Ðe Wògblẽ Be Woazã Mawu Ƒe Ŋkɔa?

MAWU ƒe ŋkɔ dze le Hebri Ŋɔŋlɔawo si woyɔna zi geɖe be “Nubabla Xoxoa” me ade zi 7,000 sɔŋ le nuŋɔŋlɔ ƒe nɔnɔme si nye יהוה (si woxlẽna tso ɖusime yina ɖe miame) la me. Esia fia be wozã Hebri ŋɔŋlɔdzesi ene siwo nye Yohdh, He, Waw, kple He wotsia tsitre ɖi na Mawu ƒe ŋkɔ la, eye zi geɖe le míaƒe nuŋlɔdzesi nu la, woŋlɔna YHWH.

Ɣeyiɣi didi aɖee nye esi va yi la, aʋatsodzixɔse aɖe va su Yudatɔwo si be mesɔ be woazã Mawu ƒe ŋkɔ la o. Le esia ta la, wodzudzɔ ŋkɔa yɔyɔ alo eŋɔŋlɔ, eye wote nya bubuwo tsɔtsɔ ɖɔlii. Gake Biblia gɔmeɖela geɖewo ɖe ŋkɔa gɔme be “Yahweh,” alo “Yehowa.” Biblia gɔmeɖeɖe siwo wɔe alea dometɔ ɖekae nye Katolikotɔwo ƒe Jerusalem Bible. Le Biblia gɔmeɖeɖe sia ƒe nya nu la, esime Mose bia Mawu be, nya kae wòle be yeagblɔ ne Israel viwo bia ye be ame kae dɔ ye mahã la, Mawu ɖo eŋu nɛ be: “Gblɔ na Israel viwo be: ‘Yahweh, mia fofowo ƒe Mawu, Abraham kple Isak kpakple Yakob ƒe Mawu ye dɔm ɖe mia gbɔ.’ Esiae nye nye ŋkɔ hena ɣeyiɣiawo katã; ŋkɔ siae dzidzime siwo katã ava va la ayɔ nam.”—2 Mose 3:15.

Esime Yesu nɔ gbe dom ɖa la, eƒo nu tso ale si eya ŋutɔ zã Mawu ƒe ŋkɔ lae ŋu ale: “Mena wonya wò ŋkɔ la, eye mana woanyae.” Eye Yesu gblɔ le gbedodoɖa aɖe si amewo lɔ̃a yɔyɔ be Mía Fofo Si Le Dziƒo la me be: “Mía Fofo si le dziƒowo, wò ŋkɔ ŋuti nakɔ.”—Yohanes 17:26; Mateo 6:9.

Ekema ɖewohĩ awɔ nuku na wò be nàse nya si Papa Benedict XVI (Benoît XVI) gblɔ le eƒe agbalẽ aɖe si wòŋlɔ nyitsɔ laa si nye Jesus of Nazareth me ku ɖe Mawu ƒe ŋkɔa zazã ŋu be: “Israel viwo tɔ dzɔ ŋutɔ be woagbe ŋkɔ sia si Mawu tsɔ na eɖokui la zazã, si woŋlɔna kple ŋɔŋlɔdzesi siwo nye YHWH la, ale be woagaɖi gbɔ ŋkɔa wòava sɔ kple trɔ̃subɔlawo ƒe mawuwo ƒe ŋkɔwo o. Le mɔ ma ke nu la, Biblia gɔmeɖeɖe siwo do nyitsɔ laa la gɔmeɖelawo tɔ medzɔ be wozã Mawu ƒe ŋkɔ—si Israel viwo bu ɣesiaɣi be enye ŋkɔ si gɔme womate ŋu ase o kple ŋkɔ si menya yɔna o la—abe blema ŋkɔ dzro aɖe koe wònye ene o.”

Aleke wò ya nèsusu? Ðe wòsɔ be míazã Mawu ƒe ŋkɔa loo alo mesɔ o? Ne Yehowa ŋutɔ gblɔ be, “Esiae nye nye ŋkɔ hena ɣeyiɣiawo katã; ŋkɔ siae dzidzime siwo katã ava va la ayɔ nam” la, ɖe ame aɖe tɔ ate ŋu adzɔ be wòatsi tsitre ɖe eŋua?

[Nɔnɔmetata si le axa 30]

Yesu zã Mawu ƒe ŋkɔa le gbedodoɖa me