Nu Si Míesrɔ̃ Tso Yesu Gbɔ

Tso Ale Si Míawɔ Nu Ðe Amewo Ŋui Ŋu

Nu ka tae míanyo dɔme na amewo?

Ènyoa dɔme na amewo nenye be womenyoa dɔme na wò o gɔ̃ hã? Ne míedi be míasrɔ̃ Yesu la, ele be míanyo dɔme na ame siwo léa fu mí gɔ̃ hã. Yesu gblɔ be: “Ne ame siwo lɔ̃a mi lae mielɔ̃na ɖe, kafukafu kae wònye na mi? Elabena nu vɔ̃ wɔlawo kura gɔ̃ hã lɔ̃a ame siwo lɔ̃a wo. . . . Ke boŋ miyi edzi mialɔ̃ miaƒe futɔwo . . .  eye mianye Dziƒoʋĩtɔ la ƒe viwo, elabena enyoa dɔme na ame madakpewo kple ame vɔ̃ɖiwo.”—Luka 6:32-36; 10:25-37.

Nu ka tae míatsɔ ake?

Ne míewɔ vodada la, míedina be Mawu natsɔe ake mí. Yesu fia mí be esɔ be míado gbe ɖa na Mawu abia eƒe tsɔtsɔke. (Mateo 6:12) Ke hã, Yesu gblɔ hã be ne míetsɔ ke amewo ko hafi Mawu hã atsɔ ake mí. Egblɔ be: “Ne mietsɔa amewo ƒe vodadawo kea wo la, mia Fofo si le dziƒo hã atsɔ ake mi; gake ne mietsɔa amewo ƒe vodadawo kea wo o la, mia Fofo hã matsɔ miaƒe vodadawo ake mi o.”—Mateo 6:14, 15.

 Aleke ƒomewo awɔ akpɔ dzidzɔ?

Togbɔ be Yesu meɖe srɔ̃ kpɔ o hã la, míate ŋu asrɔ̃ nu geɖe tso egbɔ ku ɖe ale si míawɔ be dzidzɔ nanɔ míaƒe ƒomea me la ŋu. Eto eƒe nyagbɔgblɔwo kple nuwɔnawo siaa dzi ɖo kpɔɖeŋu ɖi na mí be míasrɔ̃. Bu aɖaŋuɖoɖo etɔ̃ siwo gbɔna ŋu kpɔ:

1. Ele be srɔ̃ŋutsu nalɔ̃ srɔ̃a abe eya ŋutɔ ƒe ŋutilã ene. Yesu ɖo esia ƒe kpɔɖeŋu ɖi na srɔ̃ŋutsuwo. Egblɔ na eƒe nusrɔ̃lawo be: “Se yeye nam mele mi, be mialɔ̃ mia nɔewo.” Aleke gbegbee wòle be woalɔ̃ wo nɔewo? Eyi edzi be: “Abe ale si melɔ̃ mi ene la.” (Yohanes 13:34) Biblia tsɔ gɔmeɖose sia ku ɖe srɔ̃ŋutsuwo ŋu hegblɔ be: “Srɔ̃ŋutsuwo, miyi edzi mialɔ̃ mia srɔ̃wo, abe ale si ko Kristo la hã lɔ̃ hame la, eye wòtsɔ eɖokui na ɖe eta la ene . . . Alea wòle be srɔ̃ŋutsuwo nanɔ wo srɔ̃wo lɔ̃m abe woawo ŋutɔwo ƒe ŋutilãwo ene. Ŋutsu si lɔ̃a srɔ̃a la, elɔ̃a eɖokui, elabena ame aɖeke melé fu ye ŋutɔ ƒe ŋutilã kpɔ o; ke boŋ enyinɛ, eye wòléa be nɛ nyuie, abe ale si Kristo la hã wɔna na hame la ene.”—Efesotɔwo 5:25, 28, 29.

2. Ele be srɔ̃tɔwo nawɔ nuteƒe na wo nɔewo. Gbɔdɔdɔ le srɔ̃ɖeɖea godo nye nu vɔ̃ wɔwɔ ɖe Mawu ŋu, eye wògbãa ƒomewo. Yesu gblɔ be: “Ðe miexlẽe kpɔ be . . . ‘Le esia ta ŋutsu agblẽ fofoa kple dadaa ɖi, eye wòalé ɖe srɔ̃a ŋu, eye woa kple eve la woazu ŋutilã ɖeka’ oa? Eya ta womeganye eve o, ke boŋ ŋutilã ɖeka. Eya ŋuti nu si Mawu bla ɖekae la, ame aɖeke negama eme o. . . . Mele egblɔm na mi be ame sia ame si gbe srɔ̃a, ne menye le agbe gbegblẽ nɔnɔ ta o, eye wòɖe bubu la, ewɔ ahasi.”—Mateo 19:4-9.

3. Ele be ɖeviwo nabɔbɔ wo ɖokuiwo na wo dzilawo. Togbɔ be Yesu de blibo, eye edzilawo mede blibo o hã la, eɖo to wo esime wònye ɖevi. Biblia gblɔ tso Yesu ŋu esime wòxɔ ƒe 12 la be, eyi ‘kple edzilawo, eye wòva Nazaret, eye wòyi edzi bɔbɔ eɖokui na wo.’—Luka 2:51; Efesotɔwo 6:1-3.

Nu ka tae wòle be nàwɔ ɖe gɔmeɖose siawo dzi?

Yesu gblɔ le nu siwo wòfia eƒe nusrɔ̃lawo la ŋu be: “Ne mienya nu siawo la, dzidzɔtɔwoe mianye ne miewɔ wo dzi.” (Yohanes 13:17) Be míanye Kristotɔ vavãwo la, ele be míawɔ ɖe aɖaŋu siwo Yesu ɖo na mí ku ɖe ale si míawɔ nu ɖe amewo ŋui ŋu la dzi. Egblɔ be: “Esia me amewo katã anyae le be nye nusrɔ̃lawo mienye, ne lɔlɔ̃ le mia dome.”—Yohanes 13:35.

Kpɔ agbalẽ si nye Nuka Tututue Nye Biblia ƒe Nufiafia? * ƒe ta 14 lia hena nyatakaka bubuwo

[Etenuŋɔŋlɔ]

[Nɔnɔmetata si le axa 16]

Yesu ƒe kpɔɖeŋu si ku ɖe vi nudomegblẽla la ŋu fia nu vevi aɖe mí ku ɖe dɔmenyonyo kple tsɔtsɔke ƒe vevienyenye ŋu.—Luka 15:11-32

[Nɔnɔmetata si le axa 17]

Ele be srɔ̃tɔwo nawɔ nuteƒe na wo nɔewo