WODZI fofonye le Graz, Austria, le ƒe 1899 me, eya ta sɔhɛ ko wònye esime Xexemeʋa I dze egɔme. Esi Xexemeʋa II dze egɔme le ƒe 1939 me teti la, wozi edzi de asrafodɔ me le Germany. Nublanuitɔe la, eku le aʋagbedzi le ƒe 1943 me le Russia. Alea wòdzɔe be fofonye bu ɖem esi mexɔ abe ƒe eve pɛ ko ene. Mɔnukpɔkpɔ mesu asinye medze sii o, eye mesusua fofonye ŋutɔ, vevietɔ esi mekpɔe be nye sukuhati akpa gãtɔ fofowo le agbe. Emegbe meva srɔ̃ nu tso mía Fofo gãtɔ si le dziƒo, si mekuna o la ŋu esi menye ɖekakpui, eye esia fa akɔ nam geɖe.—Hab. 1:12.

Esi mexɔ ƒe adre la, mege ɖe sɔhɛwo ƒe habɔbɔ si woyɔna be Scout me. Britain-srafo Robert Stephenson Smyth Baden-Powell ye ɖo Scout viwo ƒe xexea me katã ƒe ha na sɔhɛ ŋutsuviwo le ƒe 1908 me le Great Britain. Le ƒe 1916 me la, egaɖo ɖeviwo ƒe habɔbɔ si woyɔna be Wolf Cubs hã na ɖevi siwo meɖo ƒewuiwo me haɖe o, siwo nɔ abe nye ene.

Edoa dzidzɔ nam ŋutɔ ne míeyi ɖamlɔ avɔgbadɔwo me le gbedadaƒo le kwasiɖanuwuwuwo, do míaƒe awu tɔxɛwo, eye míezɔ le fli me hele afɔ ɖem ɖe ʋuawo ƒe ɖiɖi dzi. Nuwɔwɔ ɖekae kple Scout vi bubuwo, abe hadzidzi esi míele dzo ƒum le fiẽwo me, alo le fefem le avewo me ene vivia nunye ŋutɔ. Míesrɔ̃ nu geɖe tso dzɔdzɔmenuwo ŋu si wɔe be mekpɔ ŋudzedze ɖe Wɔla la ƒe asinudɔwɔwɔwo hã ŋu.

Wodea dzi ƒo na Scout viwo be woadze agbagba awɔ nyui na ame zi ɖeka ya teti le ŋkekea me. Esiae nye nya si wolɔ̃a gbɔgblɔ. Míedoa gbe na mía nɔewo kple nya siawo be “Míesu Te Ɣesiaɣi.” Esia doa dzidzɔ nam. Míaƒe sɔhɛwo ƒe ha si me tɔwo sɔ gbɔ wu ame alafa ɖeka la ƒe afã nye Katolikotɔwo, afã nye Protestanttɔwo, eye ame ɖeka nye Buddhatɔ.

Tso ƒe 1920 me la, wowɔa Scout viwo ƒe takpekpe tɔxɛ le ƒe aɖewo me. Mede woƒe Xexea Me Katã Ƒe Takpekpe tɔxɛ adrelia si wowɔ le Bad Ischl, Austria, le August 1951 me, kple asiekelia si wowɔ le Sutton Park, si te ɖe Birmingham ŋu le England, le August 1957 me. Le takpekpe evelia ma me la, Scout vi 33,000 siwo tso dukɔ 85 me ye va kpe ta. Eye ame siwo ade 750,000, siwo dome England Fianyɔnu Elizabeth hã nɔ, ye va kpɔ míaƒe wɔnawo teƒe. Ewɔ nam abe xexea me katã ƒe nɔviwo ƒe habɔbɔ aɖee esia nye ene. Nyemenya kura be emegbe mava kpɔ nɔviwo ƒe habɔbɔ bubu aɖe si de ŋgɔ kura wu esia, si Mawu ŋutɔ le megbe na o.

Le ƒe 1958 ƒe adame esi wòsusɔ vie mawu kplɔ̃ŋutisubɔla ƒe hehexɔxɔ nu le Grand Hotel  Wiesler, le Graz, Austria la, nye dɔwɔhati aɖe si ŋkɔe nye Rudolf Tschiggerl, si nye abolomela, ɖi vomeɖase nam. Nyemenya naneke tso nyateƒea ŋu ɣemaɣi o. Eƒo nu tso Mawuɖekaetɔ̃ ƒe nufiafia ŋu hegblɔ be metso Biblia me o. Meʋli Mawuɖekaetɔ̃ ƒe nufiafiaa ta, eye medi be maɖee afiae be eda ƒu. Melɔ̃ nye dɔwɔhatia ƒe nya, eya ta medi be makpe ɖe eŋu wòatrɔ ava Katoliko ha me.

Rudolf, si míegayɔna be Rudi, tsɔ Biblia nam. Gake mete tɔ ɖe edzi be Katoliko Biblia koe maxlẽ. Esi medze exexlẽ gɔme la, mekpɔ be Rudi tsɔ trakt aɖe si Gbetakpɔxɔ Habɔbɔa ta la de nye Biblia la me. Megbe trakt la xexlẽ, elabe mesusu be woaŋlɔe wòadze abe nyateƒeae le eme ene gake ɖewohĩ wòanye alakpa. Ke hã, melɔ̃ ɖe edzi be wòadzro Biblia me kplim. Rudi dze aɖaŋu; megatsɔ agbalẽ aɖeke nam be maxlẽ o. Anɔ abe ɣleti etɔ̃ ene la, míedzroa Biblia me ɣeaɖewoɣi ʋuu keke zã tsina.

Esi mewu nye hehexɔxɔa nu le Graz, si nye mía de la, danye di be mayi sukua dzi aɖasrɔ̃ amedzrodzeƒedzikpɔkpɔ. Eya ta meʋu yi ɖanɔ Bad Hofgastein dua me heyi sukua dzi. Wowɔ ɖoɖo na sukuviawo be woaxɔ hehe le Grand Hotel si le Bad Hofgastein atsɔ akpe ɖe sukunusɔsrɔ̃a ŋu, eya ta ɣeaɖewoɣi meyina ɖawɔa dɔ le afi ma.

Rudi ɖo nye adrɛs yeyea ɖe alɔdzedɔwɔƒe si le Vienna, eye woawo hã woɖoe ɖe nɔvinyɔnu dutanyanyuigblɔla eve siwo ŋkɔwoe nye Ilse Unterdörfer kple Elfriede Löhr. * Gbe ɖeka la, woyɔm le amedzrodzeƒea gblɔ nam be nyɔnu eve aɖewo le lalam le woƒe ʋu me le gota be yewoakpɔm. Ewɔ nuku nam elabe nyemenya wo o. Gake meyi ɖakpɔ wo. Emegbe mese be wonye Ðasefo siwo tsɔa agbalẽwo yina na nɔviwo le Germany le Nazitɔwo ƒe dziɖuɣi esime woɖo asi dɔa dzi le afi ma do ŋgɔ na Xexemeʋa II. Hafi aʋaa nadze egɔme la, Germanytɔwo ƒe adzamekpovitɔwo lé wo de fuwɔamegaxɔ me le Lichtenburg. Eyome le aʋawɔɣia la, woɖe wo yi Ravensbrück gakpɔ si te ɖe Berlin ŋu me.

Medea bubu nɔvinyɔnuawo ŋu ŋutɔ elabena wo kple danye woanye hatiwo. Ema tae nyemedi be woagblẽ woƒe ɣeyiɣi atsɔ anɔ Biblia me dzrom kplim o ɖo. Nyemedi be le kwasiɖa alo dzinu aɖewo megbe la, magblɔ na wo be nusɔsrɔ̃a megado dzidzɔ nam o. Eya ta mebia tso wo si be woaŋlɔ mawunyakpukpui siwo katã ku ɖe Katolikotɔwo ƒe nufiafia si gblɔ be papawoe xɔ ɖe apostoloawo teƒe la ŋu nam. Megblɔ na wo be mayi aɖadzro mawunyakpukpuiawo me kple míaƒe nunɔlaa. Mesusui be emae ana makpɔ nyateƒe si le nya sia me.

Roma Katolikotɔwo fiaa nu be papawoe nye apostoloawo teƒenɔlawo, eye woxlẽa papawo tso apostolo Petro dzi. (Sɔlemeha la se Yesu ƒe nya siwo dze le Mateo 16:18, 19 la gɔme bubui.) Katoliko ha la xɔe se hã be papa la medaa vo ne ele nu  siwo dzi wòle be sɔlemeha la naxɔ ase la gblɔm o. Mexɔ nya sia dzi se, elabena mesusu be ne papa si Katolikotɔwo yɔna be Fofo Kɔkɔe la medaa vo le dzixɔsenyawo gome o la, ke nya si wogblɔ tso Mawuɖekaetɔ̃ nufiafiaa ŋu la anye nyateƒe godoo. Gake ne etea ŋu wɔa vodada la, ke nufiafiaa hã ate ŋu anye alakpa. Mewɔ nuku o be nufiafia si gblɔ be papawoe nye apostoloawo teƒenɔlawo lae nye nufiafia vevitɔ na Katolikotɔ geɖe, esi wònye be Katolikotɔwo ƒe nufiafia bubuwo katã nɔ te ɖe esia dzi ta!

Esi meyi nunɔlaa gbɔ la, mete ŋu ɖo nye nyabiaseawo ŋu nam o, gake eɖe agbalẽ aɖe si ku ɖe apostoloawo teƒenɔlawo ŋu do goe. Egblɔ nam be matsɔe ayi aƒe me, eya ta meyi ɖaxlẽe, emegbe metrɔ yi egbɔ kple nyabiase geɖewo. Mlɔeba la, esi nunɔla la mete ŋu le nye nyawo ŋu ɖom o ta la, egblɔ nam be: “Mèle nye nyawo gɔme sem o eye nye hã nyemele tɔwòwo gɔme sem o. . . . Hede nyuie!” Megadi be mava ye gbɔ kple nya aɖeke azɔ o.

Menyae be ɣeyiɣia de nam azɔ be mana llse kple Elfriede nava srɔ̃ Biblia kplim. Wofia nu geɖem tso Yehowa Mawu, si nye Fofo Kɔkɔe vavã si le dziƒo ŋu. (Yoh. 17:11) Ɣemaɣi la, hame aɖeke menɔ nuto ma me o, eya ta nɔvinyɔnu eve siawo wɔa kpekpeawo le dzinyuitɔ aɖe ƒe aƒe me. Ame ʋɛ aɖewo koe dena. Nɔvinyɔnu eveawo koe wɔa kpekpea me dɔdeasi akpa gãtɔ, le esi nɔviŋutsu xɔnyɔnyrɔ aɖeke meli axɔ ŋgɔ o ta. Ɣeaɖewoɣi la, nɔviŋutsu aɖe tsoa teƒe bubu va ƒoa dutoƒonuƒo eye wozãa teƒe aɖe si wohaya.

Ilse kple Elfriede dze Biblia sɔsrɔ̃ gɔme kplim le October 1958 me, eye mexɔ nyɔnyrɔ ɣleti etɔ̃ megbe le January 1959 me. Do ŋgɔ na nye nyɔnyrɔxɔxɔ la, mebia wo ne anya wɔ be makplɔ wo ɖo le tso aƒe me yi aƒe me dɔa me be makpɔ ale si wowɔa gbeƒãɖeɖedɔae. (Dɔw. 20:20) Zi gbãtɔ si mekplɔ wo ɖo yi la, mebia wo be anya wɔ be woana anyigbamama aɖem si me manɔ dɔ wɔm le mahã? Wotsɔ kɔƒe aɖe nam eye nye ɖeɖe meyina ɖaɖea gbeƒã tso aƒe me yi aƒe me hetrɔna yia ɖetsɔlemetɔwo gbɔ. Nɔviŋutsu gbãtɔ si mezɔ kple le aƒe me yi aƒe me dɔa me lae nye nutome sue dzikpɔla si va subɔ mí emegbe.

Le ƒe 1960 me, esi mewu sukua nu la, metrɔ yi mía de be makpe ɖe nye ƒometɔwo ŋu woasrɔ̃ Biblia me nyateƒea. Va de asi na fifia la, wo dometɔ ɖeka pɛ hã mexɔ nyateƒea o, gake wo dometɔ aɖewo le ɖe tsɔm le nyaa me.

Le ƒe 1961 me la, woxlẽ lɛta siwo tso alɔdzedɔwɔƒea na hameawo tsɔ de dzi ƒo na nɔviwo be woawɔ mɔɖeɖedɔa. Menye tre ɣemaɣi eye ŋusẽ nɔ ŋunye, eya ta mekpɔe be susu aɖeke meli si tae magbe mɔɖeɖedɔa wɔwɔ o. Meɖo dze kple nutome sue dzikpɔla Kurt Kuhn be medi be mawɔ dɔ ɣleti ʋɛ aɖewo ale be mate ŋu aƒle ʋu, esi wònye be akpe ɖe ŋunye le mɔɖeɖedɔa wɔwɔ me ta. Ebiam be, “Ðe Yesu kple eƒe apostoloawo hiã ʋu le woƒe ɣeyiɣiawo katã ƒe subɔsubɔdɔa mea?” Nya ʋɛ mawo trɔ nye susu! Meɖoe be madze mɔɖeɖedɔa gɔme kpuie. Gake esi wònye be menɔ dɔ wɔm gaƒoƒo 72 kwasiɖa sia kwasiɖa le amedzrodzeƒe aɖe ta la, ele be matrɔ asi le nye ɖoɖowo ŋu gbã.

Mebia nye dɔmemegã ne aɖe mɔ nam be mawɔ dɔ gaƒoƒo 60. Elɔ̃, eye wògaxea fetu si mexɔna tsã la ke nam. Eteƒe medidi o megabiae ne anya wɔ  be mawɔ dɔ gaƒoƒo 48 le kwasiɖaa me. Elɔ̃ ɖe ema hã dzi, eye le esia me hã nye fetu metrɔ o. Eyome megabiae be wòaɖe mɔ nam mawɔ dɔ gaƒoƒo 36 le kwasiɖaa me, alo gaƒoƒo 6 gbe ɖeka ŋkeke 6 le kwasiɖaa me, eye megbe ema hã o. Nukutɔe la, nye dɔmemegãa meɖe nye fetua dzi kpɔtɔ o! Ewɔ abe medi be madzo o ene. Azɔ mete ŋu dze gbesiagbe mɔɖeɖedɔa gɔme. Ɣemaɣi la, mɔɖelawo naa gaƒoƒo 100 ɣleti sia ɣleti.

Le ɣleti ene megbe la, woɖom mɔɖela vevi kple hamesubɔla le hame sue aɖe me le Carinthia nutoa me, le Spittal an der Drau dua me. Ɣemaɣi la, mɔɖela veviwo naa gaƒoƒo 150 ɣleti sia ɣleti. Ame si ado eve nam le mɔɖeɖedɔa me menɔ asinye o, gake mekpɔ ŋudzedze ɖe ale si nɔvinyɔnu aɖe si ŋkɔe nye Gertrude Lobner si nye hamesubɔla ƒe kpeɖeŋutɔ ɣemaɣi doa alɔm la ŋu vevie. *

Le ƒe 1963 me la, wokpem be mava zu nutome sue dzikpɔla. Ɣeaɖewoɣi la, meɖoa keteke tso hame ɖeka me yia bubu me hetsɔa mɔzɔkplo gãwo ɖe asi. Ʋu menɔ nɔvi geɖe si o, eya ta wo dometɔ aɖeke meva kɔam le ketekedzeƒea o. Nyemedi be wòadze abe ɖe mele ɖokuinye dom ɖe dzi ene o, eya ta nyemetsɔa taksi yia nye dzeƒea o, afɔe metona.

Le ƒe 1965 me esi mekpɔtɔ nye tre la, wokpem be mava de Gilead Suku ƒe klass 41 lia. Nye sukuhati geɖe hã nye trewo. Ewɔ nuku nam ŋutɔ be esi mewu sukua nu la, wogbugbɔ ɖom ɖe mía de Austria be mayi nutome sue dzikpɔkpɔdɔa dzi. Gake hafi madzo le Amerika la, wobia tso asinye be mawɔ dɔ kple nutome sue dzikpɔla aɖe si ŋkɔe nye Anthony Conte kwasiɖa ene. Dɔwɔwɔ kple nɔviŋutsu lɔ̃ame sia si hã lɔ̃a gbeƒãɖeɖedɔa eye wòkpɔa dzidzedze geɖe le eme la do dzidzɔ nam ŋutɔ. Míewɔ dɔ le New York ƒe dzigbe le nuto si nye Cornwall me.

Esi metrɔ gbɔ va Austria la, woɖom ɖe nutome sue aɖe me, afi si meva do go Tove Merete si nye nɔvinyɔnu ɖetugbui dzetugbe aɖe le. Wofia nyateƒeae tso esime wòxɔ ƒe atɔ̃. Ne nɔviwo bia mí be aleke míewɔ do go la, míegblɔna fefetɔe be, “Alɔdzedɔwɔƒea ye wɔ ɖoɖoa na mí.” Míeɖe mía nɔewo le ƒe si kplɔe ɖo me, le April 1967 me, eye woɖe mɔ na mí be míayi mɔzɔzɔdɔa dzi.

Le ƒe si kplɔe ɖo me la, meva de dzesii be Yehowa si ami nam be manye yeƒe gbɔgbɔmeviwo dometɔ ɖeka le eƒe amenuveve me. Alea wòdzɔe be meva le ƒomedodo tɔxɛ me kple Fofonye si le dziƒo kpakple ame siwo katã ‘doa ɣli be “Abba, Fofo!”’ abe ale si Romatɔwo 8:15 gblɔe ene.

Nye kple Merete míeyi nutome sue kple nutome gã dzikpɔkpɔdɔa dzi va se ɖe ƒe 1976 me. Ɣeaɖewoɣi le vuvɔŋɔli la, eva hiãna be míamlɔ xɔ siwo me fana miamiamia wu tsikpe la me. Gbe ɖeka esi míefɔ la, míekpɔe be míaƒe ŋɔtimegbɔgbɔ bla ɖe kuntru si míetsyɔ la ƒe tade abe sno ene! Eya ta míeva tso nya me be míatsɔ dzoxɔxɔnamɔ̃ sue aɖe ɖe asi be míaƒe xɔdɔmewo me naxɔ dzo vie le zã me. Le zã me la, ele be míado go le xɔ me azɔ to sno me esime yame hã fa miamiamia  hafi ayi nugododeƒe. Xɔ menɔ míawo ŋutɔ si o eya ta míekpɔtɔ nɔa míaƒe dzeƒea le Dzoɖagbe. Braɖagbe ŋdi hafi míedzona yia hame bubu me.

Dzidzɔ wònye nam be srɔ̃nye lɔlɔ̃a nye kpekpeɖeŋutsoƒe gã aɖe nam le ƒe siawo katã me. Elɔ̃a gbeadzidede, eye mehiã be made dzi ƒo nɛ ɣeaɖekeɣi hafi wòayi gbeadzi o. Elɔ̃ nɔviawo hã ŋutɔ eye wòtsɔa ɖe le eme na amewo. Esia kpe ɖe ŋunye geɖe.

Wokpe mí va alɔdzedɔwɔƒe si le Vienna, le Austria, le ƒe 1976 me, eye woɖom Alɔdzekɔmitia me tɔ. Ɣemaɣi la, Austria alɔdzedɔwɔƒea ye kpɔa dɔa dzi le Ɣedzeƒe Europa dukɔ geɖe me eye wòkpɔa egbɔ be woɖo agbalẽwo ɖe dukɔ mawo me aɖaŋudzedzetɔe. Nɔviŋutsu Jürgen Rundel ye xɔ ŋgɔ le dɔ sia wɔwɔ me, eye wòdze aye ŋutɔ. Mɔnukpɔkpɔ su asinye mewɔ dɔ kplii, eye emegbe wobia tso asinye be makpɔ gbegɔmeɖeɖe le Ɣedzeƒe Europa ƒe gbegbɔgblɔ ewo me ƒe dɔa dzi. Jürgen kple srɔ̃a Gertrude kpɔtɔ le subɔsubɔm nuteƒewɔwɔtɔe abe mɔɖela veviwo ene le Germany. Tso ƒe 1978 me la, Austria alɔdzedɔwɔƒea zã agbalẽtamɔ̃ sue aɖe tsɔ taa magazinewo ɖe gbegbɔgblɔ ade me. Míeɖoa agbalẽ siwo amewo dɔ tso dukɔ bubuwo me hã ɖa. Nɔviŋutsu Otto Kuglitsch, si kple srɔ̃a Ingrid le subɔsubɔm le alɔdzedɔwɔƒe si le Germany, ye nɔ dɔ siawo dzi kpɔm.

Mía nɔvi siwo le Ɣedzeƒe Europa dukɔwo me hã zãa agbalẽtamɔ̃ siwo wotsɔ taa agbalẽwo wonɔa suesuesue la tsɔ taa míaƒe agbalẽwoe. Ke hã wogahiãna na dukɔ bubuwo ƒe kpekpeɖeŋu. Yehowa kpɔ wo ta le dɔ sia wɔwɔ me, eye mí ame siwo le alɔdzedɔwɔƒea míeva lɔ̃ nɔvi mawo siwo subɔ le mɔxeɖenuwo te le nɔnɔme sesẽwo me ƒe geɖe la vevie.

Le ƒe 1989 me la, mɔnukpɔkpɔ su asinye mezɔ mɔ kple Nɔviŋutsu Theodore Jaracz, si nye Dɔdzikpɔha la me tɔ, yi Romania. Taɖodzinuae nye be míakpe ɖe nɔvi gbogbo aɖewo ŋu be woagava wɔ ɖeka kple habɔbɔa. Tso ƒe 1949 ƒe gɔmedzedze la, wodzudzɔ hadede kple habɔbɔa le susu vovovowo ta heva ɖo woawo ŋutɔwo ƒe hamewo. Ke hã woyi edzi nɔ gbeƒã ɖem nɔ ame yeyewo nyrɔm ɖe tsi me. Woawo hã woyi mɔ́ le esi womedea akpa aɖeke dzi le dunyahehe me o ta, abe ale  si wòdzɔ ɖe nɔvi siwo kpɔtɔ le ha dem kple hame siwo dzi habɔbɔa ƒe dɔwɔƒegã da asi ɖo la dzi ene. Esi wokpɔtɔ ɖo asi dɔa dzi le Romania ta la, mía kple hamemetsitsi ene siwo nye ŋgɔxɔlawo kpakple Romania Dukɔ Dzikpɔkɔmiti si dzi habɔbɔa da asi ɖo la teƒenɔlawo, míekpe le Nɔviŋutsu Pamfil Albu ƒe aƒe me le adzame. Míekplɔ gbegɔmeɖela, si nye Nɔviŋutsu Rolf Kellner, hã tso Austria yii.

Esi míekpe zi evelia nɔ nu me dzrom kpli wo le zãa me la, Nɔviŋutsu Albu ƒoe ɖe hamemetsitsi ene bubuawo nu be woawɔ ɖeka kpli mí esi wògblɔ be, “Ne míewɔ esia fifia o la, ɖewohĩ mɔnukpɔkpɔ bubu aɖeke magasu mía si o.” Ema megbe la, wogaxɔ nɔvi siwo anɔ 5,000 sɔŋ wova wɔ ɖeka kple habɔbɔa. Aʋadziɖuɖu gã aɖee esia nye na Yehowa, evɔ wòhena Satana ɖu ŋukpe!

Le ƒe 1989 ƒe nuwuwu lɔƒo, hafi Kɔmiunist Dziɖuɖua namu le Ɣedzeƒe Europa la, Dɔdzikpɔha la kpe nye kple srɔ̃nye be míava wɔ dɔ le habɔbɔa ƒe dɔwɔƒegã la, le New York. Míenɔ mɔ kpɔm na esia kura o. Míedze dɔwɔwɔ gɔme le Brooklyn Betel le July 1990 me. Le ƒe 1992 me la, wode dɔ asi nam be manye Dɔdzikpɔha la ƒe Subɔsubɔ Kɔmiti la ƒe kpeɖeŋutɔ, eye tso July 1994 me la, mɔnukpɔkpɔ su asinye mezu Dɔdzikpɔha la me tɔ.

Ɣeyiɣi si menye kplɔ̃ŋusubɔla le amedzrodzeƒe aɖe henɔa nuɖuɖu dam ɖe kplɔ̃ dzi na amewo la va yi xoxoxo. Fifia la, enye dzidzɔ nam be mele gome kpɔm le gbɔgbɔmenuɖuɖu nana míaƒe xexea me katã ƒe nɔviwo ƒe habɔbɔa me tɔwo me. (Mat. 24:45-47) Ne metrɔ kpɔ ƒe 50 siwo metsɔ le ɣeyiɣiawo katã ƒe subɔsubɔdɔ tɔxɛa wɔm la, dzi dzɔam ŋutɔ eye medaa akpe na Yehowa ɖe ale si wòle yayram ɖe míaƒe xexea me katã ƒe nɔviwo ƒe habɔbɔa dzi la ta. Dukɔwo dome takpekpewo dede vivia nunye, elabena wodea dzi ƒo na mí le kpekpe mawo me be míasrɔ̃ nu tso mía Fofo Yehowa si le dziƒo kple Biblia me nyateƒea ŋu.

Nye gbedodoɖae nye be ame miliɔn bubu geɖewo asrɔ̃ Biblia ava xɔ nyateƒea eye woawɔ ɖeka kple xexea me katã ƒe Kristotɔwo ƒe nɔviwo ƒe habɔbɔa le Yehowa subɔsubɔ me. (1 Pet. 2:17) Mele mɔ kpɔm na ɣeyiɣi si manɔ dziƒo akpɔ eteƒe woafɔ amewo ɖe tsitre le anyigba dzi ahakpɔ fofonye si dzim la hã. Mele mɔ kpɔm hã be fofonye, danye kple nye ƒometɔ lɔlɔ̃awo katã nalɔ̃ asubɔ Yehowa le Paradiso me.