Exlẽlawo Bia Be

Ðe Nukudɔdadawo Tso Mawu Gbɔa?

Ðikeke aɖeke mele eme o be ŋusẽ le Yehowa Mawu si be wòayɔ dɔ amewo. Eye edze ƒãa be ate ŋu ana ŋusẽ ma esubɔlawo. Le kpɔɖeŋu me, le apostoloawo ƒe ɣeyiɣiwo me la, nukudɔdada nye eƒe gbɔgbɔ kɔkɔea ƒe nunana tɔxɛawo dometɔ ɖeka. Apostolo Paulo ŋlɔ be: “Woɖea gbɔgbɔ la fiana to ame sia ame dzi hena tameɖoɖo si ŋu viɖe le. Le kpɔɖeŋu me, wona nunya ƒe nya ame aɖe to gbɔgbɔ la dzi, . . . eye wona dɔdada ƒe nunanawo ame bubu to gbɔgbɔ ɖeka ma dzi, . . . wona nyagbɔgblɔɖi ame bubu, . . . wona gbegbɔgblɔ bubuwo dodo ame bubu.”—1 Korintotɔwo 12:4-11.

Gake Paulo gaŋlɔ le eƒe agbalẽ ma si wòŋlɔ na Korintotɔwo la ke me be, Mawu ƒe gbɔgbɔ kɔkɔea ƒe nukununanawo nu ava yi. Egblɔ be: “Ne nyagbɔgblɔɖi ƒe nunanawo li la, woava ɖe wo ɖa; ne gbegbɔgblɔ bubuwo dodo li la, wo nu ava yi; ne sidzedze ƒe nunana aɖe li la, woava ɖee ɖa.”—1 Korintotɔwo 13:8.

Le ƒe alafa gbãtɔ me la, Yesu Kristo kple eƒe apostolowo da dɔ na amewo nukutɔe. Ɣemaɣi le Kristotɔwo ƒe ŋutinya me la, wona gbɔgbɔa ƒe nunanawo, siwo dometɔ ɖekae nye dɔdada ŋutete la amewo hena Mawu ƒe kafukafu, eye wònye dzesi be Yehowa ƒe ŋudzedzekpɔkpɔ kple eƒe yayra nɔ Kristo hame yeyea dzi. Gake ne Kristo hamea tsi heli ke nyuie vɔ la, le esi teƒe be wòanɔ susu hem yi nunana tɔxɛwo dzi la, ahe susu ayi xɔse sẽŋu, mɔkpɔkpɔ, kple lɔlɔ̃ dzi be woawoe nye kpeɖodzi be Mawu kpɔ ŋudzedze ɖe eŋu. (Yohanes 13:35; 1 Korintotɔwo 13:13) Eya ta va ɖo ƒe 100 M.Ŋ. lɔƒo la, meganye nukudɔdada ye nye dzesi be Mawu kpɔ ŋudzedze ɖe hamea ŋu o. *

Gake ɖewohĩ àbia be, ‘Nu ka tae wogagblɔna egbea be, wole dɔ dam na amewo nukutɔe?’ Le kpɔɖeŋu me, nyadzɔdzɔgbalẽ aɖe ƒo nu tso ŋutsu aɖe si wogblɔ be kansa nɔ fu ɖem na la ŋu. Dɔlélea kaka ɖe eƒe tame, eƒe ayikuwo, kple eƒe ƒuwo tome gɔ̃ hã. Mɔkpɔkpɔ aɖeke meganɔ esi o, va se ɖe gbe si gbe wòbe Mawu “ƒo nu” kpli ye. Nyatakakaa gblɔ be, le ŋkeke ʋɛ aɖewo megbe la, kansa la vɔ nɛ.

Ne èse ŋutinya siawo tɔgbi la, anyo be nàbia ɖokuiwò be: ‘Nyateƒee nyatakaka sia nyea? Ðe atikewɔlawo na kpeɖodzi aɖe ku ɖe eŋu eye eŋuti nuŋlɔɖi lia? Eye ne edze abe amea haya ene gɔ̃ hã la, ɖe Biblia fia be Mawu gbɔe nudzɔdzɔ siwo katã dze abe nukudɔdadawo ene la tsoa?’

Biabia mamlɛtɔ sia ƒe ŋuɖoɖo le vevie ŋutɔ. Yesu xlɔ̃ nu eyomedzelawo be: “Mikpɔ nyuie le aʋatsonyagblɔɖilawo [ŋuti] . . . Ame geɖewo agblɔ nam le ŋkeke ma dzi be, ‘Aƒetɔ, Aƒetɔ, ɖe míegblɔ nya ɖi le wò ŋkɔ me, eye míenya gbɔgbɔ vɔ̃wo do goe le wò ŋkɔ me, eye míewɔ ŋusẽdɔ [alo nukunu] geɖewo le wò ŋkɔ me oa?’ Gake maʋu eme na wo be: Nyemenya mi kpɔ o! Mite ɖa le gbɔnye, mi sedzimawɔlawo.”—Mateo 7:15, 21-23.

Edze ƒãa be, nu siwo yɔm wole be nukudɔdadawo ate ŋu atso teƒe bubu aɖe, ke menye Mawu gbɔ o. Be ame siwo gblɔna be yewole nukunuwo wɔm le Mawu ƒe ŋkɔ me nagable mí o la, ele be Mawu ŋuti sidzedze vavãtɔ nasu mía si, míazã tamebubu ŋutete si Mawu na mí la nyuie, eye míasrɔ̃ ale si míawɔ ade dzesi ame siwo le Mawu ƒe lɔlɔ̃nu wɔm ŋutɔŋutɔ.—Mateo 7:16-19; Yohanes 17:3; Romatɔwo 12:1, 2.

[Etenuŋɔŋlɔ]