Nunana ka ƒomevi ŋue nàkpɔ ŋudzedze ɖo wu? Ðikeke mele eme o be mía dometɔ akpa gãtɔ akpɔ dzidzɔ ɖe nunana si lɔlɔ̃ ʋã nunalaa wòna mí la ŋu tsɔ wu esi nunalaa se le eɖokui me be wobia tso ye si be yeana nu ko tae wòna mí ɖo. Susu si ta wona nua ɖo la le vevie. Ele vevie na mí. Eye esi gale vevie wue nye be, ele vevie na Mawu hã. Bu nya si apostolo Paulo gblɔ le 2 Korintotɔwo 9:7 ŋu kpɔ.

Nu ka tae Paulo ŋlɔ nya mawo ɖo? Edi be yeade dzi ƒo na Kristotɔ siwo nɔ Korinto la be woakpe asi ɖe kpekpeɖeŋunadɔ si wɔm wonɔ be woatsɔ akpɔ woƒe haxɔsetɔ siwo hiã tu le Yudea la ƒe nuhiahiãwo gbɔ la ŋu. Ðe wòdze agbagba be yeaƒoe ɖe Korintotɔwo nu be woana nua? Ao, ke boŋ eŋlɔ bena: “Ame sia ame newɔ abe ale si wòɖo le eƒe dzi me ene, menye kple veve alo dzizizi o, elabena ame si naa nu kple dzidzɔ lae Mawu lɔ̃na.” Na míadzro dzideƒonya sia me nyuie kpɔ.

“Abe ale si wòɖo le eƒe dzi me ene.” Le Paulo ƒe nya nu la, Kristotɔ vavã naa nu le esi wòɖoe “le eƒe dzi me” be yeawɔe nenema ta. Azɔ hã, Kristotɔ bua eƒe haxɔsetɔwo ƒe hiahiãwo ŋu vevie. Agbalẽnyala aɖe gblɔ be le gbe si me woŋlɔ nya sia ɖo gbã ƒe nya nu la, nyagbe “wòɖo” fia “nu si ŋu wobu do ŋgɔ.” Eya ta Kristotɔ dea ŋugble le haxɔsetɔwo ƒe hiahiãwo ŋu hebiaa eɖokui be nu kae yeate ŋu awɔ atsɔ akpe ɖe wo ŋui hã.—1 Yohanes 3:17.

“Menye kple veve alo dzizizi o.” Paulo he susu yi nunana ƒomevi eve siwo wòle be Kristotɔwo naƒo asa na la dzi—woawoe nye nu si wona kple vevesese alo dzizizi. Helagbe me nya si gɔme woɖe be “kple veve” la ƒe gɔmeɖeɖe le nyaa ŋutɔŋutɔ nu fia “kple blanuiléle (alo, kple nuxaxa).” Agbalẽ aɖe ɖe eme be nunala si se veve alo xa nu le nu si nam wòle ŋu la “xaa nu le dzi me le esi wòle asi ɖem le eƒe ga ŋu ta.” Ame si naa nu kple dzizizi la naa nu le esi woƒoe ɖe enu be wòana nu ta. Mía dometɔ kae adi be nunala si se veve ɖe nu si nam wòle ta alo nunala si nu woƒo nya ɖo la nana nu ye?

“Ame si naa nu kple dzidzɔ lae Mawu lɔ̃na.” Paulo gblɔ be ne Kristotɔ tso nya me be yeana nu la, ele be wòana nua kple dzidzɔ. Le nyateƒe me la, ne susu nyui ye le ame aɖe si hafi wòna nu la, akpɔ dzidzɔ godoo. (Dɔwɔwɔwo 20:35) Dzidzɔ ɖea dzesi le ame si naa nu kple dzidzɔ la ŋu. Le nyateƒe me la, gɔmesese si le nya “dzidzɔ” ŋu la ate ŋu afia nunalaa ƒe seselelãme kpakple ale si wòɖenɛ fiana la siaa. Ame si naa nu kple dzidzɔ la ƒe nu nyoa mía ŋu. Edoa dzidzɔ na Mawu hã ƒe dzi. Biblia gɔmeɖeɖe bubu gblɔ be: “Mawu lɔ̃a ame siwo lɔ̃a nunana.”—Contemporary English Version.

Mɔfiame vevi aɖee nya si Mawu ƒe gbɔgbɔ ʋã apostolo Paulo wòŋlɔ la nye na Kristotɔwo ku ɖe nunana ŋu. Míeɖale míaƒe ɣeyiɣi alo ŋusẽ zãm alo le nu nam o, mina míawɔe tso dzi me faa le esi wònye dzidzɔ na mí vavã be míana nu ame bubuwo, vevietɔ ame siwo le hiã me la ta. Menye ɖeko nunana alea ana míakpɔ dzidzɔ ko o, ke ana míaƒe nu nanyo Mawu ŋu hã, elabena “ame si naa nu kple dzidzɔ lae Mawu lɔ̃na.”