Nu Si Míesrɔ̃ Tso Yesu Gbɔ

Tso “Nuwuwu La” Ŋu

Nu kae awu enu?

Yesu ƒe nusrɔ̃lawo biae be: “Nu kae anye wò [anyinɔɣi] kple nuɖoanyi sia ƒe nuwuɣi la ƒe dzesi?” (Mateo 24:3) Esi Yesu nɔ nya sia ŋu ɖom la, megblɔ be míaƒe anyigba la ŋutɔŋutɔe awu enu o. Do ŋgɔ la, ezã nya “nuɖoanyi” wòfia xexea me ƒe alakpasubɔsubɔhawo kple ameƒomea ƒe akpa si le Satana ƒe ŋusẽ te. (Mateo 13:22, 40, 49) Eya ta nuɖoanyi ma ŋue wònɔ nu ƒom tso esi wògblɔ be: “Nuwuwu la ava.”—Mateo 24:14.

Alekee Yesu gblɔ be nuwuwua anɔ?

“Nya nyui” ye nuɖoanyi vɔ̃ɖi sia ƒe nuwuwu nye. Yesu gblɔ be: “Woaɖe gbeƒã fiaɖuƒe ŋuti nya nyui sia le anyigba blibo la katã dzi, be wòanye ɖaseɖiɖi na dukɔwo katã, eye ekema nuwuwu la ava.” Yesu gblɔ tso ale si fifi nuɖoanyia ƒe nuwuwu anɔ la ŋu be: “Xaxa gã ava, si tɔgbi meva kpɔ o, ao, meva kpɔ tso xexea ƒe gɔmedzedze va se ɖe fifia o, eye magava ake o. Le nyateƒe me la, ne wometso ŋkeke mawo dzi o la, ŋutilã aɖeke makpɔ ɖeɖe o.”—Mateo 24:14, 21, 22.

Ame kawoe woatsrɔ̃?

Ame siwo melɔ̃a Yehowa kple Yesu hewɔa woƒe lɔlɔ̃nu o la koe woatsrɔ̃. Ame mawo meɖoa to Mawu o. Yesu gblɔ be: “Ale si Noa ƒe ŋkekeawo nɔ la, nenema kee Amegbetɔvi la ƒe [anyinɔɣi] la hã anɔ. Elabena ale si wowɔ le ŋkeke mawo me do ŋgɔ na tsiɖɔɖɔa, . . . wometsɔ ɖeke le eme o, va se ɖe esime tsiɖɔɖɔa va, eye wòkplɔ wo katã yii.” (Mateo 24:36-39) Yesu gblɔ be ame geɖewo  le mɔ si kplɔa ame yia tsɔtsrɔ̃ me la dzi. Ke hã, egblɔ kakaɖedzitɔe be ‘mɔ xaxɛ’ aɖe li “si kplɔa ame yia agbe me.”—Mateo 7:13, 14.

Ɣekaɣie nuɖoanyi sia awu enu?

Esi wobia nya Yesu tso eƒe anyinɔɣi “kple nuɖoanyi sia ƒe nuwuɣi la” ƒe dzesi ŋu la, eɖo eŋu be: “Dukɔ atsi tsitre ɖe dukɔ ŋu, eye fiaɖuƒe ɖe fiaɖuƒe ŋu, nuɖuɖu ave, eye anyigba aʋuʋu, le teƒeteƒewo . . . eye le sedzimawɔmawɔ ƒe dzidziɖedzi ta la, ame akpa gãtɔ ƒe lɔlɔ̃ ayi to.” (Mateo 24:3-12) Eya ta gɔmesese dedziƒoname aɖe le nu gbãdziname siwo katã le dzɔdzɔm egbea la ŋu, si nye be eteƒe madidi o Mawu Fiaɖuƒea ƒe dziɖuɖu ahe ŋutifafa avae na ameƒomea me tɔ toɖolawo. Yesu gblɔ be: “Ne miekpɔ nu siawo le dzɔdzɔm la, minyae be Mawu fiaɖuƒe la gogo.”—Luka 21:31.

Nu kae wòle be nàwɔ?

Yesu gblɔ be Mawu “[tsɔ] eƒe Tenuvi la na, bene ame sia ame si ɖenɛ fiana be yexɔ edzi se la nagatsrɔ̃ o, ke boŋ wòakpɔ agbe mavɔ.” (Yohanes 3:16) Hafi nàte ŋu aɖee afia be yexɔ Mawu kple Via dzi se la, ele be nànya woamawo nyuie. Eya ta Yesu gblɔ be: “Esiae nye agbe mavɔ la: be woanɔ wò, Mawu vavã ɖeka la, kple Yesu Kristo, si nèdɔ ɖa la, ŋuti sidzedze xɔm.”—Yohanes 17:3.

Kpɔ nyuie be dzimaɖitsitsiwo kple kuxiwo nagana nàdo kpo ale si nàɖe wò lɔlɔ̃ na Mawu afia la sɔsrɔ̃ o. Yesu gblɔ be: “Mikpɔ mia ɖokui dzi nyuie, be . . . agbe me dzimaɖitsitsiwo nagate miaƒe dzi ɖe to gbeɖe o, ne ŋkeke ma nagava lili mi abe mɔ ene o. Elabena [ele vava ge].” Ne èɖo to Yesu ƒe nuxlɔ̃amea la, àte ŋu “asi le nu siawo katã siwo adzɔ la nu.”—Luka 21:34-36.

Kpɔ agbalẽ si nye Nuka Tututue Nye Biblia ƒe Nufiafia? * ƒe ta 9 lia si nye “‘Ŋkeke Mamlɛawo’ Mee Míele Nyateƒea?” hena numeɖeɖe bubuwo.

[Etenuŋɔŋlɔ]