Ðokuibɔbɔ nye nɔnɔme si nɔa ame si, si wɔnɛ be medoa eɖokui ɖe dzi o. Ðokuibɔbɔla mesusunɛ be yenyo wu ame bubuwo o. Ele be ame madeblibo ɖe sia ɖe si bɔbɔ eɖokui la nalɔ̃ ɖe edzi hã be seɖoƒe li na yeƒe ŋutete.

Mose medo eɖokui ɖe dzi le ɖoƒe si su esi ta o. Zi geɖe la, ne ɖoƒe vi aɖe su ame si la, edzena enumake ne amea nye ɖokuibɔbɔla loo alo ame si doa eɖokui ɖe dzi. Esia tae ƒe alafa wuiasiekelia me agbalẽŋlɔla Robert G. Ingersoll gblɔ be: “Ame geɖewo tea ŋu nɔa te ɖe nɔnɔme sesẽwo nu. Gake ne èdi be yeanya ale si tututu ame aɖe le la, tsɔe ɖo ŋusẽnɔƒe aɖe.” Le go sia me la, Mose ɖo kpɔɖeŋu nyui aɖe ɖi. Le mɔ ka nu?

Ðoƒe kɔkɔ su Mose si, elabena Yehowa tsɔe ɖo Israel-viwo kplɔlae. Ke hã, Mose medo eɖokui ɖe dzi gbeɖe le ɖoƒe ma ta o. Le kpɔɖeŋu me, bu ale si wòɖee fia be yenya afi si yeƒe ŋutete se ɖo la le ale si wòkpɔ nya sesẽ aɖe si fɔ ɖe te ku ɖe domenyinyi ŋu gbɔe me la ŋu kpɔ. (4 Mose 27:1-11) Nya gã aɖee wònye, elabena ale si woatso nya ma mee la anye nu si dzi woanɔ te ɖo akpɔ nya mawo tɔgbi gbɔ le etsɔme.

Aleke Mose awɔ nui? Ðe wòasusui be esi yenye Israel-viwo kplɔla ta la, yedze atso nya me le nya ma ŋua? Ðe wòanɔ te ɖe eƒe dzɔdzɔmeŋutete, agbemenuteƒekpɔkpɔ, alo nu si gbegbe wònya tso ale si Yehowa bua nuwo ŋui la dzi atso nya mea?

Ðewohĩ nenemae ame si doa eɖokui ɖe dzi la awɔ nui. Gake Mose ya mewɔ nu nenema o. Biblia gblɔ na mí be: “Mose tsɔ woƒe nya la va Yehowa ŋku me.” (4 Mose 27:5) Bu eŋu kpɔ ko! Le ƒe 40 siwo Mose tsɔ kplɔ Israel-viwo megbe gɔ̃ hã la, meɖo ŋu ɖe eɖokui ŋu o, ke boŋ ɖe Yehowa ŋu. Esia na míekpɔ ale si gbegbe Mose bɔbɔ eɖokuii.

Mose mebui be ye ɖeka koe dze anɔ ŋusẽnɔƒe o. Dzi dzɔe esi Yehowa na Israel-vi bubuwo hã va nye nyagblɔɖilawo. (4 Mose 11:24-29) Esi Mose ƒe to, Yetro, ɖo aɖaŋu nɛ be wòana ame bubuwo nakpe ɖe eŋu la, Mose bɔbɔ eɖokui wɔ ɖe aɖaŋuɖoɖoa dzi. (2 Mose 18:13-24) Eye togbɔ be ŋusẽ kpɔtɔ nɔ Mose ŋu le eƒe agbenɔƒe mamlɛawo me hã la, ebia be Yehowa natia ame bubu si ava xɔ ɖe ye teƒe. Esi Yehowa tia Yosua la, Mose lɔ̃ faa kpe asi ɖe Yosua ŋu, togbɔ be Mose nye xoxo nɛ hã, eye wòde dzi ƒo na dukɔa be woadze Yosua yome ayi Ŋugbedodonyigbaa dzi. (4 Mose 27:15-18; 5 Mose 31:3-6; 34:7) Ðikeke mele eme o be Mose bui be enye mɔnukpɔkpɔ na ye be yeaxɔ ŋgɔ na Israel-viwo le tadedeagu me. Ke hã, ame bubuwo ƒe nyonyo nɔ vevie nɛ wu ɖoƒe si akpɔtɔ anɔ esi.

Míadi gbeɖe be ŋusẽ, ɖoƒe, alo dzɔdzɔmeŋutetewo nana míado mía ɖokui ɖe dzi o. Ðo ŋku edzi be, be míanye ŋudɔwɔnuwo na Yehowa la, míaƒe ɖokuibɔbɔ le vevie wu míaƒe ŋutetewo. (1 Samuel 15:17) Ne míebɔbɔa mía ɖokuiwo vavã la, míadze agbagba awɔ ɖe Biblia ƒe aɖaŋuɖoɖo nyui sia dzi be: “Ðo ŋu ɖe Yehowa ŋu tso dzi blibo me, ke mègaɖo dzi ɖe wò gɔmesese ŋu o.”—Lododowo 3:5, 6.

Mose ƒe kpɔɖeŋua fia mí hã be mele be míabu ɖoƒe alo ŋusẽnɔƒe si le mía si la nu vevi akpa o.

Ðe ɖokuibɔbɔ ƒe kpɔɖeŋu si Mose ɖo ɖi la sɔsrɔ̃ aɖe vi na mía? Ɛ̃, aɖe vi na mí godoo! Ne míebɔbɔa mía ɖokui ɖe anyi le dzi me la, míenana agbea nɔa bɔbɔe na ame siwo dome míele, eye míaƒe nu nyoa wo ŋu. Gawu la, míaƒe nu nyoa Yehowa Mawu, ame si ŋutɔ hã ɖea nɔnɔme nyui sia fiana la ŋu. (Psalmo 18:36) “Mawu tsia tsitre ɖe ɖokuidoɖedzilawo ŋu, gake evea ɖokuibɔbɔlawo nu.” (1 Petro 5:5) Ðe esia menye susu vevi aɖe si tae wòle be míasrɔ̃ Mose ƒe ɖokuibɔbɔ ɖo oa?