Nu Kae Ame Aɖewo Gblɔna Be Harmagedon Nye?

“Eye woƒo wo nu ƒu ɖe teƒe, si woyɔna le Hebrigbe me be Harmagedon.”—NYAÐEÐEFIA 16:16.

NE ÈSE nya “Harmagedon” la, nu kae vaa susu me na wò? Ðewohĩ wò susu yia afɔku gã si me nu geɖewo dome gblẽ le la dzi. Togbɔ be zi ɖeka koe nya sia dze le Biblia me hã la, nyadzɔdzɔŋlɔlawo kple subɔsubɔhakplɔlawo ƒoa nu tsoa eŋu zi geɖe.

Ðe nu si ame geɖe susuna be Harmagedon nye la wɔ ɖeka kple nu si Biblia gblɔ tso eŋua? Ŋuɖoɖoa nyanya aɖe vi na wò. Nu ka tae? Elabena Harmagedon ŋuti nyateƒea nyanya ate ŋu ana be mànɔ vɔvɔ̃m dzodzro o, ana nànɔ mɔ kpɔm na etsɔme nyui aɖe, eye akpɔ ŋusẽ ɖe ale si nèbua Mawui dzi.

De ŋugble le biabia etɔ̃ siwo gbɔna ŋu kpɔ, eye nàtsɔ nu siwo ame geɖe gblɔna tso Harmagedon ŋu la asɔ kple nu si tututu Biblia gblɔ tso eŋu.

 1. AFƆKU SI ATSO AMEGBETƆWO GBƆE HARMAGEDON NYEA?

Nyadzɔdzɔŋlɔlawo kple numekulawo zãa nya “Harmagedon” tsɔ ɖɔa afɔku siwo tsoa amegbetɔwo ƒe nuwɔnawo gbɔe la zi geɖe. Le kpɔɖeŋu me, wogblɔ tso Xexemeʋa Gbãtɔ kple Evelia ŋu be wonye Harmagedon. Le aʋa mawo wɔwɔ vɔ megbe la, ameƒomea nɔ vɔvɔ̃m be United States kple Soviet Union woatsɔ nukliaʋawɔnuwo ɖe wo nɔewo ŋu. Nyadzɔdzɔgblɔlawo gblɔ be avuwɔwɔ ma anye “nukliaʋawɔnuwo ƒe Harmagedon.” Egbea, dzɔdzɔmeŋutinunyala siwo tsi dzi be ɖiƒoƒo anyigba ana yame ƒe nɔnɔme natrɔ kpata la xlɔ̃a nu amewo tso “yame ƒe nɔnɔme ƒe Harmagedon” ŋu.

Nu si woƒe numeɖeɖea fia: Amegbetɔwo ƒe asi mee anyigba ƒe etsɔme kple nu gbagbe siwo katã le edzi la le. Ne dziɖuɖuwo meɖɔ ŋu ɖo o la, anyigba agblẽ ɖikaa.

Nu si Biblia gblɔ: Mawu maɖe mɔ na amegbetɔwo be woagblẽ anyigba keŋkeŋ o. Biblia ka ɖe edzi na mí be Yehowa * mewɔ anyigba “be wòatsi ƒuƒlu o.” Ke boŋ ɖe wòmèe “be woanɔ edzi.” (Yesaya 45:18) Mawu maɖe mɔ na amegbetɔwo be woatsrɔ̃ anyigba o, ke boŋ ahe “gbegblẽ ava ame siwo le anyigba la gblẽm la dzi.”—Nyaɖeɖefia 11:18.

2. DZƆDZƆMEFƆKUE HARMAGEDON NYEA?

Ɣeaɖewoɣi la, nyadzɔdzɔŋlɔlawo zãa nya Harmagedon na dzɔdzɔmefɔku gãwo. Le kpɔɖeŋu me, le ƒe 2010 me la, nyadzɔdzɔgbalẽ aɖe gblɔ be “‘Harmagedon’ Dzɔ Le Haiti.” Esi anyigba ʋuʋu sesĩe le dukɔ ma me, si wɔe be amewo kpe fu, nuwo dome gblẽ, eye amewo ƒe agbe tsi eme tae wogblɔ nya ma ɖo. Menye nu siwo dzɔ va yi la koe nyadzɔdzɔŋlɔlawo kple fefewɔlawo yɔna be Harmagedon o, ke wozãa nya sia na nu siwo wole vɔvɔ̃m be woava dzɔ hã. Le kpɔɖeŋu me, wozã nya “Harmagedon” tsɔ ɖɔ afɔku si wosusu be adzɔ nenye be kpe gã nyadri aɖe ge tso dziƒonutowo me va dze anyigba dzi.

Nu si woƒe numeɖeɖea fia: Harmagedon tea ŋu dzɔna le afi sia afi hewua ame sia ame ƒomevi, ame nyuiwo kple ame vɔ̃ɖiwo siaa. Ame aɖeke mate ŋu asi le enu o.

Nu si Biblia gblɔ: Harmagedon menye afɔku si ɖea ame sia ame ko ƒe agbe ɖa o. Ame vɔ̃ɖiwo koe atsrɔ̃ le Harmagedon me. Biblia do ŋugbe be “ame vɔ̃ɖi la maganɔ anyi o, eye ne èɖe ŋku ɖe eteƒe la, màgakpɔe o.”—Psalmo 37:10.

3. ÐE MAWU ATSRƆ̃ ANYIGBA LA LE HARMAGEDON MEA?

Ame siwo be yewoxɔ Mawu dzi se la dometɔ geɖe xɔe se be ʋiʋli aɖe ayi edzi le nyui kple vɔ̃ dzi delawo dome mlɔeba si me anyigba atsrɔ̃ le. Le numekuku si United States habɔbɔ aɖe (Princeton Survey Research Associates) wɔ me la, ame tsitsi siwo wobia gbee la dometɔ 40 le alafa me xɔe se be xexea awu enu le “Harmagedon-ʋa aɖe” me.

 Nu si woƒe numeɖeɖea fia: Womewɔ amegbetɔwo be woanɔ anyigba dzi tegbee o, eye womewɔ anyigba hã be wòanɔ anyi tegbee o. Ðe Mawu wɔ amegbetɔwo be wo katã woava ku mlɔeba.

Nu si Biblia gblɔ: Biblia na eme kɔ ƒãa be Mawu ɖo “anyigba gɔme anyi ɖe eƒe anyinɔwo dzi, ne magaʋã gbeɖe akpɔ o.” (Psalmo 104:5) Biblia gblɔ tso anyigbadzinɔlawo ŋu be: “Ame dzɔdzɔewo anyi anyigba la dome, eye woanɔ edzi tegbee.”—Psalmo 37:29.

Edze ƒãa be nu siwo amewo gblɔna tso Harmagedon ŋu la dometɔ geɖe mewɔ ɖeka kple Biblia tɔ o. Ekema nyateƒeae nye ka?

[Etenuŋɔŋlɔ]