Dzɔdzɔmenuwo kpɔkpɔ doa dzidzɔ nam tso ɖevime ke. Míaƒe ƒomea ɖia tsa yia teƒe dzeaniwo zi geɖe, abe ave kple tɔsisi siwo ƒo xlã mía dedu Jyväskylä, si le Titina Finland la, to ene. Azɔ hã, lãwo ƒe nu doa dzidzɔ nam. Esi menɔ ɖevime la, medina be makɔ dadi kple avu ɖe sia ɖe si medo goe la ɖe akɔ. Esi meva tsi la, etena ɖe dzinye ne mekpɔ ale si amewo sẽa ŋuta le lãwo ŋui. Emegbe la, meva ge ɖe habɔbɔ aɖe si ʋlia lãwo ƒe gomenɔamesi ta la me, afi si medo go ame siwo ƒe susu sɔ kple tɔnye le.

Míaƒe ŋku biã ɖe lãwo ƒe gomenɔamesi taʋiʋli ŋu vevie. Míeɖia tsa maa agbalẽviwo eye míewɔ ɖoɖo lɔa gbɔ tsɔ tsia tsitre ɖe lãgbalẽdzralawo kple dzɔdzɔmeŋutinunyala siwo wua lãwo tsɔ wɔa numekukui la ŋu. Míeva ɖo habɔbɔ yeye aɖe hã hena lãwo ƒe dedienɔnɔ takpɔkpɔ. Esi wònye míetoa akpasesẽnuwɔnawo dzi be míaɖo míaƒe taɖodzinuwo gbɔ ta la, míeɖoa nya me le setɔwo gbɔ zi geɖe. Wolém hekplɔm yi ʋɔnu enuenu.

Tsɔ kpe ɖe dzitsitsi ɖe lãawo ƒe dedienɔnɔ ŋu ŋuti la, kuxi bubu siwo le xexea me hã ɖea fu nam vevie. Esia wɔe be meva ge ɖe dukɔwo dome habɔbɔ vovovowo, abe Amnesty International kple Greenpeace ene, me. Mezã nye ŋusẽ katã tsɔ do alɔ habɔbɔ siawo. Meʋlia ame dahewo, dɔwuitɔwo kple wɔnamanɔŋutɔwo ta.

Gake meva kpɔe be nyemate ŋu atrɔ xexea me o. Togbɔ be habɔbɔ siawo dze agbagba kpɔ kuxi suesuesue aɖewo gbɔ hã la, kuxi gãtɔwo ya gakpɔtɔ li, eye wole gã dom ɖe edzi. Ðeko wòdze abe vɔ̃ɖinyenye xɔ xexe bliboa katã me eye ame aɖeke metsɔ ɖeke le naneke me o ene. Mekpɔe be naneke meli mate ŋu awɔ o.

Ete ɖe dzinye be nyemete ŋu wɔ naneke tsɔ ɖɔ xexea ɖo o, eye esia na meva dze tamebubu tso Mawu kple Biblia ŋu. Yehowa Ðasefowo srɔ̃ Biblia kplim kpɔ. Togbɔ be mekpɔ ŋudzedze ɖe Yehowa  Ðasefowo ƒe dɔmenyo kple ale si wotsɔ ɖe le eme nam ŋu hã la, nyemedi be matrɔ nye agbenɔnɔ ɣemaɣi o. Gake fifia ya, mele klalo be mawɔ tɔtrɔ.

Mehe nye Biblia ɖe go azɔ, eye mexlẽnɛ edziedzi. Nu siwo mexlẽ fa akɔ nam ŋutɔ. Meke ɖe mawunyakpukpui geɖe siwo gblɔ be ele be woalé be na lãwo la ŋu. Le kpɔɖeŋu me, Lododowo 12:10 gblɔ be: “Ame dzɔdzɔe léa be na eƒe lãwo.” (Agbenya La) Meva se egɔme hã be menye Mawu gbɔe kuxi siwo le xexea me tso o. Ke boŋ esi ame akpa gãtɔ mewɔna ɖe eƒe mɔfiamewo dzi o tae míaƒe kuxiwo le dzidzim ɖe edzi. Nu siwo mesrɔ̃ tso Yehowa ƒe lɔlɔ̃ kple dzigbɔgbɔ blewu ŋu la de dzi gbɔ nam ŋutɔ.—Psalmo 103:8-14.

Le ɣeyiɣi mawo lɔƒo me la, mexlẽ nu tso Nuka Tututue Nye Biblia ƒe Nufiafia? gbalẽa ŋu eye mekpe agbalẽvi ɖo hebia be woaɖo ɖeka ɖem. Eteƒe medidi o Ðasefo atsu kple asi aɖe va nye aƒe me hedo Biblia nusɔsrɔ̃ ɖe gbɔnye, eye melɔ̃. Medze Ðasefowo ƒe kpekpewo dede le Fiaɖuƒe Akpata me. Ale Biblia me nyateƒea dze gege ɖe nye dzi me.

Biblia kpe ɖe ŋunye mewɔ tɔtrɔ geɖe. Medzudzɔ atama kple aha tsu nono. Metrɔ asi le nye dzedzeme ŋu eye medzudzɔ nya madzetowo gbɔgblɔ. Nyemegadzea aglã ɖe setɔwo ŋu hã o. (Romatɔwo 13:1) Meva dzudzɔ gbɔdɔdɔ ƒe agbe gbegblẽ nɔnɔ hã, nu si me meƒo ɖokuinye ɖo vĩi tsã.

Tɔtrɔwɔwɔ si sesẽ nam wue nye ale si mawɔ ado go le habɔbɔ siwo me mege ɖo la me. Menɔ bɔbɔe nam kura o. Gbãa, mesusui be ne medo le habɔbɔ mawo me la, ke efia be nyemewɔ nuteƒe na wo o. Gake meva kpɔe be Mawu Fiaɖuƒea koe akpɔ xexea ƒe kuxiwo gbɔ. Metso nya me be matsɔ nye ŋusẽ katã ado alɔ Fiaɖuƒe ma ahakpe ɖe ame bubuwo ŋu be woasrɔ̃ nu tso eŋu.—Mateo 6:33.

Dɔ si mewɔ tsã abe gomenɔamesitaʋlila ene la na mede mama amewo me—mebua ame aɖewo be wonye ame nyuiwo, ɖewo be wonye ame baɖawo—eye menɔa klalo be matu nu kple ame siwo mebuna be wonye ame baɖawo. Gake Biblia sɔsrɔ̃ kpe ɖe ŋunye medzudzɔ fuléle amewo. Fifia, abe Kristotɔ ene la, medzea agbagba lɔ̃a ame sia ame. (Mateo 5:44) Mɔ siwo nu meɖea lɔlɔ̃ sia fiana le dometɔ ɖekae nye Mawu Fiaɖuƒea ŋuti nya nyuia gbɔgblɔ na amewo. Dzidzɔe wònye nam be mele gome kpɔm le dɔ nyui sia si le kpekpem ɖe amewo ŋu be ŋutifafa, dzidzɔ, kple mɔkpɔkpɔ vavã nasu wo si la me.

Nye susu me dze akɔ anyi azɔ le esi menya be Yehowa koe ate ŋu aɖɔ nuwo ɖo ta. Meka ɖe edzi be esi eyae nye Wɔla la ta la, maɖe mɔ amegbetɔwo nayi edzi asẽ ŋuta le lãwo kple wo nɔvi amegbetɔwo ŋu alo agblẽ míaƒe anyigba dzeani sia dome gbeɖe o. Ke boŋ eteƒe madidi o, ato eƒe Fiaɖuƒea dzi aɖɔ nu sia nu ɖo. (Yesaya 11:1-9) Dzidzɔ gã aɖe ŋutɔe wònye nam be menya nyateƒenya siawo hele kpekpem ɖe ame bubuwo ŋu be woawo hã woaxɔ edzi ase. Fifia nyemegasena le ɖokuinye me be ele be matrɔ xexea me o.