Nyati sia dzro nyabiase siwo nànya nɔ ŋuɖoɖo dim na la me, eye afia wò afi si nàkpɔ ŋuɖoɖoawo le le wò Biblia me. Adzɔ dzi na Yehowa Ðasefowo be yewoadzro nyabiase siawo ƒe ŋuɖoɖowo me kpli wò.

1. Nu ka tae Mawu tsɔ ŋkɔ na eɖokui?

Ðikeke mele eme o be àdi be amewo nayɔ wò ŋkɔ ŋutɔŋutɔ tsɔ wu be woanɔ dzesideŋkɔwo abe “ŋutsu,” “aƒetɔ,” “aƒenɔ,” alo “nyɔnu” ene yɔm na wò. Ŋkɔ dea vovo mia kple ame bubuwo dome. Dzesideŋkɔ siwo woyɔna na Mawu la dometɔ aɖewoe nye “Aƒetɔ Dziɖulagã,” “Mawu Ŋusẽkatãtɔ,” kple “Wɔwòla Gã.” (1 Mose 15:2; 17:1; Nyagblɔla 12:1, NW) Gake egatsɔ ŋkɔ si akpe ɖe mía ŋu míanɔ ƒomedodo kplikplikpli me kplii la na eɖokui. Le Eʋegbe me la, Mawu ƒe ŋkɔ ŋutɔŋutɔe nye Yehowa.​—Xlẽ Yesaya 42:8.

Togbɔ be Biblia gɔmeɖela geɖewo tsɔ dzesideŋkɔwo abe “Mawu” alo “Aƒetɔ” ene ɖɔ li Mawu ƒe ŋkɔa hã la, ŋkɔ ma dze zi 7,000 kloe le Biblia ƒe blema Hebri asinuŋɔŋlɔawo me. Eme kɔ ƒãa be, Mawu di be woanya yeƒe ŋkɔ.​—Xlẽ Yesaya 12:4.

2. Nu ka tae Mawu ƒe ŋkɔ nyanya le vevie?

Mawu ƒe ŋkɔa nyanya nyuie bia nu geɖe wu ale si woayɔe nyanya ko. Be míanya Mawu ƒe ŋkɔa fia be míanɔ ƒomedodo kplikplikpli me kplii. Ŋkɔ Yehowa gɔmee nye “Enana Wòvaa Eme.” Enye kakaɖedzinana be Mawu awɔ nu sia nu si hiã be eƒe tameɖoɖo nava eme. Eya ta Mawu ƒe ŋkɔ nyanya nyuie fia be míaxɔe ase be Mawu ana eƒe ŋugbedodowo nava eme. (Psalmo 9:11) Xɔse si le ame siwo nya Mawu ƒe ŋkɔa hezãnɛ si la ʋãa wo woɖoa dzi ɖe eŋu henana wòxɔa nɔƒe gbãtɔ le woƒe agbe me. Yehowa Mawu kpɔa ame siawo ƒomevi ta.​—Xlẽ Psalmo 91:14.

  3. Nu ka tae Mawu di be woanya yeƒe ŋkɔ?

Mawu di be amewo nanya yeƒe ŋkɔa nyuie, elabena esia ɖea vi na wo. Enana wozua Mawu xɔlɔ̃wo, eye mɔkpɔkpɔ sua wo si be woanɔ agbe tegbee. Eya ta mewɔ nuku o be Yehowa di be míana amewo nanya yeƒe ŋkɔ!​—Xlẽ Yohanes 17:3; Romatɔwo 10:13, 14.

Yesu na amewo nya Mawu ƒe ŋkɔ to ale si wòfia nu wo tso Mawu ƒe mɔwo, sewo kple ŋugbedodowo ŋu me. Egbea hã, Yesu yomedzelawo le Mawu ƒe ŋkɔa fiafia amewo le dukɔwo katã me ƒe dɔa dzi. Wole esia wɔm abe dukɔ wɔɖeka ene, “hena [Mawu ƒe] ŋkɔ la.”​—Xlẽ Dɔwɔwɔwo 15:14; Yohanes 17:26.

4. Aleke Mawu akɔ eƒe ŋkɔa ŋui?

Yehowa Mawu di be yeakɔ yeƒe ŋkɔa ŋu elabena wodo vlo ŋkɔa. Le kpɔɖeŋu me, ame aɖewo gblɔna be menye eyae wɔ nu gbagbewo o, eye le ema ta mehiã be yewoaɖo toe o. Ame bubuwo hã gblɔna be metsɔ ɖeke le eme na mí o, eye eya gbɔe míaƒe fukpekpewo tso. Ame siawo doa vlo Mawu ƒe ŋkɔ. Gake womanɔ esia wɔwɔ dzi ɖaa o. Mawu atu nu kple ame siwo le vlo dom eƒe ŋkɔa.​—Xlẽ Psalmo 83:18, 19.

Yehowa akɔ eƒe ŋkɔa ŋu ne eƒe Fiaɖuƒea ɖe amegbetɔ ƒe dziɖuɖuwo katã ɖa, eye wòahe ŋutifafa kple dedienɔnɔ vae na ameƒomea. (Daniel 2:44) Eteƒe madidi o, ame sia ame ava de dzesii be Yehowae nye Mawu vavã la.​—Xlẽ Xezekiel 36:23; Mateo 6:9.

Ekema nu kae wòle be nàwɔ? Te ɖe Mawu ŋu to eƒe Nyaa sɔsrɔ̃, kpakple hadede kple ame siwo lɔ̃nɛ dzi. Ne Yehowa kɔ eƒe ŋkɔa ŋu la, aɖo ŋku esubɔla wɔnuteƒewo katã dzi.​—Maleaxi 3:16.

Ne èdi be yeasrɔ̃ nu geɖe wu tso nya sia ŋu la, kpɔ agbalẽ sia, si nye Nuka Tututue Nye Biblia ƒe Nufiafia? ƒe ta 1 lia. Yehowa Ðasefowoe tae.

[Nɔnɔmetata si le axa 16]

Ale si woŋlɔ Mawu ƒe ŋkɔae le blema Hebri asinuŋɔŋlɔgbalẽ aɖe me