, si míawo ŋutɔwo míeyɔ be sinimaxɔ, la me ale gbegbe be ehiã be míagaɖe video la zi evelia. Le videoa ɖeɖe zi evea siaa megbe la, ame geɖe lɔ̃ be míasrɔ̃ Biblia kpli yewo. Viɖe geɖe do tso míaƒe agbagbadzedzeawo me vavã.”

2. (a) Nu ka tae Kristotɔwo ɖoe kplikpaa be yewoazã yewoƒe agbe le subɔsubɔdɔ wɔwɔ na Mawu me? (b) Biabia kawo mee míadzro azɔ?

² Nu kae ʋã Aaron kple etɔwo be wozɔ mɔ si bia kutrikuku geɖe nenema ɖo? Woƒe ŋudzedzekpɔkpɔ ɖe Yesu Kristo ƒe tafevɔsaa ŋue ʋã wo wotsɔ woƒe agbe ɖe adzɔgbe na Mawu hedi be yewoazãe le ɖekawɔwɔ me kple Mawu ƒe tameɖoɖo. Abe woawo ke ene la, Kristotɔ ɖeadzɔgbewo katã ɖoe kplikpaa be ‘yewomaganɔ agbe na yewo ɖokuiwo o’ ke boŋ be yewoazã yewoƒe ŋutete katã “le nyanyui la ta.” (Korintotɔwo II, 5:15; Korintotɔwo I, 9:23) Wonyae be ne wotsrɔ̃ nuɖoanyi sia ko la, asixɔxɔ aɖeke maganɔ ŋkɔxɔxɔ kple ga siwo katã le xexea me ŋu o. Eya ta wokpɔe be esi yewonya le agbe eye lãmesẽ aɖe si nu le yewo si ko la, yewoazã yewoƒe agbe le ɖekawɔwɔ me kple Mawu ƒe tameɖoɖo. (Nyagblɔla 12:1) Aleke míate ŋu awɔ esiae? Afi kae míate ŋu akpɔ dzideƒo kple ŋusẽ tso hena esia wɔwɔ? Eye subɔsubɔ ƒe mɔnukpɔkpɔ kawoe le ʋuʋu ɖi na mí?

Ðe Afɔ Vevi Siwo Ana Be Nàwɔ Ŋgɔyiyi

3. Afɔ vevi kawo ɖeɖee Mawu ƒe lɔlɔ̃nu wɔwɔ lɔ ɖe eme?

³ Kristotɔ vavãwo nyae be, Mawu ƒe lɔlɔ̃nu wɔwɔ nye nu si wòle be woawɔ le ame ƒe agbemeŋkekewo katã me. Zi geɖe la, esia dzea egɔme kple afɔ vevi aɖewo ɖeɖe, siwo nye ŋkɔŋɔŋlɔ ɖe Teokrasi Subɔsubɔ Sukua me, Biblia xexlẽ gbe sia gbe, gomekpɔkpɔ le gbeƒãɖeɖedɔa me, kple ŋgɔyiyiwɔwɔ ahaxɔ nyɔnyrɔ. Ne míele ŋgɔyiyi wɔm la, míeɖoa ŋku apostolo Paulo ƒe nya siawo dzi be: “De ŋugble le nu siawo ŋu; wò dzi katã neku ɖe wo ŋu, bene wò ŋgɔgbedede nadze ƒãa na amewo katã.” (Timoteo I, 4:15, NW) Menye ame ɖokui dodo ɖe ŋgɔe ŋgɔyiyi siawo wɔwɔ nye o, ke boŋ enye míaƒe didi vevie be míawɔ Mawu ƒe lɔlɔ̃nu ɖokuitɔmadimaditɔe la ɖeɖe fia. Esia ɖenɛ fiana be míelɔ̃ be Mawu nafia mɔ míaƒe afɔɖeɖewo le agbemenuwɔna ɖe sia ɖe me, eye ewɔa esia nyuie wu ale si míawo ŋutɔwo míate ŋui.—Psalmo 32:8.

4. Aleke míawɔ aƒo asa na vɔvɔ̃ madzemadzee?

⁴ Gake ɖikeke ate ŋu axe mɔ na mí be míagawɔ ŋgɔyiyi le subɔsubɔdɔwo wɔwɔ na Mawu me o. (Nyagblɔla 11:4) Eya ta hafi míate ŋu akpɔ dzidzɔ vavã le Mawu subɔsubɔ kple kpekpe ɖe amewo ŋu me la, ɖewohĩ ahiã be míaɖu vɔvɔ̃ si le mía me dzi gbã. Le kpɔɖeŋu me, Erik ɖoe be yeaɖasubɔ le dutagbehame aɖe me. Gake enɔ vɔvɔ̃m henɔ  eɖokui biam be: ‘Ðe woaxɔm nyuiea? Ðe mate ŋu alɔ̃ nɔviawoa? Ðe nɔviawo alɔ̃ nye nyaa?’ Eɖe nu me be: “Meva de dzesii mlɔeba be ehiã be matsɔ ɖe le eme na nɔviawo geɖe wu ɖokuinye ŋu bubu. Eya ta meɖoe be maɖu vɔvɔ̃ si le menye dzi eye mawɔ nu sia nu si mate ŋui na amewo ɖokuitɔmadimaditɔe. Medo gbe ɖa na Mawu hebia eƒe kpekpeɖeŋu, eye mewɔ ɖe nye ɖoɖoa dzi. Fifia mekpɔa dzidzɔ geɖe le nye subɔsubɔ le afi ma me ŋutɔ.” (Romatɔwo 4:20) Nyateƒee, zi ale si míesubɔa Mawu hekpena ɖe amewo ŋu ɖokuitɔmadimaditɔe la, zi nenemae míakpɔ dzidzɔ kple dzidzeme geɖe.

5. Nu ka tae ɖoɖo nyui wɔwɔ hiã hafi míate ŋu awɔ nu le ɖekawɔwɔ me kple Mawu ƒe tameɖoɖo? Gblɔ eƒe kpɔɖeŋu.

⁵ Hafi míate ŋu awɔ nu le ɖekawɔwɔ me kple Mawu ƒe tameɖoɖo dzidzedzetɔe la, ehiã hã be míawɔ ɖoɖo ɖe míaƒe agbe ŋu nyuie. Míeƒoa asa na fenyinyi bena míagava zu kluvi na nuɖoanyi sia si ana be míakpɔ vovo ɖe subɔsubɔdɔwo wɔwɔ na Mawu ŋu ale si dze o. Biblia na míenya be: “Amesi doa nugbana la, dɔla wònye na agbanatɔ.” (Lododowo 22:7) Ŋuɖoɖo ɖe Yehowa ŋu kple gbɔgbɔmenuwo tsɔtsɔ ɖo nɔƒe gbãtɔ kpena ɖe mía ŋu míaƒe susu nɔa nu siwo le vevie wu dzi. Le kpɔɖeŋu me, Guoming kple nɔvianyɔnu eve kpakple wo dada siaae le aƒe me, le nuto si me xɔfe xɔa asi le ŋutɔ, eye wòsesẽna ŋutɔ be woakpɔ dɔ aɖe si woawɔ hena ɣeyiɣi didi la me. Esi wozãa woƒe ga le nunya me eye wo katã wokpea asi ɖe ƒomea ƒe nuhiahiãwo gbɔ kpɔkpɔ ŋu ta la, agbemenuhiahiã veviwo sua wo si ɣesiaɣi, ne wo katã womekpɔ dɔ le wɔwɔm o gɔ̃ hã. Guoming gblɔ be: “Ɣeaɖewoɣi la, edzɔna be dɔ menɔa mía dometɔ aɖewo si o. Ke hã, míete ŋu yia mɔɖeɖedɔa wɔwɔ dzi eye míekpɔa mía dadaa hã dzi nyuie. Míedaa akpe be Dada medi be míaɖe asi le gbɔgbɔmetaɖodzinuwo ŋu ahawɔ dɔ bene míana kesinɔnu geɖewo ye o.”—Korintotɔwo II, 12:14; Hebritɔwo 13:5.

6. Kpɔɖeŋu kae ɖe ale si míate ŋu awɔ tɔtrɔ bene míaƒe agbenɔnɔ nawɔ ɖeka kple Mawu ƒe tameɖoɖo la fia?

⁶ Ne èƒo ɖokuiwò ɖe xexemenuwo me fũu—eɖanye kesinɔnuwo alo nu bubuwo yome titi o—la, ahiã be nàwɔ tɔtrɔ gãwo hafi nàte ŋu atsɔ nu siwo le ɖekawɔwɔ me kple Mawu ƒe tameɖoɖo aɖo nɔƒe gbãtɔ le wò agbe me. Zi geɖe la, womate ŋu awɔ tɔtrɔ mawo gbe ɖeka kple eƒe zãdodo o, eye ne mèkpɔ dzidzedze le wò agbagbadzedze gbãtɔwo me o la, mègasusui be yedo kpo nu o. Bu Koichi, ame si ɣeyiɣi geɖe zazã ɖe modzakaɖeɖe ŋu va zu kuxi na ŋu kpɔ. Koichi srɔ̃ Biblia esime wònye ƒewuivi, gake eva ƒo eɖokui ɖe videofefewo ƒoƒo me fũu hena ƒe geɖe. Gbe ɖeka, Koichi de ŋugble le eɖokui ŋu hegblɔ be: ‘Nu ka wɔm mele? Mele nye ƒe 30-awo me fifia, gake nyemele naneke si ŋu taɖodzinu vavã le la wɔm le nye agbe me o!’ Koichi na wogate Biblia sɔsrɔ̃ kplii, eye wòxɔ kpekpeɖeŋu geɖe tso hamea hã gbɔ. Togbɔ be tɔtrɔwɔwɔ menɔ bɔbɔe nɛ o hã la, mena ta o. To gbedodoɖa kutrikukutɔe kple kpekpeɖeŋu si ame bubuwo nae lɔlɔ̃tɔe me la, ete ŋu va ɖu eƒe numamea dzi mlɔeba. (Luka 11:9) Koichi le subɔsubɔm dzidzɔtɔe fifia abe subɔsubɔdɔwɔla ene.

Srɔ̃ Nuwɔwɔ Le Dadasɔ Me

7. Nu ka tae wòhiã be míada asɔ le dɔ siwo Mawu bia tso mía si wɔwɔ me?

⁷ Ebia agbagbadzedze tso luʋɔ blibo me bene míawɔ nu le ɖekawɔwɔ me kple Mawu ƒe tameɖoɖo. Mele be míawɔ alɔgblɔlɔ alo awɔ kuvia le esia wɔwɔ me gbeɖe o. (Hebritɔwo 6:11, 12) Ke hã, Yehowa medi be míagbla ɖe dɔ ŋu ale gbegbe be ɖeɖi nate mía ŋu—le ŋutilã me, susu me, kple seselelãme gome—wu ale si dze o. Lɔlɔ̃ ɖe edzi ɖokuibɔbɔtɔe be míate ŋu awɔ Mawu ƒe dɔwo ade goe le mía ŋutɔ míaƒe ŋusẽ me o nyea eyama kafukafu eye wònye nuwɔwɔ le dadasɔ me. (Petro I, 4:11) Yehowa do ŋugbe be yeana ŋusẽ si hiã hena eƒe lɔlɔ̃nu wɔwɔ la mí, gake mele be míaŋe aɖaba aƒu afi si míaƒe ŋutetewo se ɖo dzi ahanɔ agbagba dzem be míawɔ nu si mebia tso mía si o la o. (Korintotɔwo II, 4:7) Bene míayi edzi anɔ subɔsubɔdɔ wɔm na Mawu evɔ nu mate mía ŋu akpa o la, ehiã be míanya afi si míaƒe ŋutetewo se ɖo.

8. Nu kae dzɔ ɖe sɔhɛ Kristotɔ aɖe dzi esime wòdze agbagba be yeazã yeƒe ŋutete katã le Yehowa subɔsubɔ kple eƒe dɔwɔɖui siaa me, eye tɔtrɔ kae wòwɔ?

⁸ Le kpɔɖeŋu me, Ji Hye, si le Ɣedzeƒe Asia la wɔ dɔ aɖe si bia kutrikuku geɖe hena ƒe eve sɔŋ esime wònɔ mɔɖeɖedɔa hã wɔm. Egblɔ be: “Medze  agbagba be mazã nye ŋutete katã le Yehowa subɔsubɔ kple nye dɔwɔɖui siaa me, eye esia wɔe be gaƒoƒo atɔ̃ pɛ koe medɔa alɔ̃ gbe sia gbe. Mlɔebaa, ɖeɖi va te nye susu ŋu ale gbegbe be ŋusẽ aɖeke megava nɔ ŋunye na subɔsubɔdɔa o, eye nyemegakpɔa dzidzɔ le Yehowa subɔsubɔ me abe tsã ene o.” Ji Hye va di dɔ bubu si mebia kutrikuku geɖe o bene wòate ŋu asubɔ Yehowa kple eƒe ‘dzi, luʋɔ, tamesusu kpakple ŋusẽ blibo.’ (Marko 12:30) Egblɔ be: “Togbɔ be ƒometɔwo ƒo nya ɖe nunye be madi dɔ si me ga geɖe anɔ awɔ hã la, metɔ afɔ to sesĩe tsɔ Mawu ƒe lɔlɔ̃nu wɔwɔ ɖo nɔƒe gbãtɔ. Ke hã, mekpɔa ga hena nye nuhiahiã veviwo, abe nudodo nyuiwo ene, gbɔ kpɔkpɔ. Eye mete ŋu dɔa alɔ̃ hã ɖina ɖe eme nyuie! Fifia, mekpɔa dzidzɔ geɖe le nye subɔsubɔdɔa wɔwɔ me, eye mía kple Yehowa dome va le kplikplikpli wu. Viɖe siawo katã su asinye le esi nyemegawɔa dɔ si ana xexea me kple eƒe susuhenuwo nakpɔ ŋusẽ ɖe dzinye fũu akpa o ta.”—Nyagblɔla 4:6; Mateo 6:24, 28-30.

9. Aleke míaƒe agbagbadzedzewo ate ŋu akpɔ ŋusẽ ɖe amewo dzi le gbeadzi?

⁹ Menye ame sia amee ate ŋu asubɔ Mawu abe mɔɖela ene o. Ne tsitsi, lãmesẽkuxiwo, kple kplamatsedonu bubuwo le fu ɖem na wò la, nyae be Yehowa kpɔa ŋudzedze ɖe wò nuteƒewɔwɔ kple subɔsubɔdɔ ɖe sia ɖe si nète ŋu wɔna tso dzi blibo me la ŋu. (Luka 21:2, 3) Esia ta, mele be mía dometɔ aɖeke nabu ŋusẽ si míaƒe agbagbadzedzewo, ne womede naneke o hã, ate ŋu akpɔ ɖe ame bubuwo dzi la nu tsɛ o. Le kpɔɖeŋu me, tsɔe be míege ɖe aƒe aɖewo me le gbeadzi eye edze abe ame aɖeke metsɔ ɖe le míaƒe gbedeasia me o ene. Gake ne míedzo vɔ la, aƒeawo me tɔwo ate ŋu aɖo dze tso míaƒe sasrãkpɔa ŋu hena gaƒoƒo alo ŋkeke geɖewo, le afi siwo womexɔ mí le o kura gɔ̃ hã! Míekpɔa mɔ be ame sia ame si míegblɔ nya nyuia na la akpɔ ŋudzedze ɖe eŋu kokoko o, gake míenya be wo dometɔ aɖewo akpɔ ŋudzedze ɖe eŋu godoo. (Mateo 13:19-23) Bubuwo ava kpɔ ŋudzedze ɖe eŋu ne xexea me ƒe nɔnɔmewo trɔ alo tɔtrɔ aɖewo va woƒe agbe me. Aleke kee wòɖale o, ne míele míaƒe ŋutete katã wɔm le gbeƒãɖeɖedɔa me la, míenyae be míele subɔsubɔdɔ wɔm na Mawu. “Mawu ƒe hadɔwɔlawo” míenye.—Korintotɔwo I, 3:9.

10. Mɔnukpɔkpɔ kawoe le ʋuʋu ɖi na mí katã le hamea me?

¹⁰ Hekpe ɖe eŋu la, mí katã míate ŋu akpe ɖe míaƒe ƒometɔwo kpakple mía nɔviŋutsu kple nɔvinyɔnuwo ŋu. (Galatiatɔwo 6:10) Ŋusẽ nyui siwo míekpɔna ɖe amewo dzi ate ŋu awɔ dɔ ɖe wo dzi hena ɣeyiɣi didi aɖe. (Nyagblɔla 11:1, 6) Ne hamemetsitsiwo kple subɔsubɔdɔwɔlawo  léa fɔ ɖe woƒe dɔdeasiwo ŋu hewɔa wo nyuie la, wowɔa akpa vevi aɖe le hamea ƒe gbɔgbɔmelãmesẽ me nɔnɔ kple kelili me, eye esia wɔnɛ be míekpɔa dzidzedze geɖe le míaƒe subɔsubɔdɔa me. Kakaɖedzi le mía si be, ne ‘miegba go ɖaasi le Aƒetɔ la ƒe dɔwɔwɔ me’ la, míaƒe agbagbadzedzewo ‘manye dzodzro o.’—Korintotɔwo I, 15:58.

Dɔ Si Mawu Ðo Be Míawɔ Egbea Wɔwɔ Wò Agbemedɔe

11. To vovo na subɔsubɔ le hame si me míele me la, mɔnukpɔkpɔ kawoe ate ŋu asu mía si?

¹¹ Abe Kristotɔwo ene la, míekpɔa dzidzɔ ɖe agbe si míele ŋu, eye míedina be míakafu Mawu le nu sia nu si míewɔna me. (Korintotɔwo I, 10:31) Ne míedoa vevie nu le Fiaɖuƒegbeƒãɖeɖedɔa kple nufiafia amewo be woawɔ nu siwo katã ƒe se Yesu de dzi me nuteƒewɔwɔtɔe la, subɔsubɔ mɔnukpɔkpɔ geɖe, siwo me yayra geɖe le, aʋu ɖi na mí. (Mateo 24:14; 28:19 20) Hekpe ɖe dɔwɔwɔ aduadu kple hame si me míele ŋu la, subɔsubɔ le afi si hiahiã geɖe wu le ƒe mɔnukpɔkpɔwo hã li; ate ŋu anye le anyigbamama bubu me, hame si doa gbegbɔgblɔ bubu me loo, alo dukɔ bubu me. Woate ŋu akpe hamemetsitsi kple subɔsubɔdɔwɔla siwo mekpɔ ɖe srɔ̃ o, eye wodze la be woade Subɔsubɔdɔ Ƒe Hehenasukua, eye le edede vɔ megbe la, woaɖasubɔ le hame siwo me Kristotɔ bibi siwo axɔ ŋgɔ hiã le me, eɖanye le woawo ŋutɔwo ƒe dukɔ me loo, alo le duta. Mɔnukpɔkpɔ ate ŋu asu srɔ̃tɔ siwo le ɣeyiɣiawo katã ƒe subɔsubɔdɔa wɔm si be woaxɔ hehe le Gilead Suku eye woaɖasubɔ le duta. Gakpe ɖe eŋu la, lɔlɔ̃nu faa dɔwɔla geɖewo hiã fifia hena dɔ vovovowo wɔwɔ le Betel kpakple le tadeaguƒewo kple alɔdzedɔwɔƒewo tutu kple wo dzadzraɖodɔwo me.

12, 13. (a) Aleke nàwɔ atia subɔsubɔ mɔnukpɔkpɔ siwo ʋu ɖi la dometɔ si nàwɔ? (b) Gblɔ ale si woate ŋu awɔ nuteƒekpɔkpɔ si su ame si le dɔ aɖe wɔwɔ me la ŋu dɔ le bubuwo wɔwɔ me ƒe kpɔɖeŋu aɖe.

¹² Subɔsubɔ mɔnukpɔkpɔ kawo yomee wòle be nàti? Abe Yehowa subɔla ɖeadzɔgbe ene la, di mɔfiafia tso eyama kple eƒe habɔbɔa gbɔ ɣesiaɣi. Eƒe “gbɔgbɔ nyui la” akpe ɖe ŋuwò nàwɔ nyametsotso nyuitɔ. (Nexemya 9:20) Zi geɖe la, dɔdeasi aɖe wɔwɔ nana ame sua te nyuie hena bubu wɔwɔ, eye dɔwɔɖaŋu kple nuteƒekpɔkpɔ si su ame si le dɔ aɖe wɔwɔ me la ate ŋu ava hiã le dɔ bubu wɔwɔ me emegbe.

¹³ Le kpɔɖeŋu me, Dennis kple srɔ̃a Jenny, kpea asi ɖe Fiaɖuƒe Akpata tutu dɔwo ŋu edziedzi. Esi Katrina Ahomya gblẽ nu le United States (États-Unis) la, wotsɔ wo ɖokuiwo na faa be yewoawɔ kpekpeɖeŋunadɔwo. Dennis gblɔ be: “Xɔtuɖaŋu siwo su mía si le Fiaɖuƒe Akpatawo tutu me la zazã le kpekpeɖeŋunana mía nɔviwo me na míekpɔ dzidzɔ geɖe ŋutɔ. Ŋudzedzekpɔkpɔ si ame siwo ŋu míekpe ɖo ɖe fia wɔ dɔ ɖe mía dzi ale gbegbe.  Kpekpeɖeŋunaha bubu geɖewo mekpɔ dzidzedze ale o. Gake aƒe siwo Yehowa Ðasefowo ya gbugbɔ tu kple esiwo wodzra ɖo xoxo la ƒe xexlẽme wu 5,300, eye wotu Fiaɖuƒe Akpata gbogbo aɖewo hedzra geɖewo hã ɖo. Ame geɖe le esia teƒe kpɔm eye wole ŋudzedze kpɔm ɖe míaƒe gbedeasia ŋu geɖe wu fifia.”

14. Nu kae nàte ŋu awɔ ne èdi be yeaƒo ye ɖokui ɖe ɣeyiɣiawo katã ƒe subɔsubɔdɔa me?

¹⁴ Ðe nàte ŋu awɔ nu le ɖekawɔwɔ me kple Mawu ƒe tameɖoɖo to ɣeyiɣiawo katã ƒe subɔsubɔdɔa wɔwɔ wò agbemedɔe mea? Ne àte ŋu awɔe la, kakaɖedzi nenɔ asiwò be àxɔ yayra geɖewo. Ne wò fifinɔnɔmewo maɖe mɔ na wò o la, ɖewohĩ anyo be nàwɔ asitɔtrɔ le wo ŋu. Do gbe ɖa abe ale si Nexemya wɔe esime wòdi be yeawɔ dɔ vevi aɖe la ene, be: “Oo [Yehowa], . . . na wòadze edzi na wò dɔla egbea dzro.” (Nexemya 1:11) Emegbe, ɖo ŋu ɖe ‘Gbedodoɖasela’ la ŋu, eye nàwɔ nu le ɖekawɔwɔ me kple wò gbedodoɖaa. (Psalmo 65:3) Be Yehowa nayra ɖe wò agbagbadzedze be nàsubɔe bliboe wu dzi la, ele kokoko be wò ŋutɔ nàtɔ agbagbadzedze le eŋu gbã. Eya ta ne ènya tso nya me be yeawɔ ɣeyiɣiawo katã ƒe subɔsubɔdɔa ko la, ƒo ɖokuiwò ɖe eme. Ne ɣeyiɣiawo va le yiyim la, nuteƒekpɔkpɔ geɖe ava su asiwò; eye esia ana nàkpɔ dzidzɔ geɖe.

Agbenɔnɔ Si Ŋu Viɖe Vavã Le

15. (a) Aleke dzeɖoɖo kple ame siwo subɔ Mawu hena ɣeyiɣi didi kple woƒe agbemeŋutinyawo xexlẽ ɖea vi na míi? (b) Ƒo nu tso agbemeŋutinya aɖe si de dzi ƒo na wò etɔxɛe ŋu.

¹⁵ Ne ènɔ agbe le ɖekawɔwɔ me kple Mawu ƒe tameɖoɖo la, viɖe kawoe nàte ŋu akpɔ mɔ na? Ðo dze kple ame siwo subɔ Yehowa hena ƒe geɖe, vevietɔ wo dometɔ siwo wɔ ɣeyiɣiawo katã ƒe subɔsubɔdɔa hena ƒe geɖe la. Teƒeɖoɖo ka gbegbee nye esi su wo si le agbe me! (Lododowo 10:22) Woagblɔ na wò be Yehowa megblẽ yewo ɖi gbeɖe le nɔnɔme sesẽwo me o; ena nu siwo yewohiã ŋutɔŋutɔ la su yewo si wu ale si yewokpɔ mɔ nɛ gɔ̃ hã. (Filipitɔwo 4:11-13) Tso ƒe 1955 va ɖo ƒe 1961 me la, wotaa nuteƒewɔla aɖewo ƒe agbemeŋutinya si wona tanyae be “Pursuing My Purpose in Life” (Agbenɔnɔ Ðe Tameɖoɖo Si Le Nye Agbe Ŋu Nu) ɖe Eŋlisigbe me Gbetakpɔxɔ me. Tso ɣemaɣi la, wogata agbemeŋutinya alafa geɖewo. Dzonɔameme kple dzidzɔ si nɔviawo ɖe fia, si dzena le nyatiawo me la, ɖoa ŋku nuŋlɔɖi si le Biblia gbalẽ si nye Dɔwɔwɔwo me dzi na mí. Agbemeŋutinya dodzidzɔname mawo xexlẽ aʋã wò nagblɔ be, ‘Agbe sia ƒomevie nye hã medi be manɔ!’

16. Nu kae nana be Kristotɔwo kpɔa dzidzɔ eye gɔmesese nɔa woƒe agbe ŋu?

¹⁶ Aaron, si ŋu míeƒo nu tso le gɔmedzedzea me la gblɔ be: “Medo go sɔhɛwo le Afrika zi geɖe, siwo nɔ dagbadagbam be tameɖoɖo ɖɔʋu aɖe nanɔ yewoƒe agbe ŋu. Wo dometɔ akpa gãtɔ meke ɖe eŋu o. Gake míawo ya míenɔ agbe si bia kutrikuku geɖe le ɖekawɔwɔ me kple Mawu ƒe tameɖoɖo to gbeƒãɖeɖe Fiaɖuƒe ŋuti nya nyuia me, gake enye agbenɔnɔ si ŋu tameɖoɖo le. Míawo ŋutɔwo míekpɔe kɔtee be dzidzɔ geɖe le nana me wu xɔxɔ vavã.”—Dɔwɔwɔwo 20:35.

17. Nu ka tae wòle be míanɔ agbe nɔm ɖe Mawu ƒe tameɖoɖo nu fifia?

¹⁷ Ke wò ya ɖe? Tameɖoɖo ka nue nèle agbe nɔm ɖo? Ne mèɖo gbɔgbɔmetaɖodzinu aɖeke na ɖokuiwò o la, nu bubuwo yome titi ava kpɔ ŋusẽ ɖe wò agbe dzi. Nu ka tae nàzã wò agbe yakatsyɔ ɖe Satana ƒe xexea ƒe nuwo yome nɔnɔ ŋu? Eteƒe madidi kura o, ne “xaxa gã” la tɔzi la, ŋutilãmekesinɔnuwo kple ŋkɔxɔxɔ le xexea me azu nu dzodzro. Nu si ŋu viɖe anɔ koe nye ƒomedodo si le mía kple Yehowa dome. Aleke gbegbe dzi adzɔ míi enye esi be míewɔ Mawu ƒe lɔlɔ̃nu, míekpe ɖe ame bubuwo ŋu eye míenɔ agbe ɖe Mawu ƒe tameɖoɖo nu bliboe!—Mateo 24:21; Nyaɖeɖefia 7:14, 15.

[Etenuŋɔŋlɔwo]

Àte Ŋu Aɖe Wo Mea?

• Aleke Yehowa sena le eɖokui me ɖe subɔsubɔ si míetsɔna nanae ŋu?

• Alekee afɔ veviwo ɖeɖe kple dadasɔ kpena ɖe mía ŋu le Mawu subɔsubɔ kple kpekpe ɖe amewo ŋu me?

• Subɔsubɔ mɔnukpɔkpɔ kawoe ʋu ɖi na mí?

• Alekee míate ŋu anɔ agbe si ŋu tameɖoɖo vavã le egbea?

[Biabiawo]

[Nɔnɔmetata siwo le axa 23]

Dadasɔ hiã hafi míate ŋu ayi edzi asubɔ Yehowa kple luʋɔ blibo

[Nɔnɔmetata siwo le axa 24]

Subɔsubɔ kɔkɔe ƒe mɔnukpɔkpɔ geɖewo li