Aleke Nàwɔ Be Etsɔme Nanyo Na Wò?

MƆ KA dzie nàto ana etsɔme nyui nasu asiwò? Mɔ ɖekae nye be nàwɔ ŋutete tɔxɛ si le asiwò be nàbu nyametsotso siwo nèwɔna fifia me tsonuwo ŋu la ŋu dɔ.

Nyateƒee wònye be ate ŋu asesẽ na wò be nàwɔ nyametsotso siwo aɖe vi na wò le wò agbemeŋkekewo katã me. Nu ka tae? Elabena ame siwo dome míele la dometɔ geɖe dina be nu si yewodi la nasu yewo si enumake. Ðewohĩ ànya de dzesii be Biblia me mɔfiamewo dzi wɔwɔ ate ŋu ana wò ƒomea nali ke nyuie. (Efesotɔwo 5:22–6:4) Gake be esia nanya wɔ la, ehiã be nànɔ vovo kpɔm ɖe wò ƒomea ŋu edziedzi, eye nàɖɔ ŋu ɖo be nàgaƒo ɖokuiwò ɖe dɔwɔɖui, dzidzɔdonamenuwo, alo modzakaɖeɖe me atraɖii o. Abe ale si wòle le nu bubuwo hã gome ene la, ele be nàtiae nenye be yeati ɣeyiɣi kpui aɖe ƒe dzidzɔkpɔkpɔ yome loo alo nàwɔ nu si ana etsɔme nanyo na wò. Nu kae akpe ɖe ŋuwò nàwɔ tiatia nyuitɔ? Ðe afɔ ene esiawo.

1 Bu Wò Nyametsotsowo Me Tsonuwo Ŋu

Ne ehiã be nàtso nya me le nya aɖe ŋu la, dze agbagba nàbu nu siwo ate ŋu ado tso eme la ŋu anukwaretɔe. Biblia gblɔ be: “Nunyala kpɔa dzɔgbevɔ̃e, eye wòɣlaa eɖokui.” (Lododowo 22:3) Ne èbu emetsonuwo ŋu anukwaretɔe la, esia ate ŋu aʋã wò nàƒo asa na nu siwo agblẽ nu le ŋuwò la wɔwɔ. Azɔ hã, ne èbu etsɔmeviɖe siwo ado tso nyametsotso nyuiwo wɔwɔ me ŋu la, esia ate ŋu ade dzi ƒo na wò be nàɖe afɔ nyuitɔ.

Bia ɖokuiwò be: ‘Nu kae ava nye emetsonua le ƒe ɖeka, alo ƒe 10 alo ƒe 20 gɔ̃ hã megbe? Ŋusẽ kae wòava kpɔ ɖe nye lãmesẽ alo seselelãme dzi? Aleke nuwo ava nɔ na nye ƒomea kple nye ame lɔlɔ̃ bubuwo le tiatia si mewɔ la ta?’ Vevietɔ wue nye: ‘Ðe ale si metso nya mee la dze Mawu ŋua? Aleke wòana mía kple Mawu dome nava nɔ?’ Esi wònye Mawu ƒe gbɔgbɔe ʋã amewo woŋlɔ Biblia ta la, ate ŋu akpe ɖe ŋuwò nànya nu siwo dzea Mawu ŋu, eye wòana nànɔ ŋudzɔ ɖe nu siwo ate ŋu agblẽ nu le ŋuwò hafi la ŋu.—Lododowo 14:12; 2 Timoteo 3:16.

2 Wò Ŋutɔ Dae Kpɔ Hafi Nàtso Nya Me

Ame geɖe nɔa ha yome le esi teƒe be woatso nya me le wo ɖokui si. Ke hã, ne ame akpa gãtɔ nɔa agbe ƒomevi aɖe la, esia mefia kokoko be agbe ma nɔnɔ ana eme nanyo na wò o. Wò ŋutɔ dae kpɔ hafi nàtso nya me. Bu Natalie * ƒe nuteƒekpɔkpɔa ŋu kpɔ. Egblɔ be: “Medi be atsuƒe nanyo nam. Gake mede dzesii be ale si menɔ agbea nɔmee la mana esia nava eme o. Esi menɔ yunivɛsiti la, xɔ̃nyewo katã nye sɔhɛ tagbɔɖaɖɛtɔwo. Ke hã, nyametsotso gbegblẽwoe wowɔna zi geɖe le agbe me. Woɖɔa li ahiãviwo edziedzi. Ahiãvi vovovowo nɔ nye hã asinye kpɔ. Agbenɔnɔ alea na meto vevesese geɖe me.”

Yehowa Ðasefowo va nɔ Biblia srɔ̃m kple Natalie. Natalie gblɔ be: “Mekpɔ sɔhɛ kpɔdzidzɔwo kple ame siwo ƒe srɔ̃ɖeɖewo li ke la le wo dome. Vivivi la, mewɔ tɔtrɔwo heɖe  asi le nye agbenɔnɔ tsãtɔ ŋu, togbɔ be menɔ bɔbɔe nam o hã.” Nu kae do tso eme? Egblɔ be: “Tso ɣeaɖeɣi ke la, medi be maɖe ame aɖe si malɔ̃ vevie. Emegbe meva ɖe haxɔsetɔ aɖe. Mese le ɖokuinye me be Mawu na nye ƒomegbenɔnɔa nyo wu ale si nye ŋutɔ mesusui be ava nɔ gɔ̃ hã.”

3 Minyà Etsɔme Mavɔ

Be wò susu naganɔ fifi nuwo ɖeɖe ko ŋu o la, ele be ale si nèdi be etsɔme nanɔ na wò la nanɔ susu me na wò nyuie, eye nàbu ale si nàwɔ wòava eme na wò la ŋu. (Lododowo 21:5) Mègana wò susu nanɔ ƒe 70 alo ƒe 80 si nye amegbetɔwo ƒe agbenɔƒewo la ko ŋu o. Ke boŋ, kpɔe ɖaa le susu me be agbe tegbee nɔnɔ si ŋu Biblia ƒo nu tsoe la va eme na wò hã.

Biblia gblɔ be Mawu to Kristo Yesu ƒe tafevɔsaa dzi ʋu agbe tegbee nɔnɔ ƒe mɔnu ɖi na amegbetɔwo. (Mateo 20:28; Romatɔwo 6:23) Mawu do ŋugbe be eteƒe madidi o, ale si yeɖoe be nuwo nanɔ na ameƒomea kpakple anyigba la ava eme. Mɔnukpɔkpɔ asu ame siwo lɔ̃ Mawu la si be woanɔ agbe tegbee le anyigba si dzi wodzra ɖo nyuie la dzi. (Psalmo 37:11; Nyaɖeɖefia 21:3-5) Àte ŋu anɔ agbe le xexe yeye ma me ne èminyà etsɔme mavɔ.

4 Ðe Afɔ Be Nàɖo Wò Taɖodzinuwo Gbɔ

Nu kae nàwɔ be etsɔme ma si ŋugbe wodo la nava eme na wò? Gbã la, srɔ̃ nu tso Mawu ŋu. (Yohanes 17:3) Biblia ŋuti sidzedze vavãtɔ ana nàka ɖe edzi be ŋugbe si Biblia do ku ɖe míaƒe etsɔme ŋu la ava eme. Xɔse sia aʋã wò nàwɔ tɔtrɔ ɖe sia ɖe si hiã, be wò nu nadze Mawu ŋu.

Bu Michael ƒe nuteƒekpɔkpɔa ŋu kpɔ. Egblɔ be: “Medze aha tsu nono kple atike vɔ̃ɖi zazã gɔme tso esime mexɔ ƒe 12. Menye gbevuha aɖe me tɔ, eye nyemenɔ mɔ kpɔm be maxɔ ƒe 30 hafi aku o. Dziku kple mɔkpɔkpɔbuɖeame wɔe be metee kpɔ zi geɖe be mawu ɖokuinye. Menɔ mɔ kpɔm be agbea ava nyo wu, gake gbeɖegbeɖea koe.” Esi Michael nɔ suku la, Yehowa Ðasefowo va nɔ nu srɔ̃m kple gbevuha si me wònɔ la me tɔ ɖeka. Michael hã lɔ̃ be woasrɔ̃ nu kpli ye.

Nu si Michael srɔ̃ tso Biblia me la na eƒe susu le etsɔme ŋu trɔ. Egblɔ be: “Mesrɔ̃e be le etsɔme la, woadzra anyigba ɖo wòanye paradiso si me amewo anɔ agbe le ŋutifafa me, eye womatsi dzimaɖi le naneke ŋu o. Nye hã meva nɔ mɔ kpɔm na etsɔme sia. Meva ɖoe nye taɖodzinu be xɔlɔ̃wɔwɔ nanɔ mía kple Yehowa dome. Gake menye ɣesiaɣie nuwo zɔ nyuie o. Esime menɔ Biblia srɔ̃m gɔ̃ hã la, memu aha ɣeaɖewoɣi. Eye mede asi nyɔnuvi aɖe ŋu hã.”

Aleke Michael wɔ ɖu kplamatsɛdonuwo dzi hetrɔ eƒe agbenɔnɔ? Egblɔ be: “Ame si nɔ Biblia srɔ̃m kplim la de dzi ƒo nam be manɔ Biblia xlẽm gbe sia gbe ahanɔ ha dem kple ame siwo hã di be yewoadze Mawu ŋu. Mede dzesii be ame siwo mía kpli wo míenɔ gbevuhaa me la ganɔ ŋusẽ kpɔm ɖe dzinye. Togbɔ be wonɔ nam abe ƒometɔwo ene hã la, medzudzɔ hadede kpli wo.”

Taɖodzinu siwo gbɔ ɖoɖo mesesẽ o nɔ Michael si, eye esiawo kpe ɖe eŋu wòɖo eƒe taɖodzinu gãtɔ si nye be yeanɔ agbe si wɔ ɖeka kple Mawu ƒe lɔlɔ̃nu la gbɔ. Wò hã àte ŋu awɔe nenema. Ŋlɔ wò taɖodzinu siwo gbɔ ɖoɖo axɔ ɣeyiɣi la kpakple afɔ siwo nàɖe be nàɖo wo gbɔ la ɖi. Na ame siwo ate ŋu akpe ɖe ŋuwò la nanya nu tso wò taɖodzinuwo ŋu, eye nàgblɔ na wo be woalé ŋku ɖe ale si nèle ŋgɔyiyi wɔmee ŋu.

Mègahe nusɔsrɔ̃ tso Mawu ŋu kple eƒe mɔfiamewo dzi wɔwɔ ɖe megbe o. Ðe afɔ siwo ana wò lɔlɔ̃ na Mawu kpakple eƒe Nya, Biblia, nade to la fifia. Mawu ƒe Nya la gblɔ tso ame si wɔa Biblia ƒe mɔfiamewo dzi la ŋu be: “Nu sia nu si wòwɔna la, ewɔnɛ wua nu nyuie!”—Psalmo 1:1-3.

[Etenuŋɔŋlɔ]