1. (a) Nu kae dzɔ ɖe Petro dzi esime ya sesẽ aɖe nɔ ƒoƒom le Galilea-ƒua dzi? (Kpɔ nɔnɔmetata si le nyati sia ƒe gɔmedzedze.) (b) Nu kae na Petro de asi toyiyi me?

LE ZÃ aɖe me la, apostolo Petro kple nusrɔ̃la bubu aɖewo nɔ tɔdziʋu me be yewoatso Galilea-ƒua, gake ya sesẽ aɖe ƒo va le wo kpem, si wɔe be ʋua kuku zu dɔ na wo. Kasia, Yesu ye nye ema le ƒua dzi zɔm gbɔna. Petro yɔ Yesu hebiae be nena ye hã yeazɔ tsia dzi ava egbɔ. Esi Yesu lɔ̃ ɖe edzi be wòava la, Petro ɖi le tɔdziʋua me hezɔ tsia dzi ɖo ta Yesu gbɔ. Gake eteƒe medidi o, Petro de asi toyiyi me. Nu ka tae? Elabena ekpɔ ya sesẽ si le ƒoƒom la kple ƒutsotsoeawo eye vɔvɔ̃ ɖoe. Petro do ɣli na Yesu be wòaxɔ na ye, eye enumake Yesu do asi ɖa lée gblɔ nɛ be: “Wò xɔseʋɛtɔ, nu ka ŋuti nèke ɖi?”—Mateo 14:24-32.

2. Nu kawo mee míadzro?

² Na míadzro nu etɔ̃ siwo míate ŋu asrɔ̃ tso xɔse ŋu le Petro ƒe nuteƒekpɔkpɔa me la me: (1) ale si Petro ka ɖe edzi gbã be Yehowa akpe ɖe ye ŋu, (2) nu si tae Petro ƒe xɔse gbɔdzɔ  kple (3) nu si kpe ɖe Petro ŋu be ŋusẽ gaɖo eƒe xɔse ŋu. Esiawo me dzodzro akpe ɖe mía ŋu be ‘míanɔ tsitre sesĩe le xɔse la me.’—1 Korintotɔwo 16:13.

3. Nu ka tae Petro ɖi le tɔdziʋua me hezɔ tsia dzi, eye aleke míawo hã míeɖe afɔ ma tɔgbi?

³ Xɔse sesẽ nɔ Petro si. Nu ka tae míegblɔe alea? Esi Yesu kpe Petro be neva la, eɖi le tɔdziʋua me hezɔ tsia dzi. Eka ɖe edzi be Mawu ana ŋusẽ ye yeazɔ tsia dzi abe ale si wòwɔe na Yesu ene. Nenema ke esi Yesu kpe míawo hã be míadze ye yome la, míetsɔ mía ɖokuiwo ɖe adzɔgbe na Yehowa hexɔ nyɔnyrɔ. Nu ka tae? Elabena míexɔ Yehowa kple Yesu dzi se eye míeka ɖe edzi bliboe be woakpe ɖe mía ŋu.—Yohanes 14:1; xlẽ 1 Petro 2:21.

4, 5. Nu ka tae xɔse nye nu xɔasi aɖe?

⁴ Nu xɔasi aɖee xɔse nye. Petro ƒe xɔse kpe ɖe eŋu wòzɔ tsi dzi, nu si dze abe manya wɔ na amegbetɔ o ene. Xɔse ate ŋu akpe ɖe míawo hã ŋu be míawɔ nu si dze abe manya wɔ o ene. (Mateo 21:21, 22) Mía dometɔ aɖewo míetrɔ míaƒe nɔnɔme kple agbenɔnɔ ale gbegbe be ame siwo nya mí tsã megakpɔa mí dzea sii o. Nu si na míewɔ tɔtrɔ siawoe nye be míeva lɔ̃ Yehowa, eye eya hã kpe ɖe mía ŋu le wo wɔwɔ me. (Xlẽ Kolosetɔwo 3:5-10.) Xɔse ʋã mí míeɖe adzɔgbe na Yehowa heva zu exɔlɔ̃wo, eye esia manya wɔ eƒe kpekpeɖeŋu manɔmee o.—Efesotɔwo 2:8.

⁵ Míaƒe xɔse nana míesẽa ŋu. Esia wɔnɛ be míetea ŋu tsia tsitre sesĩe ɖe Abosam, si nye míaƒe futɔ sẽŋu la ŋu ne edze mía dzi. (Efesotɔwo 6:16) Azɔ hã esi míeɖoa ŋu ɖe Yehowa ŋu ta la, míetsia dzimaɖi fũu ne míele kuxiwo me tom o. Yehowa do ŋugbe na mí be, yeana nu siwo míehiã la mí ne míeka ɖe ye dzi hedi yeƒe Fiaɖuƒea gbã. (Mateo 6:30-34) Nu si gawu esiae nye be, Yehowa ana agbe mavɔ nunana mí ne míelé xɔse me ɖe asi.—Yohanes 3:16.

6, 7. (a) Nu kae míate ŋu atsɔ ya sesẽ kple ƒutsotsoe siwo na Petro vɔ̃ la asɔ kplii? (b) Nu ka tae wòle be míanyae be míaƒe xɔse me ate ŋu agbɔdzɔ?

⁶ Esi Petro nɔ zɔzɔm le Galilea-ƒua dzi la, vɔvɔ̃ ɖoe. Nu ka tae? Ya sesẽ la kple ƒutsotsoeawo tae. Míate ŋu atsɔ esiawo asɔ kple dodokpɔ kple tetekpɔ siwo vaa Kristotɔwo dzi egbea. Aleke kee kuxi siawo nu sẽe o, Yehowa ate ŋu akpe ɖe mía ŋu míanɔ tsitre sesĩe. Gake ɖo ŋku nu si dzɔ ɖe Petro dzi la dzi. Menye esi ya kple ƒutsotsoeawo nɔ elɔm tae wòdze toyiyi o. Ke boŋ Biblia gblɔ be: “Esi wòkpɔ ale si ya la le ƒoƒom sesĩe la, evɔ̃.” (Mateo 14:30) Petro ƒe ŋku va nɔ ya sesẽ la ŋu le esi wòanɔ Yesu ŋu teƒe. Ale eƒe xɔse va nɔ gbɔdzɔgbɔdzɔm. Ne míawo hã míaƒe susu va le míaƒe kuxiwo ko ŋu la, ava nɔ wɔwɔm na mí be Yehowa mate ŋu akpe ɖe mía ŋu o.

 ⁷ Eya ta ele be míanyae be míaƒe xɔse ate ŋu agbɔdzɔ. Nu ka tae? Elabena Biblia gblɔ le xɔse si tea ŋu gbɔdzɔna la ŋu be enye “nu vɔ̃ si ɖea to ɖe mí bɔbɔe.” (Hebritɔwo 12:1) Abe Petro ene la, ne míena míaƒe ŋku va le nu siwo mesɔ o ŋu la, míaƒe xɔse agbɔdzɔ kaba. Ekema aleke míawɔ anya be míaƒe xɔse le gbɔdzɔgbɔdzɔm? Nyabiabia siwo gbɔna akpe ɖe mía ŋu míadzro mía ɖokuiwo me.

8. Aleke wòate ŋu adzɔe be míagava nɔ mɔ kpɔm na Mawu ƒe ŋugbedodowo abe tsã ene o?

⁸ Ðe megakpɔa mɔ na Mawu ƒe ŋugbedodowo vevie fifia abe tsã enea? Le kpɔɖeŋu me, Mawu do ŋugbe be yeatsrɔ̃ Satana ƒe xexea. Ke hã ɖe dzidzɔdonamenu gbogbo siwo le eƒe xexea me la hea míaƒe susua? Ne edzɔ alea la, míagava ka ɖe edzi tututu be nuwuwua gogo o. (Habakuk 2:3) Gabu nya sia hã ŋu kpɔ. Yehowa na tafea mí eye wòdo ŋugbe na mí be yeatsɔ míaƒe vodadawo ake mí. Gake ne míaƒe susu katã va le vodada siwo míewɔ va yi ŋu la, ava nɔ wɔwɔm na mí eveveve nenye be Yehowa tsɔ wo ke mí vavã. (Dɔwɔwɔwo 3:19) Esia ana be dzi maganɔ mía dzɔm le Mawu subɔsubɔ me o eye míadzudzɔ gbeadzi dede.

9. Nu kae adzɔ ne míeva le nu siwo ana nu nanyo na mí egbea ko ŋu bum?

⁹ Ðe megale Yehowa subɔm tso dzi blibo mea? Ne míewɔa geɖe le Yehowa subɔsubɔ me la, ana be míaƒe susu katã nanɔ nu siwo míele mɔ kpɔm na la ŋu. Ke ne míeva le nu siwo ana nu nanyo na mí egbea ko ŋu bum ya ɖe? Anɔ eme be míelɔ̃ be míawɔ dɔ aɖe si me ga geɖe le evɔ mana mɔ mí míasubɔ Yehowa bliboe o. Esia ate ŋu agbɔdzɔ míaƒe xɔse me, eye míava zu “kuviatɔwo,” si fia be mímanɔ dɔ geɖe wɔm na Yehowa abe ale si dze ene o.—Hebritɔwo 6:10-12.

10. Ne míetsɔa amewo ƒe vodada kea wo la, aleke wòɖenɛ fiana be míexɔ Yehowa dzi se?

¹⁰ Ðe wòle sesẽm nam be matsɔ amewo ƒe vodada ake woa? Ne amewo dze agɔ le mía dzi alo wɔ nu wòve mí la, ɖe míedoa dziku vevie heléa ke woa? Ne nenemae la, ke efia be míele mía ɖokui ŋu bum fũu akpa. Ne míetsɔa amewo ƒe vodada kea wo la, eɖenɛ fiana be míexɔ Yehowa dzi se. Le mɔ ka nu? Ne ame aɖe wɔ nu vɔ̃ ɖe mía ŋu la, enyi fe le mía ŋue nye ema. Eye ne míawo hã míewɔ nu vɔ̃ ɖe Yehowa ŋu la, míenyi fe le eŋu. (Luka 11:4) Eya ta ne míetsɔ ke amewo la, ke efia be míeka ɖe Yehowa dzi. Míexɔe se be ayra mí ne míewɔe alea, eye be eƒe yayra le vevie na mí wu be amea naxe fe si wònyi le mía ŋu alo akpɔ nu si wòwɔ la me tsonu. Yesu ƒe nusrɔ̃lawo nyae be ehiã  xɔse hafi yewoate ŋu atsɔ ake amewo faa. Esi Yesu gblɔ na wo be woatsɔ ame siwo wɔ nu vɔ̃ ɖe wo ŋu zi gbɔ zi geɖe gɔ̃ hã ƒe nu vɔ̃wo ake wo la, eƒe nusrɔ̃laawo ɖe kuku nɛ be: “Na míaƒe xɔse nadzi ɖe edzi.”—Luka 17:1-5.

11. Nu kae ana be aɖaŋuɖoɖo maɖe vi na mí o?

¹¹ Ðe mekpɔa dziku ne woɖo aɖaŋu nama? Anyo be nàse aɖaŋuɖoɖo ahasrɔ̃ nu tso eme ke menye be nànɔ vodada dim le aɖaŋuɖoɖoa alo ame si le eɖom na wò la ŋu o. (Lododowo 19:20) Mègana mɔnukpɔkpɔ nyui sia si su asiwò be nàbu nuwo ŋu abe ale si Yehowa bua woe ene la nàto ŋuwò o!

12. Ne ame aɖe toa nyatoƒoe le ame siwo le ŋgɔ xɔm le hamea me ŋu ɣesiaɣi la, nu kae esia ɖe fia?

¹² Ðe metoa nyatoƒoe le ame siwo le ŋgɔ xɔm le hamea me ŋua? Esi Israel-viwo tsɔ susu ɖo nyatakaka gbegblẽ siwo ŋkutsala ewoawo he vɛ ŋu la, wolĩ Mose kple Aron ŋu. Eye Yehowa bia Mose be: “Va se ɖe ɣekaɣie woagbe dzinye xɔxɔ se.” (4 Mose 14:2-4, 11) Yehowa nya be Israel-viwo mexɔ ye dzi se o le esi wolĩ Mose kple Aron, siwo nye ŋutsu siwo wòɖo wo nu la, ŋu ta. Nenema ke ne míetoa nyatoƒoe le ame siwo zãm Yehowa le tsɔ le eƒe amewo kplɔm egbea ŋu la, esia ate ŋu afia be míaƒe Mawu dzi xɔse me gbɔdzɔ.

13. Ne míekpɔe be míaƒe xɔse me gbɔdzɔ la, nu ka tae mele be dzi naɖe le mía ƒo o?

¹³ Esi nèdzro nyabiase siawo me vɔ la, ɖe nèkpɔe be wò xɔse me gbɔdzɔa? Ne ele alea la, dzi megaɖe le ƒowò o. Ðo ŋku edzi be vɔvɔ̃ ɖo apostolo Petro gɔ̃ hã eye wòke ɖi. Yesu xlɔ̃a nu eƒe apostoloawo katã ɣeaɖewoɣi be wonye “xɔseʋɛtɔwo.”  (Mateo 16:8) Ke hã míate ŋu asrɔ̃ nu vevi aɖewo tso nu si dzɔ ɖe Petro dzi la me. Kpɔ nu si wòwɔ esi wòke ɖi hede asi toyiyi me megbe ɖa.

14, 15. (a) Nu kae Petro wɔ esime wònɔ nyɔnyrɔm? (b) Aleke míaƒe ‘ŋku ate ŋu anɔ Yesu ŋu tututu’?

¹⁴ Nu kae Petro wɔ esime wòde asi toyiyi me? Petro nya tsiƒuƒu nyuie eya ta ate ŋu atiae be yeaƒu tsia atrɔ ayi tɔdziʋua me. (Yohanes 21:7) Gake nu ka tae mewɔe alea o? Elabena meɖo ŋu ɖe eɖokui ŋu o. Etrɔ ɖe Yesu ŋu ake hebia be wòakpe ɖe ye ŋu. Ne míekpɔe be míaƒe xɔse gbɔdzɔ la, nunya anɔ eme be míasrɔ̃ Petro ƒe kpɔɖeŋua. Aleke míate ŋu awɔ esiae?

¹⁵ Ale si ko Petro trɔ ɖe Yesu ŋu hebia kpekpeɖeŋu la, nenema kee wòle be míawo hã míana míaƒe ‘ŋku nanɔ Yesu ŋu tututu.’ (Xlẽ Hebritɔwo 12:2, 3.) Gake míawo ya míate ŋu akpɔ Yesu kple ŋku ŋutɔŋutɔ abe Petro ene o. Ke aleke míaƒe ‘ŋku ate ŋu anɔ eŋu tututu’? Míate ŋu awɔ esia ne míesrɔ̃a nu siwo wòfia kple nu siwo wòwɔ hedzea eƒe afɔɖoƒe yome pɛpɛpɛ. Ewɔwɔ alea akpe ɖe mía ŋu be ŋusẽ naɖo míaƒe xɔse ŋu. Na míakpɔ mɔ siwo nu míate ŋu asrɔ̃ Yesu le dometɔ aɖewo ɖa.

16. Aleke Biblia ate ŋu akpe ɖe mía ŋu míado ŋusẽ míaƒe xɔse?

¹⁶ Na ale si nèxɔ Biblia dzi se la me nasẽ ɖe edzi. Yesu ka ɖe edzi be Biblia nye Mawu ƒe Nya, eye be eya mee mɔfiame nyuitɔwo le. (Yohanes 17:17) Be kakaɖedzi ma nasu míawo hã si la, ele be míaxlẽ Biblia gbe sia gbe, asrɔ̃e ahade ŋugble le nufiame siwo le eme na mí ŋu. Ele hã be míadi biabia siwo le fu ɖem na mí la ƒe ŋuɖoɖowo le eme. Le kpɔɖeŋu me, ɖe nèxɔe se ŋutɔŋutɔ be míele ŋkeke mamlɛawo mea? Be nàka ɖe edzi geɖe wu la, srɔ̃ Biblia me nyagblɔɖi siwo ɖo kpe edzi be míele ŋkeke mamlɛawo me. Ðe nèdi be yeado ŋusẽ yeƒe xɔse le nu siwo ŋugbe Mawu do be yeawɔ le etsɔme ŋua? Ekema srɔ̃ Biblia me nyagblɔɖi siwo le eme vam. Ðe nèka ɖe edzi vavã be Biblia me nyawo sɔ na mí egbea? Ke àte ŋu axlẽ nɔviŋutsu kple nɔvinyɔnu siwo ŋu Biblia kpe ɖo wotrɔ woƒe agbenɔnɔ la ƒe ŋutinyawo. * (Kpɔ etenuŋɔŋlɔa.)—1 Tesalonikatɔwo 2:13.

17. Nu kae kpe ɖe Yesu ŋu wòdo dzi le dodokpɔ siwo nu sẽ ŋutɔ me, eye aleke nàte ŋu asrɔ̃ eƒe kpɔɖeŋu?

¹⁷ Wò susu nenɔ yayra siwo ŋugbe Yehowa do ŋu. Yesu ƒe susu nɔ yayra siwo nɔ ŋgɔ nɛ la ŋu eye esia kpe ɖe eŋu wòdo dzi le dodokpɔ siwo nu sẽ ŋutɔ me. (Hebritɔwo 12:2) Meɖe mɔ xexea me nuwo he eƒe susu o. (Mateo 4:8-10) Aleke míate ŋu asrɔ̃ Yesu ƒe kpɔɖeŋu sia? Nɔ ŋugble dem le ŋugbe nyui siwo Yehowa do na mí ŋu. Kpɔ ɖokuiwò le xexe yeyea me. Anyo hã be nàŋlɔ nu siwo nàdi be yeawɔ le Paradisoa me la alo atae ɖe nu dzi. Alo ŋlɔ ame siwo woagbɔ agbee siwo nàdi be yeaɖo dze kple la ƒe ŋkɔwo kple nya siwo nàdi be yeabia wo la ɖi. Bu ŋugbedodo siawo be woyi na ye, ke menye na amewo katã ko o.

18. Aleke gbedodoɖa ate ŋu akpe ɖe ŋuwò be ŋusẽ naɖo wò xɔse ŋu?

 ¹⁸ Bia Mawu be wòana wò xɔse nadzi ɖe edzi. Yesu fia eƒe nusrɔ̃lawo be woado gbe ɖa na Yehowa abia eƒe gbɔgbɔ kɔkɔea. (Luka 11:9, 13) Ne èle gbɔgbɔ kɔkɔea biam la, bia Mawu be wòana wò xɔse nadzi ɖe edzi. Elabena xɔse hã nye gbɔgbɔ kɔkɔea ƒe kutsetsea ƒe akpa aɖe. Àte ŋu ado gbe ɖa tso nanewo koŋ ŋuti. Le kpɔɖeŋu me, ne ède dzesii be ele sesẽm na ye be yeatsɔ ake amewo faa la, do gbe ɖa nàbia Yehowa be wòado ŋusẽ wò xɔse ne nàte ŋu atsɔ amewo ƒe vodada ake wo.

19. Aleke míawɔ adze xɔlɔ̃ nyuiwo?

¹⁹ Dze xɔlɔ̃ ame siwo si xɔse sesẽ le. Yesu lé ŋku ɖe ame siwo wòadze xɔlɔ̃e la ŋu nyuie. Exɔlɔ̃ veviawo, siwo nye apostoloawo, nye anukwareɖilawo, nuteƒewɔlawo kple ame siwo ɖoa toe. (Xlẽ Yohanes 15:14, 15.) Srɔ̃ Yesu eye nàlé ŋku ɖe ame siwo nàdze xɔlɔ̃e la ŋu nyuie. Ele be woanye ame siwo si xɔse sesẽ le siwo ɖoa to Yesu. Xɔlɔ̃ veviwo ɖia anukware na wo nɔewo, ne ehiã be woaɖo aɖaŋu alo axɔ aɖaŋuɖoɖo gɔ̃ hã.—Lododowo 27:9.

20. Vi kae wòaɖe ne míekpe ɖe amewo ŋu be woatu woƒe xɔse ɖo?

²⁰ Kpe ɖe amewo ŋu be woatu woƒe xɔse ɖo. Yesu kpe ɖe eƒe nusrɔ̃lawo ŋu wodo ŋusẽ woƒe xɔse to eƒe nyagbɔgblɔ kple nuwɔnawo dzi. (Marko 11:20-24) Ne míesrɔ̃ Yesu la, aɖe vi na mí ŋutɔ. Elabe esia wɔwɔ ado ŋusẽ míawo ŋutɔ ƒe xɔse kple ame bubuwo tɔ siaa. (Lododowo 11:25) Aleke nàte ŋu akpe ɖe ame siwo le wò anyigbamama me ŋui? Eyae nye be, ne èle Biblia fiam amewo la, te gbe ɖe edzi be Mawu li, be etsɔa ɖe le eme na mí, eye be Biblia nye Mawu ƒe Nya. Aleke nàte ŋu akpe ɖe haxɔsetɔwo ŋu be ŋusẽ nakpɔtɔ anɔ woƒe xɔse ŋu? Ne èkpɔe be nɔvi aɖe le nɔviŋutsu siwo le ŋgɔ xɔm la ŋu lĩm la, mègaƒo asa nɛ enumake o. Dze agbagba nàkpe ɖe eŋu aɖaŋutɔe be wòado ŋusẽ eƒe xɔse. (Yuda 22, 23) Ne sukuvie nènye, eye wòva dzɔ be miaƒe nufialaa le nu fiam mi tso amedzɔtsolãme ŋu la, lé dzi ɖe ƒo nàƒo nu tso xɔse si le asiwò le nuwɔwɔwo ŋu la ŋu. Ale si wò nufialaa kple sukuhatiwo axɔ nya sia la awɔ nuku na wò ale gbegbe.

21. Ŋugbe kae Yehowa do na mí?

²¹ Yehowa kple Yesu kpe ɖe Petro ŋu wòɖu vɔvɔ̃ kple ɖikeke dzi. Emegbe Petro va zu xɔse ƒe kpɔɖeŋu nyui aɖe na amewo. Yehowa kpena ɖe mía dometɔ ɖe sia ɖe hã ŋu nenema ale be míanɔ tsitre sesĩe le xɔse me. (Xlẽ 1 Petro 5:9, 10.) Ebia agbagbadzedze geɖe hafi míatu xɔse sẽŋu ɖo, gake Yehowa ayra mí ne míedo ŋusẽ nu wɔe.