Ènyaa?

Ame kae nye Persia Fia Axasweros si ŋu woƒo nu tsoe le Biblia gbalẽ si nye Ester me?

▪ Ester ƒe agbalẽa gblɔ be Axasweros tia Yuda ɖetugbui si nye Ester be wòanye fiasrɔ̃, eye emegbe Ester xɔ na wo detɔ siwo ŋu woɖo nugbe ɖo be woatsrɔ̃ ɖa la. Agbalẽnyala geɖewo ƒe nu mesɔ le Persia Fia Axasweros si tututu ŋu woƒo nu tsoe le Biblia me ŋu o. Gake edze abe wova nya wo dometɔ si wònye la ene le nuŋlɔɖi siwo ŋu wova ke ɖo le gbegbɔgblɔ etɔ̃ aɖewo me la me. Kpeɖodziawo fia be Axasweros siae nye Xerxes I, si nye Dario Gãtɔ (Hystaspis) ƒe vi. Ne woŋlɔ ale si woŋlɔ ŋkɔ Xerxes le Persiatɔwo ƒe nuŋlɔɖia me la ɖe Hebri ŋɔŋlɔdzesiwo nu la, ede sɔsɔ ge pɛpɛpɛ kple ale si woŋlɔ ŋkɔae le Ester ƒe agbalẽa me le Hebrigbe me.

Nu sia nu si wogblɔ le Ester ƒe agbalẽa me tso Axasweros ŋu la ɖo kpe edzi be eyae nye Xerxes I. Persia fiagã sia ƒe fiadue nye Susa si le Elam. Eyae ɖu Media hã dzi, eye eƒe dziɖuƒe tso India va ɖo keke Mediterranea ƒua gbɔ ke. (Ester 1:2, 3; 8:9; 10:1) Agbalẽnyalagã Lewis Bayles Paton gblɔ be: “Nya mawo meku ɖe Persia fiagã bubu aɖeke ŋu tsɔ wu Xerxes o. Ale si woɖɔ Axasweros ƒe nuwɔnawo le Est[er] ƒe Agbalẽa me hã sɔ pɛpɛpɛ kple Xerxes ŋuti nuŋlɔɖi siwo dze le Herodotus kple blema Hela ŋutinyaŋlɔla bubuwo ƒe nuŋlɔɖiwo me.”

Nu kae ɖo kpe edzi be womèa anyikpewo le blema Egipte?

▪ Biblia gblɔ le Mose ƒe Agbalẽ Evelia me be Egiptetɔwo nana woƒe kluvi siwo nye Hebritɔwo mèa anyikpewo na wo. Enɔ na kluviawo be woablu anyi kple gbe atsɔ amè anyikpe agbɔsɔsɔme aɖe gbe sia gbe.—2 Mose 1:14; 5:10-14.

Anyikpe siwo womèna hesiana ɖe ŋdɔ gbe la nye dɔ vevi aɖe si wowɔna le Nil balia me le Biblia ƒe ɣeyiɣiwo me. Xɔ siwo wotsɔ anyikpe siawo tɔgbi tu la dometɔ aɖewo gale Egipte va de asi na egbe. Gli ŋu nutata aɖe si wota tso ƒe alafa 15 lia Do Ŋgɔ Na Mía Ŋɔli me ɖe Rekhmire ƒe yɔdo me le Thebes, si sɔ kloe ɖe ɣeyiɣi si ƒe nudzɔdzɔwo woŋlɔ ɖe Mose ƒe Agbalẽ Evelia me nu la, ɖe ale si womèa anyikpewoe la fia.

Numekugbalẽ aɖe (The International Standard Bible Encyclopedia) ɖɔ nutata si dze le gli sia ŋu ale: “Wokua tsi tso tsita aɖe me; wotsɔa kodzi nyãa anyi, eye emegbe wokaa anyia yia afi si emèla amèe le. Wokɔa anyia ɖe kpetsonu si ƒe nɔnɔme emèla di be wòanɔ la me eye wotenɛ sesĩe. Azɔ woɖea kpetsonua ɖa le anyikpe si womè la ŋu eye wonana wònɔa ŋdɔ gbe be wòaƒu. Womèa anyikpe gbogbo aɖewo, eye ne woƒu la, woɖoa wo ɖi na zazã. Wogawɔa mɔnu sia ŋu dɔ le Titina Ɣedzeƒe nutowo me egbea.”

Ƒe akpe evelia Do Ŋgɔ Na Mía Ŋɔli ƒe nuŋlɔɖi vovovowo hã ƒo nu tso ale si kluviwo tsɔa anyi kple gbe mèa anyikpewoe ŋu; eye wògaƒo nu tso anyikpe agbɔsɔsɔme si wòle be dɔwɔlawo namè gbe sia gbe hã ŋu.

[Nɔnɔmetata si le axa 22]

Xerxes (si le tsitrenu) kple Dario gãtɔ (si le anyinɔƒe) ƒe kpetata

[Afi Si Míexɔ Mɔɖeɖe Tso]

Werner Forman/Art Resource, NY

[Nɔnɔmetata si le axa 22]

Gli ŋu nutata aɖe si le Rekhmire ƒe yɔdɔ me

[Afi Si Míexɔ Mɔɖeɖe Tso]

Erich Lessing/Art Resource, NY