Biblia La​—Ale Si Wokpɔ Etae Ƒe Ŋutinya Ðedzesi Aɖe

LE ŊUTINYA katã me la, Bibliae nye agbalẽ si woma le xexea me wu—woma ɖekaɖeka biliɔn ene, miliɔn alafa enyi xoxo. Le ƒe 2007 ɖeɖe dzaa me la, Biblia 64,600,000 sɔŋ ye wota. To vovo na esia la, ŋutinyagbalẽ siwo wodzrana le xexea me wu la ƒe kɔpi miliɔn 12 koe wota le ƒe ma me le United States.

Gake, hafi Biblia nava zu agbalẽ si womana le xexea me wu la, wokpɔ eta tso nu geɖe siwo ate ŋu abu mo nɛ hafi la me. Le ŋutinya katã me la, woxe mɔ ɖe etata kple ezazã nu hetɔ dzo eƒe tata siwo li, eye wowɔ funyafunya ame siwo nɔ agbagba dzem be yewoaɖe egɔme la hewu wo dometɔ aɖewo. Ke hã, nu siwo ate ŋu ana Biblia la natsrɔ̃ bɔbɔe wu la dometɔ ɖekae nye ale si nu siwo dzi woŋlɔe ɖo la ate ŋu anyunyɔ bɔbɔe, ke menye ale si woti amewo yome kutɔkutɔe le etata kple egɔmeɖeɖe ta o. Nu ka tae?

Biblia nye agbalẽ suesuesue 66 ƒe ƒuƒoƒo, eye Israel dukɔa me tɔwoe ŋlɔ wo dometɔ xoxoetɔwo kekeake ƒe 3,000 kple edzivɔwoe nye esia. Nu siwo nyunyɔna bɔbɔe, abe aƒlagbalẽ kple lãgbalẽwo ene, dzie ame gbãtɔ siawo kple ame siwo va gbugbɔ woƒe agbalẽawo ŋlɔ la ŋlɔ gbedeasi si tso gbɔgbɔ me la ɖo. Womeke ɖe nuŋlɔɖi gbãtɔawo ŋutɔŋutɔ dometɔ aɖeke ŋu haɖe o. Ke hã, wova ke ɖe Biblia gbalẽ siwo wogbugbɔ ŋlɔ la ƒe akpa aɖe alo akpa geɖe akpe nanewo ŋu. Agbalẽ siawo dometɔ ɖeka, si nye Yohanes ƒe Nya Nyui Gbalẽa, ƒe akpa aɖe si ŋu wova ke ɖo la nye esi wogbugbɔ ŋlɔ le ɣiyiɣi aɖe si medidi boo tso ɣeyiɣi si me apostolo Yohanes ŋlɔ nuŋlɔɖi gbãtɔa gbɔ o la me.

Nu ka tae wòɖe dzesi ŋutɔ be Biblia ƒe akpa vovovoawo ƒe kɔpi aɖewo li va se ɖe egbe? Ðe Biblia siwo li egbea la me nyawo sɔ kple nuŋlɔɖi gbãtɔawo pɛpɛpɛa?

Nu Kae Dzɔ Ðe Blemanuŋlɔɖi Bubuwo Dzi?

Ale si Biblia wɔ gakpɔtɔ li va de asi na egbea la ɖe dzesi ŋutɔ, ne míebu nu si va dzɔ ɖe dukɔ bubu siwo hã nɔ anyi le Israel viwo ŋɔli la ƒe nuŋlɔɖiwo ŋu. Le kpɔɖeŋu me, Foiniketɔwo nye dukɔ aɖe si te ɖe Israel dukɔa ŋu le ƒe akpe ɖeka si do ŋgɔ na mía ŋɔliawo la me. Dukɔ sia si me tɔwo, siwo nye ƒudzisitsalawo la, na woƒe nuŋlɔŋlɔ kaka ɖe Mediterranea nuto bliboa katã me. Wokpɔ viɖe geɖe tso aƒlagbalẽwo dzadzra na Egiptetɔwo kple Helatɔwo me. Togbɔ be ele nenema hã la, National Geographic magazine gblɔ tso Foiniketɔwo ŋu be: “Woƒe nuŋlɔɖiwo, siwo dometɔ akpa gãtɔ woŋlɔ ɖe aƒlagbalẽ siwo nyunyɔna bɔbɔe dzi la, tsrɔ̃ keŋkeŋ—ale be nuŋlɔɖi totro aɖewo siwo Foiniketɔwo ƒe futɔwo ŋlɔ la koe na míenya be wonɔ anyi kpɔ. Togbɔ be nyatakakawo ɖee fia be Foiniketɔwo ŋutɔ wɔ nuŋlɔɖi gbogbo aɖewo hã la, wo katã nu yi gbe aɖe gbe ʋĩi ke.”

Ke blema Egiptetɔwo ƒe nuŋlɔɖiwo ya ɖe? Ame geɖe nya nu tso Egiptetɔwo ƒe blemanuŋɔŋlɔ, siwo nyea nutata siwo nɔa gbedoxɔwo ƒe gliwo kple nu bubuwo dzi la ŋu nyuie. Woxɔ ŋkɔ le asitɔtrɔ le aƒlagbalẽwo ŋu bene woate ŋu aŋlɔ nu ɖe wo dzi me. Ke hã Egiptetɔwo ƒe blemanuwo ŋuti nunyalagã K. A. Kitchen gblɔ be: “Numekukuwo ɖee fia be aƒlagbalẽ siwo dzi woŋlɔ nu ɖo tso ƒe 3,000 D.M.Ŋ. va ɖo Helatɔwo kple Romatɔwo ƒe dziɖuɣiwo la dometɔ 99 le alafa me la dome gblẽ keŋkeŋ.”

 Ke Romatɔwo ƒe nuŋlɔɖi siwo woŋlɔ ɖe aƒlagbalẽwo dzi ya ɖe? Bu kpɔɖeŋu sia ŋu kpɔ. Le agbalẽ si nye Roman Military Records on Papyrus ƒe nya nu la, edze abe woxea fe na Roma srafowo zi etɔ̃ le ƒe ɖeka me, eye woŋlɔa fexexe siawo ŋuti nuŋlɔɖiwo ɖe aƒlagbalẽwo dzi ene. Akɔntabubuwo ɖee fia be le ƒe 300 siwo tso Fiagã Augusto (27 D.M.Ŋ.–14 M.Ŋ.) ƒe dziɖuɣi va ɖo Diocletian (284-305 M.Ŋ.) ƒe dziɖuɣi dome la, fexexe siawo ŋuti nuŋlɔɖi 225,000,000 sɔŋ ye nɔ anyi. Wo dometɔ nenie gakpɔtɔ li? Wo dometɔ eve ko ŋue woke ɖo siwo ƒe nuŋɔŋlɔwo gale dzedzem nyuie.

Nu ka tae blemanuŋlɔɖi siwo nɔ aƒlagbalẽwo dzi la dometɔ ʋɛ aɖewo koe kpɔtɔ li? Nu siwo dzi woŋlɔa nuwo ɖo ɣemaɣi, abe aƒlagbalẽawo kple nu bubu si hã bɔ ɣemaɣi, si nye lãgbalẽwo, la te ŋu nyunyɔna bɔbɔe le teƒe siwo yamenutowo me fana le. The Anchor Bible Dictionary gblɔ be: “Le ale si yamenuto me nɔna le ɣeyiɣi mawo [ƒe akpe ɖeka siwo do ŋgɔ na mía ŋɔli] me ta la, ne wodzra aƒlagbalẽwo ɖo ɖe agadowo me le gbedadaƒo, afi si dzoxɔxɔ le la ko hafi woate ŋu anɔ anyi hena ɣeyiɣi didi.”

Ke Biblia Me Nuŋlɔɖiwo Hã Ðe?

Nu siwo te ŋu nyunyɔna bɔbɔe la dzi koe woŋlɔ Biblia me nuŋlɔɖi gbãtɔawo ɖo, abe ale si ko wònɔ le Foiniketɔwo, Egiptetɔwo, kple Romatɔwo ƒe nuŋlɔɖiawo hã gome ene. Ke aleke wòdzɔe be wote ŋu kpɔ Biblia me nuŋlɔɖiawo ya ta wova zu agbalẽ si wotana wu le xexea me godoo egbea? Nufialagã James L. Kugel ƒo nu tso susuawo dometɔ ɖeka ŋu. Egblɔ be wogbugbɔ nuŋlɔɖi gbãtɔawo ŋlɔ “zi gbɔ zi geɖe, le Bibliaŋlɔɣiawo ŋutɔ gɔ̃ hã.”

Ðe Biblia gɔmeɖeɖe siwo li egbea la me nyawo sɔ kple blemasinuŋɔŋlɔgbalẽawoa? Nufialagã Julio Trebolle Barrera, si hã nɔ nunyalagã siwo srɔ̃ nu tso blemasinuŋɔŋlɔgbalẽ siwo wova yɔna be Ƒukukua ƒe Agbalẽxatsaxatsawo la ŋu heta wo dome la gblɔ be: “Wogbugbɔ Hebrigbe me Biblia gbãtɔa me nyawo ŋlɔ wòsɔ pɛpɛpɛ le mɔ wɔnuku aɖe nu ale gbegbe be womate ŋu atsɔ Hela kple Latin ƒe blemanuŋlɔɖi siwo wogbugbɔ ŋlɔ la dometɔ aɖeke asɔ kplii o.” Biblia ŋuti nunyalagã xɔŋkɔ F. F. Bruce gblɔ be: “Míaƒe Nubabla Yeye la ŋuti kpeɖodzi siwo ŋu woke ɖo la de ŋgɔ sãsãsã wu blemanuŋlɔɖi bubu geɖewo tɔ, eye ame aɖeke meku drɔ̃e kpɔ be yeake ɖi le wo me nyawo ƒe dede pɛpɛpɛ ŋu gbeɖe o.” Eyi edzi be: “Ne ŋutinyagbalẽ dzro aɖe koe Nubabla Yeye la nye hã la, ame sia ame alɔ̃ ɖe emenyawo ƒe dede pɛpɛpɛ dzi godoo.” Ðikeke mele eme o be agbalẽ ɖedzesi aɖe ŋutɔe Biblia nye. Ðe nèdia ɣeyiɣi xlẽnɛ gbe sia gbea?—1 Petro 1:24, 25.

[Nya si ɖe dzesi si le axa 13]

“Wogbugbɔ Hebrigbe me Biblia gbãtɔa me nyawo ŋlɔ wòsɔ pɛpɛpɛ le mɔ wɔnuku aɖe nu ale gbegbe be womate ŋu atsɔ Hela kple Latin ƒe blemanuŋlɔɖi siwo wogbugbɔ ŋlɔ la dometɔ aɖeke asɔ kplii o.”—Nufialagã Julio Trebolle Barrera

[Nɔnɔmetata siwo le axa 14]

Hebri Ŋɔŋlɔawo, si ame aɖewo yɔna be Nubabla Xoxo la, ƒe asinuŋɔŋlɔgbalẽ 6,000 aɖewo, kple Hela Ŋɔŋlɔawo, si ame aɖewo yɔna be Nubabla Yeye la, hã tɔ 5,000 aɖewo sɔŋ gakpɔtɔ li egbea

[Afi Si Míexɔ Mɔɖeɖe Tso]

Left: Todd Bolen/Bible Places.com; right: Shrine of the Book, Israel Museum, Jerusalem

[Nɔnɔmetata Tsoƒe si le axa 13]

From the book The Parallel Bible, The Holy Bible, 1885