Wodzi Vahan le Armenia le April 1983 me. Le ƒe 1996 me la, Yehowa Ðasefowo va nɔ Biblia srɔ̃m kple eya kple eƒe ƒometɔ bubuwo, eye wòxɔ nyɔnyrɔ esime wòxɔ ƒe 16. Le nu siwo Vahan srɔ̃ le Biblia me ta la, ebua Yesu Kristo ƒe nufiafiawo nya veviwoe, eye eɖoe kplikpaa be yeawɔ ɖe nya si Yesu gblɔ na eyomedzelawo be woagatsɔ aʋawɔnuwo o la dzi. (Mateo 26:52) Eya ta ɣeyiɣi kpui aɖe le Vahan ƒe nyɔnyrɔxɔxɔ megbe la, nyametsotso vevi aɖe wɔwɔ dze ŋgɔe.

Armeniatɔwo ƒe se bia be ɖekakpui ɖe sia ɖe si xɔ ƒe 18 la nawɔ asrafodɔ hena ɣeyiɣi aɖe. Ne wogbe la, woate ŋu ade wo mɔ va se ɖe ƒe etɔ̃. Togbɔ be Vahan di be yeasubɔ yeƒe dukɔmeviwo hã la, medi be yeawɔ nu si tsi tsitre ɖe eƒe dzitsinya si wòtsɔ Biblia na hehee la ŋu o. Eya ta nu kae wòwɔ?

Le ƒe 2001 me la, Vahan xɔ ƒe si dukɔa bia tso ame si be wòaxɔ hafi awɔ asrafodɔ, eye enumake ede asi lɛtawo ŋɔŋlɔ me na Armenia ƒe dziɖuɖumegãwo. Egblɔ le lɛtaawo me be asrafodɔwɔwɔ tsi tsitre ɖe yeƒe dzixɔsewo kple yeƒe dzitsinya ŋu. Egblɔ hã be yealɔ̃ faa awɔ dziɖuɖudɔ bubu si menye asrafodɔ o.

Le ƒe ɖeka kple edzivɔ me la, Vahan nɔ kukuɖeɖe dzi na dumegãwo be woagana yeawɔ asrafodɔ o, le esi yeƒe dzitsinya maɖe mɔ na ye o ta. Ke hã, le September 2002 me  la, wolée hetso enu be egbe asrafodɔwɔwɔ. Woka ɣleti 18 nɛ be wòatsɔ anɔ gaxɔ me. Ke hã, esia medze senyala amenutsola la ŋu o. Ɣleti ɖeka pɛ ko megbe la, amenutsolaa gatsɔ nyaa yi nyagbugbɔdrɔ̃ƒea bene woadzi Vahan ƒe gamenɔɣia ɖe edzi. Egblɔ be Vahan ƒe gbegbe be yemawɔ asrafodɔ o le yeƒe dzitsinya kple subɔsubɔ dzixɔsewo ta la “mele se nu o, eye ate ŋu agblẽ nu.” Nyagbugbɔdrɔ̃ƒea da asi ɖe amenutsolaa ƒe nyaa dzi, si wɔe be wodzi Vahan ƒe gamenɔɣia ɖe edzi va ɖo ɣleti 30.

Vahan tsɔ nyaa yi Armenia ƒe ʋɔnudrɔ̃ƒe kɔkɔtɔ be woagbugbɔ adrɔ̃. Le January 2003 me la, ʋɔnudrɔ̃ƒe kɔkɔtɔa (Court of Cassation) da asi ɖe nyagbugbɔdrɔ̃ƒea ƒe nyametsotsoa dzi. Enumake, woɖe Vahan yi gaxɔ si me amewulawo, atike vɔ̃ɖi zãlawo kple ame siwo dɔ ame gbɔ sesẽe le la me.

Tso ƒe 2001 mee Armenia va zu dukɔ siwo le Europa Aɖaŋudehaa me la dometɔ ɖeka. Eya ta gome le dukɔmeviawo si be woatsɔ nya ayi Europa Amegbetɔ Ƒe Gomenɔamesiwo Ŋuti Ʋɔnudrɔ̃ƒe nenye be womete ŋu drɔ̃ nyaa nyuie le dukɔa ƒe ʋɔnudrɔ̃ƒewo o. Vahan tso nya me be yeatsɔ nyaa ayi afi ma. Eʋli eɖokui ta be fɔbuʋɔnu si wodrɔ̃ ye ɖe yeƒe gbegbe be yemawɔ asrafodɔ o ta la nye dada le Europa Amegbetɔ Ƒe Gomenɔamesiwo Ŋuti Ðoɖo ƒe Se 9 lia dzi. Ebia be woalɔ̃ ɖe yeƒe nyametsotso be yemawɔ asrafodɔ o la dzi le ɖekawɔwɔ me kple se sia. Ke hã, ʋɔnudrɔ̃ƒea melɔ̃ ɖe nya sia dzi na ame aɖeke le ŋutinya me kpɔ o.

Le October 27, 2009 dzi la, Europa Ʋɔnudrɔ̃ƒea tso afia le nya sia ŋu. Ʋɔnudrɔ̃ƒea nɔ te ɖe ale si wotso afia le nya siawo tɔgbi ŋu va yi dzi gblɔ be Europatɔwo ƒe Gomenɔamesi Se 9 lia meɖe mɔ be ame nagbe asrafodɔwɔwɔ le eƒe dzitsinya ta o.

Le ɣemaɣi la, woɖe Vahan le gaxɔ me xoxo, eye wòɖe srɔ̃ dzi ŋutsuvi ɖeka gɔ̃ hã. Ale si wotso afiae la te ɖe Vahan dzi. Nu si wòagate ŋu awɔ koe nye be wòaɖe asi le nyaa ŋu loo alo be wòatsɔe ayi ɖe Europa Ʋɔnudrɔ̃ƒea ƒe Nyagbugbɔgadrɔ̃kɔmiti Gãtɔ. Etiae be yeatsɔe ayi nyagbugbɔdrɔ̃ƒea. Esi wònye nya tɔxɛwo koe Nyagbugbɔgadrɔ̃kɔmiti Gãtɔ drɔ̃na ta la, edzɔ dzi na Vahan be wolɔ̃ be yewoagadzro nyaa me.

Mlɔeba le July 7, 2011 dzi le Strasbourg, France la, Europa Ʋɔnudrɔ̃ƒea ƒe Nyagbugbɔgadrɔ̃kɔmiti Gãtɔ tso afia. Le ʋɔnudrɔ̃la 17 siwo dzro nyaa me dome la, wo dometɔ 16 sɔŋ tso afia be Armenia dziɖuɖua ƒe afiatsotsoa tsi tsitre ɖe gome si le Vahan Bayatyan  si be wòagbe asrafodɔ le dzitsinya ta la ŋu, eye ale si wobu fɔe hedee gaxɔ me la mele se nu o. Ʋɔnudrɔ̃laawo dometɔ si tso Armenia la koe mede Vahan dzi o.

Nu ka tae afiatsotso sia le vevie ɖo? Elabena esiae nye zi gbãtɔ si Europa Ʋɔnudrɔ̃ƒea lɔ̃ ɖe edzi be ne ame aɖe gbe asrafodɔwɔwɔ le eƒe dzitsinya ta la, metsi tsitre ɖe Ʋɔnudrɔ̃ƒea ƒe Se 9 lia ŋu o. Esia fia be ʋɔnudrɔ̃ƒea kpɔe be ne wode ame gaxɔ me le demokrasi dukɔ aɖe me le esi eƒe dzitsinya meɖe mɔ nɛ be wòawɔ asrafodɔ o ta la, enye tsitretsitsi ɖe amea ƒe gomenɔamesi ŋu.

Ʋɔnudrɔ̃ƒea gblɔ nya si gbɔna la tso ale si Yehowa Ðasefowo mewɔa asrafodɔ o le woƒe dzitsinya ta ŋu be: “Naneke meli si dzi Ʋɔnudrɔ̃ƒea anɔ te ɖo ake ɖi be menye ame sia ƒe subɔsubɔdzixɔse siwo le vevie nɛ, siwo ŋu mate ŋu aɖe asi le o tae wògbe be yemawɔ asrafodɔ ɖo o, eya ta edzi zizi be wòawɔ dɔ sia anye tsitretsitsi ɖe eƒe dzixɔse ŋu.”

Ƒe blaeve kple edzivɔwoe nye esia la, wode Yehowa Ðasefo siwo wu 450 gaxɔ me le Armenia le esi wogbe asrafodɔwɔwɔ ta. Le ɣeyiɣi si me míenɔ dɔ wɔm le nyati sia ŋu la, ɖekakpui 58 nɔ gaxɔ me le dukɔ sia me le esi woƒe dzitsinya kple subɔsubɔdzixɔsewo meɖe mɔ na wo be woawɔ asrafodɔ o ta. Wode ame siawo dometɔ atɔ̃ gaxɔ me le Bayatyan kple Armenia dziɖuɖua dome nyaa dɔdrɔ̃ vɔ megbe. a Le nya siawo dometɔ ɖeka drɔ̃ɣi la, ɖekakpui aɖe si gbe asrafodɔwɔwɔ le dzitsinya ta la bia be woate fli ɖe nya si wotsɔ ɖe ye ŋu le yeƒe asrafodɔmawɔmawɔ ta la me, gake amenutsolaa gbe. Amenutsolaa gblɔ le nya si wòŋlɔ tsɔ ɖo eŋui me be: “Afia si Europa Ʋɔnudrɔ̃ƒea tso le Bayatyan kple Armenia dome nyaa ŋu le July 7, 2011 dzi la medo ƒome kple nya sia o, elabena edze ƒãa be nɔnɔmeawo to vovo.”

Nu ka tae amenutsolaa se le eɖokui me nenema ɖo? Esime wotso Vahan Bayatyan nu la, ɖoɖo aɖeke menɔ anyi be ame nawɔ dziɖuɖudɔ bubu ɖe asrafodɔ teƒe o. Armenia dziɖuɖua gblɔ be se aɖe li fifia si ɖe mɔ ɖe dɔ bubuwo wɔwɔ ŋu, eya ta ame siwo medi be yewoawɔ asrafodɔ o la ate ŋu awɔ dziɖuɖudɔ bubu mawo. Ke hã, asrafoha la kee kpɔ ŋusẽ ɖe ɖoɖo ma dzi, eya ta mate ŋu aɖe vi na ame siwo si wole biabiam tso fifia be woawɔ asrafodɔ, gake wogbe, le esi woƒe dzitsinya meɖe mɔ na wo ta la dometɔ geɖe o.

Edzɔ dzi na Vahan Bayatyan be wotso afia na ye le ʋɔnudrɔ̃nya vevi sia me. Afiatsotso sia da agba ɖe Armenia dziɖuɖua dzi be wòadzudzɔ ame siwo ƒe subɔsubɔdzixɔsewo meɖe mɔ na wo be woawɔ asrafodɔ o la kpɔkplɔ yi ʋɔnui kple wo dede gaxɔ me.

Menye Yehowa Ðasefowo ƒe taɖodzinue nye be yewoatrɔ ʋɔnudrɔ̃ɖoɖowo le dukɔ aɖeke me o. Ke hã, abe ale si Vahan Bayatyan wɔe ene la, wodina be yewoawɔ gome siwo le yewo si le dukɔ siwo me wole ƒe sewo nu la ŋu dɔ. Nu ka tae? Elabena esia ana be woanɔ anyi le ŋutifafa me ahawɔ se siwo katã woƒe Kplɔla, Yesu Kristo, de na wo la dzi le ablɔɖe me.