“Wò Nunana Xɔasi La”

NYA mae Belgium ƒe dudɔnunɔlawo ƒe tatɔ tsãtɔ gblɔ tso agbalẽ si nye Ame Vevitɔ Kekeake Si Nɔ Anyi Kpɔ * ŋu. Dudɔnunɔla sia ƒe aƒelika aɖe va srãe kpɔ, eye wòlɔ̃ xɔ agbalẽa ƒe ɖeka. Emegbe la, eŋlɔ akpedalɛta sia be: “Wò sasrãkpɔa wɔ dɔ ɖe dzinye ŋutɔ, eye wò nunana xɔasi la gawɔ dɔ ɖe dzinye wu: eyae nye agbalẽ si ku ɖe ‘Ame Vevitɔ Kekeake’ la ŋu.”

Dudɔnunɔlawo ƒe tatɔ tsãtɔ sia dzro agbalẽa me heƒo nya ta be: “Ne amewo atsɔ ɖe le Nya Nyui gbedeasia me eye woatsɔ gɔmeɖose siwo Yesu Kristo na ade dɔwɔwɔ me la, xexea me anyo egbea sãsãsã wu. Esia awɔe be míagahiã Dukɔ Ƒoƒuawo ƒe Dedienɔnɔ Ŋuti Ðaŋuɖoha o, eye ŋɔdzidonamelawo, ŋɔdzinuwɔlawo ƒe amedzidzedze kple ŋutasesẽ nu ayi le xexea me.” Togbɔ be elɔ̃ ɖe edzi be edze abe nu si yesusu mate ŋu ava eme o ene hã la, eɖe ale si wòkpɔ ŋudzedze ɖe eƒe aƒelika ƒe sasrãkpɔa ŋu la gblɔ.

Lɛta la yi edzi be: “Dɔmenyotɔwo ƒe ƒuƒoƒo gã aɖe me tɔe nènye; mienye ame siwo kpɔa mɔ be nu nyuiwo sɔŋ alo dzɔgbevɔ̃ewo sɔŋ koe adzɔ o, ke boŋ miexɔe se be amegbetɔwo ƒe nɔnɔmewo kple nuwo ava ɖɔ ɖo ahanyo ɖe edzi.”

Yehowa Ðasefowo xɔe se be Mawue ava he xexe si nyo wu la vae mlɔeba, ke menye amegbetɔwo ƒe agbagbadzedze mee wòatso o. Wodzea agbagba be yewoasrɔ̃ ame vevitɔ kekeake, Yesu Kristo. Ðe Yehowa Ðasefowo va srã wò kpɔ le ŋkeke siawo mea? Dzeɖoɖo kple wo tso ame vevitɔ kekeake si nɔ anyi kpɔ la ŋu ado dzidzɔ na wò godoo. Eye adzɔ dzi na wo be yewoana agbalẽ si wɔ dɔ ɖe dudɔnunɔlawo ƒe tatɔ tsãtɔ sia dzi la ƒe ɖeka wò hã.

[Etenuŋɔŋlɔ]