1. Aleke duƒula aɖe ƒe nɔnɔme ate ŋu akpe ɖe mía ŋu míaɖoe kplikpaa be míagana ta o?

MARY DECKER nye duƒula si ƒe ŋkɔ de du tso esime wònye ƒewuivi ko. Le ƒe 1984 ƒe Olimpik hoʋiʋli me la, eyae amewo nɔ mɔ kpɔm be wòaxɔ gbã le meta 3,000 ƒe duɖimekekea me. Gake mete ŋu wu duƒuƒua nu o. Ekli duƒula bubu ƒe afɔ eye wòdze anyi hexɔ abi. Efa avi. Ðe wova kɔe do goe le flia me. Gake esia mena Mary dzudzɔ duƒuƒu o. Le ƒe 1985 me la, eyae xɔ gbã le nyɔnuwo ƒe agbadroƒe ɖeka ƒe duɖimekeke aɖe me, eye va se ɖe ɣemaɣi la, ame aɖeke mewu du ma ƒuƒu nu kaba de enu kpɔ o.

2. Du ka tɔgbi ƒum Kristotɔ vavãwo le, eye aleke wòle be míaƒu duae?

² Mí Kristotɔwo hã míele duɖime aɖe kem. Ele be míaɖoe kplikpaa be míaɖu dzi. Menye du kpui aɖe si hiã afɔ ɖeablɛ ƒum míele o. Eye menye kamedede ƒe duƒuƒu si ame ate ŋu atɔ agbɔ ɖe eme ale si wòdi hãe o. Ke boŋ enye dulegbeƒuƒu si bia dzidodo hafi ame nate ŋu aɖu dzi. Esi apostolo Paulo nɔ lɛta ŋlɔm na Kristotɔ siwo nɔ blema Korinto-du si xɔ ŋkɔ le duƒuƒu ƒe hoʋiʋliwo me la, ezã duƒula tsɔ wɔ kpɔɖeŋui. Egblɔ be: “Ðe mienyae be duƒula siwo le ho ʋlim la katãe ƒua dua, gake ame ɖeka koe xɔa dziɖuɖufetu la oa? Miƒu du le mɔ si ana miaxɔe la nu.”—1 Kor. 9:24.

3. Nu kae ana duƒula ɖe sia ɖe naxɔ agbe mavɔ ƒe dziɖuɖufetu la?

³ Biblia la de dzi ƒo na mí be míayi kpɔɖeŋudu sia ƒuƒu dzi. (Mixlẽ 1 Korintotɔwo 9:25-27.) Dziɖuɖufetu lae nye agbe mavɔ, le dziƒo na Kristotɔ amesiaminawo loo alo le anyigba dzi na duƒula susɔeawo. Le duƒuƒu sia me la, ame sia ame si do dzi ƒu dua va se ɖe nuwuwu la axɔ dziɖuɖufetu. (Mat. 24:13) Nu si ko ate  ŋu ana ame nado kpo fetu sia xɔxɔe nye ne meƒu dua ɖe seawo nu o loo alo wu duƒuƒua nu o. Du sia ƒuƒu me koe ame ate ŋu axɔ dziɖuɖufetu si nye agbe mavɔ le.

4. Nu kae na be agbe mavɔ dua ƒuƒu mele bɔbɔe o?

⁴ Dua ƒuƒu va se ɖe nuwuwu mele bɔbɔe ya o. Ehiã ame ɖokui mamla kple tameɖoɖo kplikpaa. Yesu Kristo koe nye ame si te ŋu ƒu du sia va se ɖe nuwuwu eye mekli nu zi ɖeka pɛ hã le mɔa dzi o. Gake nusrɔ̃la Yakobo gblɔ be Kristo yomedzelawo ‘katã klia nu zi geɖe.’ (Yak. 3:2) Ðe esia menye nyateƒe oa? Míawo ŋutɔwo kple ame bubuwo ƒe blibomademade ɖea fu na mí katã. Eya ta míate ŋu akli nu, eye ŋgɔyiyi nazu dɔ na mí. Míate ŋu adze anyi gɔ̃ hã, gake ne esia dzɔ la, míetsona gayia dua ƒuƒu dzi. Ame aɖewo dze anyi vevie ale gbegbe be ehiã be woakpe ɖe wo ŋu be woatso agayi dua ƒuƒu dzi. Eya ta ate ŋu adzɔ be míakli nu alo adze anyi, eye esia ate ŋu adzɔ zi geɖe gɔ̃ hã.—1 Fia. 8:46.

5, 6. (a) Nu ka tae wogblɔ be ‘nukikli aɖeke meli’ na Kristotɔ o, eye nu kae akpe ɖe ame si dze anyi ŋu be ‘wòagafɔ’? (b) Nu ka tae ame aɖewo megatea ŋu tsona ne wokli nu o?

⁵ Nu si ame aɖe awɔ nenye be ekli nu alo dze anyi le gbɔgbɔ mee aɖe ame si ƒomevi wònye la afia. Ame siwo kli nu alo dze anyi la dometɔ aɖewo trɔ dzi me heyi Mawu subɔsubɔ dzi; gake ame bubu aɖewo ya gbe dzimetɔtrɔ. Lododowo 24:16 gblɔ be: ‘Ame dzɔdzɔe ate ŋu adze anyi zi adre, eye wòagafɔ; ke ame vɔ̃ɖiwo dzea dzɔgbevɔ̃e me.’

⁶ Yehowa maɖe mɔ nɔnɔme sesẽ siwo ana ame nakli nu alo adze anyi ale gbegbe be magate ŋu afɔ o la nava ame siwo ɖoa dzi ɖe eŋu la dzi o. Kakaɖedzi le mía si be Yehowa akpe ɖe mía ŋu ‘míafɔ’ ale be míayi edzi asubɔe. Ðe esia mefaa akɔ na mí ame siwo katã lɔ̃ Yehowa vevie tso dzi me oa? Ame vɔ̃ɖiwo ya madi be yewoafɔ o. Womedia gbɔgbɔ kɔkɔea ƒe kpekpeɖeŋu o, eye ne Mawu ƒe amewo be yewoana kpekpeɖeŋu wo hã la, wogbena. Gake  ‘ame siwo lɔ̃a Yehowa ƒe sea’ ya la, nukikli aɖeke meli si ana woadzudzɔ agbedua ƒuƒu keŋkeŋ o.—Mixlẽ Psalmo 119:165.

7, 8. Nu kae ame si ‘dze anyi’ awɔ be Mawu nave enu?

⁷ Gbɔdzɔgbɔdzɔ wɔe be ame aɖewo wɔ nu vɔ̃ suesue aɖewo—zi gbɔ zi geɖe gɔ̃ hã. Gake Yehowa bua wo ame dzɔdzɔewoe ne ‘wogafɔna,’ si fia be wotrɔa dzi me nyateƒetɔe hedzea agbagba be yewoayi nuteƒewɔwɔ dzi. Esia dze le ale si Mawu wɔ nu ɖe blema Israel viwo ŋu me. (Yes. 41:9, 10) Lododowo 24:16 si me nyawo míeyɔ va yi la menɔ gbe tem ɖe míaƒe ‘anyidzedze’ dzi o, ke ɖe ale si mía Mawu nublanuikpɔla la kpena ɖe mía ŋu ‘míegafɔna’ boŋ dzi. (Mixlẽ Yesaya 55:7.) Yehowa Mawu kple Yesu Kristo ɖee fia be yewoka ɖe mía dzi elabena wodea dzi ƒo na mí be ‘míagafɔ.’—Ps. 86:5; Yoh. 5:19.

⁸ Ne duƒula kli nu alo dze anyi le dulegbeƒuƒu me la, ɣeyiɣi kpɔtɔ nɔa esi be wòatso kaba ayi dua ƒuƒu dzi ahawu enu. Míenya ‘ŋkeke kple gaƒoƒo’ si míaƒe agbe mavɔ dua ƒuƒu awu nu o. (Mat. 24:36) Ke hã, zi ale si míele agbagba dzem be míagakli nu o la, zi nenemae míanɔ ŋgɔ yim, anɔ dua ƒuƒu dzi ahawu enu dzidzedzetɔe. Nu kawoe akpe ɖe mía ŋu be míagakli nu o?

9. Nu siwo ate ŋu azu nukikli na mí dometɔ kawo mee míadzro?

⁹ Mina míadzro nu atɔ̃ aɖewo siwo nyea nukikli alo nuɖiaɖia na ame la me. Woawoe nye míawo ŋutɔwo ƒe gbɔdzɔgbɔdzɔwo, ŋutilã ƒe nudzodzrowo, haxɔsetɔ aɖe ƒe nu madzɔmadzɔ wɔwɔ ɖe mía ŋu, xaxa alo yometiti, kple ame bubuwo ƒe blibomademade. Gake mina wòanɔ susu me na mí be ne míekli nu hã la, Yehowa gbɔa dzi ɖi na mí blewu. Metsɔnɛ enumake be míezu nuteƒemawɔlawo o.

10, 11. Gbɔdzɔgbɔdzɔ kawo dzie wòle be David naɖu?

¹⁰ Míate ŋu atsɔ míawo ŋutɔwo ƒe gbɔdzɔgbɔdzɔwo asɔ kple kpe siwo le mɔ me na duƒula. Míade dzesi gbɔdzɔgbɔdzɔ eve—siwo nye ɖokuidzimaɖumaɖu kple amegbetɔvɔvɔ̃—le nu siwo dzɔ ɖe Fia David kple apostolo Petro dzi me.

¹¹ Ðokuidzimaɖumaɖu nye Fia David ƒe gbɔdzɔgbɔdzɔ, eye esia dze le eya kple Bat-Seba ƒe nudzɔdzɔa me. Eye esi Nabal gblɔ nya veamewo ɖe David ŋu la, David ƒe dzimagbɔɖi na wòda vo kloe. Ele eme be David meɖu eɖokui dzi le nudzɔdzɔ siawo me o ya, gake mena ta le nu si dze Yehowa ŋu wɔwɔ me o. Wokpe ɖe eŋu wògali ke le gbɔgbɔ me.—1 Sam. 25:5-13, 32, 33; 2 Sam. 12:1-13.

12. Nu kae na Petro yi agbedua ƒuƒu dzi togbɔ be ewɔ vodada gɔ̃ hã?

¹² Amegbetɔvɔvɔ̃ kpe Petro dzi, eye esia na wòwɔ vodada ɣeaɖewoɣi; ke hã eyi edzi wɔ nuteƒe na Yesu kple Yehowa. Le kpɔɖeŋu me, egbe nu le eƒe Aƒetɔ la gbɔ, menye zi ɖeka o, ke boŋ zi etɔ̃ sɔŋ. (Luka 22:54-62) Emegbe la, Petro wɔ nane si medze Kristotɔ o esime wòwɔ nu ɖe Dukɔwo me tɔ siwo va zu xɔsetɔwo ŋu abe ɖe asixɔxɔ mele wo ŋu de Kristotɔ Yudatɔ siwo wotso aʋa na la nu o ene. Gake apostolo Paulo ya kpɔe be Petro ƒe nuwɔna sia mesɔ o, elabena mele be míanɔ vovototo dem amewo me le hamea me o. Esi Paulo medi be nɔnɔme sia nayi edzi le hamea me o ta la, eka mo na Petro tẽe. (Gal. 2:11-14) Ðe mokaname sia na Petro do dziku ale gbegbe be wòdzudzɔ agbedua ƒuƒua? Kura o. Elɔ̃ xɔ Paulo ƒe nuxlɔ̃amea, ewɔ edzi, eye wòyi agbedua ƒuƒu dzi.

13. Aleke dɔlényawo ate ŋu azu nukikli na mí?

¹³ Ɣeaɖewoɣi míaƒe gbɔdzɔgbɔdzɔwo ate ŋu anye dɔlényawo. Esia hã ate ŋu azu nukikli na mí. Ate ŋu ana dzo si le mía me ɖe subɔsubɔdɔa ŋu dzi naɖe kpɔtɔ, eye ɖeɖi nate mía ŋu le agbedua ƒuƒu me. Le kpɔɖeŋu me, esi nɔvinyɔnu aɖe si le Japan xɔ nyɔnyrɔ ƒe 17 megbe la, dɔlényawo va nɔ fu ɖem nɛ vevie. Esia na wòtsi dzi  ale gbegbe be wòva nɔ gbɔdzɔgbɔdzɔm le gbɔgbɔ me. Emegbe edzudzɔ gbeadzidede. Hamemetsitsi eve yi ɖasrãe kpɔ. Woƒe nya siwo wogblɔ tufafatɔe kpe ɖe eŋu wògadze kpekpeawo dede gɔme. Nɔvinyɔnua gblɔ be: “Esi meva kpekpea la, ale si nɔviwo xɔm atuu vividoɖeameŋutɔe la wɔ dɔ ɖe dzinye ŋutɔ.” Fifia mía nɔvinyɔnu sia gatrɔ va le agbedua ƒum.

14, 15. Nu kae wòle be míaɖoe kplikpaa awɔ ku ɖe dzodzro vɔ̃wo ŋu? Wɔ eƒe kpɔɖeŋu.

¹⁴ Ŋutilã ƒe nudzodzrowo hã zu nukikli na ame geɖe. Ele vevie be míawɔ nu sia nu si míate ŋui aɖu tetekpɔ sia dzi ale be míanɔ dzadzɛ le susu me, agbenɔnɔ me, kple gbɔgbɔ me. Mina míaɖo ŋku Yesu ƒe aɖaŋuɖoɖoa dzi be míaho alo alã nu sia nu si le nukikli zum na mí la “aƒu gbe” le kpɔɖeŋunyagbɔgblɔ nu, ne eganye míaƒe ŋku alo míaƒe asie wònye gɔ̃ hã o. Ðe esia mefia be míaɖe agbe gbegblẽ nɔnɔ ƒe susuwo kple nuwɔna siwo na mía nɔvi aɖewo dze anyi hedzudzɔ agbedua ƒuƒu la hã ɖa keŋkeŋ oa?—Mixlẽ Mateo 5:29, 30.

¹⁵ Nɔviŋutsu aɖe si wonyi le nyateƒea me gblɔ be ɣeyiɣi didi aɖee nye esia si yele avu wɔm kple ŋutsu ŋutsugbɔdɔla ƒe dzodzrowo. Egblɔ be: “Nyemevona le ɖokuinye me kura o. Ewɔna nam be meto vovo le nɔviwo dome.” Kaka wòaxɔ ƒe 20 la, ezu gbesiagbe mɔɖela kple subɔsubɔdɔwɔla le hamea me. Gake ekli nu vevie esi wòwɔ nu vɔ̃ gã aɖe; hamemetsitsiwo tsɔ Ŋɔŋlɔawo ɖɔe ɖo, wohe to nɛ, eye wòlɔ̃ xɔ woƒe kpekpeɖeŋu. Nu siwo na wògatso ɖe tsitrenu heyi agbedua ƒuƒu dzie nye gbedodoɖa, Mawu ƒe Nya la sɔsrɔ̃, kple didi si le eme be yeakpe ɖe ame bubuwo ŋu. Egblɔ le ƒe geɖe megbe be: “Nuwɔna gbegblẽ ma ƒe susu gavaa tame nam ɣeaɖewoɣi, gake nyemeɖea mɔ wòkpɔa ŋusẽ ɖe dzinye o. Mesrɔ̃e be Yehowa maɖe mɔ woate mí akpɔ wu esi nu míate ŋu anɔ te ɖo o. Eya ta meka ɖe edzi vevie be Mawu nyae be mate ŋu anɔ te ɖe enu.” Nɔviŋutsu sia gblɔ kpee be: “Tetekpɔ ɖe sia ɖe si nu manɔ te ɖo la aɖe vi nam godoo elabena esia ana mayi xexe yeyea me. Ema dim mele! Gake hafi ɣemaɣi naɖo la, ele be mayi edzi aʋli vevie.” Nɔviŋutsu sia ɖoe kplikpaa be yeayi agbedua ƒuƒu dzi.

16, 17. (a) Nu kae kpe ɖe nɔviŋutsu aɖe si susu be wowɔ nu madzɔmadzɔ ɖe ye ŋu la ŋu? (b) Ame ka dzie wòle be míana míaƒe ŋku nanɔ ale be míagakli nu o?

¹⁶ Haxɔsetɔ aɖe ƒe nu madzɔmadzɔ wɔwɔ ɖe mía ŋu hã ate ŋu aɖia mía nu. Nɔviŋutsu aɖe si le France, si nye hamemetsitsi tsã la xɔe se be nɔvi aɖe wɔ nu madzɔmadzɔ ɖe ye ŋu eye wòdo dziku vevie. Eya ta edzudzɔ kpekpeawo kple gbeadzi dede. Hamemetsitsi eve yi ɖasrãe kpɔ, woɖo to se eƒe nyawo katã veveseɖeamenutɔe, eye wometsi nya ɖe enu esi wòle eƒe susu gblɔm o. Wode dzi ƒo nɛ be wòatsɔ eƒe nyawo adro ɖe Yehowa dzi, eye wona wòkpɔe be nu vevitɔ kekeakee nye be wòawɔ nu si adze Mawu ŋu. Exɔ kpekpeɖeŋua, egayi agbedua ƒuƒu dzi, eye wòle vevie dom nu le hamea me.

¹⁷ Ele be mí Kristotɔwo katã míana míaƒe ŋku nanɔ hamea ƒe Ta, si nye Yesu Kristo, ŋu ke menye mía nɔvi madebliboawo ŋu o. Yesu, ame si ƒe ŋkuwo le “abe dzo ƒe aɖe ene,” kpɔa nu sia nu tsitotsito eye wòsea nɔnɔmeawo gɔme nyuie wu mí. (Nyaɖ. 1:13-16) Le kpɔɖeŋu me, eya ate ŋu akpɔe be nu si dze abe nu madzɔmadzɔ wɔwɔ ene le mía gbɔ la nye nya bliboa gɔme masemase. Yesu akpɔ hamea ƒe kuxiwo gbɔ nyuie le ɣeyiɣi si sɔ dzi. Eya ta mele be míana mía nɔvi Kristotɔwo ƒe nuwɔnawo alo nyametsotsowo nazu nukikli na mí o.

18. Nu kae akpe ɖe mía ŋu míanɔ te ɖe xaxawo alo nɔnɔme madeamedziwo nu?

¹⁸ Nu eve bubu siwo agate ŋu anye nukikli na míe nye xaxa alo yometiti, kple hamea me tɔ bubuwo ƒe blibomademade. Yesu gblɔ le nukuwula ƒe lododoa me be, “xaxa alo yometiti” si ava ame siwo xɔ yeƒe nyawo  dzi la, azu nukikli na wo dometɔ aɖewo. Yometitia ɖatso ƒometɔwo, aƒelikawo, alo dziɖuɖumegãwo gbɔ o, ate ŋu akpɔ ŋusẽ ɖe ame si “meli ke le eɖokui me o,” alo li ke le nyateƒea me o la koŋ dzi vevie. (Mat. 13:21) Gake ne dzi ƒe nɔnɔme nyui le mía si la, Fiaɖuƒea ƒe nukuwo akpe ɖe mía ŋu míaƒe xɔse nali ke. Ne èle xaxawo me tom la, dze agbagba nànɔ ŋugble dem le nu siwo dze kafukafu la ŋu. (Mixlẽ Filipitɔwo 4:6-9.) Yehowa ado ŋusẽ mí míanɔ te ɖe xaxawo nu, eya ta mele be míaɖe mɔ nɔnɔme madeamedziwo nazu nukikli na mí o.

19. Nu kae akpe ɖe mía ŋu be mía nɔviwo ƒe vodada nagazu nuɖianu na mí o?

¹⁹ Ewɔ nublanui be ame aɖewo na nɔvi bubuwo ƒe blibomademade ɖia wo nu ale gbegbe be wodzudzɔ agbedua ƒuƒu. Nyametsotso siwo ame aɖewo nɔ te ɖe woƒe dzitsinya dzi wɔ la gɔ̃ hã ɖia nɔvi aɖewo nu le esi woƒe nukpɔsusu mesɔ kple wo tɔ o ta. (1 Kor. 8:12, 13) Ne nɔvi aɖe dze agɔ le mía dzi la, ɖe wòle be míatsɔe awɔ nya gãea? Biblia la xlɔ̃ nu mí Kristotɔwo be míadzudzɔ ʋɔnudɔdrɔ̃, míatsɔ ake mía nɔewo, eye míalɔ̃ faa aɖe asi le nya ŋu. (Luka 6:37) Ne èkpɔ nuklikpe aɖe le wò mɔ me la, bia ɖokuiwò be: ‘Nye ŋutɔ nye nukpɔsusuwoe metsɔ le ʋɔnu drɔ̃m amewoa? Esi menyae be mí katã míede blibo o ta la, ɖe haxɔsetɔ aɖe ƒe blibomademade ana madzudzɔ agbedua ƒuƒua?’ Lɔlɔ̃ si míeɖo na Yehowae akpe ɖe mía ŋu be míaɖoe kplikpaa be ame aɖeke ƒe nuwɔna nagaxe mɔ na mí le agbedua ƒuƒu va se ɖe nuwuwu me o.

20, 21. Nu kae nèɖo kplikpaa be yeawɔ le agbedua ƒuƒu me?

²⁰ Èɖoe kplikpaa be ‘yeawu duɖimekekea nua’? (2 Tim. 4:7, 8) Ekema tsɔ ɖokuisinusɔsrɔ̃ nu vevii. Wɔ numekuku le Biblia kple míaƒe agbalẽwo me, de ŋugble le nufiameawo ŋu, eye nàkpɔ nu siwo ate ŋu azu nukikli na wò la adze sii. Do gbe ɖa nàbia Mawu ƒe gbɔgbɔ kɔkɔea be wòakpe ɖe ŋuwò nàli ke le gbɔgbɔ me. Ðo ŋku edzi be womabu duƒula aɖeke be edo kpo nu le esi wòkli nu alo dze anyi ɣeaɖeɣi ta o; elabena ate ŋu atso agayi dua ƒuƒu dzi. Ate ŋu akpɔ nuklikpewo adze sii bɔbɔe ahanya ale si wòaɖe afɔe, eye wòasrɔ̃ nu tso xɔse ƒe dodokpɔ siwo me wòto va yi la me.

²¹ Biblia na míenya be agbe mavɔ dua ƒuƒu bia kutrikuku, ke menye duƒulawo dome nɔnɔ dzro ko o. Mele abe ale si míaɖo ʋu anɔ eme dziɖeɖitɔe be wòatsɔ mí ayi dedienɔƒe ene o. Ele be míawo ŋutɔwo míaƒu dua ŋutɔŋutɔ. Ne míedo vevie nu la, “ŋutifafa gã” si tso Yehowa gbɔ la anɔ abe yaƒoƒo si le mía tutum ɖo ta ŋgɔ la ene. (Ps. 119:165) Ekema míate ŋu aka ɖe edzi be ayra mí fifia, eye wòana eƒe yayra mavɔwo nasu mía dometɔ ɖe sia ɖe si wu agbedua ƒuƒu nu la si.—Yak. 1:12.