Meva Kpɔe Be Viɖe Le Agbea Ŋu

Abe ale si GASPAR Martínez Gblɔe ene

Le mɔ aɖe nu la, magblɔ be ŋutsuvi aɖe si tso kɔƒe me heva zu kesinɔtɔ le dugã me ye menye. Gake àva kpɔe be kesinɔnu si su asinye la menye esi tututu menɔ mɔ kpɔm na o.

KƆƑE aɖe si ƒe anyigba mewɔa nu o, si le Rioja nuto si le Spain ƒe anyiehe mee menɔ tsi le ƒe 1930-awo me. Esi mexɔ ƒe ewo la, eva hiã be madzudzɔ suku, gake kaka ɣemaɣi naɖo la, mesrɔ̃ nuxexlẽ kple nuŋɔŋlɔ. Mía kple nɔvinyeŋutsu kple nɔvinyenyɔnu ade míekplɔa alẽwo yia gbe me ɣeaɖewoɣi, eye míedea míaƒe agble suesuewo hã ɣebubuɣiwo.

Ahedada na be míedea asixɔxɔ gã aɖe ŋutilãmenunɔamesiwo ŋu ŋutɔ. Míeva nɔ ŋu ʋãm ame siwo dzi nuwo de le agbe me wu mí la. Ke hã, míaƒe bisiɔp gblɔ kpɔ be, “le nuto siwo katã le yeƒe dzikpɔkpɔ te dome la, míaƒe kɔƒea me tɔwoe doa vevie mawusubɔsubɔ wu.” Gake menya kura be le ɣeyiɣi aɖe megbe la, ame geɖe ado le Katolikohaa me o.

Nane Si Nyo Wu La Didi

Meɖe Mercedes, si nye ɖetugbui aɖe si nye míaƒe kɔƒea me tɔ. Eteƒe medidi kura o, míedzi ŋutsuvi si dzi wòle be míakpɔ. Le ƒe 1957 me la, míeʋu yi dugã aɖe si te ɖe mía ŋu si ŋkɔe nye Logroño me, eye mlɔeba la, dzinyelawo kple nɔvinyewo hã ʋu va. Eteƒe medidi o meva kpɔe be esi nyemesrɔ̃ dɔ aɖeke o ta la, asesẽ be makpɔ dɔ aɖe si ƒe fetu de ame dzi la awɔ. Nyemenya afi si matrɔ ɖo hena mɔfiame le agbe me o. Mete numekukuwɔwɔ le agbalẽdzraɖoƒe si le mía gbɔ la me, togbɔ be nyemenya nu si tututu dim menɔ o hã.

Le ɣeyiɣi aɖe megbe la, mese nu tso radio dzi wɔna aɖe ŋu. Wodoa Biblia sɔsrɔ̃ to lɛtaŋɔŋlɔ dzi ɖe amewo gbɔ le wɔna sia me, eye meƒo ɖokuinye ɖe eme. Esi mewu nusɔsrɔ̃a nu teti ko la, Prostestanttɔ Mawunyagblɔlawo va srãm kpɔ. Esi menya de woƒe sɔlemea zi eve ko megbe la, mekpɔe dze sii be nyaʋiʋli nɔ woƒe tatɔwo dome. Nyemegatrɔ yi afi ma o, eye meƒo nya ta be nenemae subɔsubɔhawo katã le.

Tsrowo Ge Le Nye Ŋkuwo Dzi

Le ƒe 1964 me la, ɖekakpui aɖe si ŋkɔe nye Eugenio va srã mí kpɔ le aƒe me. Yehowa Ðasefoe wònye. Ɣemaɣi la, nyemese nu tso subɔsubɔha ma ŋu kpɔ o. Ke hã, medi vevie be maɖo dze tso Biblia me nyawo ŋu kplii. Mesusui be menya Ŋɔŋlɔawo nyuie. Mezã mawunyakpukpui siwo mesrɔ̃ le nusɔsrɔ̃ to lɛtaŋɔŋlɔ dzi me la dometɔ ʋɛ aɖewo tsɔ ɖo nyawo ŋu nɛ. Togbɔ be menɔ agbagba dzem be maʋli Protestanttɔwo ƒe nufiafia aɖewo ta hã la, le nye dzi me la, nyemexɔ wo dzi se ŋutɔŋutɔ o.

 Esi míeɖo dze legbee zi eve megbe la, eva hiã be malɔ̃ ɖe edzi be Eugenio wɔ Mawu ƒe Nya la ŋu dɔ abe ame si bi ɖe Ŋɔŋlɔawo me ene. Ale si wòtea ŋu kena ɖe mawunyakpukpuiwo ŋu kple ale si wòtea ŋu ɖea wo me togbɔ be mede suku de nunye hã o la wɔ nuku nam ŋutɔ. Eugenio zã Biblia tsɔ ɖo kpe edzi nam be míele ŋkeke mamlɛawo me, eye be eteƒe madidi o, Mawu Fiaɖuƒea atrɔ anyigba wòazu paradiso. Nya ma do dzidzɔ nam ŋutɔ.—Ps. 37:11, 29; Yes. 9:5, 6; Mat. 6:9, 10.

Melɔ̃ enumake be wòasrɔ̃ Biblia kplim. Nu siwo katã kloe mesrɔ̃ nye nu yeyewo nam, eye wowɔ dɔ ɖe dzinye ŋutɔ. Mɔkpɔkpɔ aɖe si menɔ asinye tsã o la va su asinye azɔ, eye esia na meva kpɔ be viɖe le agbea ŋu. Meke ɖe nu si dim menɔ xoxoxo la ŋu azɔ. Tso ekema dzi la, nyemegabua agbagba siwo dzem menɔ be ɖoƒe si nyo wu nasu asinye la be wohiã o, eye kutri si kum menɔ be makpɔ dɔ nyui aɖe awɔ hã megava nɔ vevie nam o. Nenye be woaɖe dɔléle kple ku kura gɔ̃ hã ɖa ɖe, kae va nye nye kuxi mawo.—Yes. 33:24; 35:5, 6; Nyaɖ. 21:4.

Enumake mete nu siwo srɔ̃m menɔ la ŋu nya gbɔgblɔ na ƒonyemetɔwo, metsɔ dzonɔameme nɔ nu ƒom tso ŋugbe siwo Mawu do be yeahe anyigba dzi paradiso aɖe si me amegbetɔ wɔnuteƒewo anɔ agbe tegbee le avae ŋu na wo.

Ƒonyemetɔwo Xɔ Biblia Me Nyateƒea

Eteƒe medidi o, mí ame wuieve aɖewo míeɖoe be míanɔ kpekpem Kwasiɖagbe ŋdɔ ɖe sia ɖe le tɔɖinye ƒe aƒe me hena nusɔsrɔ̃ tso ŋugbedodo siwo le Biblia me la ŋu. Míezãa gaƒoƒo eve alo etɔ̃ kwasiɖa sia kwasiɖa tsɔ srɔ̃a nui. Esi Eugenio kpɔe be nye ƒometɔ gbogbo aɖewo tsɔ ɖe le Biblia me nyawo me la, ewɔ ɖoɖo be yeasrɔ̃ nu kple ƒome ɖe sia ɖe ɖe vovo.

Míaƒe ƒometɔ bubu aɖewo nɔ Durango, du sue aɖe si didi tso mía gbɔ anɔ abe kilometa 120 ene, eye Ðasefo aɖeke menɔ du ma me o. Eya ta le dzinu etɔ̃ megbe la, mexɔ ŋkeke ʋɛ aɖewo le dɔ me heyi ɖasrã wo kpɔ kple susu be maƒo nu na wo tso nye dzixɔse yeyea ŋu. Le nye afi ma nɔnɔ me la, mí ame ewo aɖewo míekpea ta fiẽ sia fiẽ, eye menɔa nu me ɖem na wo ʋuu va se ɖe fɔŋli. Wo katã woɖoa to dzidzɔtɔe. Esi ɣeyiɣia de be madzo la, megblẽ Biblia kple Biblia srɔ̃gbalẽ aɖewo ɖe wo gbɔ. Tso ekema dzi la, kadodo yi edzi nɔ mía dome.

Esi Ðasefowo va Durango—afi si ame bubu aɖeke meɖe gbeƒã le kpɔ o la—wokpɔ ame 18 siwo nɔ lalam vevie be woava srɔ̃ Biblia kpli yewo. Dzi dzɔ Ðasefoawo, eye wowɔ ɖoɖo hete nusɔsrɔ̃ kple ƒome ɖe sia ɖe.

Va de asi na ɣemaɣi la, srɔ̃nye Mercedes mekpɔ xɔ nyateƒea haɖe o, menye esi Biblia ƒe nufiafiawo dzi xɔxɔ se sesẽ nɛ tae o, ke boŋ amegbetɔvɔvɔ̃ tae. Woɖo asi Yehowa Ðasefowo ƒe dɔa dzi le Spain ɣemaɣi, eya ta esusui be dziɖuɖua anya mía vi eveawo le suku, eye amewo agbe nu le mía gbɔ. Gake esi wòkpɔe be ƒome bliboa nɔ Biblia me nyateƒea xɔm la, eya hã di be yeasrɔ̃ nu.

Le ƒe eve me la, ƒonyemetɔ 40 xɔ nyɔnyrɔ tsɔ ɖo kpe woƒe adzɔgbe si woɖe na Mawu be yewoasubɔe la dzi hezu Ðasefowo. Ɛ̃, taɖodzinu ɖeka va le mía kple nye ƒomea si le agbe me. Mese le ɖokuinye me be meɖo taɖodzinu aɖe si ŋu viɖe vavã le la gbɔ le agbe me. Mawu tsɔ gbɔgbɔmekesinɔnu geɖe yra mí.

Kesinɔnu Geɖe Wu Kpɔkpɔ Esi Ƒeawo Va Nɔ Yiyim

Le ƒe 20 siwo kplɔe ɖo me la, nye ŋku biã ɖe hehenana mía viŋutsu eveawo kple kpekpeɖeŋunana míaƒe hamea ŋu. Esi mía kple srɔ̃nye Mercedes míeʋu yi Logroño la, Yehowa Ðasefo siwo ƒe xexlẽme anɔ abe 20 ene koe nɔ dugã ma si me ame 100,000 aɖewo nɔ la me. Le ɣeyiɣi kpui aɖe megbe la, agbanɔamedzi geɖe su asinye le hamea me.

Esi mexɔ ƒe 56 la, míaƒe adzɔha la tu dɔwɔƒe si mewɔa dɔ le la, eye woɖe asi le ŋunye le dɔ me. Tso gbe aɖe gbe kee didi vevie nɔ menye be mawɔ ɣeyiɣiawo katã ƒe subɔsubɔdɔa, eye mewɔ mɔnukpɔkpɔ ma ŋu dɔ hezu mɔɖela. Dzudzɔxɔxɔ le dɔ me ƒe fetu si mexɔna le sue ale gbegbe be medena na mí kura o. Eya ta srɔ̃nye Mercedes nɔ xɔmedzadzraɖodɔ wɔm tsɔ nɔ asi  kpem ɖe ƒomea ƒe gazazãwo ŋu. Míete ŋu kpɔ míaƒe ƒomea dzi, eye míekpɔa míaƒe agbemenu hiahiã veviwo ɣesiaɣi. Megakpɔtɔ le mɔɖeɖedɔa wɔm, eye srɔ̃nye hã wɔa kpekpeɖeŋu mɔɖeɖedɔa ɣeaɖewoɣi, eye wòle dzidzɔ kpɔm le gbeƒãɖeɖedɔa me ale gbegbe.

Ƒe ʋɛ aɖewoe nye esia la, Mercedes nɔ míaƒe magazinewo nam ɖetugbui aɖe si ŋkɔe nye Merche; ɖetugbui sia srɔ̃ Biblia kpɔ le eƒe ɖevime. Merche xlẽa míaƒe agbalẽwo kple dzidzɔ, eye Mercedes de dzesii be egakpɔa ŋudzedze ɖe Biblia me nyateƒea ŋu le eƒe dzi me. Mlɔeba la, Merche lɔ̃ be woasrɔ̃ Biblia kpli ye, eye wòte ŋgɔyiyi nyuiwo wɔwɔ. Gake srɔ̃a Vicente nye aha tsu nola, eya ta dɔ aɖeke metɔna ɖe esi me o. Esia wɔe be mete ŋu nɔ eƒe ƒomea dzi kpɔm o. Gakpe ɖe eŋu la, eƒe ahanono vivivo na be woƒe srɔ̃ɖeɖea me de gbegblẽ ge kloe.

Srɔ̃nye ɖo aɖaŋu na Merche be wòana Vicente naƒo nu kplim, eye eva lɔ̃ ƒo nu kplim mlɔeba. Esi meyi ɖaɖo dze kplii zi geɖe megbe la, elɔ̃ be yeasrɔ̃ Biblia. Vicente te tɔtrɔwo wɔwɔ, etea ŋu dzudzɔa ahanono ŋkeke geɖe ɣeaɖewoɣi. Emegbe ete ŋu ɖu eɖokui dzi kwasiɖa ɖeka alo esi wu nenema si mede nu aha me o. Mlɔeba la, edzudzɔ ahanono kura. Vicente ƒe nɔnɔme va trɔ kura, eye eƒe ƒomea hã va wɔ ɖeka. Eƒe ƒome bliboa—siwo dome srɔ̃a kple vianyɔnu hã le—le Canary Ƒukpowo dzi fifia, eye wole kpekpeɖeŋu gã aɖe nam hame sue si le afi ma.

Ŋkuɖoɖo Agbe Si Ŋu Viɖe Le Si Menɔ La Dzi

Togbɔ be ƒonyemetɔ siwo srɔ̃ Biblia ƒe geɖewoe nye esia dometɔ aɖewo ku fifia hã la, míaƒe ƒometɔwo yi edzi le agbɔ sɔm ɖe edzi, eye Mawu yra mí geɖe ŋutɔ. (Lod. 10:22) Aleke gbegbe nye dzi dzea emee nye esi be makpɔe be ame siwo dze Biblia sɔsrɔ̃ gɔme ƒe 40 aɖewoe nye esi va yi la katã kloe kple wo viwo kpakple wo tɔgbuiyɔviwo gakpɔtɔ le Yehowa subɔm nuteƒewɔwɔtɔe!

Egbea la, ƒonyemetɔ gbogbo aɖewo nye Ðasefowo, eye wo dometɔ geɖe nye hamemetsitsiwo, subɔsubɔdɔwɔlawo, kple mɔɖelawo. Vinye tsitsitɔ kple srɔ̃a le subɔsubɔm le Yehowa Ðasefowo ƒe alɔdzedɔwɔƒe si le Madrid, Spain. Esi mezu Ðasefo la, Ðasefo siwo anɔ abe 3,000 ene ye nɔ Spain. Gake egbea la, wosɔ gbɔ wu 100,000. Mekpɔa dzidzɔ ɖe ɣeyiɣiawo katã ƒe subɔsubɔdɔa ŋu ŋutɔ, eye medaa akpe na Mawu ɖe mɔnukpɔkpɔ nyui si wònam le eƒe subɔsubɔdɔa me ta. Togbɔ be nyemede suku yi ŋgɔ o hã la, wozãam abe nutome sue dzikpɔla ƒe teƒenɔla ene tso ɣeyiɣi yi ɣeyiɣi.

Ƒe ʋɛ aɖewoe nye esi va yi la, megayi míaƒe kɔƒea me, eye mekpɔe be kɔƒea zu aƒedo keŋkeŋ kloe. Ahedada na be kɔƒea me nɔlawo katã gblẽ woƒe agblewo kple aƒewo ɖi heʋu yi afi siwo agbea de ame dzi le wu. Dzidzɔtɔe la, ame siwo ʋu la dometɔ geɖe—siwo dome nye hã mele la—ke ɖe gbɔgbɔmekesinɔnuwo ŋu. Míeva kpɔe dze sii be viɖe le agbea ŋu, eye be Yehowa subɔsubɔ hea dzidzɔ gãtɔ kekeake vanɛ na ame.

[Nɔnɔmetata si le axa 32]

Nɔviŋutsu Martínez ƒe ƒomea me tɔ siwo le nyateƒea me la katã kloe