Eteƒe Madidi O Anyigba La Azu Paradiso!

‘Mía Fofo, si le dziƒowo! Wò ŋkɔ ŋuti nakɔ! Wò fiaɖuƒe nava! Woawɔ wò lɔlɔ̃nu le anyigba dzi, sigbe ale si wowɔna le dziƒo ene!’ —Mateo 6:9, 10, Biblia Alo Ŋɔŋlɔ Kɔkɔe La—Le Eʋegbe Me.

GBEDODOÐA xɔŋkɔ sia, si ame geɖe yɔna be Mía Fofo Si Le Dziƒo, alo Aƒetɔ Ƒe Gbedodoɖa la, na mɔkpɔkpɔ ameƒomea. Le mɔ ka nu?

Abe ale si Aƒetɔ Ƒe Gbedodoɖa la ɖee fia ene la, Mawu Fiaɖuƒea ana woawɔ Mawu ƒe lɔlɔ̃nu le anyigba dzi sigbe ale si wole ewɔm le dziƒo fifia ene. Eye Mawu ƒe lɔlɔ̃nue nye be yeatrɔ anyigba la wòazu Paradiso. (Nyaɖeɖefia 21:1-5) Nu ka tututue Mawu Fiaɖuƒe la nye, eye aleke wòatrɔ anyigba la wòazu Paradisoe?

Dziɖuɖu Ŋutɔŋutɔ Aɖe

Mawu Fiaɖuƒea nye dziɖuɖu ŋutɔŋutɔ. Hafi dziɖuɖu ɖe sia ɖe nate ŋu awɔ dɔ nyuie la, ehiã be dziɖulawo, sewo, kple eteviwo nanɔ anyi. Ðe Mawu Fiaɖuƒea ɖo nudidi siawo gbɔa? Kpɔ ale si Biblia ɖo nyabiase etɔ̃ siwo gbɔna la ŋui ɖa:

Ame kawoe nye dziɖulawo le Mawu Fiaɖuƒea me? (Yesaya 33:22) Yehowa Mawu tia Via, Yesu Kristo, be wòanye dziɖula le Fiaɖuƒea me. (Mateo 28:18) Le Yehowa ƒe mɔfiafia te la, Yesu tia ame ʋɛ aɖewo tso “to sia to kple gbegbɔgblɔ sia gbegbɔgblɔ kple ame ƒomeviwo katã kple dukɔ sia dukɔ me” be woakpe ɖe ye ŋu ‘yewoaɖu fia ɖe anyigba la dzi.’—Nyaɖeɖefia 5:9, 10.

Se kawoe Mawu Fiaɖuƒea ɖo anyi na eteviwo be woawɔ ɖe wo dzi? Seawo alo sededeawo dometɔ aɖewo bia be woawɔ nanewo koŋ. Yesu gblɔ be se mawo dometɔ si nye vevitɔe nye: “‘Ele be nàlɔ̃ Yehowa wò Mawu kple wò dzi blibo kple wò luʋɔ blibo kple wò tamesusu blibo.’ Esiae nye sedede gãtɔ kple gbãtɔ. Evelia, si ɖii, lae nye esi: ‘Ele be nàlɔ̃ hawòvi abe wò ŋutɔ ɖokuiwò ene.’”—Mateo 22:37-39.

 Seawo dometɔ bubu aɖewo hã bia tso Mawu Fiaɖuƒea teviwo si be woaƒo asa na nuwɔna aɖewo koŋ. Le kpɔɖeŋu me, Biblia na mɔfiame sia tẽe be: “Migana woable mi o. Agbe gbegblẽ nɔlawo kple trɔ̃subɔlawo kple ahasiwɔlawo kple ŋutsu siwo wɔa wo ɖokuiwo nyɔnuwoe kple ŋutsu siwo dɔna kple ŋutsuwo, kple fiafitɔwo kple ŋuklẽlawo kple ahamulawo kple amedzulawo kple adzodalawo la, womanyi Mawu fiaɖuƒe la dome o.”—1 Korintotɔwo 6:9, 10.

Ame kawoe nye Mawu Fiaɖuƒea teviwo? Yesu tsɔ Mawu Fiaɖuƒea teviwo sɔ kple alẽwo. Egblɔ be: “Woase nye gbe, eye woazu alẽha ɖeka, alẽkplɔla ɖeka.” (Yohanes 10:16) Be ame nanye Mawu Fiaɖuƒea tevi la, menye ɖeko wòagblɔ be yedzea Alẽkplɔla Nyui, Yesu, yome o, ke boŋ ele hã be wòawɔ ɖe se siwo wòde la dzi. Yesu gblɔ be: “Menye ame sia ame si le gbɔgblɔm nam be, ‘Aƒetɔ, Aƒetɔ,’ ye ayi ɖe dziƒofiaɖuƒe la me o, ke ame si le Fofonye si le dziƒowo ƒe lɔlɔ̃nu wɔm lae ayi ɖe eme.”—Mateo 7:21.

Eya ta ame siwo nye Mawu Fiaɖuƒea teviwo la, zãa Mawu ƒe ŋkɔ, Yehowa, hedea bubu eŋu, abe ale si ko Yesu wɔe ene. (Yohanes 17:26) Wowɔna ɖe se si Yesu de be woaɖe gbeƒã “fiaɖuƒe ŋuti nya nyui sia” la dzi. (Mateo 24:14; 28:19, 20) Eye woɖea lɔlɔ̃ akuakua fiaa wo nɔewo.—Yohanes 13:35.

Gbegblẽ Hehe Va Ame Siwo “Le Anyigba La Gblẽm La Dzi”

Nu siwo le dzɔdzɔm le anyigba dzi fifia ɖee fia be, eteƒe madidi o, Mawu Fiaɖuƒea ahe tɔtrɔ gãwo ava anyigba la dzi. Aleke míewɔ nya? Ƒe akpe eve kloe ye nye esi va yi la, Yesu gblɔ dzesi aɖe si me nu vovovowo le siwo aɖee afia be “Mawu fiaɖuƒe la gogo” la ŋu nya ɖi. (Luka 21:31) Abe ale si wòdze le nyati si do ŋgɔ mee ene la, dzesi ma ƒe akpa vovovowo ƒe emevava dze kɔte le anyigba dzi godoo.

Nu kae adzɔ akplɔe ɖo? Yesu ɖo eŋu be: “Ɣemaɣi la, xaxa gã ava, si tɔgbi meva kpɔ o, ao, meva kpɔ tso xexea ƒe gɔmedzedze va se ɖe fifia o, eye magava ake o.” (Mateo 24:21) Esia manye dzɔgbevɔ̃e aɖe si amegbetɔwo ahe vae o. Ke boŋ anye afɔ si Mawu aɖe atsɔ ahe “gbegblẽ ava ame siwo le anyigba la gblẽm la dzi.” (Nyaɖeɖefia 11:18) Woatsrɔ̃ ame vɔ̃ɖi siwo ƒe ɖokuitɔdidinuwɔnawo na be anyigba la dome gblẽ kloe la “ɖa le anyigba dzi.” Gake ame maɖifɔ siwo subɔa Mawu nyuie la, “asusɔ ɖe edzi.”—Lododowo 2:21, 22.

Yehowa Mawu tɔ dzɔ be wòaɖe afɔ vevi ma. Nu ka tae? Bu kpɔɖeŋu sia ŋu kpɔ: Tsɔe be aƒe kpokploe aɖe le asiwò. Xɔhayalawo dometɔ aɖewo nye ame ɖɔʋuwo kple ameŋubulawo; woxea woƒe xɔfewo eye woléa be na aƒea me. Gake xɔhayalawo dometɔ bubuwo nye fuɖenamela vɔ̃ɖiwo kple ɖokuitɔdilawo; wogbea woƒe xɔfewo xexe, eye wogblẽa nuwo dome le aƒea me. Togbɔ be woxlɔ̃ nu wo zi geɖe hã la, woyi woƒe agbenɔnɔ vɔ̃ɖi la dzi. Anye ne nu kae nàwɔ? Kakaɖedzitɔe la, wò ame si nye aƒea tɔ la, anya ame baɖa mawo ɖa le aƒea me godoo.

Nenema kee Yehowa Mawu, si nye anyigba la kple nu siwo katã le edzi Wɔla la, kpɔ mɔ atso nya me le ame siwo wòaɖe mɔ na be woanɔ anyigbaa dzi la ŋu. (Nyaɖeɖefia 4:11) Yehowa gblɔ be yeƒe tameɖoɖoe nye be yeaɖe ame vɔ̃ɖi siwo gbea yeƒe lɔlɔ̃nu wɔwɔ eye wogblẽa nu le ame bubuwo ƒe gomenɔamesiwo ŋu la ɖa le anyigba dzi.—Psalmo 37:9-11.

Woatrɔ Anyigba La Wòagazu Paradiso

Eteƒe madidi o, Mawu Fiaɖuƒe, si le Yesu Kristo si me la, aɖu anyigba la dzi. Yesu yɔ dziɖuɖu ƒe gɔmedzedze yeye sia be “nuwo gbugbɔgawɔ.” (Mateo 19:28) Aleke nɔnɔmeawo anɔ ɣemaɣi? Kpɔ Biblia me ŋugbedodo siwo gbɔna la ɖa:

Psalmo 46:10. ‘Atsi aʋawɔwɔwo nu va se ɖe anyigba ƒe mlɔenu ke.’

Yesaya 35:1. “Gbegbe kple gbedadaƒo akpɔ dzidzɔ, tagba atso aseye, eye wòaƒo se abe dzogbenya ene.”

 Yesaya 65:21-23. “Nye ame tiatiawo aɖu woawo ŋutɔ ƒe asinudɔwɔwɔwo. Womadze agbagba dzodzro o, eye womadzi dzikudziku o.”

Yohanes 5:28, 29. “Gaƒoƒo la gbɔna, esi me ame siwo katã le ŋkuɖodziyɔdowo me la ase [Yesu ƒe] gbe, eye woado go.”

Nyaɖeɖefia 21:4. “[Mawu atutu] aɖatsi sia aɖatsi ɖa le woƒe ŋkume, eye ku maganɔ anyi o, eye konyifafa kple ɣlidodo kple vevesese hã maganɔ anyi o.”

Susu Siwo Tae Míaxɔe Ase Ðo

Èxɔ Biblia ƒe ŋugbedodowo dzi sea? Biblia gblɔe ɖi be ame geɖe maxɔ wo dzi ase o. Egblɔ be: “Le ŋkeke mamlɛawo me la, fewuɖulawo ava . . . eye woawɔ nu le woawo ŋutɔwo ƒe nudzodzrowo nu, ahanɔ gbɔgblɔm be: ‘Afi ka eƒe anyinɔnɔ sia si ŋugbe wodo la le? Kpɔ ɖa, tso ŋkeke si dzi mía tɔgbuiwo dɔ alɔ̃ le ku me la, nuwo katã le edzi yim abe ale si tututu ko wonɔ tso nuwɔwɔ ƒe gɔmedzedze la ene.’” (2 Petro 3:3, 4) Gake fewuɖula mawo le vodada gã aɖe wɔm. Kpɔ susu ene siwo gbɔna siwo tae nàte ŋu axɔ nu si Biblia gblɔ dzi ase la ɖa:

(1) Mawu de nu anyigba dzi nyawo me va yi kpɔ. Noa ƒe ŋkekea me Tsiɖɔɖɔa nye eƒe kpɔɖeŋu ɖedzesi aɖe.—2 Petro 3:5-7.

(2) Mawu ƒe Nya la gblɔ nu siwo le dzɔdzɔm fifia la ŋu nya ɖi pɛpɛpɛ do ŋgɔ.

(3) Nuwo katã mele “edzi yim abe ale si tututu ko wonɔ tso nuwɔwɔ ƒe gɔmedzedze la ene” o. Le míaƒe anyigba sia dzi la, nuwo le gbegblẽm le hadomegbenɔnɔ, agbe nyui nɔnɔ, kple anyigba dzi nuwo ŋu le mɔ aɖe si tɔgbi medzɔ kpɔ le ŋutinya me o nu.

(4) Wole gbeƒã ɖem “fiaɖuƒe ŋuti nya nyui” la le anyigba dzi godoo fifia, si le eɖem fia be “nuwuwu la ava” kpuie.—Mateo 24:14.

Yehowa Ðasefowo le kpewòm be nàlɔ̃ woasrɔ̃ Mawu ƒe Nya, Biblia la, kpli wò, ale be nàte ŋu asrɔ̃ nu geɖe wu tso agbe mavɔ nɔnɔ le Mawu Fiaɖuƒea ƒe dziɖuɖua te ƒe mɔkpɔkpɔa ŋu. (Yohanes 17:3) Ɛ̃, etsɔme nyui aɖe le ŋgɔ na ameƒomea. Ɛ̃, ɣeyiɣi nyuitɔwo le ŋgɔ gbɔna! Àdi be yeakpɔ gome le etsɔme nyui sia mea?

[Nɔnɔmetata si le axa 7]

Ame siwo gblɔna be nuwo katã anɔ edzi yim abe ale si ko wonɔna ɖaa ene la le vodada gã aɖe wɔm

[Nɔnɔmetata si le axa 8]

Àdi be yeakpɔ gome le etsɔme nyui sia mea?