Ènyaa?

Nu ka tae wogblɔa “amen” le gbedodoɖa ƒe nuwuwu?

Nya “amen” nye Hebrigbe me nya ʼa·menʹ si woŋlɔ ɖe ale si wòɖina le Hebrigbe me nu. Nya sia si amewo tsɔa nu sɔsɔe gblɔna ɖekae, zi geɖe le gbedodoɖa, atamkaka, yayranyawo, alo fiƒodenyawo ƒe nuwuwu la fia “neva eme,” alo “nenɔ alea.” Egbɔgblɔ alea fia be esela da asi ɖe nya siwo wogblɔ la dzi. Le numekugbalẽ aɖe ƒe nya nu la, “nya sia gbɔgblɔ ɖea kakaɖedzi, nyateƒetɔnyenye, nuteƒewɔwɔ, kple ɖimakemake fiana.” Le Biblia ŋlɔɣiwo la, amewo zãa “amen” tsɔ lɔ̃na ɖe atamkakawo alo nubablawo dzi le se nu, eye wòganyea kpeɖodzi be amea lɔ̃ ɖe tohehe si ado tso eme nenye be eda le edzi la dzi.—5 Mose 27:15-26.

Le Yesu ƒe gbeƒãɖeɖe kple nufiafiawo me la, edzea eƒe nyagbɔgblɔ aɖewo gɔme kple nya sia si nye “amen.” Etoa esia dzi tea gbe ɖe kakaɖedzi blibo si le nya siwo gblɔ ge wòala akplɔe ɖo ŋu la dzi. Le go siawo me la, woɖea Helagbe me nya a·menʹ la gɔme be “vavã” alo “nyateƒe.” (Mateo 5:18; 6:2, 5; Agbenya La) Ne Yesu zã nya sia zi eve ɖe wo nɔewo yome abe ale si wòdze enuenu le Yohanes ƒe Nya Nyui Gbalẽ bliboa mee ene la, woɖea egɔme be “vavã, vavã.” (Yohanes 1:51) Wogblɔ be ale si Yesu zãa amen alea la nye esi le etɔxɛ kura le agbalẽ kɔkɔewo ŋɔŋlɔ me.

Le Kristotɔwo ƒe Hela Ŋɔŋlɔawo me la, wozã dzesideŋkɔ si nye “Amen” na Yesu tsɔ ɖee fia be eƒe ɖaseɖiɖi nye ‘nyateƒe kple anukware.’—Nyaɖeɖefia 3:14.

Nu kawoe nye Urim kple Tumim?

Edze abe Urim kple Tumim ye wozãna le blema Israel tsɔ nyaa Yehowa ƒe lɔlɔ̃nu le nya siwo ka dukɔa alo dukɔa kplɔlawo ŋu ene. Wotsɔa Urim kple Tumim siawo naa nunɔlagã eye wotsɔa wo dea “ʋɔnudɔdrɔ̃ ƒe akɔtaɖonu” la me. (2 Mose 28:15, 16, 30, NW) Togbɔ be Ŋɔŋlɔawo meƒo nu tso nu siawo ŋu tsitotsito alo ƒo nu tso ale si tututu wozãa woe ŋu o hã la, wozãa wo tsɔ dzidzea nu tsɔ nyana ne Mawu ƒe ŋuɖoɖo le nya aɖe ŋu nye “ɛ̃” alo “ao,” alo ne ŋuɖoɖo aɖeke kura matso egbɔ o.

Esia ƒe kpɔɖeŋu ɖekae nye esime David na Abyatar tsɔ nu si anya nye nunɔlagã la ƒe kɔmewu si me Urim kple Tumim nɔ la vae nɛ. David bia nya eve aɖewo Yehowa be: ‘Ðe Saul le vava gea,’ eye be, “Ðe Kegilatɔwo atsɔm ade asi nɛa?” Biabia eve siawo ƒe ŋuɖoɖo si David xɔ lae nye ɛ̃, si kpe ɖe eŋu wòwɔ nyametsotso siwo sɔ.—1 Samuel 23:6-12.

Do ŋgɔ la, Fia Saul zã Urim kple Tumim tsɔ ku nu me be yeanya ne dukɔ lae ɖi fɔ loo alo ye kple ye viŋutsu Yonatan ye hã; eye emegbe, be yeanya be ye kple ye via dometɔ kae ɖi fɔa hã. (1 Samuel 14:40-42) Emegbe esi Mawu megava kpɔ ŋudzedze ɖe Saul ŋu o la, Mawu meganaa mɔfiamewoe “le drɔ̃e me loo alo to Urim alo nyagblɔɖilawo dzi o.”—1 Samuel 28:6.

Le Yudatɔwo ƒe xotutuwo nu la, wova dzudzɔ Urim kple Tumim zazã le esime wotsrɔ̃ Yehowa ƒe gbedoxɔa le ƒe 607 D.M.Ŋ. me megbe.

[Nɔnɔmetata si le axa 27]

“Amen,” Nyaɖeɖefia 3:14. Codex Alexandrinus, ƒe alafa 5 lia M.Ŋ.