Nya Nyui Le Gbegbɔgblɔ 500 Me
Nya Nyui Le Gbegbɔgblɔ 500 Me
ESIME dukɔmeviʋa nɔ edzi yim le Rwanda la, gbegɔmeɖelawo ƒe ƒuƒoƒo sue aɖe gblẽ woƒe nunɔamesiwo ɖi hesi dzo le woƒe aƒewo me. Ke hã, wodze agbagba tsɔ woƒe kɔmpiuta suewo ɖe asi yi ɖe sitsoƒedilawo ƒe asaɖawo me. Nu ka tae? Bene yewoate ŋu ayi Biblia srɔ̃gbalẽwo gɔme ɖeɖe ɖe Kinyarwandagbe me dzi.
Ðetugbui aɖe si le Asia ƒe anyieheɣedzeƒe la le dɔ dzi le eƒe kɔmpiuta dzi vevie le zã me, eye wònɔ nɛ be wòanɔ te ɖe ɖeɖiteameŋu, dzoxɔxɔ, kple dzotsitsi na wo enuenu nu. Taɖodzinu ka tae? Bene wòate ŋu awu nu si gɔme ɖem wòle la nu kaba ne woatae ɖe game dzi.
Gbegɔmeɖela siawo nye lɔlɔ̃nu faa dɔwɔla 2,300 aɖewo siwo wɔa dɔ le gbegɔmeɖeƒe vovovo 190 le xexea me godoo la dometɔ aɖewo. Woxɔ tso ƒe 20 va se ɖe ƒe 90 kloe, eye wokua kutri vevie bene Biblia me gbedeasi fakɔnamewo nate ŋu asu amewo si le gbegbɔgblɔ 500 me.—Nyaɖeɖefia 7:9.
Agbalẽwo Gɔme Ðeɖe Ðe Gbegbɔgblɔ Vovovowo Me
Le ƒe ʋɛ siwo va yi me la, Yehowa Ðasefowo ƒe gbegɔmeɖeɖedɔa dzi ɖe edzi le mɔ ɖedzesi aɖe nu. Le kpɔɖeŋu me, le ƒe 1985 me la, wotaa Gbetakpɔxɔ ɖe gbegbɔgblɔ 23 me le ɣeyiɣi ɖeka me—si nye nu si ɖe dzesi ŋutɔ ɣemaɣi. Egbea la, woɖea Gbetakpɔxɔ gɔme ɖe gbegbɔgblɔ 176 me, eye wotaa wo katã le ɣeyiɣi ɖeka me, bene wo me nyawo naɖo ame siwo katã xlẽnɛ le xexea me la gbɔ le ɣeyiɣi ɖeka me.
Le gbegbɔgblɔ siawo dometɔ 50 gome la, Yehowa Ðasefowo ƒe Gbetakpɔxɔ la koe nye magazine si amewo ate ŋu akpɔ axlẽ le wo degbe me edziedzi. Nu ka tae? Adzɔha siwo taa agbalẽwo la metsia dzi ɖe agbalẽwo tata ɖe wo degbewo me ŋu o. Gake Yehowa Ðasefo siwo le xexea me godoo ya lɔ̃na faa dzɔa nu be woate ŋu ata Mawu ƒe Nya la kple Biblia srɔ̃gbalẽwo ɖe gbegbɔgblɔ bubuwo me ne ehiã.—2 Korintotɔwo 8:14.
Amewo dea asixɔxɔ Biblia me gbedeasia ŋu ŋutɔ ne woxlẽe le wo degbe me. Le kpɔɖeŋu me, wote Biblia srɔ̃gbalẽwo tata ɖe Miskito, si nye gbegbɔgblɔ aɖe si ame 200,000 aɖewo dona le Nicaragua la me nyitsɔ laa. Nyɔnu aɖe dɔ agbalẽ si ŋkɔe nye Nye Agbalẽ Si Nye Biblia-Ŋutinyawo * le Miskitogbea me, eye nutoa me osɔfo aɖe nɔ afi ma hafi wotsɔe va nɛ. Esi osɔfoa kpɔ agbalẽ dzeani sia la, edi be nyɔnua natsɔe ana ye. Gake nyɔnua gbe, togbɔ be osɔfoa gblɔ be yeatsɔ kɔfi kilogram 20 sɔŋ anae ɖe agbalẽa ta hã!
Le ƒe ewo siwo va yi me la, woɖea Biblia srɔ̃gbalẽwo gɔme ɖe gbegbɔgblɔ 12 aɖewo siwo wodona le Mexico, siwo dome Maya, Nahuatl, kple Tzotzil hã le la me. Mede ƒe ewo hafi Yehowa Ðasefowo ƒe hame siwo doa gbegbɔgblɔ vovovo siawo kple tokunɔgbe siaa le dukɔ ma me la dzi ɖe edzi tso 72 va ɖo 1,200 kple edzivɔ o. Yehowa Ðasefowo ƒãa Biblia me gbedeasia ɖe amewo ƒe dzi me, gake wogblẽnɛ ɖe Mawu si me be wòana nyateƒea ƒe kuwo namie.—1 Korintotɔwo 3:5-7.
Biblia Aɖe Gɔme Ðeɖe Ðe Gbegbɔgblɔ 80 Me Egbea
Le ƒe ʋɛ siwo va yi me la, Yehowa Ðasefowo ku kutri ta New World Translation of the Holy Scriptures Biblia bliboa, alo eƒe akpa aɖe ɖe gbegbɔgblɔ 80 aɖewo me. Nu kae do tso eme? Yehowa Ðasefo aɖe si le South Africa la gblɔ tso Biblia si gɔme woɖe le Tswanagbe me la ŋu be: “Dɔwɔnu lédziname ka gbegbee nye esi. Ana magakpɔ ŋudzedze ɖe Mawu ƒe Nya la ŋu geɖe wu. Exexlẽ le bɔbɔe eye wòvivia ame nu ŋutɔ.” Ame aɖe si le Mozambique si xlẽ Biblia le Tsongagbe me la ŋlɔ be: “Ne Biblia srɔ̃gbalẽ bubuawo katã le ame aɖe si gake Biblia mekpe ɖe eŋu o la, ɖeko wòle abe dziɖegbe kple dzikedzo si ŋu tsidzadza mekpe ɖo o ene. Ke hã, tsia ŋutɔŋutɔ dza azɔ esi woɖe New World Translation la ɖe go le Tsongagbe me.”
Ame siwo ɖea nya nyui si le Biblia me la gɔme hemaa wo la, na nya aɖe si wogblɔ ɖi xoxoxo la le eme vam le mɔ ɖedzesi aɖe nu. Yesu Kristo ŋutɔe gblɔe ɖi be: “Woaɖe gbeƒã fiaɖuƒe ŋuti nya nyui sia le anyigba blibo la katã dzi, be wòanye ɖaseɖiɖi na dukɔwo katã, eye ekema nuwuwu la ava.”—Mateo 24:14.
[Etenuŋɔŋlɔ]
^ mm. 8 Yehowa Ðasefowoe tae.
[Akɔntabubu si le axa 25]
(Edze nyuie le agbalẽa ŋutɔ me)
XEXE YEYE GƆMEÐEÐE AGBALẼ
BIBLIA LA BUBUWO
Biblia bliboa alo
eƒe akpa aɖe
80 2010 500 2010
36 2000
13 1990 200 1990
190 1980
7 1970 165 1970
125 1960
1 1950 88 1950
GBEGBƆGBLƆ SIWO ME WOLE
[Nɔnɔmetata siwo le axa 24, 25]
Lɔlɔ̃nu faa dɔwɔla 2,300 aɖewo ɖea Biblia srɔ̃gbalẽwo gɔme ɖe gbegbɔgblɔ 500 sɔŋ me
BENIN
SLOVENIA
ETHIOPIA
BRITAIN