Ame Kae Nye Abraham?
Ame Kae Nye Abraham?
ABRAHAM * ƒe ŋkɔ de du ŋutɔ le mawusubɔsubɔnyawo gome. Yudatɔwo, Moslemtɔwo kple Kristotɔwo siaa nya Abraham be enye “ame xɔŋkɔ aɖe le Ŋɔŋlɔawo me” eye be enye “xɔse sẽŋu ƒe kpɔɖeŋuɖola ɖedzesi.” Biblia yɔe be enye “fofo na ame siwo katã si xɔse le.”—Romatɔwo 4:11.
Nu ka tae amewo dea bubu Abraham ŋu alea gbegbe ɖo? Susu gbãtɔe nye be, Abraham koe nye ame si woyɔ le Bible me tẽe be Mawu xɔlɔ̃, eye woyɔe alea zi gbɔ zi etɔ̃ sɔŋ!—2 Kronika 20:7; Yesaya 41:8; Yakobo 2:23.
Ke hã, amegbetɔ ko Abraham nye abe míawo ke ene. Eto nu geɖe siwo me tom míawo hã míele la me—eye wòto wo me do dedie. Àdi be yeanya ale si wòwɔ nɔ te ɖe nɔnɔmeawo nua? Na míade ŋugble tso nya si Biblia gblɔ tso ame vevi sia ŋu la ŋuti.
Nu Si Míenya Tso Eŋu
Wodzi Abraham le ƒe 2018 Do Ŋgɔ Na Mía Ŋɔli, eye wònɔ du si woyɔna be Ur me tsi. (1 Mose 11:27-31) Ur nye dugã si me nuwo de ame dzi le. Trɔ̃subɔsubɔ hã bɔ ɖe dua me ŋutɔ. Tarax, si nye Abraham fofo, hã anya nɔ ame siwo dea ta agu na legbawo dome. (Yosua 24:2) Ke hã, Abraham tiae be Yehowa * ɖeka ko yeade ta agu na, ke menye mawuwɔwɔe siwo me agbe mele o.
Nu kae ʋãe wòwɔ tiatia sia? Abraham xɔ ƒe 150 hafi Noa vi Sem ku. Nenye be eɖo dze kple ame tsitsi ma kpɔ la, ŋusẽ kae wòanya kpɔ ɖe eƒe agbe dzi? Abraham anye see tso Sem ŋutɔ gbɔ tẽe ale si wowɔ tsi agbe le Tsiɖɔɖɔ si ɖe anyigba bliboa la me. Anya srɔ̃ vevienyenye si le Yehowa, Mawu si kpɔ Sem kple eƒe ƒomea ta le Tsiɖɔɖɔa me la, subɔsubɔ hã me.
Eɖanye Sem ŋutɔe gblɔ nya siawo nɛ loo alo mɔ bubu aɖe dzie wòto nya nya siawo o, Abraham lɔ̃ wɔ ɖe nu si wòsrɔ̃ tso Mawu vavãa ŋu la dzi. Esi Yehowa, ame si “doa dziwo kpɔna” la, lé ŋku ɖe Abraham ŋu la, ekpɔ nu nyui aɖe le eme, eye wònɔ te ɖe ema dzi kpe ɖe eŋu be wòva zu ame nyui aɖe.—Lododowo 17:3; 2 Kronika 16:9.
Eƒe Agbenɔnɔ
Abraham nɔ agbe didi si me wòkpɔ dzidzɔ le, eye togbɔ be edo go kuxi geɖe hã la, enɔ agbe si ŋu viɖe le. Na míade ŋugble le nu siwo me wòto la dometɔ ʋɛ aɖewo ŋu kpɔ.
▪ Esime Abraham nɔ wo de Ur la, Mawu gblɔ nɛ be wòaʋu le afi ma ayi afi si yeafiae. Togbɔ be Abraham kple Sara menya afi si yim wonɔ kple susu si tae Mawu gblɔ be woaʋu ɖo tsitotsito o hã la, woɖo to. Abraham kple Sara nɔ ʋuʋum tso teƒe yi teƒe, mlɔeba wova tsi Kanaan-nyigba dzi henɔ agbadɔwo me le woƒe agbemeŋkekewo katã me.—Dɔwɔwɔwo 7:2, 3; Hebritɔwo 11:8, 9, 13.
▪ Vi menɔ Abraham kple Sara si ɣemaɣi hafi Yehowa do ŋugbe na Abraham be yeana dukɔ gã aɖe nado tso eme o. Yehowa gblɔ kpee be woayra anyigba dzi ƒomeawo katã to Abraham dzi. (1 Mose 11:30; 12:1-3) Yehowa gaɖo kpe ŋugbedodo ma dzi emegbe be yeana wòava eme godoo. Egblɔ na Abraham be yeana eƒe dzidzimeviwo nasɔ gbɔ abe dziƒoɣletivi gbogboawo ene.—1 Mose 15:5, 6.
▪ Esime Abraham xɔ ƒe 99 eye Sara gogo ƒe 90 la, Yehowa do ŋugbe be woadzi vi. Le amegbetɔwo ƒe nukpɔkpɔ nu la, esia mate ŋu adzɔ o, gake Abraham kple Sara va kpɔe dze sii be naneke ‘mesesẽ akpa na Yehowa o.’ (1 Mose 18:14) Le ƒe ɖeka megbe esime Abraham xɔ ƒe 100 la, wodzi ŋutsuvi nɛ, eye wòna ŋkɔe be Isak. (1 Mose 17:21; 21:1-5) Mawu yɔ Isak ŋkɔ tẽe be eya dzie yayra wɔnukuwo ato ava na ameƒomea.
▪ Ƒe geɖe megbe la, Yehowa bia nu sesẽ aɖe tso Abraham si: Ebia tso esi be wòatsɔ via Isak asa vɔe, evɔ ɖekakpuia meɖe srɔ̃ alo dzi vi aɖeke hã haɖe o. * Togbɔ be ete ɖe Abraham dzi vevie be ye via aku na ye hã la, enɔ klalo be yeatsɔ ye vi Isak asa vɔe abe ale si Mawu bia tso esi ene. Abraham nyae be ŋusẽ le Yehowa si be wòafɔ Isak ɖe tsitre, ne ema wɔwɔe ana eƒe ŋugbe si wòdo la nava eme. (Hebritɔwo 11:19) Esi wòsusɔ vie ko ne Abraham natsɔ via asa vɔe la, Mawu tsoe xɔ, ale be Isak tsi agbe. Mawu kafu Abraham ɖe eƒe toɖoɖo ɖedzesi sia ta. Eye Yehowa gate gbe ɖe ŋugbe si wòdo na Abraham va yi la dzi.—1 Mose 22:1-18.
▪ Abraham nɔ agbe ƒe 175, eye wòku. Biblia gblɔ be: ‘Enɔ agbe tsi nyuie hafi ku,’ eye wògagblɔ kpee be, ‘agbenɔnɔ ɖi kɔ nɛ.’ (1 Mose 25:7, 8) Ŋugbe bubu si Mawu do nɛ be anɔ agbe atsi nyuie hafi aku le ŋutifafa me la hã va eme na Abraham.—1 Mose 15:15.
Nu Si Wògblẽ Ðe Megbe
Menye Mawu ƒe ame alo ŋutinyameme dzro aɖe si nɔ anyi le blema koe Abraham nye o. Eƒe ŋutinya gakpɔa ŋusẽ ɖe mía dzi egbea hã, eye wònye kpɔɖeŋu nyui aɖe na mí be míasrɔ̃. (Hebritɔwo 11:8-10, 17-19) Na míade ŋugble tso Abraham ƒe nɔnɔme nyui ene aɖewo ŋu kpɔ. Míadze egɔme kple eƒe nɔnɔme nyui si ɖe dzesi wu, si nye eƒe xɔse.
[Etenuŋɔŋlɔwo]
^ Woyɔa Abraham tsã be Abram, eye woyɔa srɔ̃a be Sarai. Emegbe Mawu trɔ woƒe ŋkɔwo. Eyɔ Abram be Abraham, si gɔmee nye “Dukɔ Geɖewo Fofo,” eye wòyɔ srɔ̃a Sarai be Sara, si gɔmee nye “Fianyɔnu.” (1 Mose 17:5, 15) Le nyati sia kple esiwo kplɔe ɖo me la, míayɔ wo ko be Abraham kple Sara.
^ Biblia na míenya be Mawu ƒe ŋkɔe nye Yehowa.
^ Kpɔ nyati si nye “Exlẽlawo Bia Be . . . Nu Ka Tae Mawu Bia Tso Abraham Si Be Wòatsɔ Via Asa Vɔe?” si dze le magazine sia ƒe axa 23 lia.
[Aɖaka si le axa 4]
Enye Ame Vevi Aɖe Le Biblia Me
Le Mose Ƒe Agbalẽ Gbãtɔ ƒe ta ewo gbãtɔawo me la, Biblia ƒo nu tso ame geɖe siwo ɖe xɔse fia la ƒe ŋutinyawo ŋu. Wo dometɔ aɖewoe nye Habel, Henox, kple Noa. Ke hã, le ta 15 siwo kplɔe ɖo me la, woƒo nu tso ame ɖeka aɖe koŋ ko ŋu, si nye Abraham.
Gawu la, nya vevi aɖewo dze le Biblia me zi gbãtɔ esi wonɔ nu ƒom tso Abraham ŋu. Le kpɔɖeŋu me, Abraham ƒe ŋutinya mee nya siawo dze le:
▪ wogblɔe zi gbãtɔ be Mawu nye Akpoxɔnu, alo Ametakpɔla na esubɔlawo.—1 Mose 15:1; kpɔ 5 Mose 33:29; Psalmo 115:9; Lododowo 30:5.
▪ woƒo nu zi gbãtɔ tso Mawu dzi xɔxɔ se ŋu.—1 Mose 15:6.
▪ zi gbãtɔe nye esia nya nyagblɔɖila dze.—1 Mose 20:7.
▪ woƒo nu zi gbãtɔ tso lɔlɔ̃ si le dzilawo si na wo viwo ŋu.—1 Mose 22:2.
