Ðe Yesu De Nu Dunyahehe Mea?

NYA Nyui Gbalẽ ŋlɔlawo ƒo nu tso mɔnukpɔkpɔ vovovo aɖewo siwo su Yesu si be wòade nu dunya me le eƒe subɔsubɔdɔa wɔɣi la ŋu. Le kpɔɖeŋu me, esime Yesu xɔ abe ƒe 30 ene, si nye ɣeyiɣi kpui aɖe le eƒe nyɔnyrɔxɔxɔ megbe la, Abosam na mɔnukpɔkpɔe be wòanye xexea dzi ɖula. Emegbe le eƒe subɔsubɔdɔa wɔɣi la, ameha aɖe di be yewoaɖoe yewoƒe fia. Ema megbe la, ame aɖewo te kpɔ be yewoana wòazu dunyahela. Aleke Yesu wɔ nui? Na míadzro nudzɔdzɔ siawo me kpɔ.

Xexea dzi ɖula. Nya Nyui Gbalẽawo gblɔ be Abosam gblɔ be yeatsɔ “xexea me fiaɖuƒewo katã” ana Yesu ne wòanye wo dzi ɖula. Bu gbɔdzɔe si gbegbe ameƒomea akpɔ tso woƒe fukpekpewo me ne ɖe Yesue nye xexea dzi ɖula la ŋu kpɔ! Ðe ame aɖe si ka ɖe edzi be dunyahehe ɖea vi, eye wòtsɔ ɖe le ameƒomea ƒe nyonyo me vevie la agbe mɔnukpɔkpɔ sia xɔxɔa? Gake Yesu gbe.—Mateo 4:8-11.

Fia. Nɔnɔme sesẽ siwo me tom Yesu ŋɔlimetɔwo nɔ la na wodi vevie be dziɖula si akpɔ yewoƒe ganyawo kple dunyahehe me kuxiwo gbɔ la nanɔ yewo si. Esi ŋutete siwo nɔ Yesu si la wɔ dɔ ɖe wo dzi ta la, wodi be wòade nu dunya me. Aleke Yesu wɔ nui? Nya Nyui Gbalẽ ŋlɔla Yohanes gblɔ be: “Esi Yesu nya be wole vava ge, eye woalé ye sesẽe aɖo fiae la, eɖe eɖokui ɖe aga yi to la dzi.” (Yohanes 6:10-15) Eme kɔ ƒãa be Yesu gbe be yemade nu dunyahehe me o.

Dunyahela. De dzesi nu si dzɔ ŋkeke ʋɛ aɖewo do ŋgɔ na Yesu ƒe ku. Farisitɔwo ƒe nusrɔ̃lawo, siwo di be yewoavo tso Roma Fiaɖuƒea te nɔnɔ me, kpakple Herodestɔwo, si nye dunyaheha aɖe si de Roma dzi me tɔwo la, te ɖe Yesu ŋu. Wodi be yewoaƒoe ɖe Yesu nu wòade akpa aɖe dzi le dunyahehe me. Wobiae be ɖe wòle be Yudatɔwo naxe adzɔ na Roma hã.

Marko ƒe nuŋlɔɖia gblɔ be Yesu ɖo eŋu na wo be: “‘Nu ka tae miele teyem kpɔ? Mitsɔ denario ɖeka vae nam makpɔ.’ Wotsɔ ɖeka vae. Eye wògblɔ na wo be: ‘Ame ka ƒe nɔnɔmetata  kple nuŋɔŋlɔ ye nye esia?’ Wogblɔ nɛ be: ‘Kaisaro tɔe.’ Eya ta Yesu gblɔ be: ‘Mitsɔ nu siwo nye Kaisaro tɔ la na Kaisaro, gake nu siwo nye Mawu tɔ la, na Mawu.’” (Marko 12:13-17) Esi agbalẽ aɖe (Church and State—The Story of Two Kingdoms) nɔ susu si tae Yesu ɖo eŋu na wo alea me ɖem la, egblɔ be: “Melɔ̃ be yeanye ɖela to dunyaheɖoɖowo dzi o, eye wòna akpa si Kaisaro le kpakple akpa si Mawu le la dze kɔtɛ.”

Kuxi siwo me tom amewo nɔ, abe ahedada, nu fitifiti wɔwɔ, kple madzɔmadzɔnyenye ene, te ɖe Kristo dzi. Le nyateƒe me la, Biblia ɖee fia be nɔnɔme wɔnublanui si me eŋɔlimetɔwo nɔ la wɔ dɔ ɖe edzi ŋutɔ. (Marko 6:33, 34) Ke hã, Yesu meɖe afɔ be yeatsɔ aɖe madzɔmadzɔnyenye ɖa le xexea me o, togbɔ be ame aɖewo dze agbagba vevie be yewoana wòaƒo eɖokui ɖe eŋɔlimetɔwo ƒe nyaʋiʋliwo me hã.

Eme kɔ ƒãa be, abe ale si kpɔɖeŋu siawo ɖee fia ene la, Yesu gbe eɖokui ƒoƒo ɖe dunyahehe me. Ke Kristotɔ siwo li egbea ya ɖe? Aleke wòle be woawɔ nui?