KRISTOTƆ miliɔn geɖe tiae be yewomaɖu Kristmas o. Aleke wosena le wo ɖokui me ɖe nyametsotso sia ŋu? Ðe wosena le wo ɖokui me be nane le yewo ŋu toma? Ðe wo viwo sena le wo ɖokui me be wole nane tem yewoa? De dzesi nu si Yehowa Ðasefo siwo tso xexea ƒe teƒe vovovowo la gblɔ tso nya sia ŋu.

Ŋkuɖoɖo Yesu Kristo dzi: “Hafi mava zu Yehowa Ðasefo la, ƒãa hafi medea sɔleme. Ne mayi gɔ̃ hã la, ke le Kristmas kple Easter ɖuɣiwo ko. Gake le ŋkeke mawo dzi gɔ̃ hã la, nye susu menɔa Yesu Kristo ŋu gobi ale o. Nyemegaɖua Kristmas o, ke hã medea Kristotɔwo ƒe kpekpewo zi eve le kwasiɖa me, eye mefiaa nu amewo tso nu si Biblia gblɔ tso Yesu ŋu gɔ̃ hã!”—EVE, AUSTRALIA.

Dzidzɔ si tsoa nunana me: “Evivia nunye nenye be amewo na num le ɣeyiɣi si me nyemele mɔ kpɔm nɛ o. Esia dzɔa dzi nam ŋutɔ! Nye hã medina be maŋlɔ agbalẽ ahata nuwo aɖo ɖe amewo, elabena esia nana wokpɔa dzidzɔ, eye wònana dzi dzɔa nye hã.”—REUBEN, NORTHERN IRELAND.

Kpekpeɖeŋunana ame siwo hiã tu: “Míelɔ̃a nuɖaɖa na ame siwo dze dɔ. Ɣeaɖewoɣi la, míetsɔa seƒoƒo, akpɔnɔvivi alo nunana sue aɖe vanɛ na wo. Esia wɔwɔ dzɔa dzi na mí, elabena mɔnukpɔkpɔ nɔa anyi be míawɔe le ƒea ƒe ɣeyiɣi ɖe sia ɖe me.”—EMILY, AUSTRALIA.

Ƒomea ƒe ɖekawɔwɔ: “Ne mía kple míaƒe ƒometɔwo míeƒo ƒu ɖekae la, mía viwo nyaa wo dzilawo nɔviwo, wo mamawo kple wo tɔgbuiwo kpakple ƒometɔ bubuwo nyuie le dziɖeɖi me. Míawo ŋutɔwoe tsona le mía ɖokui si srãa míaƒe ƒometɔwo kpɔna, ke menye le esi azãɖuɣi ɖo tae o, eye woawo hã wonyae be esi míelɔ̃ yewo tae míesrãa yewo kpɔna ɖo.”—WENDY, CAYMAN ISLANDS.

Ŋutifafa: “Vovo menɔa amewo ŋu le Kristmas ɖuɣiwo kura o, si wɔnɛ be ame geɖe ƒe susu menɔa ŋutifafawɔwɔ ŋu o. Menya ŋugbe si Biblia do ku ɖe amegbetɔwo ƒe etsɔme ŋu; nye dzi dze eme. Menya be etsɔme nyui aɖe le ŋgɔ na vinyewo.”—SANDRA, SPAIN.