Mawu nye gbɔgbɔ si ŋku mate ŋu akpɔ o. Eyae wɔ dziƒo kple anyigba kpakple nu gbagbewo katã. Womewɔ Mawu o, eye gɔmedzedze hã meli nɛ o. (Psalmo 90:2) Mawu di be amewo nadi ye ahanya nyateƒea tso ye ŋu.—Xlẽ Dɔwɔwɔwo 17:24-27.

Mawu nye ame ŋutɔŋutɔ si si ŋkɔ le. Ne míede ŋugble le nu siwo wòwɔ ŋu la, míakpɔ nɔnɔme siwo le esi la dometɔ aɖewo adze sii. (Romatɔwo 1:20) Gake ele be míasrɔ̃ Mawu ƒe Nya, Biblia la, hafi ate ŋu adze sii nyuie. Biblia ɖea Mawu ƒe nɔnɔme lédzinameawo fiaa mí.—Xlẽ Psalmo 103:7-10.

Yehowa, mía Wɔla la, lé fu nu madzɔmadzɔ wɔwɔ. Ewɔ amegbetɔwo ɖe eƒe nɔnɔme nu. (5 Mose 25:16) Esia tae mía dometɔ akpa gãtɔ lé fu nu madzɔmadzɔ wɔwɔ ɖo. Nu madzɔmadzɔ siwo teƒe kpɔm míele la metso Mawu gbɔ o. Mawu na tiatiawɔwɔ ƒe ablɔɖe amegbetɔwo. Gake nublanuitɔe la, ame geɖe wɔa woƒe ablɔɖea ŋu dɔ le mɔ gbegblẽ nu hewɔa nu madzɔmadzɔ. Esia ɖua dzi na Yehowa.—Xlẽ 1 Mose 6:5, 6; 5 Mose 32:4, 5.

Yehowa lɔ̃a dzɔdzɔenyenye, eye maɖe mɔ ɖe madzɔmadzɔnyenye ŋu tegbee o. (Psalmo 37:28, 29) Biblia do ŋugbe be eteƒe madidi o, Mawu ana nu madzɔmadzɔ wɔwɔ nu nayi keŋkeŋ.—Xlẽ 2 Petro 3:7-9, 13.