Tsaɖiɖi Yi Agbalẽtaƒe Ðedzesi Aɖe

MAGAZINE sia si xlẽm nèle la manya nye gbãtɔ si nèkpɔ kpɔ o. Ðewohĩ Yehowa Ðasefowo va srã wò kpɔ le wò aƒe me, eye wotsɔ Gbetakpɔxɔ kple Nyɔ! siwo akpe ɖe ŋuwò nàse Biblia gɔme nyuie wu la na wò. Alo ɖewohĩ èkpɔ Ðasefowo wole magazine siawo tɔgbi mam le ablɔdzi loo alo le asi me. Le nyateƒe me la, womaa magazine sia miliɔn 35 kple edzivɔwo ɣleti sia ɣleti, si wɔe be wònye magazine si womana wu le xexea katã me.

Ðe nède ŋugble tso ale si wowɔna taa magazine siawo kple afi si wotaa wo le ŋu kpɔa? Na míaƒo nu tso Yehowa Ðasefowo ƒe agbalẽtaƒe siwo le dukɔ vovovowo me la dometɔ ɖeka ko—esi le Wallkill, New York, U.S.A. la—ŋu. Magazine sia xlẽla geɖe siwo le xexea me katã la mate ŋu aɖi tsa ayi Yehowa Ðasefowo ƒe agbalẽtaƒe sia si le United States la o, eya ta nya siwo míagblɔ tso agbalẽtaƒea ŋu kple eƒe fotoawo ana nàkpɔ nu si dzɔna le afi ma.

Enye nyateƒe be ɖe woŋlɔa nuwo hafi taa wo ɖe agbalẽ dzi. Nutatadɔdzikpɔƒea xɔa nyatakakaawo tsoa Agbalẽŋɔŋlɔdɔdzikpɔƒe si le Brooklyn, New York la gbɔ to kɔmpiuta dzi. Woɖea nuŋlɔɖi mawo kple nɔnɔmetataawo ɖe ga falɛ gbadzawo dzi. Ɣleti sia ɣleti la, woɖoa pɛpa siwo woxatsa wòlolo ale gbegbe la 1,400 sɔŋ ɖe Wallkill gbalẽtaƒea, si zãa pɛpa tɔn 80 va ɖo 100 gbe sia gbe. Wodea pɛpa xatsaxatsa gã siawo siwo dometɔ aɖewo ƒe kpekpeme wu kilogram 1,360 la agbalẽtamɔ̃ gã atɔ̃ siwo me wode ga falɛ gbadza siwo dzi woɖe nuŋlɔɖiawo kple nɔnɔmetatawo ɖo xoxo la me. Mɔ̃a ɖea nuŋlɔɖiawo kple nɔnɔmetatawo ɖe pɛpaawo dzi, flia wo ɖe kekeme aɖe nu, eye wòŋeawo ɖe axa 32 ƒe bablawo me keŋ. Magazine sia si xlẽm nèle la nye babla siawo dometɔ ɖeka. Ke agbalẽ gãwo ya ɖe? Le agbalẽblaƒeawo la, woblaa babla siawo ƒe agbɔsɔsɔme aɖe ɖekae wòzua agbalẽ blibo ɖeka. Agbalẽblamɔ̃ eveawo dometɔ ɖeka tea ŋu taa agbalẽ siwo ƒe akpa tri la 50,000 sɔŋ, alo esiwo ƒe akpa metri o la 75,000 sɔŋ le ŋkeke ɖeka ko me. Agbalẽblamɔ̃ evelia hã tea ŋu taa agbalẽ siwo ƒe akpa metri o la 100,000 le ŋkeke ɖeka ko me.

Le ƒe 2008 me la, wota agbalẽ vovovo 28,000,000 kple edzivɔwo le agbalẽtaƒea, eye wo dometɔ siwo wu 2,600,000 nye Bibliawo. Le ƒe ma ke me la, wota magazine 243,317,564 sɔŋ. Biblia srɔ̃gbalẽ siwo le gbegbɔgblɔ 380 me la ŋue wotrɔa asi le le agbalẽtaƒea. Ne wota agbalẽawo vɔ la, alekee wowɔna wo?

Yehowa Ðasefowo ƒe hame 12,754 siwo le United States dukɔa me kple hame 1,369 siwo le Carib kple Hawaii nutowo me la katã ɖoa woƒe agbalẽnudɔdɔwo ɖe agbalẽtaƒe sia. Agbalẽwo Ðoɖoɖa Dɔwɔƒea kpɔa hame ɖe sia ɖe ƒe  nudɔdɔawo gbɔ hewɔa ɖoɖo ɖona wo ɖe wo. Ƒe sia ƒe la, woɖoa Biblia srɔ̃gbalẽ siwo ade kilogram miliɔn 14 sɔŋ ɖe hame siwo le United States.

Nu si nye vevitɔwo kekeake le agbalẽtaƒe siae nye ame siwo le afi ma, ke menye mɔ̃awo o. Ame 300 kple edzivɔwoe wɔa dɔ le agbalẽtaƒea ƒe dɔwɔƒe vovovoawo—Nutatadɔdzikpɔƒea, Agbalẽtata Ŋuti Ðoɖowo Wɔƒea, afi si Agbalẽtamɔ̃a le, Agbalẽblaƒea, kple Agbalẽwo Ðoɖoɖa Dɔwɔƒea. Dɔwɔla siwo le afi ma la katã nye lɔlɔ̃nu faa dɔwɔla siwo xɔ tso ƒe 19 va se ɖe 92.

Wotsɔ ɖe le eme na amewo vevie—ame siwo axɔ agbalẽawo kple dzidzɔ ahana Biblia me gɔmeɖose siwo me wodzro le wo me la nafia nu wo, ade dzi ƒo na wo, ahafia mɔ wo le agbe me. Míeka ɖe edzi be wò hã nènye nuxlẽla siawo dometɔ ɖeka, eye agbalẽ siawo siwo wotana le afi sia la ayi edzi akpe ɖe ŋuwò be nàxɔ Yehowa Mawu kple Yesu Kristo ŋuti sidzedze, si akplɔ wò ayi agbe mavɔ me.—Yohanes 17:3.

[Nɔnɔmetata siwo le axa 16]

 [Nɔnɔmetata si xɔ axa 17]