Wole Kristotɔwo Sram Abe Lu Ene

DO ŊGƆ teti na Yesu ƒe ku la, ena toklã eƒe nusrɔ̃lawo be: “Kpɔ ɖa! Satana bia be woaɖe mɔ le mia ŋu, ne yeagbɔ mi, abe lu ene.” (Luka 22:31) Nu kae eƒe nya siawo fia?

Le Yesu ƒe ŋkekea me la, luŋeŋe biaa ɣeyiɣi kple agbagbadzedze geɖe. Gbã la, nuŋelawo ƒoa lubablaawo nu ƒu. Emegbe wotsɔa luawo nɔ xaxlãm ɖe nu, alo wozãa agbleŋlɔlãwo tsɔ hea luƒotasiaɖam tugua nukuawo. Esia wɔnɛ be kuawo dona le tsroawo me. Le ema megbe la, agbledelaawo tsɔa lugbɔnu lɔa nukua, gbea, kple tsroa siaa dona ɖe dzi ne ya le ƒoƒom. Kuawo duduna ɖe lugbɔƒea, gake ya ƒoa gbe siwo le nukua ŋu la dzonɛ. Mlɔeba la, wosraa kuawo heɖea nu siwo katã mehiã o la ɖa le wo dome.

Abe ale si Yesu gblɔe ene la, Satana dze Yesu ƒe nusrɔ̃lawo dzi kutɔkutɔe ɣemaɣi, eye wògadzea míawo hã dzi egbea. (Ef. 6:11) Menye Satana gbɔe nɔnɔme sesẽ ɖe sia ɖe si míedoa goe le agbe me la tsona tẽe ya o. (Nyagb. 9:11) Ke hã, edzɔa dzi na Satana be yeawɔ nu sia nu si yeate ŋui la ŋu dɔ atsɔ agblẽ míaƒe nuteƒewɔwɔ me. Le kpɔɖeŋu me, ate ŋu ate mí kpɔ be míati ŋutilãmenuwo yome, be míatia modzakaɖeɖe manyomanyowo, alo be míaƒo mía ɖokui ɖe agbe gbegblẽ nɔnɔ me. Ate ŋu azã sukuhatiwo, dɔwɔhatiwo, alo míaƒe ƒometɔ siwo menye Yehowa Ðasefowo o la atsɔ aƒoe ɖe mía nu be, míati nu siwo katã xexea atsɔ ɖo mía ŋkume le sukudede kple ŋutilãmedɔwɔwɔ me la yome. Gawu la, Satana ate ŋu ana woati mía yome tẽe, kple susu be yeana míadzudzɔ Mawu subɔsubɔ. Mɔ bubu geɖewo gali, siwo dzi Satana tona sraa mí, le kpɔɖeŋunyagbɔgblɔ nu.

Aleke míawɔ anɔ te ɖe futɔ sẽŋu sia nu? Míate ŋu awɔ esia le mía ŋutɔwo míaƒe ŋusẽ me o. Satana sesẽ wu mí; ke hã, míenyae be Yehowa ya sẽ ŋu wu Satana sãsãsã. Ne míeɖo ŋu ɖe Yehowa ŋu bliboe, doa gbe ɖa nɛ vevie be wòana nunya kple dzideƒo mí míado dzi, eye míekana ɖe eƒe mɔfiafia dzi bliboe la, ado ŋusẽ mí míanɔ te ɖe Satana ƒe amedzidzedzewo nu.—Ps. 25:4, 5.

Ne míele dodokpɔwo me tom la, míehiã ŋutete si akpe ɖe mía ŋu “[míade] vovototo nyui kple vɔ̃ dome,” si ana be Satana ƒe mɔwo nagakplɔ mí atrae o. (Heb. 5:13, 14) Yehowa ate ŋu akpe ɖe mía ŋu míatu ŋutete ma ɖo. Azɔ ele be míanɔ nu nyui wɔwɔ dzi ɖaa, nu ka kee ɖadzɔ o. Ne míewɔna ɖe Yehowa ƒe mɔfiamewo dzi la, ado ŋusẽ mí godoo le tame si míeɖo kplikpaa dzinɔameƒotɔe be míawɔ nu si nyo la me.—Ef. 6:10.

Satana adze agbagba be yeasra mí abe lu ene. Gake le Yehowa ƒe ŋusẽ me la, míate ŋu atsi tsitre ɖe eŋu, anɔ te sesĩe le xɔse me. (1 Pet. 5:9) Ɛ̃, Yehowa ƒe Nya la ka ɖe edzi na mí be: “Mitsi tsitre ɖe Abosam ŋu, eye asi le mia gbɔ.”—Yak. 4:7.