NU KAE Yehowa di tso ame siwo di be yewoƒe tadedeagu nadze eŋu la si? Ðe wòbia blibodede tso mía si, si awɔe be mí ame madeblibowo míate ŋu adze eŋu gbeɖe oa? Alo nu si anya wɔ na mí la koe wòdina tso mía sia? Hafi míate ŋu akpɔ dzidzɔ le Mawu subɔsubɔ me la, ele be míakpɔ ŋuɖoɖo na biabia mawo. Na míadzro nu si nyagblɔɖila Mixa gblɔ tso nu si Mawu di tso mía si ŋu la me kpɔ kpuie.—Xlẽ Mixa 6:8.

“Egblɔ nu si nyo la na wò.” Mehiã be míawo ŋutɔwo míasusu nane agblɔ tso nu si Mawu di tso mía si ŋu o. Ena nu siwo wòdi tso mía si la me kɔ nyuie na mí le Biblia me. Nu siwo Mawu di tso mía si la “nyo.” Mawu mate ŋu adi nu si menyo o la mía si gbeɖe o. “Mawu nye lɔlɔ̃,” eya ta míaƒe nyui koe wòdina. (1 Yohanes 4:8; 5:3) Ne míewɔ eƒe didiwo dzi la, menye ɖeko wòdzea eŋu ko o, ke eɖea vi na míawo ŋutɔwo hã.—5 Mose 10:12, 13.

“Nu si ko dim Yehowa le tso asiwò.” Ðe Mawu tɔ dzɔ be wòadi nane tso mía sia? Ɛ̃, etɔ dzɔ! Esi Mawu nye Agbedzɔƒe kple Ame si léa míaƒe agbe ɖe te ta la, edze be míaɖo toe. (Psalmo 36:10) Ke nu kae wòdi tso mía si? Mixa ƒo nu tso Mawu ƒe nudidiwo ŋu kpuie le nyagbe etɔ̃ me. Nyagbe eve gbãtɔwo ku ɖe ale si míawɔ nu ɖe mía havi amegbetɔwo ŋu, eye etɔ̃lia ku ɖe mía kple Mawu dome ƒomedodo ŋu.

“Nàwɔ nu si le eteƒe.” Numekugbalẽ aɖe gblɔ be Hebrigbe me nya si gɔme woɖe be “nu si le eteƒe” la fia be “ame ƒe nuwɔwɔ ɖe ehavi ŋu nasɔ, eye wòadzɔ.” Mawu di tso mía si be ale si míewɔa nu ɖe amewo ŋui la nadzɔ, eye wòasɔ ɖe eƒe dzidzenuwo nu. Nu si le eteƒe wɔwɔ bia be míagakpɔ ame ŋkume o, míawɔ nu dzɔdzɔe, eye míaɖi anukware na mía havi. (3 Mose 19:15; Yesaya 1:17; Hebritɔwo 13:18) Ne míewɔa nuteƒe na amewo la, ate ŋu aʋã woawo hã be woawɔ nuteƒe na mí.—Mateo 7:12.

“Nàlɔ̃ dɔmenyowɔwɔ.” Mawu bia tso mía si be míalɔ̃ dɔmenyowɔwɔ, ke menye be míaɖee afia ko o. Hebrigbe me nya si gɔme woɖe be “dɔmenyowɔwɔ” (cheʹsedh) la ate ŋu afia “lɔlɔ̃ si nu metsina o” alo “amenuveve.” Biblia-nyala aɖe gblɔ be: “Nya [cheʹsedh] gɔme ɖeɖe be lɔlɔ̃, nublanuikpɔkpɔ alo dɔmenyonyo mesɔ tututu o; nɔnɔme nyui etɔ̃ siawo katã ŋue wòku ɖo, ke menye wo dometɔ ɖeka ko o.” Ne míelɔ̃a dɔmenyowɔwɔ la, míalɔ̃ faa aɖee afia, eye adzɔ dzi na mí be míakpe ɖe amewo ŋu. Esia wɔwɔ ana be dzidzɔ si dona tsoa nunana amewo me la nasu mía si.—Dɔwɔwɔwo 20:35.

“Nàbɔbɔ ɖokuiwò ɖe anyi ahazɔ le wò Mawu ŋku me.” Le Biblia me la, nya “woazɔ” fia “nuwɔwɔ ɖe mɔ aɖe nu.” Ne míenɔa agbe ɖe Mawu ƒe mɔfiame siwo le Biblia me nu la, ekema míele zɔzɔm kplii. Ele be ‘míabɔbɔ mía ɖokuiwo ɖe anyi’ hafi ate ŋu awɔ esia. Aleke míawɔ esiae? Ne míebɔbɔ mía ɖokui le Mawu ŋkume la, míalɔ̃ ɖe edzi anukwaretɔe be míebɔbɔ ɖe eyama te. Eya ta be ‘míabɔbɔ mía ɖokui ɖe anyi’ fia be míaka ɖe edzi be nu si wòdi tso mía si la le eteƒe, eye míade dzesi afi si míaƒe ŋutete se ɖo le eƒe nudidiwo dzi wɔwɔ me.

Dzidzɔtɔe la, Yehowa medi nu si gbɔ míaƒe ŋutete ŋu la tso mía si o. Ekpɔa ŋudzedze ɖe ale si míewɔa míaƒe ŋutete katã be míasubɔe la ŋu. (Kolosetɔwo 3:23) Enya afi si míaƒe ŋutete se ɖo. (Psalmo 103:14) Ne míawo hã míebɔbɔ mía ɖokui hede dzesi afi si míaƒe ŋutete se ɖo la, míakpɔ dzidzɔ esime míele zɔzɔm kplii. Ðe manyo ŋutɔ be nàsrɔ̃ nu tso ale si nàzɔ kple Mawu ŋu oa? Esia ahe yayra geɖe vɛ na wò.—Lododowo 10:22.