Ale Si Agbea Nɔ Le Biblia Ƒe Ɣeyiɣiwo Me​—Agbledela La

“[Yesu gblɔ] na eƒe nusrɔ̃lawo be: ‘Nyateƒee, nuŋeŋe la sɔ gbɔ, gake dɔwɔlawo ya mesɔ gbɔ o. Eya ta miɖe kuku na nuŋeŋe ƒe Aƒetɔ la be, wòaɖo dɔwɔlawo ɖe eƒe nuŋeŋe la me.’”—MATEO 9:37, 38.

YESU tsɔ agbledemɔnuwo kple agbledenuwo wɔ kpɔɖeŋui zi geɖe esime wònɔ nya veviwo me ɖem. (Mateo 11:28-30; Marko 4:3-9; Luka 13:6-9) Nu ka tae? Elabena ame siwo dome wònɔ la nya nu tso agbledede ŋu nyuie. Eƒe nyaselawo dometɔ geɖe nɔ agbledemɔnu siwo wo tɔgbiwo zã ƒe alafa geɖewoe nye ema la ŋu dɔ wɔm. Eya ta wose eƒe nufiafia siwo me wòƒo nu tso woƒe gbe sia gbe dɔwo ŋu le la gɔme. Yesu nya ale si wonɔa agbee, si wɔe be eƒe nufiafiawo ʋã wo.—Mateo 7:28.

Ne míesrɔ̃ nu tso ƒe alafa gbãtɔ me agbledelawo ŋu vie, le kpɔɖeŋu me, nuku siwo woƒã, agbledenu siwo wozã kple kuxi siwo wodo goe la, míase Yesu ƒe kpɔɖeŋuwo kple Biblia me nuŋlɔɖi bubuwo gɔme nyuie wu.

Esi nèle nua xlẽm la, kpɔe ɖaa le susu me be agbledelaa le dɔ dzi. Xlẽ mawunyakpukpuiawo, eye nàkpɔ nu siwo nàsrɔ̃ tso wo me la ɖa.

Nuƒãɣi

Agbledelaa fɔ ŋdi kanya heva tɔ ɖe eƒe xɔmɔnu, eye wòtsɔ asi ɖo ŋgonu le ɣea ƒe keklẽ ta, ale ŋdiya fafɛ la ƒo ɖee. Tsidzadza na anyigba si ŋdɔ ɖu wòƒu kplakplakpla la bɔbɔ. Anyigba dzoboɣi ɖo azɔ. Etsɔ anyigbadzobonu wodzoe si wotsɔ ati wɔ la ɖo abɔta heɖo ta eƒe agble me.

 Le agblea me la, etsɔ kɔkuti ɖo eƒe nyiawo dzi hetsɔ nutɔnu tɔ wo be woadze dɔ gɔme. Esi lãawo le anyigbadzobonua hem la, ga si le enu la ɖea do ɖe kpenyigba la dzi ɖe fli me (1). Sẽ kple sẽ la, agbledelaa zɔa ɖusikpa dzi agazɔ miakpa dzi esime wòle agbagba dzem be yeadzobo anyigba ɖe fli dzɔdzɔe dzi—mekpɔa megbe gbeɖe o, ale be fliawo nagaglɔ̃ o. (Luka 9:62) Mele be wòagbɔ eƒe agblea ƒe liƒowo ŋu o, eye ele be wòawɔ eƒe anyigba sue la ŋu dɔ nyuie.

Esi wòdzra anyigba ɖo alea vɔ la, nuƒãɣi ɖo azɔ. Agbledelaa lé akplo si me ƒo le la ɖe asi, eye wòtsɔ asi kemɛa le nuku xɔasi mawo wum ɖe agblea dzi (2). Afɔmɔwo to eƒe agblea me, si wɔe be anyigba ƒe akpa mawo sesẽ, eya ta ele be wòaɖɔ ŋu ɖo be nukuawo nadze “anyigba nyui dzi.”—Luka 8:5, 8.

Esi wòwu nukuawo vɔ la, ɣeyiɣia de azɔ be wòaxe ke ɖe wo dzi. Agbledelaa tsi atilɔ siwo ŋu ŋuwo le la ɖe nyiawo ƒe kɔkuti ŋu bene woahe ato agblea dzi. Xewo ƒe xɔxlɔ̃ le ɖiɖim esime wova ƒo zi ɖi hele nukuawo fɔm le mimim hafi wòaxe ke ɖe wo dzi. Emegbe agbledelaa tsɔ dziga (3) dzobo anyigba, eye wòho gbe wuwlui siwo ate ŋu avu atsyɔ nuku fẽawo be woagatsi o la.—Mateo 13:7.

Nuxaɣi

Ɣletiwo va yi, eye tsi hã dza. Ƒo siwo ƒu hena ŋeŋe azɔ la ƒe ta ɣiawo le ya ƒom le ŋdɔkutsugbe.—Yohanes 4:35.

Dɔ geɖe nɔa agbledelaa kple eƒe ƒomea dzi le nuxaɣi. Nuxalaa tsɔa eƒe miasi léa ƒoa, eye wòtsɔa hɛ gobɛ si le eƒe nuɖusi la sinɛ (4). Ame bubuwo lɔa nukuawo heblaa wo tatata (5), eye wotsɔnɛ doa agba na tedziwo alo wodea wo (6) agbatsɔkeke me bene woatsɔ ayi lugbɔƒe si le kɔƒea me.

Ɣe ɖo ta azɔ, si na wòdze abe do ɣi aɖee le dziŋgɔli blɔa me ene. Ƒomea dzudzɔ sẽ le gboti aɖe ƒe vɔvɔli te. Wole dze ɖom le nu kom esime wole abolo, nuku tɔtɔe, amititsetse, gbotsetse ƒuƒu, kple waintsetseƒuƒubolo ɖum. Esi wowɔ vɔ la, woku tsi le vudo me no ɖe edzi glugluglu.—5 Mose 8:7.

 Ame aɖewo le nuku siwo susɔ ɖe agble si te ɖe wo ŋu dzi la fɔm (7), le esi woda ahe, eye anyigba mele wo si o ta.—5 Mose 24:19-21.

Emegbe agbledelaa kaka lu bablaawo ɖe kpo dzi le kɔƒea ƒe lugbɔƒea. Azɔ etsɔ luƒotasiaɖam zɔ edzi zi gbɔ zi geɖe (8). (5 Mose 25:4) Kpe ɖaɖɛ kple gavi siwo le luƒotasiaɖama te la tugua ƒoa.

Agbledelaa lala ɣetrɔya fafɛ la. (Rut 3:2) Le ɣetrɔme la, etsɔ atigaflo, alo “lugbɔnu” (9), de ƒoa te hele edam ɖe ya me. (Mateo 3:12) Esi ƒoa le kpekpem wu ta la, ekɔna ɖe anyigba, ke ya ƒoa atsaa ya dzonae. Enɔ esia wɔwɔ dzi va se ɖe esime wògbɔ ƒoa katã vɔ.

Le ŋufɔke la, agbledelaa srɔ̃ kple vianyɔnuwo dze ƒoa tsatsra gɔme (10). Wokɔa ƒo si tsaka kple kpekuiwo la ɖe tsranuiwo dzi hetsranɛ. Ƒoa kɔna ɖe kusiwo me, ke wotsɔa kpekuiawo ƒua gbe. Woxa nuku geɖe. Dɔwɔlawo dzra nukua ƒe ɖewo ɖe zewo me (11). Ke woadzra susɔea ɖo ɖe zɔ siwo woɖi ɖe to me la me.

Agbledelaa tsi tre ɖe lugbɔƒea, edè eƒe lãmekawo me le ɖeɖiteameŋu ta, eye wòtsa ŋku godoo kpɔ agble siwo ƒo xlã kɔƒea. Esi wòkpɔ ale si ahɔ̃litiwo susɔ ɖe agbleawo dzi, si ɖe dɔ sesẽ si gbegbe wowɔ le ŋkeke siwo va yi me fia la, eƒe dzi dze eme. Ekpɔ dɔwɔlawo wole woƒe waintiwo ŋu ɖem hele amiti, yevuboɖa kple gboti gblewo me ŋlɔm. Eƒe aƒelika aɖe si le abɔ me ŋlɔm le afi si te ɖe eŋu la ʋuʋu asi nɛ. Ado aŋanyi, atiyi, ayi kple sabala ƒomevi vovovowo ɖe eme. Agbledelaa tɔ ɖi sẽ hewu mo dzi kpɔ dziƒo, eye wòdo gbe kpui aɖe ɖa tso dzi me da akpe na Mawu ɖe nunana nyui siwo wònana la ta.—Psalmo 65:10-12.

[Nɔnɔmetata siwo le axa 28-30]

(Kpɔ agbalẽa ŋutɔ)