Srɔ̃ Nu Tso Mawu Ƒe Nya La Me
Ðe Mawu Aɖo Xexea Me Katã Ƒe Dziɖuɖu Anyia?
Nyati sia dzro nyabiase siwo nànya nɔ ŋuɖoɖo dim na la me, eye afia wò afi si nàkpɔ ŋuɖoɖoawo le le wò Biblia me. Adzɔ dzi na Yehowa Ðasefowo be yewoadzro nyabiase siawo ƒe ŋuɖoɖowo me kpli wò.
1. Nu ka tae ameƒomea hiã na dziɖuɖu si aɖu xexea me katã dzi?
Egbea, ameƒomea ƒe kuxi akpa gãtɔ nyea xexea me godoo ƒe kuxiwo. Le dukɔ aɖewo me la, ame geɖe da ahe, eye wote wo ɖe anyi. Ke le dukɔ bubuwo me la, edze abe ame geɖewo kpɔ nu siwo hiã wo la wògbɔ edzi ene. Dziɖuɖu si kpɔ ŋusẽ ɖe xexe bliboa dzi la koe ate ŋu ama anyigbadzinuwo sɔsɔe ɖe ame sia ame nu.—Xlẽ Nyagblɔla 4:1; 8:9.
2. Ame kae dze be woatsɔ xexemedziɖuɖu ade asi na?
Ame geɖe madi be ame ɖeka ko nanye xexea me godoo dzi ɖula o, elabena ŋutsu alo nyɔnu aɖeke meli si ate ŋu aɖu xexea dzi nyuie o. Amegbetɔ aɖeke meli si ƒe nu adze ame sia ame ŋu o. Azɔ hã, ɖe amegbetɔ aɖe li si mate ŋu awɔ ŋusẽ ŋu dɔ le mɔ gbegblẽ nu oa? Amewo vɔ̃na be ne ame ɖeka le xexe bliboa dzi ɖum la, ate ŋu ava zu ŋutasẽdziɖula.—Xlẽ Lododowo 29:2; Yeremiya 10:23.
Yehowa Mawu tia Via, Yesu, be wòaɖu ameƒomea dzi tegbee. (Luka 1:32, 33) Yesu nɔ anyigba sia dzi kpɔ, eye wònya ale si nɔnɔmeawo le. Esime wònɔ anyigba dzi la, eda gbe le dɔnɔwo ŋu, efia nu ame fafawo, eye wòkpɔ vovo ɖe ɖeviwo ŋu. (Marko 1:40-42; 6:34; 10:13-16) Eya ta Yesue nye Dziɖula si dze.—Xlẽ Yohanes 1:14.
3. Ðe wòanya wɔ be xexemedziɖuɖu ɖeka ko nanɔ anyia?
Mawu tia Via be wòanye anyigba dzi ɖula si aɖu dzi tso dziƒo. (Daniel 7:13, 14) Abe ale si ko mehiã be dziɖula siwo nye amegbetɔwo nanɔ du sia du si le woƒe dziɖuɖu te me o ene la, mehiã be Yesu hã nanɔ anyigba dzi hafi ate ŋu aɖu ameƒomea dzi o.—Xlẽ Mateo 8:5-9, 13.
Ame sia amee abɔbɔ ɖe Yesu ƒe dziɖulanyenye tea? Ao. Ame siwo lɔ̃ nu nyui wɔwɔ la koe abɔbɔ ɖe ete. Dziɖula si Yehowa tia la nye nu dzɔdzɔe wɔla si lɔ̃a ame, eye Yehowa atsrɔ̃ ame siwo tsia tsitre ɖe eŋu la ɖa.—Xlẽ Mateo 25:31-33, 46.
4. Nu kae xexea me katã ƒe Dziɖulaa ava wɔ?
Abe ale si ko alẽkplɔla ƒoa eƒe alẽwo nu ƒui ene la, Yesu hã le ame fafawo nu ƒom ƒu tso dukɔwo katã me hele Mawu ƒe mɔwo fiam wo be woawɔ nu le lɔlɔ̃ me. (Yohanes 10:16; 13:34) Ame siawo va zua Yesu yomedzela dovevienuwo, siwo bɔbɔna ɖe eƒe dziɖuɖu te. (Psalmo 72:8; Mateo 4:19, 20) Le xexea me godoo la, Yesu tevi wɔnuteƒewo tsɔ nusɔsɔe le gbeƒã ɖemee be Yesu zu Fia.—Xlẽ Mateo 24:14.
Eteƒe madidi o, Yesu awɔ eƒe ŋusẽ ŋu dɔ atsɔ aɖe dziɖuɖu gblẽkuwo ɖa. Etia eyomedzela wɔnuteƒe aɖewo be woava ɖu fia kpli ye le dziƒo ɖe anyigba dzi. (Daniel 2:44; 7:27) Yesu ƒe Fiaɖuƒea ana Yehowa ŋuti sidzedze naxɔ anyigba dzi, eye wòagbugbɔ aɖo paradiso si tɔgbi nɔ anyi le gɔmedzedzea me la anyi.—Xlẽ Yesaya 11:3, 9; Mateo 19:28.
Ɖewohĩ Esia Hã Adzɔ Dzi Na Wò
GBETAKPƆXƆ
Nu Ka Tae Mawu Dɔ Yesu Ðe Anyigba Dzi Ðo?
Xlẽ nu tso nu si tae Yesu va anyigba dzi ɖo kple ale si wòagate ŋu aɖe vi na mí egbeae ŋu.
GBETAKPƆXƆ
Ðe Nàte Ŋu Anɔ Agbe Tegbeea?
Yehowa Mawu, Ame si gbɔ agbe dzɔ tso, la ate ŋu ana agbe mavɔ ame bubuwo, eye edo esia ƒe ŋugbe hã.
GBETAKPƆXƆ
