Le Yesu ƒe Todzimawunyaa me la, egblɔ na eyomedzelawo be: “Miawoe nye anyigba ƒe dze; ke ne dze bu eƒe ŋusẽ ɖe, nu kae woawɔ nɛ be wòagatrɔ azu dze? Womagate ŋu azãe na naneke o, ɖeko woatsɔe aƒu gbe ɖe xexe be amewo nazɔ edzi.” (Mateo 5:13) Dze kpɔa nuɖuɖu ta be wòagagblẽ o. Eya ta anɔ eme be Yesu ƒe nyawo fia be yeƒe nusrɔ̃lawo ate ŋu akpɔ amewo ta be woaganye nu gbegblẽ wɔlawo kple ame mavɔ̃mawuwo o, eye ele be woawɔe hã.

Ke hã, numekugbalẽ aɖe (The International Standard Bible Encyclopedia) gblɔ ku ɖe nya si Yesu gblɔ tso ale si dze bua eƒe ŋusẽe ŋu be: “Anyigbamenuwo tsakana kple dze si woɖena le Ƒu Kukua ƒe nutowo me la zi geɖe; eya ta ne dzea nyi la, anyigbamenua, si me vivi aɖeke mele o la koe tsia anyi.” Eya ta eme kɔ be Yesu gblɔ tso nu si tsia anyi la ŋu be “womagate ŋu azãe na naneke o, ɖeko woatsɔe aƒu gbe ɖe xexe.” Numekugbalẽa gblɔ kpee be, “Togbɔ be dze si tso Ƒu Kukua me la ƒe nyonyome mede esi woɖena tsoa ƒu bubuwo me nu o, le anyigbamenuawo ta hã la, ekpɔkpɔ mesesẽ o, (wokpɔnɛ le ƒua ta lɔna bɔbɔe) eya ta eya koŋue wozãna le Palestina.”

Yesu wɔ kpɔɖeŋu aɖe si me wògblɔ le be draxma gaku ewo nɔ nyɔnu aɖe si, ke esi ɖeka bu la, esi akaɖi, eye wòkplɔ eƒe xɔ me nyuie va se ɖe esime wòkpɔe. (Luka 15:8-10) Le Yesu ŋɔli la, draxma la ade ŋkeke ɖeka ƒe fetu kloe, eya ta kpekpeme le ga si ŋu Yesu ƒo nu tsoe le eƒe kpɔɖeŋua me la ŋu. Gake susu bubuwo hã li si tae Yesu ƒe kpɔɖeŋua sɔ ɖo.

Numekugbalẽ aɖewo gblɔ be gakuwo nyea atsyɔ̃ɖonu na nyɔnuwo zi geɖe le ɣemaɣi. Ðewohĩ gaku si Yesu wɔnɛ le eƒe kpɔɖeŋua me la nye ƒomea ƒe kesinɔnu vevi si dome nyɔnua nyi alo be enɔ nu siwo wotsɔ bia eta la dome. Aleke kee wòɖale o, eme kɔ ƒãa be nyɔnua atsi dzi vevie be yeake ɖe yeƒe gaku ewoawo dometɔ ɖeka si bu la ŋu.

Gawu la, le Yesu ŋɔli la, wotrɔa asi le aƒe siwo me dumevi dzrowo nɔna la ŋu be dzogbɔgbɔ kple kekeli nagage ɖe eme o. Ne fesrewo le woƒe xɔwo ŋu gɔ̃ hã la, wonɔna ʋɛ. Zi geɖe la, woɖoa gbe ƒuƒuwo ɖe anyigba le xɔawo me. Ne gaku ge ɖe anyigba la, ekpɔkpɔ asesẽ. Eya ta Biblia ŋuti numeɖela aɖe gblɔ be: “Ne nu sue aɖe, abe gaku ene bu le xɔ siawo tɔgbi me la, nu si ko wòle be ame nawɔ hafi akpɔe ye nye be wòasi akaɖi ahakplɔ xɔa me.”