Ènyaa?

Nu kae nye “ʋɔnudrɔ̃zikpui” si ŋgɔ wokplɔ apostolo Paulo yii?

▪ Le Dɔwɔwɔwo 18:12, 13 ƒe nya nu la, Yudatɔ siwo nɔ Korinto la tsò Paulo nu be eda se dzi le esi wòɖe gbeƒã ta, eye wokplɔe yi “ʋɔnudrɔ̃zikpui,” alo beʹma (Helagbe me nya si gɔmee nye “atrakpui”) la ŋgɔ. Dogbadzi nuƒolanɔƒe aɖe si wotu wòkɔ la nɔ afi si te ɖe blema Korinto dua ƒe agora, alo asia titina, eye ɖewohĩ ƒuƒoƒea hã te ɖe eŋu tututu. Afi si wòle la sɔ nyuie be ame natɔ ɖi aƒo nu na amehawo. Kpe fufu xɔasi blɔtɔ kple ɣitɔ ye wotsɔ tui. Eye wotsɔ kpetatawo ɖo atsyɔ̃ nɛ etɔxɛe. Wotu xɔ eve siwo me amewo lalana le la hã ɖe nuƒolanɔƒe sia dzi. Woɖo kpe ŋɔŋɔewo ɖe anyigba le xɔawo me, eye eme zikpuiwo nye kpe fufu xɔasiwo.

Edze abe nuƒolanɔƒe sia ŋgɔe apostolo Paulo nɔ le nutomefia Gallio ŋkume ene. Gallio nye Roma nutomegãdziɖula, si nɔ Axaya dzi ɖum. Amegãwo nɔa afi sia sea ʋɔnudrɔ̃nyawo hegblɔa woƒe afiatsotsowo na ameha siwo va ƒo ƒu ɖi.

Le Helatɔwo ƒe dugãwo me la, amehawo kpea ta zi geɖe ɖe beʹma siawo tɔgbi ŋgɔ, afi si wokpɔa dunyawo katã gbɔ le. Le Helagbe me nuŋlɔɖi siwo ku ɖe ʋɔnudɔdrɔ̃ Yesu ŋu me la, Mateo 27:19 kple Yohanes 19:13 siaa gblɔ be Pontio Pilato nɔ eƒe beʹma la esime wònɔ nu ƒom na amehaawo.—Dɔwɔwɔwo 12:21.

Nu ka tae mɔ si nu Yesu ku le la nye nukikli na Yudatɔ aɖewo?

▪ Apostolo Paulo gblɔ tso Kristotɔ gbãtɔwo ŋu be: “Míeɖea gbeƒã Kristo si wohe ɖe ati ŋu la, wònye nukikli na Yudatɔwo, gake wònye bometsinya na dukɔwo ya.” (1 Korintotɔwo 1:23) Nu ka tae ale si Yesu ku la nye nukikli na ame aɖewo?

Esi Biblia me ɖela Ben Witherington III nɔ nu ƒom tso mɔ si nu Yesu ku le kpakple ale si Titina Ɣedzeƒetɔ siwo nɔ anyi le ƒe alafa gbãtɔ me wɔa nui ŋu la, egblɔ be wobui be “enye gbɔɖiku si vloe wu ɖe sia ɖe le ɣemaɣi.” Womebui kura be enye xɔsetaku si ŋu bubu le o. Witherington gblɔ kpee be: “Ame siwo nɔ anyi ɣemaɣi la xɔe se be ku si tɔgbi ame ku la ɖea ame si ƒomevi wònye fiana. Eya ta wobu Yesu ame tovoe, be edze aglã ɖe dziɖuɖu ŋu, eye wònye ame si dze na to si wohena na kluvi dzeaglãwo.” Esi Yudatɔwo doa vlo ame si woklã ɖe ati ŋu ta la, edze ƒãa be nukpɔsusu si nye be, Kristotɔ gbãtɔwo kpa nyawo ŋlɔ tso Yesu ƒe ku kple tsitretsitsi ŋu la, mele eteƒe o.