1. Nu ka ŋue apostolo Yohanes de dzi ƒo na mí be míade ŋugble le, eye nu ka tae?

APOSTOLO YOHANES de dzi ƒo na mí be míade ŋugble le lɔlɔ̃ gã si le Yehowa si na mí la ŋu. Egblɔ le 1 Yohanes 3:1 be: “Mikpɔ lɔlɔ̃ si ƒomevi Fofo la tsɔ lɔ̃ míi ɖa.” Ne míebu lɔlɔ̃ si gbegbe Yehowa tsɔ lɔ̃ mí kple ale si wòɖe lɔlɔ̃ sia fia míi ŋu la, etea mí ɖe eya amea ŋu eye míegalɔ̃nɛ ɖe edzi.

2. Nu ka tae wòsesẽna na ame aɖewo be woakpɔe be Mawu lɔ̃ yewo?

² Nublanuitɔe la, esesẽna na ame aɖewo be woaxɔe ase be Mawu lɔ̃ yewo. Wobunɛ be Mawu metsɔa ɖeke le eme na amewo o. Ðewohĩ woxɔe se be sewo koe Mawu dena eye wòhea to na ame siwo mewɔna ɖe wo dzi o. Aʋatsonufiafia wɔe be ame aɖewo susui gɔ̃ hã be Mawu nye tagbɔsẽla eye manya wɔ be yewoalɔ̃e o. Ame aɖewo hã bui be Mawu lɔ̃ ame sia ame, nu ka kee amea ɖawɔ o. Gake Biblia sɔsrɔ̃ kpe ɖe ŋuwò nèva nya nyateƒe si ku ɖe Yehowa ŋu. Èva  nyae hã be lɔlɔ̃e nye eƒe nɔnɔme vevitɔ eye be etsɔ Via sa vɔe ɖe mía ta. (Yohanes 3:16; 1 Yohanes 4:8) Ke hã nu siwo me nèto le agbe me ate ŋu ana wòasesẽ na wò be nàkpɔ ale si gbegbe Yehowa lɔ̃ wòe.

3. Nu kae ate ŋu akpe ɖe mía ŋu míakpɔe be Yehowa lɔ̃ mí vavã?

³ Be míate ŋu axɔe ase be Yehowa lɔ̃ mí vavã la, ele be míase egɔme gbã be Eyae wɔ mí. Eye Eyae na agbe mí. (Xlẽ Psalmo 100:3-5.) Ema tae Biblia gblɔ tso amegbetɔ gbãtɔ ŋu be enye “Mawu ƒe vi.” (Luka 3:38) Eye Yesu hã fia mí be míayɔ Yehowa be “Mía Fofo si le dziƒowo.” (Mateo 6:9) Eya ta Yehowa nye mía Fofo, eye elɔ̃ mí vevie abe ale si ko vifofo nyui lɔ̃a viawoe ene.

4. (a) Fofo ka ƒomevie Yehowa nye? (b) Nu kawo mee míadzro le nyati sia kple esi kplɔe ɖo me?

⁴ Esesẽna na ame aɖewo be woaxɔe ase be vifofowo lɔ̃a wo viwo. Anɔ eme be wo fofo sẽ ŋuta le wo ŋu le ɖevime, eye ŋkuɖoɖo esia dzi gbãa dzi na wo. Yehowa mawɔ nu ɖe viawo ŋu alea gbeɖe o. Eyae nye Fofo nyuitɔ kekeake. (Psalmo 27:10) Elɔ̃ mí vevie eye wòléa be na mí le mɔ geɖe nu. Ne míese le mía ɖokui me be Yehowa lɔ̃ mí la, míawo hã míalɔ̃e. (Yakobo 4:8) Le nyati sia me la, míadzro mɔ ene siwo nu Yehowa ɖe lɔlɔ̃ fia mí le la me. Eye míakpɔ mɔ ene siwo nu míawo hã míaɖee afia le be míelɔ̃e la le nyati si kplɔe ɖo me.

5. Nu kae Mawu na ame sia ame?

⁵ Esime apostolo Paulo nɔ Atene, le Hela la, ede dzesii be legbawo le dua me fũu eye ameawo xɔe se be yewoƒe mawu siawoe na agbe yewo. Eya ta eƒo nu tso “Mawu si wɔ xexea kple nu siwo katã le eme” la ŋu na wo. Egblɔ be Mawu “ŋutɔe naa agbe kple agbegbɔgbɔ kpakple nuwo katã ame sia ame” eye be “eyae na míele agbe, eye míeʋãna, eye míeli.” (Dɔwɔwɔwo 17:24, 25, 28) Yehowa ye na nu sia nu si míehiã be míanɔ agbe ahase vivi nɛ la mí. Bu nu siwo lɔlɔ̃ ʋãe wòna mí la dometɔ aɖewo ŋu kpɔ.

6. Aleke aƒe si Yehowa na mí la le? (Kpɔ nɔnɔmetata si le nyati sia ƒe gɔmedzedze.)

⁶ Yehowa na aƒe nyui aɖe mí. (Psalmo 115:15, 16) Le ɣletinyigba gbogbo siwo wòwɔ dome la, míaƒe anyigba ya le etɔxɛ. Dzɔdzɔmeŋutinunyalawo yi yamenutowo me eye woke ɖe ɣletinyigba gbogbo aɖewo ŋu, gake va se ɖe fifia la, womekpɔ ɣletinyigba aɖeke si dzi nu siwo hiã be amegbetɔwo nate ŋu anɔ agbe la le o. Menye ɖeko Yehowa na nu sia nu si alé míaƒe agbe ɖe te mí ko evɔ o, ke etrɔ asi le anyigba ŋu wònya kpɔ, eye wònye teƒe si dzidzeme le, afi si míanɔ dedie ahase vivi na agbea le. (Yesaya 45:18) Ne míede ŋugble le anyigba nyui si mía Fofo Yehowa na mí ŋu la, míekpɔnɛ be elɔ̃ mí ale gbegbe.—Xlẽ Hiob 38:4, 7; Psalmo 8:3-5.

7. Aleke Yehowa ɖe lɔlɔ̃ fia mí le ale si wòwɔ míi me?

⁷ Mɔ bubu si nu Yehowa ɖe lɔlɔ̃ fia mí lee nye ale si wòwɔ mí kple ŋutete be míasrɔ̃ yeƒe nɔnɔme nyuiwo. (1 Mose 1:27) Esia fia be míate ŋu ade dzesii be elɔ̃ mí eye míawo hã míaɖee afia be  míelɔ̃e. Enyae be esia wɔwɔe ana míakpɔ dzidzɔ vavãtɔ. Nyateƒeae nye be, ɖeviwo kpɔa dzidzɔ wu ne wokpɔe be yewo dzilawo lɔ̃ yewo vevie. Eye ɖo ŋku edzi hã be Yesu fia mí be míakpɔ dzidzɔ nenye be míete ɖe mía Fofo Yehowa ŋu kplikplikpli. (Mateo 5:3) Enaa “nuwo katã mí fũu be wòado dzidzɔ na mí.” Eme kɔ ƒãa be Yehowa lɔ̃a mí vevie henyoa dɔme na mí geɖe.—1 Timoteo 6:17; Psalmo 145:16.

8. Nu ka tae míedina be Yehowa nafia nu mí?

⁸ Vifofo nyuiwo lɔ̃a wo viwo vevie eye womedina be woable wo alo aflu wo o. Gake egbea dzila geɖewo melɔ̃ ɖe Biblia ƒe dzidzenu le nyui kple vɔ̃ ŋu dzi o. Eya ta wometea ŋu fiaa mɔ wo viwo nyuie o, esia wɔnɛ be ƒomea mekpɔa dzidzɔ o eye wotɔtɔna. (Lododowo 14:12) Ke hã Yehowa ya fiaa nu nyuitɔ viawo elabena “nyateƒe Mawu” ye wònye. (Psalmo  31:5) Edzɔa dzi nɛ be yeafia ye ŋuti nyateƒea mí. Eye efiaa ale si míasubɔe kple mɔ nyuitɔ si nu míanɔ agbe ɖo la hã mí. (Xlẽ Psalmo 43:3.) Ke nu kae Yehowa fia mí si ɖe ale si gbegbe wòlɔ̃ mí la fia?

9, 10. (a) Nu ka tae Yehowa fiaa nu mí tso eɖokui ŋu? (b) Nu kae wòfiaa mí le nu siwo wòɖo be yeawɔ ŋu?

⁹ Gbã la, Yehowa fiaa nu mí tso eɖokui ŋu. Edi be míadze si ye nyuie. (Yakobo 4:8) Eya ta eyɔ eŋkɔ na mí. Le nyateƒe me la, eƒe ŋkɔ dze le Biblia me wu ŋkɔ bubu ɖe sia ɖe. Yehowa fia Ame si tututu wònye hã mí. Ne míelé ŋku ɖe nu siwo wòwɔ ɖe xexea me ŋu la, míakpɔe be ŋusẽ le esi eye wònye nunyala hã. (Romatɔwo 1:20) Eye ne míexlẽa Biblia la, míakpɔ ale si wòle dzɔdzɔe kple ale si gbegbe wòlɔ̃ míi. Gakpe ɖe eŋu la, ne míeyi edzi le nu srɔ̃m tso nɔnɔme nyui siwo le Yehowa si ŋu la, ana míanɔ tetem ɖe eŋu geɖe wu.

¹⁰ Yehowa fiaa nu siwo wòɖo be yeawɔ hã mí. Ena míenya be míenye yeƒe ƒome gã la me tɔwo. Eɖe nu siwo wòdi be míawɔ ale be míate ŋu awɔ dɔ ɖekae le ŋutifafa me kple eƒe ƒomea me tɔ ɖe sia ɖe la me na mí. Biblia gblɔe eme kɔ be, Mawu mewɔ mí be míawo ŋutɔ míatso nya me le nu si nye nyui alo vɔ̃ ŋu o. (Yeremiya 10:23) Yehowa nya nu si nyo na mí. Eye ne míelɔ̃ ɖe eƒe dziɖuŋusẽ dzi heɖo toe ko hafi míakpɔ ŋutifafa kple dzidzeme le agbe me. Esi Yehowa lɔ̃ mí tae wòfia nyateƒe vevi siawo mí ɖo.

11. Ŋugbe kae mía Fofo lɔ̃ame la do na mí?

¹¹ Vifofo si lɔ̃a viawo la bua woƒe etsɔme ŋu vevie. Edina be eme nanyo na wo. Nublanuitɔe la, ame akpa gãtɔ tsia dzimaɖi ɖe etsɔme ŋu, eye wo dometɔ geɖe gblẽa woƒe ɣeyiɣi nɔa nu siwo manɔ anyi didi o la yome. (Psalmo 90:10) Dzi dzɔa mí ŋutɔ be menye nu siwo ana eme nanyo na mí egbea ɖeɖe koe mía Fofo Yehowa fiaa mí o, ke edo ŋugbe na mí be yeana nu nyui geɖewo mí le etsɔme!

12. Aleke Yehowa dze agbagba be yeakpe ɖe Kain kple Baruk ŋu?

¹² Esi Yehowa kpɔ be Kain le afɔ baɖa ɖe ge la, edze agbagba be yeakpe ɖe Kain ŋu eye wòbiae be: “Nu ka tae nèdo dɔmedzoe heyɔ mo? Ne ètrɔ hewɔ nyui la, ɖe womakpɔ ŋudzedze ɖe ŋuwò oa?” (1 Mose 4:6, 7) Kain gbe Yehowa ƒe aɖaŋuɖoɖo xɔxɔ eye wòkpɔ emetsonua. (1 Mose 4:11-13) Ɣebubuɣi la, Yehowa kpɔe be nɔnɔme gbegblẽ aɖe va su Baruk si, si na be nu ti kɔ nɛ eye dzi ɖe le eƒo. Yehowa gblɔ na Baruk be mele nuwo ŋu bum nyuie o, eya ta netrɔ nɔnɔme. Baruk se Yehowa ƒe aɖaŋuɖoɖoa eye esia kpɔ eƒe agbe ta.—Yeremiya 45:2-5.

13. Nu kawoe Yehowa subɔla wɔnuteƒewo srɔ̃ le nɔnɔme sesẽ siwo me woto me?

 ¹³ Esi Yehowa lɔ̃ mí tae wòfiaa mɔ mí heɖɔa mí ɖo. Ehea to na mí ne ehiã, gake emlaa mí hã. (Hebritɔwo 12:6) Woƒo nu tso nuteƒewɔla geɖe siwo Yehowa na hehee wova zu ame ɖɔʋuwo la ŋu le Biblia me. Le kpɔɖeŋu me, Yosef, Mose kple David siaa to nɔnɔme sesẽwo me. Yehowa nɔ kpli wo le dodokpɔɣi siawo me. Wosrɔ̃ nɔnɔme nyui aɖewo le dodokpɔ sesẽ mawo me siwo kpe ɖe wo ŋu emegbe esime Yehowa de dɔ gãwo asi na wo. Ne míexlẽ nu tso ale si Yehowa do alɔ eƒe amewo hemla woe ŋu le Biblia me la, míekpɔnɛ be Yehowa lɔ̃ mí vavã.—Xlẽ Lododowo 3:11, 12.

14. Ne míewɔ nu gbegblẽ aɖe la, aleke Yehowa yia edzi ɖea lɔlɔ̃ fiaa mí?

¹⁴ Ne míenɔ agbe masɔmasɔ aɖe gɔ̃ hã la, Yehowa yia edzi ɖea lɔlɔ̃ fiaa mí. Eɖɔa mí ɖo eye ne míelɔ̃ xɔ eƒe amehehea hetrɔ dzi me la, ‘etsɔna kea mí geɖe.’ (Yesaya 55:7) Nya sia gɔme ɖe? Nya siwo David gblɔ le ale si Yehowa tsɔna kena ŋu la ɖee fia be, Fofo nublanuikpɔla gã aɖee wònye. David gblɔ be: “Etsɔa wò vodadawo katã kea wò eye wòdaa gbe le wò dɔlélewo katã ŋu; eyae xɔa wò agbe le yɔdo si me, eye wòtsɔa amenuveve kple nublanuikpɔkpɔ ɖɔna na wò. Ale si ɣedzeƒe didi tso ɣetoɖoƒe gbɔe la, nenemae wòte míaƒe dzidadawo ɖa boo tso mía gbɔe.” (Psalmo 103:3, 4, 12) Yehowa ɖɔa mí ɖo hefiaa mɔ mí le mɔ vovovowo nu. Ðe nètrɔna enumake ne eɖɔ wò ɖoa? Ðo ŋku edzi ɣesiaɣi be, lɔlɔ̃ ye ʋãa Yehowa wòɖɔa mí ɖo.—Psalmo 30:5.

15. Mɔ bubu ka nue Yehowa ɖe lɔlɔ̃ fia mí le?

¹⁵ Vifofo nyui dzea agbagba kpɔa eƒe ƒomea ta tso afɔku me. Esiae mía Fofo Yehowa wɔna na mí. Hakpalaa gblɔ le Yehowa ŋu be: “Ekpɔa ame siwo wɔa nuteƒe nɛ la ƒe agbe ta; eɖea wo tso ame vɔ̃ɖiwo si me.” (Psalmo 97:10) Bu nya sia ŋu kpɔ: Ale si ko ne nane be yeage ɖe ŋku dzi na mí la, míeɖea ŋku ɖa kaba le esi wòle vevie na mí ta la, nenema kee Yehowa hã tsona bla kpɔa eƒe amewo ta elabena woxɔ asi nɛ abe eƒe ŋkuvi ene.—Xlẽ Zakariya 2:8.

16, 17. Aleke Yehowa kpɔ eƒe amewo ta le blema kple míaƒe ŋkekea me?

¹⁶ Mɔ ɖeka aɖe si dzi Yehowa tona kpɔa eƒe amewo ta tso blema va se ɖe fifiae nye to mawudɔlawo dzi. (Psalmo 91:11) Mawudɔla ɖeka pɛ koe wu Asiria-srafo 185,000 le zã ɖeka me eye wòxɔ na Mawu ƒe amewo. (2 Fiawo 19:35) Le ƒe alafa gbãtɔ me la, mawudɔlawo ɖe Petro, Paulo kple ame bubuwo le gaxɔ me. (Dɔwɔwɔwo 5:18-20; 12:6-11) Nyitsɔ laa la, aʋa dziŋɔ aɖe dzɔ le Ameyibɔnyigba aɖe dzi. Dukɔa me tɔ zi, elabe amewo nɔ kɔ dam, nɔ fi fim, wonɔ nyɔnuwo gbɔ dɔm sesẽe, eye wonɔ amewo  wum. Togbɔ be nɔvi aɖeke meku o hã la, wo dometɔ geɖe ƒe nunɔamesiwo katã dome gblẽ. Gake wo katã wokpɔe be Yehowa lɔ̃ yewo eye wòle be lém na yewo. Le nu siawo katã megbe gɔ̃ hã wokpɔtɔ nɔ dzidzɔ kpɔm. Esime míaƒe dɔwɔƒegã ƒe amedɔdɔ aɖe va kpɔ nɔvi siawo ɖa hebia woƒe fɔfɔ ta se la, woɖo eŋu be, “Míeli nyuie, le Yehowa ƒe amenuveve ta!”

¹⁷ Ke hã abe nusrɔ̃la Stefano ene la, wowu Yehowa subɔla aɖewo le woƒe nuteƒewɔwɔ ta. Yehowa mexea mɔ na esia ɣesiaɣi o. Gake ekpɔa mí eƒe amewo ta abe ƒuƒoƒo ene esi wòxlɔ̃a nu mí tso aɖaŋu vɔ̃ vovovo siwo Satana zãna be yeatsɔ aflu mí la ŋu. (Efesotɔwo 6:10-12) Míekpɔa nuxlɔ̃ame siawo le Biblia kple agbalẽ siwo Yehowa ƒe habɔbɔa tana na mí la me. Le kpɔɖeŋu me, míesrɔ̃a nu tso afɔku siwo le Internet zazã, galɔlɔ̃, film, agbalẽ kple fefe siwo me woɖea agbe ƒaƒã nɔnɔ kple nu vlo wɔwɔ le me la ŋu zi geɖe. Nyateƒee Yehowa lɔ̃ mí eye wòkpɔa mía ta.

18. Aleke nèsena le ɖokuiwò me le lɔlɔ̃ si ƒomevi Yehowa tsɔ lɔ̃ wòe ŋu?

¹⁸ Esi Mose de ŋugble le ƒe gbogbo siwo me wòsubɔ Yehowa le ŋu la, ekpɔe be Yehowa lɔ̃ ye vavã. Esia tae Mose gblɔ be: “Tsɔ wò lɔlɔ̃ si nu metsina o la ɖi ƒoe na mí le ŋdi, ne míagli kple dzidzɔ ahatso aseye le míaƒe agbemeŋkekewo katã me.” (Psalmo 90:14) Yayrae wònye na mí be míeva nyae hekpɔe be Yehowa lɔ̃ mí. Mɔnukpɔkpɔ si ɖeke mesɔ kplii o ye wònye! Míesena le mía ɖokui me abe apostolo Yohanes ene esi wògblɔ be: “Mikpɔ lɔlɔ̃ si ƒomevi Fofo la tsɔ lɔ̃ míi ɖa.”—1 Yohanes 3:1.