1. Nu ka tae yameʋukulawo léa ŋku ɖe nu vovovowo ŋu nyuie hafi hona?

TOGBƆ be wowɔ yameʋu deŋgɔwo egbea hã la, ɣesiaɣi si wòle be yameʋukula naho yameʋu aɖe la, ele be wòalé ŋku ɖe nu vovovo siwo wu 30 ƒe dɔwɔwɔ nyuie ŋu. Ne mezɔ ɖe eƒe mɔfiamegbalẽa dzi pɛpɛpɛ helé ŋku ɖe nu veviawo ŋu nyuie hafi ho o la, ate ŋu adze afɔku bɔbɔe. Ènya yameʋukula siwo wodea dzi ƒo na edziedzi be woawɔ esia ɣesiaɣia? Wo dometɔ siwo bi ŋutɔ lae! Woawoe nye ame siwo ate ŋu aka ɖe wo ɖokuiwo dzi fũu akpa ahado kpo ŋkuléle ɖe nu siwo hiã ŋu.

2. Nu kawo ŋue wòanyo be Kristotɔ nanɔ ŋku lém ɖo edziedzi?

² Abe yameʋukula si dedienɔnɔ le vevie na ene la, wò hã àte ŋu ade dzesi nu vevi aɖewo siwo ŋu wòle be nànɔ ŋku lém ɖo be wò xɔse nagagbɔdzɔ le nɔnɔme sesẽwo me o. Èɖale Mawu subɔm ƒe geɖewoe nye esia loo alo èxɔ nyɔnyrɔ eteƒe medidi o, ele vevie be nànɔ ŋku lém ɖe wò xɔse kple ɖokuitsɔtsɔ na Yehowa Mawu ƒe nuvãnyenye ŋu. Ne míeléa ŋku ɖe nu vevi siawo ŋu edziedzi o la, ƒomedodo si le mía kple Mawu dome ate ŋu agblẽ. Biblia xlɔ̃ nu mí be: “Ame si susu be yele tsitre la nakpɔ nyuie be wòagadze anyi o.”—1 Kor. 10:12.

3. Nu kae wòhiã be Kristotɔ siwo nɔ Galatia nawɔ?

³ Ehiã be Kristotɔ siwo nɔ Galatia nanɔ ŋku lém ɖe woƒe xɔse ƒe sesẽme ŋu ahade asixɔxɔ gbɔgbɔmeblɔɖe si su wo si ŋu. Yesu to eƒe tafevɔsaa dzi ʋu mɔnukpɔkpɔ ɖi na ame siwo xɔ eyama dzi se la be wova nya Mawu le mɔ tɔxɛ aɖe nu—wova zu Mawu ƒe viwo! (Gal. 4:9) Be Galatiatɔ mawo nayi edzi anɔ ƒomedodo tɔxɛ ma me kple Mawu la, ele be woagbe ame siwo kpɔtɔ lé Yuda subɔsubɔ me ɖe asi, siwo nɔ tɔ tem ɖe Mose ƒe Sea me léle ɖe asi dzi la, ƒe nufiafiawo.  Hamea me tɔ siwo menye Yudatɔwo o siwo nye aʋamatsomatsotɔwo la menɔ Sea te kpɔ gɔ̃ hã o! Ehiã be Yudatɔwo kple ame siwo menye Yudatɔwo o siaa nawɔ ŋgɔyiyi le gbɔgbɔ me. Ele be woade dzesii be yewomate ŋu azu ame dzɔdzɔewo to Mose ƒe Sea dzi wɔwɔ me o.

4, 5. Aɖaŋu kae Paulo ɖo na Galatiatɔwo, eye aleke esia le vevie na míawo hã?

⁴ Susu vevi aɖe tae woŋlɔ aɖaŋu si apostolo Paulo ɖo na Galatiatɔwo la ɖe Biblia me ɖo: be Kristotɔ vavãwo nagatrɔ megbe de Biblia me nyateƒe xɔasiawo eye woatrɔ ayi nu siwo wogblẽ ɖi la gbɔ o. Menye Galatia hameawo ɖeɖe koe Yehowa tsɔ eƒe gbɔgbɔ ʋã apostoloa wòde dzi ƒo na o, ke boŋ esubɔlawo katãe wòde dzi ƒo na be woayi edzi anɔ te sesĩe.

⁵ Anyo be mí katã míaɖo ŋku afɔ siwo míeɖe hafi vo tso gbɔgbɔmekluvinyenye me heva zu Yehowa Ðasefowo la dzi. Be nàte ŋu awɔ esia la, de ŋugble tso nyabiase eve siawo ŋu kpɔ: Èɖo ŋku afɔ siwo nèɖe hafi dze na nyɔnyrɔxɔxɔ la dzia? Èɖo ŋku ale si nèwɔ va nya Mawu, eye Mawu va nya wò, si wɔe be gbɔgbɔmeblɔɖe su asiwò la dzia?

6. Afɔɖeɖe vevi kawo mee míadzro?

⁶ Mí katã míewɔ afɔɖeɖe vevi asieke aɖewo. Afɔɖeɖe vevi siawo dze le aɖaka si nye  “Afɔɖeɖe Siwo Kplɔa Ame Yia Nyɔnyrɔxɔxɔ Kple Tsitsi Gbɔe” la me. Ŋkuɖoɖo afɔɖeɖe asieke siawo dzi na mía ɖokuiwo edziedzi ado ŋusẽ mí be míagatrɔ ayi xexemenu siwo míegblẽ ɖi la gbɔ o. Abe ale si yameʋukula bibi si ɖɔa ŋu ɖo léa ŋku ɖe nu vevi aɖewo ŋu ɣesiaɣi hafi hona be wòate ŋu aku ʋua dedie ene la, ne wò hã èdzroa nu vevi siawo me la, akpe ɖe ŋuwò be nàyi edzi awɔ nuteƒe.

7. Nu ka ƒe kpɔɖeŋu nue wòle be míazɔ ɖo, eye nu ka tae?

⁷ Nu siwo ŋu wòle be yameʋukula nalé ŋku ɖo la ɖoa ŋku edzi nɛ be nu vevi aɖewo li wòle be wòawɔ ɣesiaɣi hafi aho. Míawo hã míate ŋu anɔ ŋku lém ɖe gbɔgbɔmeŋgɔyiyi siwo wɔm míele tso esime míexɔ nyɔnyrɔ la ŋu edziedzi. Paulo ŋlɔ na Timoteo be: “Yi edzi nàlé nya nyuitɔwo, siwo nèse le gbɔnye kple xɔse kpakple lɔlɔ̃ si le Kristo Yesu me la ƒe kpɔɖeŋu me ɖe asi.” (2 Tim. 1:13) Mawu ƒe Nya la mee ‘nya nyuitɔ’ siawo le. (1 Tim. 6:3) Ale si ko nutala aɖe ƒe nuɖeɖe ɖe agbalẽ dzi nana míekpɔa ale si lɔƒo nua ŋutɔ ava nɔ ƒe kpɔɖeŋu ene la, nenema kee ‘nyateƒea ƒe kpɔɖeŋu’ la hã nye nu si dzi míekpɔna nyaa nu si dim Yehowa le tso mía si hewɔna ɖe edzi. Eya ta mina míalé ŋku ɖe afɔ siwo míeɖe hafi xɔ nyɔnyrɔ la ŋu ne míakpɔe ɖa be míele zɔzɔm ɖe nyateƒea ƒe kpɔɖeŋua nu tututu hã.

8, 9. (a) Nu ka tae wòle be míayi edzi anɔ tsitsim le sidzedze kple xɔse me? (b) Wɔ vevienyenye si le gbɔgbɔmetsitsi ŋu kple nu si tae wòle be míayi edzi anɔ tsitsim la ƒe kpɔɖeŋu.

⁸ Afɔɖeɖe gbãtɔe nye be míesrɔ̃ nu eye sidzedze su mía si. Eyome míedo ŋusẽ míaƒe xɔse. Ke hã ele be míayi edzi anɔ tsitsim le nu vevi eve siawo me. (2 Tes. 1:3) Tsitsi lɔ ŋgɔyiyiwɔwɔ ɖaa ɖe eme. “Tsitsi” fia be nane nanɔ dzidzim ɖe edzi ahanɔ ta kekem ɖe edzi. Esia fia be le nyɔnyrɔxɔxɔ megbe la, ehiã be míanɔ ŋgɔyiyi wɔm le míaƒe gbɔgbɔmemenyenye me, ale be míayi edzi anɔ tsitsim ke menye be míatsi teƒe ɖeka o.

⁹ Míate ŋu atsɔ míaƒe tsitsi le gbɔgbɔ me asɔ kple ale si ati tsinae. Ne ati ƒe kewo de to nyuie la, atia ate ŋu atsi ava zu ati gã aɖe. Le kpɔɖeŋu me, Libanon ƒe sederti aɖewo tea ŋu kɔna abe dziƒoxɔ tuɖedzi 12 ene, woƒe kewo dea to ʋĩi, eye woƒe  kpeme ƒe titrime dea meta 12. (Haw. 5:15) Ne sedertiwo tsi kabakaba ɖo afi aɖe vɔ la, woganɔa tsitsim ya gake megadzena wokpɔna tututu o. Ke boŋ ne ƒeawo va le yiyim la, wololona ɖe edzi, woƒe ke dea didiƒe ʋĩi eye atia va sesẽna ɖe edzi. Nenemae wòle le Kristotɔwo ƒe tsitsi hã gome. Míate ŋu atsi kabakaba le ɣeyiɣi si wonɔ Biblia srɔ̃m kpli mí me ahaxɔ nyɔnyrɔ. Hamea me tɔwo kpɔa dzidzɔ ne wokpɔ ŋgɔyiyi si wɔm míele. Míate ŋu adze azu mɔɖelawo alo mɔnukpɔkpɔ bubuwo asu mía si. Ne ƒeawo va le yiyim la, míaƒe ŋgɔyiyi le gbɔgbɔ me meganɔa dzedzem tututu o. Ke hã ehiã be míayi edzi anɔ tsitsim le xɔse kple sidzedze me, azu ame siwo “tsi bliboe, ahaɖo tsitsime si sɔ kple Kristo la tɔ le eƒe blibonyenye la me.” (Ef. 4:13) Ne míewɔ ŋgɔyiyi hezu Kristotɔ tsitsiwo la, ekema míele abe ati aɖe si mie, tsi nyuie heva zu ati gã sesẽ aɖe ene.

10. Nu ka tae wòle vevie be Kristotɔ tsitsiwo gɔ̃ hã nayi edzi anɔ ŋgɔyiyi wɔm?

¹⁰ Gake mele be míaƒe tsitsia nase ɖe afi ma o. Ele be míaƒe sidzedze nanɔ dzidzim ɖe edzi eye míaƒe xɔse nanɔ to dem ɖe edzi. Esia awɔe be Mawu ƒe Nya la ana míanɔ ke lim geɖe wu. (Lod. 12:3) Nɔviŋutsu kple nɔvinyɔnu geɖewo le Kristo hamea me siwo le esia wɔm. Le kpɔɖeŋu me, nɔviŋutsu aɖe si nye hamemetsitsi ƒe 30 kple edzivɔ la gblɔ be yekpɔtɔ le ŋgɔyiyi wɔm le gbɔgbɔ me. Egblɔ be: “Meva kpɔ ŋudzedze ɖe Biblia ŋu geɖe wu. Mekpɔa ale si mawɔ ɖe Biblia ƒe mɔfiamewo kple sewo dzi le nɔnɔme vovovowo me la ɣesiaɣi. Nye ŋudzedzekpɔkpɔ ɖe gbeadzisubɔsubɔdɔa ŋu hã le dzidzim ɖe edzi ɖaa.”

11. Nu kae míawɔ be míava nya Yehowa nyuie wu?

¹¹ Míaƒe tsitsi bia be míanɔ tetem ɖe Yehowa si nye mía Xɔlɔ̃ kple mía Fofo la ŋu geɖe wu. Edi be míase le mía ɖokui me be yekpɔa ŋudzedze ɖe mía ŋu. Edi be míanya be yelɔ̃ mí eye be míele dedie le ye gbɔ, abe ale si ko ɖevi si dzila lɔ̃ame kpla asi kɔ na la sena le eɖokui me be wolɔ̃ ye eye yele dedie ene, alo abe ale si míawo hã míesena le mía ɖokui me ne míele xɔlɔ̃ vavã si dzi míeka ɖo gbɔ ene. Míenya be menye ŋkeke ɖeka kple eƒe zãdodo ye xɔlɔ̃wɔwɔ kplikplikpli sia va nɔa mía kple Yehowa dome o. Exɔa ɣeyiɣi hafi míeva dzea sii nyuie helɔ̃nɛ. Eya ta be nàva nya Yehowa nyuie wu la, ɖo ɣeyiɣi aɖe koŋ ɖi nàxlẽ eƒe Nya la gbe sia gbe. Eye xlẽ Gbetakpɔxɔ kple Nyɔ! ƒe tata ɖe sia ɖe kpakple míaƒe Biblia srɔ̃gbalẽ bubuawo hã.

12. Nu kae wòhiã be míawɔ be Yehowa nanya mí?

 ¹² Mawu xɔlɔ̃wo tsina le gbɔgbɔ me to gbedodoɖa tso dzi me kple hadede nyuiwo dzi. (Mixlẽ Maleaxi 3:16.) Yehowa ƒe “towo le woƒe kokoƒoƒo ŋu.” (1 Pet. 3:12) Abe dzila lɔ̃ame ene la, Yehowa ƒe towo le mía ŋu. Eya ta ele be míanɔ “gbedodoɖa dzi ɖaa.” (Rom. 12:12) Mawu koe ate ŋu akpe ɖe mía ŋu be míava zu Kristotɔ tsitsiwo. Nuɖoanyi sia ƒe nyaƒoɖeamenuwo nu sẽ ale gbegbe be míate ŋu anɔ te ɖe wo nu le mía ɖokui si o. Ne míenɔa gbedodoɖa dzi ɖaa o la, ekema kpekpeɖeŋu si Mawu le lɔlɔ̃m faa be yeana mí la ato mía ŋu. Ðe nèkpɔe be ale si wò gbedodoɖawo le la nyoa, alo ède dzesii be ahiã be yeatrɔ asi le wo ŋua?—Yer. 16:19.

13. Nu ka tae hadede kple mía nɔvi Kristotɔwo hiã vevie hafi míate ŋu atsi le gbɔgbɔ me?

¹³ Yehowa kpɔa ŋudzedze ɖe ame siwo katã “ɖoa dzi ɖe eŋu” la ŋu; eya ta ne míeva nya Mawu gɔ̃ hã la, míadi be míayi edzi anɔ ha dem kple hamea, ale be míanɔ ame bubu siwo hã va nya eyama la ŋu kplikplikpli. (Nah. 1:7) Esi nu siwo ɖea dzi le ame ƒo bɔ ɖe xexe sia me ta la, nunya anɔ eme be míanɔ ha dem kple mía nɔviwo. Yayra kawoe míakpɔ tso eme? Míakpɔ ame siwo ade dzi ƒo na mí hena “lɔlɔ̃ kple dɔ nyuiwo wɔwɔ” la le hamea me. (Heb. 10:24, 25) Míehiã nɔviwo ƒe habɔbɔa, tadeagula siwo si tameɖoɖo ɖeka le la ƒe ƒuƒoƒo, alo hame, hafi ate ŋu awɔ ɖe nya si Paulo ŋlɔ na Hebritɔwo la dzi. Lɔlɔ̃ si ƒe nya Paulo gblɔ la ɖeɖe fia bia be kadodo nanɔ mía kple mía nɔvi Kristotɔwo dome. Eya ta kpɔ egbɔ be yedea kpekpeawo edziedzi hekpɔa gome le wo me.

14. Aleke dzimetɔtrɔ kple tɔtrɔwɔwɔ yia edzi ɖaa?

¹⁴ Hafi míava zu Kristotɔwo la, míetrɔ dzi me eye míegbugbɔ, alo wɔ tɔtrɔwo heɖe asi le nuwɔna gbegblẽwo ŋu. Ke hã dzimetɔtrɔ yia edzi ɖaa. Esi míenye amegbetɔ madeblibowo ta la, nu vɔ̃ le mía me abe da aɖe si xatsa ɖi hele klalo be yeaɖu mí ene. (Rom. 3:9, 10; 6:12-14) Mina míanɔ ŋudzɔ eye míaganɔ aɖaba ŋem ƒu míaƒe vodadawo dzi o. Dzidzɔtɔe la, Yehowa gbɔa dzi ɖi na mí esi míele agbagba dzem vevie be míaɖu míaƒe gbɔdzɔgbɔdzɔwo dzi ahawɔ tɔtrɔwo. (Flp. 2:12; 2 Pet. 3:9) Nu si akpe ɖe mía ŋue nye be míawɔ míaƒe ɣeyiɣi kple nunɔamesiwo ŋu dɔ nyuie eye míagazã wo atsɔ ati ɖokuitɔdidi ƒe nudzodzrowo yome o. Nɔvinyɔnu aɖe gblɔ be: “Nyateƒea mee wonyim le, ke hã esi metsi la, ale si mebua Yehowae la to vovo na ale si nɔvi akpa gãtɔ bunɛ. Ewɔna nam be ele be woavɔ̃e vevie, eye mese le ɖokuinye me be nyemate ŋu awɔ nu si ado dzidzɔ nɛ gbeɖe o.” Le ɣeyiɣi aɖe megbe la, nɔvinyɔnua “megava li ke le gbɔgbɔ me o,” si na be wòwɔ vodada geɖewo. Egblɔ yi edzi be: “Menye ɖe nyemelɔ̃ Yehowa o, ɖe nyemenya ame si wònye ŋutɔŋutɔ o. Ke hã, esi medo gbe ɖa vevie zi geɖe megbe la, meva wɔ tɔtrɔ. Meva de dzesii be Yehowa lé nye alɔnu abe ɖevi sue ene hele kpekpem ɖe ŋunye ɖɔɖɔɖɔ be maɖu kplamatsedonu ɖe sia ɖe dzi, eye wòle nu si mawɔ la fiamem.”

15. Nu kawo ŋue Yesu kple Fofoa léa ŋku ɖo?

¹⁵ “Miyi edzi mianɔ” nya nyui la ‘gblɔm na amewo.’ Nya siawoe mawudɔla aɖe gblɔ na Petro kple apostolo bubuawo esi wòɖe wo le gaxɔ me nukutɔe. (Dɔw. 5:19-21) Ɛ̃, gomekpɔkpɔ le gbeadzisubɔsubɔdɔa me kwasiɖa sia kwasiɖa nye nu vevi bubu si ŋu wòle be míalé ŋku ɖo. Yesu kple Fofoa léa ŋku ɖe míaƒe xɔse kple subɔsubɔdɔa siaa ŋu. (Nyaɖ. 2:19) Hamemetsitsi si ƒe nya míegblɔ do ŋgɔ la gblɔ be: “Gbeadzisubɔsubɔdɔa wɔa akpa vevi aɖe le míaƒe agbe me.”

16. Nu ka tae wòanyo be míanɔ ŋugble dem le míaƒe adzɔgbeɖeɖe na Yehowa ŋu?

¹⁶ Nɔ ŋugble dem le wò adzɔgbeɖeɖe ŋu. Nu xɔasitɔ kekeake si le mía sie nye  mía kple Yehowa dome ƒomedodoa. Enya ame siwo nye etɔwo. (Mixlẽ Yesaya 44:5.) Nɔ ŋku lém ɖe mia kplii dome ƒomedodoa ƒe nyonyome ŋu eye nànɔ gbe dom ɖa tso eŋu. Azɔ hã, nɔ ŋku ɖom ŋkeke si dzi nèxɔ nyɔnyrɔ si nye ŋkeke vevi aɖe na wò la dzi. Esia akpe ɖe ŋuwò nànɔ ŋku ɖom edzi be wò nyɔnyrɔxɔxɔ ye ɖo kpe nyametsotso vevitɔ kekeake si nèwɔ kpɔ dzi.

17. Nu ka tae dzidodo hiã mí be míanɔ Yehowa ŋu kplikplikpli?

¹⁷ Esi Paulo nɔ agbalẽ ŋlɔm na Galatiatɔwo la, ete gbe ɖe dzidodo ƒe vevienyenye dzi. (Gal. 6:9) Esia le vevie na Kristotɔwo egbea hã. Àto xaxawo me godoo, gake Yehowa akpe ɖe ŋuwò. Yi edzi nànɔ gbe dom ɖa nànɔ gbɔgbɔ kɔkɔea biam. Àkpɔ dzidzeme ne Yehowa na wò nuxaxawo trɔ zu dzidzɔ, eye wò dzimaɖitsitsiwo zu dziɖeɖi. (Mat. 7:7-11) Wò ya bu nya sia ŋu kpɔ ko: Ne Yehowa léa be na dziƒoxewo la, ɖe malé be na wò, ame si lɔ̃e hetsɔ ɖokuiwò nae, la oa? (Mat. 10:29-31) Kuxi ka kee nèɖado goe o, mègagbugbɔ ɖe megbe o, mègana ta gbeɖe o. Yayra gbogbo kawoe nye esi su mía si le esi Yehowa nya mí ta!

18. ‘Esi nèva nya Mawu’ la, ke nu kae gasusɔ na wò?

¹⁸ Ne nyitsɔ laa ye nèva nya Mawu hexɔ nyɔnyrɔ la, ke nu kae gasusɔ? Yi edzi nànɔ Yehowa nyam nyuie wu eye nànɔ tsitsim le gbɔgbɔ me. Eye ne ƒe geɖewoe nye esia nèxɔ nyɔnyrɔ la, ke nu kae gasusɔ? Wò hã yi edzi nàna wò sidzedze Yehowa nanɔ dzidzim ɖe edzi eye wòanɔ to dem ɖe edzi. Mele be míasusui gbeɖe be ale si mía kple Mawu dome le fifia la sɔ gbɔ na mí o. Ke boŋ mina mí katã míanɔ ŋku lém ɖe nu vevi siawo ŋu edziedzi be ƒomedodo si le mía kple mía Fofo lɔlɔ̃a, mía Xɔlɔ̃ kple mía Mawu, Yehowa, dome la nanɔ sesẽm ɖe edzi ɖaa.—Mixlẽ 2 Korintotɔwo 13:5, 6.