Ŋɔŋlɔawo xlɔ̃ nu mí be: “Dzi mee susu vɔ̃wo bubu, amewuwuwo, ahasiwɔwɔwo, agbe gbegblẽ nɔnɔwo, fififiwo, aʋatsoɖaseɖiɖiwo, busunyagbɔgblɔwo doa go tso.” (Mat. 15:19) Míaƒe kpɔɖeŋudzi la ate ŋu able mí eye wòana míava nɔ afɔɖeɖe aɖe si tsi tre ɖe Mawu ƒe lɔlɔ̃nu ŋu la ta ʋlim. Eye ate ŋu adzɔ be míakpɔ nu si le dzɔdzɔm la adze sii o va se ɖe esime míewɔ bometsinu vɔ hafi. Nu kae ate ŋu akpe ɖe mía ŋu be míade dzesi míaƒe dzimedidiwo ale be míagaɖe afɔ manyomanyo aɖeke o?

Xlẽ Biblia la gbe sia gbe eye nàde ŋugble tso nu si wògblɔ la ŋu.

Apostolo Paulo ŋlɔ bena: “Mawu ƒe nya la le agbe, eye ŋusẽ le eŋu, eye wòɖana wu yi nueve sia yi nueve, eye wòƒona ɖe ame yi ɖamaa keke luʋɔ kple gbɔgbɔ . . . me.” Mawu ƒe nya si le Biblia me la ‘tea ŋu dzea si dzimesusuwo kple tameɖoɖowo.’ (Heb. 4:12) Ne míetsɔa nya siwo Ŋɔŋlɔawo gblɔ la sɔna kple mía ɖokuiwo la, ate ŋu akpe ɖe mía ŋu be míadze si míaƒe dzimedidiwo. Eya ta ele vevie be míaxlẽ Mawu ƒe Nya la gbe sia gbe eye míade ŋugble le nu si wògblɔ la ŋu; esia akpe ɖe mía ŋu be míava nɔ nuwo ŋu bum abe ale si Yehowa bua woe ene.

Ŋɔŋlɔawo me aɖaŋuɖoɖowo xɔxɔ kple Biblia me mɔfiamewo dzi wɔwɔ akpɔ ŋusẽ ɖe míaƒe dzitsinya, si nye ŋutete tɔxɛ si “ɖia ɖase” le mía me, la dzi.  (Rom. 9:1) Nya si míaƒe dzitsinya gblɔna na mí la ate ŋu axe mɔ na mí be míaganɔ afɔɖeɖe gbegblẽ aɖe ta ʋlim o. Gawu la, kpɔɖeŋu siwo ate ŋu anye “nuxɔxlɔ̃ na mí” la hã le Biblia me. (1 Kor. 10:11) Nusɔsrɔ̃ tso wo me ate ŋu akpe ɖe mía ŋu be míagaɖe afɔ gbegblẽ o. Nu kae wòle be mía dometɔ ɖe sia ɖe nawɔ?

Do gbe ɖa na Mawu be wòakpe ɖe ŋuwò nàde dzesi wò dzimedidiwo.

Yehowa “dzroa dziwo me kpɔna.” (1 Kron. 29:17) Enye “gã wu míaƒe dzi, eye wònya nuwo katã.” (1 Yoh. 3:20) Míate ŋu aflu Mawu o. Ne míegblɔ míaƒe dzimaɖitsitsiwo, seselelãmewo, kple didiwo na Yehowa le gbedodoɖa me faa la, ate ŋu akpe ɖe mía ŋu míade dzesi míaƒe dzimedidiwo. Míate ŋu abia Mawu gɔ̃ hã be ‘wòawɔ dzi dzadzɛ de mía me.’ (Ps. 51:12) Eya ta be míade dzesi nu siwo ŋu míaƒe dzi ku ɖo la, mele be míaŋe aɖaba aƒu nunana tɔxɛ si nye gbedodoɖa la dzi o.

Ðo to nyuie ne ède Kristotɔwo ƒe kpekpewo.

Ne míelé to ɖe nu siwo wofiaa mí le Kristotɔwo ƒe kpekpewo me ŋu la, ate ŋu akpe ɖe mía ŋu míadzro ame si míenye le ememe—míaƒe dzi—la me anukwaretɔe. Togbɔ be menye nyatakaka yeyewoe míaxɔ le kpekpe ɖe sia ɖe me o hã la, ne míede wo la, míesea Biblia ƒe gɔmeɖosewo kple ŋkuɖodzinya veviwo gɔme ɖe edzi wu, siwo kpena ɖe mía ŋu míedzroa míaƒe dzimedidiwo me kpɔna. Mía nɔviwo ƒe nyaŋuɖoɖowo hã wɔa akpa vevi aɖe le asitɔtrɔ wɔwɔ tso ame si míenye le ememe ŋu la ŋu. (Lod. 27:17) Ne míeɖe mía ɖokui ɖe aga eye míedea ha edziedzi kple mía nɔviwo le Kristotɔwo ƒe kpekpeawo me o la, ate ŋu agblẽ nu le mía ŋu. Ate ŋu awɔe be ‘míava nɔ míawo ŋutɔwo ƒe dzodzrowo yome tim.’ (Lod. 18:1) Eya ta nunya le eme be míabia mía ɖokuiwo be: ‘Ðe wònye numame nam be made kpekpeawo katã eye mana wòaɖe vi nama?’—Heb. 10:24, 25.

Míaƒe dzi alakpatɔ la ate ŋu akplɔ mí atrae le agbenɔnɔ ƒe akpa vovovowo me. Mina míadzro wo dometɔ ene me: ŋutilãmenuwo yome titi, aha muamewo zazã, xɔlɔ̃ siwo míetiana, kple nu siwo míetsɔ ɖea modzaka.

Ŋutilãmenuwo yome titi.

Didi be míakpɔ míaƒe ŋutilãmenuhiahiãwo gbɔ sɔ le dzɔdzɔme nu. Ke hã Yesu gblɔ nuxlɔ̃amekpɔɖeŋu aɖe ku ɖe ŋutilãmenuwo bubu nu vevii akpa ŋu. Le Yesu ƒe kpɔɖeŋu aɖe me la, ekpe mí be míade ŋugble tso ŋutsu kesinɔtɔ aɖe si ƒe nudzraɖoƒewo yɔ taŋtaŋ kple nukuwo la ŋu. Teƒe aɖeke megali wòaƒo nuku yeye siwo wòŋe la nu ƒu ɖo o. Ŋutsua ɖoe be yeamu yeƒe nudzraɖoƒewo, eye yeatu esiwo lolo wu. Egblɔ be: “Afi mae madzra nye nuku la katã kple nye nu nyuiwo katã ɖo; eye magblɔ na nye luʋɔ be: ‘Luʋɔ, wodzra nu nyui geɖe ɖo ɖi na wò hena ƒe geɖewo; ɖe dzi ɖi, ɖu nu, no nu, na dzi nadzɔ wò.’” Ke hã ŋutsu kesinɔtɔ sia ƒe susu meyi nyateƒenya vevi aɖe si mate ŋu aƒo asa na o, si nye be yeƒe agbe nu ate ŋu atso le zã ma ke me, la dzi o.—Luka 12:16-20.

Esi míele tsitsim la, míate ŋu ava nɔ dzi tsim ɖe ɖoɖowɔwɔ ɖe ŋutilãmededienɔnɔ le tsitsime ŋu eye ɖewohĩ míava nɔ dɔ wɔm le fiẽ siwo míayi kpekpewo me alo míagblẽ míaƒe Kristotɔwo ƒe agbanɔamedziwo ɖi le  mɔ aɖe nu ahatsɔ nanewo anɔ taflatsɛ dom. Ðe mele be míanɔ ŋudzɔ ɖe nuwɔwɔ alea ŋu oa? Alo ɖewohĩ sɔhɛwoe míenye eye míekpɔe be agbemedɔ aɖeke meli si nyo wu ɣeyiɣiawo katã ƒe subɔsubɔdɔa o. Ke hã ɖe míetutua mɔɖeɖedɔa wɔwɔ yia ŋgɔ henɔa susum be ele be míakpɔ ga gbã? Ðe mele be míawɔ mía tɔ sinua fifia be míanye kesinɔtɔwo le Mawu gbɔ oa? Ame kae nya ne míaganɔ agbe etsɔ?

Aha muamewo zazã.

Lododowo 23:20 gblɔ be: ‘Mèganɔ wain tsu nolawo dome o.’ Ne aha muamewo nono dzroa ame aɖe vevie la, ate ŋu atsɔ nanewo anɔ taflatsɛ dom ɖe enono edziedzi ta. Ate ŋu agblɔ be ɖe yenoa aha tsɔ ɖua nu, ke menye be yeamu o. Ne míehiã aha muame hafi ate ŋu aɖu nu la, ke ɣeyiɣi de azɔ be míadzro míaƒe dzimedidiwo me akpɔ anukwaretɔe.

Xɔlɔ̃ siwo míetiana.

Nyateƒee, míado go dzimaxɔsetɔwo le suku, le dɔme kple le gbeadzi godoo. Gake esia to vovo kura na hadede kpli wo, alo be míana mía kpli wo dome nanɔ kplikplikpli. Ðe míeʋlia hadede mawo ta hegblɔna be nɔnɔme nyui geɖewo le wo sia? Biblia la gblɔ be: “Migana woakplɔ mi atrae o. Hadede vɔ̃wo gblẽa nɔnɔme nyuiwo.” (1 Kor. 15:33) Abe ale si ɖinu sue aɖe ate ŋu agblẽ tsi si le dzadzɛ ene la, xɔlɔ̃dzedze ame siwo mevɔ̃a Mawu o ate ŋu agblẽ ƒomedodo si le mía kple Mawu dome, ana xexea ƒe nukpɔsusuwo nava su mía si eye míava nɔ awu dom, anɔ nu ƒom ahanɔ agbe nɔm abe woawo ke ene.

Nu siwo míetsɔ ɖea modzaka.

Egbegbe mɔ̃ɖaŋununya wɔe be modzakaɖeɖewo va bɔ, gake wo dometɔ geɖe mesɔ na Kristotɔ o. Paulo gblɔ be: ‘Migana woayɔ makɔmakɔnyenye ƒomevi aɖeke ŋkɔ teti gɔ̃ hã le mia dome o.’ (Ef. 5:3) Ke ne toɖoɖo nu makɔmakɔ aɖe alo ekpɔkpɔ dzroa míaƒe dzia ya ɖe? Míate ŋu agblɔ be ehiã be ame sia ame naɖe modzaka, eye nu si ame aɖe wɔ tsɔ ɖe modzakae la nye ame ŋutɔ ƒe nya. Gake mina míawɔ ɖe Paulo ƒe aɖaŋuɖoɖoa dzi eye míagaɖe mɔ míaƒe ŋku nakpɔ nu makɔmakɔ aɖeke loo alo míaƒe to nasee o.

Ne nu siwo míaƒe dzi alakpatɔ la di la wɔwɔ ƒe mɔ̃ ɖe mí eye wòva zu numame na mí be míeʋlia míaƒe nuwɔna gbegblẽwo ta hã la, míate ŋu awɔ tɔtrɔ. (Ef. 4:22-24) Bu egbegbe kpɔɖeŋu eve ŋu kpɔ.

Eva hiã be nɔviŋutsu Miguel * nawɔ tɔtrɔ le ale si wòbua ŋutilãmenuwoe ŋu. Egblɔ tso eƒe ƒomea ŋu be: “Míele du aɖe si me wobua nutovɛ yeyewo kple mɔ̃ɖaŋunu nyuitɔ siwo naa dzidzeme ame la nu vevii la me. Ɣeaɖeɣi va yi la, meɖoe be xexea ƒe nutovɛ ɖe sia ɖe si mate ŋui la nasu asinye, eye mesusui be mate ŋu awɔ esia evɔ nyemazu ŋutilãmenudila o. Eteƒe medidi o, meva de dzesii be ŋutilãmenuwo yome titi le abe mɔ aɖe si seɖoƒe meli na o dzi zɔzɔ ene. Medo gbe ɖa na Yehowa tso nye nukpɔsusu kple dzimedidi sia ŋu. Megblɔ na Yehowa be míedi be míasubɔe bliboe abe ƒome ene. Míete ŋu wɔ nyametsotso be míanɔ agbe tsɛ eye míeʋu yi afi si Fiaɖuƒegbeƒãɖelawo hiã le wu. Eteƒe medidi o, míedze mɔɖeɖedɔa wɔwɔ gɔme. Míeva kpɔe be menye ɖe míehiã ŋutilãmenu geɖe hafi ate ŋu anɔ agbe si me dzidzɔ le o.”

Nɔviŋutsu Lee ƒe kpɔɖeŋua hã ɖe ale si ɖokuimedzodzro anukwaretɔe kpe ɖe eŋu wòɖe asi le hadede vɔ̃wo ŋu la fia. Lee gblɔ be: “Le nye dɔwɔɖui ta la, medea ha kple asitsala siwo tso duta la edziedzi. Menyae be aha tsu nono ayi edzi le hadede mawo me, gake kpekpe mawo dede doa dzidzɔ nam. Zi geɖe la, esusɔna vie ko mamu aha, gake emegbe la, eva veam. Eva hiã be madzro nye dzi me akpɔ anukwaretɔe. Mawu ƒe Nya la me aɖaŋuɖoɖowo kple hamemetsitsiwo ƒe nuxlɔ̃amewo kpe ɖe ŋunye mekpɔe dze sii be menɔ ha dem kple ame siwo melɔ̃ Yehowa o. Fifia mezãa telefon tsɔ wɔa nye asitsadɔa ale si mate ŋui, eye meɖe hadede kple asitsala siawo dzi kpɔtɔ kura.”

Ele be míaɖi anukware na mía ɖokuiwo eye míade dzesi míaƒe dzimedidiwo. Le esia wɔwɔ me la, ele be míado gbe ɖa abia Yehowa ƒe kpekpeɖeŋu elabena míenyae be “enya dzi me gogloeaƒe ke.” (Ps. 44:22) Mawu tsɔ eƒe Nya la, si míate ŋu azã abe ahuhɔ̃e ene la hã na mí. (Yak. 1:22-25) Ŋkuɖodzinya kple nuxlɔ̃ame siwo míexɔna to Kristotɔwo ƒe agbalẽwo kple kpekpeawo dzi hã le vevie! Esiawo ate ŋu akpe ɖe mía ŋu míadzɔ míaƒe dziwo ŋu ahayi edzi azɔ le dzɔdzɔenyenye ƒe mɔwo dzi.