Siria fia nɔ Mawu ƒe nyagblɔɖila Elisa dim be yeawu eye wòti eyome yi Dotan, todzidu si ŋu woɖo gli ɖo la me. Siria fia la ɖo sɔwo, aʋatasiaɖamwo kple asrafowo ɖe Dotan le zã me. Kaka ŋu nake la, aʋakɔa va ɖe to ɖe dua.—2 Fia. 6:13, 14.

Esi nyagblɔɖila Elisa ƒe subɔvi fɔ heyi gota la, ekpɔ aʋakɔ si va eƒe aƒetɔ lé ge. Tete wòdo ɣli be: “Oo, nye aƒetɔ, nu ka wɔ ge míala?” Elisa ɖo eŋu be: “Mègavɔ̃ o, elabena ame siwo le mía dzi la, sɔ gbɔ wu ame siwo le wo dzi.” Azɔ Elisa do gbe ɖa be: “Yehowa, ʋu eƒe ŋkuwo, ne wòakpɔ nu!” Nuŋlɔɖia yi edzi be: “Tete Yehowa ʋu ɖekakpui la ƒe ŋkuwo, eye wòkpɔ nu, eye kpɔ ɖa, dzosɔwo kple dzotasiaɖamwo le to la ŋu kpaŋkpaŋ ƒo xlã Elisa.” (2 Fia. 6:15-17) Nu kae míate ŋu asrɔ̃ tso nudzɔdzɔ sia kple Elisa ƒe agbemeŋutinya bubuwo me?

Esi Elisa kpɔ Siria-ʋakɔa wòva ɖe to ɖe wo la, ŋɔdzi melée o, elabena eɖo ŋu ɖe Yehowa ŋu eye wòka ɖe edzi be ŋusẽ le esi be wòakpɔ yewo ta. Míekpɔa mɔ be Yehowa naɖe mí nukutɔe egbea o, gake míenya be ele esubɔlawo ta kpɔm abe ƒuƒoƒo ene. Le mɔ aɖe nu la, dzosɔwo kple dzotasiaɖamwo ƒo xlã míawo hã. Ne míetsɔa xɔseŋkuwo ‘kpɔa’ nu siawo eye míeɖoa ŋu ɖe Yehowa Mawu ŋu la, ekema ayra mí ‘míanɔ dedie.’ (Ps. 4:9) Azɔ mina míadzro Elisa ƒe agbemeŋutinya bubuwo me ne míakpɔ ale si woaɖe vi na míi ɖa.

Gbe ɖeka esi Elisa nɔ agble ŋlɔm la, Eliya te ɖe eŋu eye wòda eƒe nyagblɔɖilawua ɖo ɖee. Elisa se nu si wòfia gɔme. Eyi aƒe me ɖaɖo kplɔ̃ na fofoa kple dada, eye wòklã wo hedzo le wo gbɔ yi ɖazu Eliya ƒe subɔvi. (1 Fia. 19:16, 19-21) Esi Elisa lɔ̃ faa tsɔ eɖokui ɖo anyi be yeasubɔ Mawu bliboe ta la, eva zu dɔwɔnu nyui aɖe le Yehowa ƒe asi me, eye Yehowa na wòzu nyagblɔɖila ɖe Eliya teƒe.

 Elisa subɔ Eliya anɔ ƒe ade ya teti. Le ɣeyiɣi mawo katã me la, Elisa ye ‘dea tsi asi na Eliya.’ (2 Fia. 3:11) Ɣemaɣi la, asi koŋue amewo tsɔ ɖua nui, womezãa gatsi, gaflo, hɛ alo esiawo tɔgbi o. Ne woɖu nua vɔ la, subɔvi kɔa tsi ɖe asi dzi na eƒe aƒetɔ wòklɔa asi. Esia nye dɔ tsɛ siwo Elisa wɔna na eƒe aƒetɔ la dometɔ ɖeka pɛ ko. Gake ebui be mɔnukpɔkpɔe wònye na ye be yenye Eliya ƒe subɔvi.

Nenema kee egbea hã la, Kristotɔ geɖewo ƒo wo ɖokuiwo ɖe ɣeyiɣiawo katã ƒe subɔsubɔdɔa ƒe akpa vovovowo me. Xɔse kple didi vevie be yewoazã yewoƒe ŋusẽ katã le Yehowa subɔsubɔ me ye ʋãa wo wowɔa tiatia sia. Ame siawo dometɔ aɖewo ƒe dɔdeasi biana be woaʋu le aƒe me aɖawɔ dɔ siwo ame geɖe bua dɔ tsɛwoe—le Betel loo, le habɔbɔa ƒe xɔtudɔwo me loo, alo esiawo tɔgbi. Mele be Kristotɔ vavã aɖeke nabu dɔ siawo dɔ tsɛwo o, elabena Yehowa ya dea asixɔxɔ gã dɔ siawo ŋu.—Heb. 6:10.

Hafi Mawu ‘nakɔ nyagblɔɖila Eliya le ahomya me adzoe la,’ egblɔ nɛ be wòadzo le Gilgal ayi Betel. Eliya gblɔ na eƒe subɔvi Elisa be mahiã be wòayi kpli ye o, gake Elisa ɖo eŋu nɛ be: “Ne magblẽ wò ɖi fĩ.” Esi wole mɔ dzi yina la, Eliya gaƒoe ɖe Elisa nu zi eve sɔŋ be wòatrɔ, gake egbe koe. (2 Fia. 2:1-6) Elisa ku ɖe Eliya ŋu abe ale si ko Rut ku ɖe Naomi ŋu hegbe tɔtrɔ le eyome ene. (Rut 1:8, 16, 17) Nu ka tae? Edze ƒãa be susuae nye be Elisa kpɔ ŋudzedze ɖe dɔ si Mawu de esi be wòanye Eliya ƒe subɔvi ŋu.

Kpɔɖeŋu nyui aɖee nye esia Elisa ɖo na mí katã. Ne mɔnukpɔkpɔ aɖe su mía si le Mawu ƒe habɔbɔa me la, ele be míade asixɔxɔ eŋu elabena Yehowae de dɔ ma asi na mí. Bubu gãe wònye Mawu de mía ŋu.—Ps. 65:5; 84:11.

Esi wonɔ mɔa dzi yina la, Eliya gblɔ na Elisa be: “Bia nu si mawɔ na wò, hafi woatsɔm adzoe le gbɔwò.” Abe ale si Salomo wɔe ƒe aɖewo do ŋgɔ ene la, nu si Elisa bia la ku ɖe gbɔgbɔmenuwo ŋu. Ebia be ‘yeaxɔ Elisa ƒe gbɔgbɔ ƒe akpa eve.’ (1 Fia. 3:5, 9; 2 Fia. 2:9) Le blema Israel la, ne vifofo ma eƒe domenyinuwo la, viŋutsu tsitsitɔ xɔa teƒe eve nu. (5 Mose 21:15-17) Eya ta nu si biam Elisa nɔ ye nye be yeaxɔ ɖe Eliya teƒe anye Mawu ƒe nyagblɔɖila. Egafia hã be Elisa di be dzi nanɔ ye ƒo abe Eliya, ame si ‘ʋã ŋu ɖe Yehowa ŋu vevie,’ la ke ene.—1 Fia. 19:13, 14.

Aleke nyagblɔɖila Eliya ɖo nya sia ŋu na eƒe subɔvia? Egblɔ nɛ be: “Èbia nu sesẽ. Ne èkpɔ be, wotsɔm dzoe le gbɔwò la, ekema ava eme na wò; ke ne mele alea o la, ekema mava eme o.” (2 Fia. 2:10) Nufiame eve ye le ale si Eliya ɖo nya ŋui me. Gbãtɔe nye be, Mawu koe ate ŋu ana nu si Elisa bia lae. Evelia, hafi Elisa ƒe didia nava eme nɛ la, ele be wòaku ɖe Eliya ŋu goŋgoŋ, nu ka kee ɖadzɔ o.

Aleke Mawu bu Elisa esi wòbia be yeaxɔ Eliya ƒe gbɔgbɔ ƒe akpa eve? Nuŋlɔɖia gblɔ be: “Esime wogale nu ƒom le yiyim la, kpɔ ɖa, dzotasiaɖam kple dzosɔwo va klã woa kple eve la dome, eye Eliya to ahom me yi dziƒo.” Elisa kpɔ esiawo katã. * Yehowa to nudzɔdzɔ sia dzi na nu si Elisa bia la va eme nɛ. Elisa kpɔe esi wokɔ Eliya dzoe, exɔ eƒe gbɔgbɔa ƒe akpa eve, eye wòzu nyagblɔɖila ɖe eteƒe.—2 Fia. 2:11-14.

Elisa tsɔ Eliya ƒe nyagblɔɖilawu si ge le eŋu la, eye wòdoe. Awu ma dodo ana amewo nakpɔe be Elisa zu Mawu ƒe nyagblɔɖila azɔ. Nu bubu si gaɖo kpe esia dzie nye ale si wòma Yordan Tɔsisia me nukutɔe.

Nu si Elisa kpɔ esi wokɔ Eliya le ahomya me dzoe la kpɔ ŋusẽ gã ɖe edzi. Nya lae nye be dzosɔwo kple dzotasiaɖamwo menye dzɔdzɔmenu siwo ame kpɔna gbe sia gbe o! Nukunue wònye Yehowa wɔ be yeatsɔ aɖo kpe edzi na Elisa be eƒe biabiaa dze ye ŋu. Egbea, Mawu metoa ŋutega siwo me dzosɔwo kple dzotasiaɖamwo le dzi ɖoa míaƒe gbedodoɖawo ŋu na mí o. Gake míate ŋu akpɔe adze sii be Mawu zãa eƒe ŋusẽ gã la tsɔ nana eƒe lɔlɔ̃nu vaa eme. Eye ne míekpɔ  ale si Yehowa le eƒe habɔbɔa ƒe akpa si le anyigba dzi yramee la, ke efia be eƒe dziƒotasiaɖam lae nye ema ‘kpɔm’ míele wòle zɔ ɖem.—Eze. 10:9-13.

Elisa kpɔ nu geɖewo teƒe si na wòka ɖe edzi be ŋusẽ triakɔ le Yehowa si. Mawu ƒe gbɔgbɔ kɔkɔea na wòwɔ nukunu 16 sɔŋ, eye esia sɔ gbɔ wu esi Eliya wɔ zi gbɔ zi eve. * Zi evelia si Elisa gakpɔ dzosɔwo kple dzotasiaɖamwoe nye esime Siria fia dɔ aʋakɔwo ɖa be woava lée le Dotan, si ŋu míeƒo nu tsoe le ŋgɔdonyaa me.

Esi futɔwo va ƒo xlã Elisa le Dotan la, ŋɔdzi melée o. Nu ka tae? Elabena xɔse sẽŋu le esi si na wòka ɖe Yehowa dzi bliboe. Míawo hã míehiã xɔse sia ƒomevi. Eya ta mina míanɔ gbe dom ɖa anɔ Mawu biam be wòana eƒe gbɔgbɔ kɔkɔea mí ne míate ŋu atu xɔse kple gbɔgbɔa ƒe kutsetse ƒe akpa bubuawo ɖo.—Luka 11:13; Gal. 5:22, 23.

Azɔ hã, nu si dzɔ le Dotan gado ŋusẽ Elisa be wòaɖo ŋu ɖe Yehowa kple eƒe gbɔgbɔmeʋakɔ si dzi wòtona kpɔa esubɔlawo ta la ŋu. Nyagblɔɖilaa kpɔe be Mawu dɔ eƒe dziƒodɔlawo wova ƒo xlã dua kple aʋakɔ si ɖe to ɖe dua siaa. Mawu gbã ŋku na futɔawo, eye wòɖe Elisa kple eƒe subɔvia nukutɔe. (2 Fia. 6:17-23) Elisa xɔ Yehowa dzi se heɖo ŋu ɖe eŋu bliboe le nɔnɔme sesẽ ma kple bubuwo me.

Mina míawo hã míaɖo ŋu ɖe Yehowa Mawu ŋu abe Elisa ene. (Lod. 3:5, 6) Ne míewɔe alea la, ‘Mawu ave mía nu, eye wòayra mí.’ (Ps. 67:2) Enye nyateƒe be dzosɔwo kple dzotasiaɖamwo meƒo xlã mí egbea ŋutɔŋutɔ o. Gake le “xaxa gã” si gbɔna me la, Yehowa akpɔ xexea me katã ƒe nɔviwo ƒe habɔbɔa ta. (Mat. 24:21; Nyaɖ. 7:9, 14) Hafi ɣemaɣi naɖo la, ele be míayi edzi aɖo ŋku edzi ɣesiaɣi be, “Mawue nye míaƒe sitsoƒe!”—Ps. 62:9.