Brooklyn Betel—Exɔ Ƒe 100
Brooklyn Betel—Exɔ Ƒe 100
ƑE 1909 nye ƒe ɖedzesi aɖe na New York City. Woʋu Queensboro Tɔdzisasrã, si tsia Manhattan kple Queens nutoa ɖekae la nu yeyee, eye woʋu Manhattan Tɔdzisasrã si tsia Manhattan nutoa kple Brooklyn nutoa ɖekae la hã nu yeye.
Eganye ƒe ɖedzesi aɖe na Yehowa Ðasefowo hã. Do ŋgɔ la, Charles Taze Russell, si nye Gbetakpɔxɔ Biblia Kple Trakt Habɔbɔ, si nye Yehowa Ðasefowo ƒe dɔwɔha si woɖo le se nu, ƒe zimenɔla ɣemaɣi la kpɔe be mɔkpɔkpɔ li be yewoate ŋu akeke Mawu Fiaɖuƒe ŋuti nya nyuia ƒe gbeƒãɖeɖedɔa ɖe enu. (Mateo 24:14) Eka ɖe edzi be Habɔbɔa ƒe dɔwɔƒegã la ʋuʋu tso Pittsburgh, Pennsylvania, yi ɖe Brooklyn, New York, anye mɔ vevi aɖe si dzi yewoato ate dɔa keke ɖe enu. Wote dzadzraɖowɔwɔ ɖe ʋuʋua ŋu le ƒe 1908 me, eye wova ʋu mlɔeba le ƒe si kplɔe ɖo ƒe gɔmedzedze lɔƒo.
Nu Ka Tae Wohiã Be Woaʋu Ayi Brooklyn?
Ame siwo nɔ ŋgɔ xɔm le gbeƒãɖeɖedɔa me ɣemaɣi nyae be mawunyawo ŋɔŋlɔ ɖe nyadzɔdzɔgbalẽwo me nye mɔnu nyui aɖe si dzi woato akaka Biblia me nyateƒea. Le nyateƒe me la, va ɖo ƒe 1908 me la, Russell ƒe mawunya siwo wògblɔna kwasiɖa sia kwasiɖa la dzena le nyadzɔdzɔgbalẽ 11 me, eye agbɔsɔsɔ si wotana la ade 402,000.
Gake Russell ŋlɔ be: “Nɔvi siwo nya nu tso nyadzɔdzɔgbalẽwo tata ŋu . . . ka ɖe edzi na mí be ne woata kwasiɖa sia kwasiɖa ƒe mawunya la le [dugã si lolo wu] me la, ana be woata mawunya la wòaxɔ United State katã; si awɔe be le ƒe ɖeka ko me la, nyadzɔdzɔgbalẽ alafa geɖewo anɔ etam edziedzi.” Esia ta wote teƒe nyuitɔ kekeake didi bene woate ŋu akeke gbeƒãɖeɖedɔa ɖe enu.
Nu ka tae wònye Brooklyn? Russell gblɔ be: “Le Mawu ƒe mɔfiafia biabia megbe la, mí katã míeƒo nya ta be Brooklyn, N.Y., afi si amewo sɔ gbɔ ɖo ŋutɔ . . . eye wonyae be ‘Enye Sɔlemewo Ƒe Dugã’ la, sɔ nyuie be wòanye nuŋeŋedɔa ƒe dɔdzikpɔƒe gãtɔ wu teƒe bubu ɖe sia ɖe.” Emetsonuawo ɖee fia kɔtɛ be enye nyametsotso nyuitɔ. Le ɣeyiɣi kpuie aɖe ko me la, nyadzɔdzɔgbalẽ 2,000 sɔŋ va nɔ Russell ƒe mawunyawo tam.
New York nye teƒe nyuitɔ vavã le susu bubu aɖe hã ta. Le ƒe 1909 me la, alɔdzedɔwɔƒewo nɔ Great Britain, Germany, kple Australia, eye woganɔ ɖoɖo wɔm ɖe bubuwo ŋu. Eya ta nunya le eme be woaɖo dɔwɔƒegã la ɖe melidzeƒedu aɖe si mɔdodo kple ketekemɔ geɖewo le la me.
Nu Ka Tae Woyɔe Be Betel?
Woɖo Gbetakpɔxɔ Biblia Kple Trakt Habɔbɔ ƒe dɔwɔƒegã la zi gbãtɔ le ƒe 1880-awo me le Allegheny (si nye Pittsburgh ƒe akpa aɖe fifia), Pennsylvania. Ɣemaɣi la, woyɔnɛ be Bible House. Le ƒe 1896 me la, ame 12 ye nɔ dɔ wɔm le afi ma.
Gake esi woʋu yi Brooklyn le ƒe 1909 me la, wova yɔ Bible House la be Betel. * Nu ka tae wova yɔe be Betel? Subɔsubɔhakplɔla xɔŋkɔ Henry Ward Beecher tɔe anyigba si Gbetakpɔxɔ Habɔbɔa ƒle le 13-17 Hicks Street, si woyɔna be Beecher Bethel, la nye. Woƒle Beecher ƒe aƒe si me eya ŋutɔ nɔ tsã, si le 124 Columbia Heights la hã. March 1, 1909 ƒe Gbetakpɔxɔ ka nya ta be: “Eɖe dzesi ŋutɔ be Beecher ƒe anyigba si woyɔna tsã be Beecher Bethel la su mía si eye nukutɔe la, míaƒe asi gasu eƒe aƒe xoxoa hã dzi. . . . Míayɔ aƒe yeye la be ‘Betel,’ eye míayɔ dɔwɔƒe kple takpexɔ yeyeawo be ‘Bible House.’”
Egbea la, wokpɔtɔ yɔa dɔwɔƒegã si wokeke ɖe enu le Brooklyn kple esiwo le New York State ƒe teƒe eve bubuawo, Wallkill kple Patterson, la katã be Betel. Betel ƒewo le dukɔ vovovo 113 me le xexea me godoo. Ame 19,000 kple edzivɔwo sɔŋ ye le subɔsubɔm le teƒe siawo hele asi kpem ɖe Biblia me gbedeasikakadɔa ŋu.
Tsaɖilawo Xɔxɔ Vividoɖeameŋutɔe
Wokɔ dɔwɔƒe gã sia ŋu le January 31, 1909 dzi. Woɖo Dzoɖagbe, September 6, 1909 be wòanye Ŋkeke Si Dzi Woaxɔ Tsaɖilawo Le Betel. Biblia Nusrɔ̃viwo, si nye ale si woyɔa Yehowa Ðasefowo ɣemaɣi la dometɔ alafa geɖewo ɖi tsa yi dɔwɔƒea. Wo dometɔ geɖewo nye ame siwo kpã tso Kristotɔwo ƒe takpekpe aɖe si wowɔ le Saratoga Springs, si gbɔ didi anɔ abe kilometa 320 ene le New York City ƒe dziehe gome la va tẽ. Charles Taze Russell ŋutɔ do dzaa na tsaɖilaawo hede asi asi me na wo. *
Wogakpɔtɔ xɔa tsaɖila geɖewo le Betel vividoɖeameŋutɔe. Le nyateƒe me la, ame siwo awu 40,000 sɔŋ ye va ɖia tsa le Brooklyn dɔwɔƒegã la ƒe sia ƒe. Brooklyn Betel la yi edzi le akpa vevi aɖe wɔm le Yehowa ƒe Fiaɖuƒea ƒe nuwo dodo ɖe ŋgɔ me, eye esia hea yayra gbagowo vanɛ na ame miliɔn geɖewo.
[Etenuŋɔŋlɔwo]
^ mm. 11 Hebrigbe me nya si gɔme woɖe be “Betel” gɔmee nye “Mawu ƒe Aƒe.” Le Biblia me la, Betel nye Israel du xɔŋkɔ aɖe. Gake Yerusalem du la ŋkɔe woyɔna zi geɖe wu.
^ mm. 14 Kpɔ agbalẽ si nye Jehovah’s Witnesses—Proclaimers of God’s Kingdom, ƒe axa 718-723, si Yehowa Ðasefowo ta la, hena Ðasefowo ƒe ŋutinya bubuwo.
[Aɖaka/Nɔnɔmetata siwo le axa 25]
Nu Kae Nènya Tso GBETAKPƆXƆ BIBLIA KPLE TRAKT HABƆBƆ La Ŋu?
Ƒe 1884 mee woɖo habɔbɔ si woyɔna fifia be Watch Tower Bible and Tract Society of Pennsylvania (Gbetakpɔxɔ Biblia Kple Trakt Habɔbɔ Si Le Pennsylvania) la le se nu, eye woyɔe ɣemaɣi be Zion’s Watch Tower Tract Society. Habɔbɔ sia ƒe taɖodzinue nye be wòakaka Biblia me nyateƒea wòade dukɔwo katã me, vevietɔ to agbalẽtata dzi. Egbea la, Watch Tower Bible and Tract Society kpɔtɔ nye habɔbɔ siwo le se nu, siwo zãm Yehowa Ðasefowo le le xexea me godoo la dometɔ ɖeka. *—Filipitɔwo 1:7.
Gbetakpɔxɔ Biblia Kple Trakt Habɔbɔa ta Biblia kple Biblia srɔ̃gbalẽwo le gbegbɔgblɔ 473 me. Eta Xexe Yeye Gɔmeɖeɖe Biblia bliboa alo eƒe akpa aɖe ɖekaɖeka miliɔn 150 le gbegbɔgblɔ 72 sɔŋ me. To vovo na Xexe Yeye Gɔmeɖeɖe Biblia la, Habɔbɔa ta Biblia gɔmeɖeɖe bubu siwo gbɔna la le ye ŋutɔ ƒe agbalẽtamɔ̃wo dzi alo na dɔwɔƒe bubuwo ta wo dometɔ aɖewo na wo: American Standard Version, The Bible in Living English, The Emphatic Diaglott, Holman ƒe Linear Parallel Edition, King James Version (esi Biblia Nusrɔ̃viawo ŋutɔ ta la hã le eme), kple The New Testament Newly Translated and Critically Emphasized, Tata Evelia.
To vovo na Bibliawo tata la, Yehowa Ðasefowo trɔ asi le nu bubu biliɔn 20 kple edzivɔwo ŋu le ƒe ewo siwo va yi me, abe agbalẽwo, magazinewo, traktwo, CD-wo, DVD-wo, kple bubuawo ene. * Wotrɔa asi le agbalẽ kple nu bubu siawo dometɔ akpa gãtɔ ŋu le Betel ƒe siwo le dukɔ siwo gbɔna la me: Argentina, Australia, Brazil, Britain, Canada, Colombia, Finland, Germany, India, Italy, Japan, Korea, Mexico, Myanmar, Nigeria, Philippines, South Africa, Spain, kple United States.
[Etenuŋɔŋlɔwo]
^ mm. 21 Le ƒe 2008 me la, Yehowa Ðasefo 7,124,443 ye nɔ xexea me godoo, le dukɔ 236 me. Ðasefo siawo nɔ hame vovovo 103,267 me.
^ mm. 23 Womedzraa nu siawo o. Lɔlɔ̃nu faa nudzɔdzɔwoe wotsɔna doa alɔ Yehowa Ðasefowo ƒe Biblia fiafiadɔa.
[Nyaɖoɖo]
DƆ SIWO WOWƆ LE ƑE 1998-2008 ME
Agbalẽwo
458,230,708
Magazinewo
11,292,413,199
Traktwo
7,996,906,376
Agbalẽ Gbadzawo
862,050,233
CD-wo kple MP3-wo
34,621,130
DVD-wo
13,500,125
Nu bubuwo
129,083,031
Wo Katã
20,786,804,802
[Nɔnɔmetata si le axa 22]
Betel Ƒe si le 122-124 Columbia Heights
[Nɔnɔmetata si le axa 22]
13-17 Hicks Street (1909-1918)
[Nɔnɔmetata si le axa 22]
Russell ƒe mawunyawo le nyadzɔdzɔgbãlewo me
[Nɔnɔmetata siwo le axa 22]
35 Myrtle Avenue (1920-1922)
[Nɔnɔmetata si le axa 23]
18 Concord Street (1922-1927)
[Nɔnɔmetata si le axa 23]
117 Adams Street (tso ƒe 1927 va ɖo egbea)
[Nɔnɔmetata si le axa 24]
25-30 Columbia Heights
[Nɔnɔmetata siwo le axa 24]
Wallkill agbalẽtaƒe la
[Nɔnɔmetata si le axa 24]
Patterson Hehenaƒe la